Pi Tang Nib Beech ni Fan ko Liyor Rodad!

¹ U nap’an fare muulung ni tay e Watch Tower Bible and Tract Society of Pennsylvania ko October 4, 2014 ma kan yarmiy ni ngan thilyeg boch ban’en ko pi tang rodad. Ireram reb e ban’en nrib gel e felfelan’ riy! Gubin e pi walag ni kar rung’aged murung’agen e re n’ey e kan puguran ngorad uw feni ga’ fan e pi tang ni gad ma yon’ u nap’an e liyor rodad ngak Jehovah.​—Ps. 96:2.

² Sana ga ra lemnag ko, ‘Mang fan nib t’uf ni ngan thilyeg boch ban’en ko pi tang rodad?’ Boor i fan ni ngan rin’ e re n’ey. Bin som’on e be tamilang i yan boch ban’en ni gad be nang fan ko pi thin nu Bible, ma bochan e re nem ma aram fan nrayog ni nge thilthil e pi thin ko fapi tang. (Prov. 4:18) Yugu reb i fan nib t’uf ni ngan thilyeg e pi tang rodad e bochan ni: Boor yu bugithin riy ni kan fek ko ken som’on e Bible ni New World Translation. Machane bochan ni kan fal’eg e ken nib beech e Bible ni New World Translation e ngiyal’ ney ma aram fan nib t’uf ni ngan thilyeg fapi thin ko tang ya nge yag ni nge puluw ngay. Bochan ni boor e maruwel ni bay ni ngan rin’ ni fan ko pi tang rodad, ma aram e kan dugliy ni ku bay in e tang ni ku yira uneg ko tin ni ka bay e tang.

³ Gur, thingar da songad ni nga fini fal’eg e tin nib beech e tang, ma fin aram e rayog ni nga don’ed? Danga’. Gamad be felfelan’ ni nggu weliyed ngomed ni u lan e pi pul nra yib e bay boch e tang nib beech nrayog ni ngan guy ko fare Web site rodad ni jw.org. Faanra bay reb e tang nib beech ni kan fal’eg nni thin rom ma ireram e re tang ni yira tay ko fare schedule ko Service Meeting ni yira tamilangnag riy ni “bin nib beech e tang” ni yira yon’ ko tomur.

⁴ Rogon ni Ngan Fil e Pi Tang nib Beech: Dabisiy nib mo’maw’ ni ngan fil reb e tang nib beech. Bod rogon ni yog fare psalmist ni gaar: “Dab gu th’ab gulungag.” Ere, gad baadag ni ngad uned i yon’ e pi tang u nap’an e pi muulung rodad. (Ps. 30:12, BT) Faanra ngam fil reb e tang nib beech, ma baaray boch ban’en nrayog ni ngam rin’.

• Ngaum par ma ga be motoyil ko fare piano recording ni bay ko Web site rodad. Ra um motoyil ni gubin ngiyal’ ko musik riy, ma aram e ra mom ni nge mit fare tang ngom.

• Mu fal’eg i fil e thin ko fare tang, mag gay rogon ni nge mit e thin riy ngom.

• Mu cheleg fare musik ma ga un ko tang. Mu rin’ e re n’ey nge mada’ ko ngiyal’ ni ke mit fare tang ngom.

• Nap’an e Fol Bible ni Tabinaw, mag guy rogon ni nga mon’ed chon e tabinaw rom boch fapi tang nib beech nge mada’ ko ngiyal’ ni ke mit ngorad.

⁵ U nap’an e tin ni bay yib e pul nga m’on ma bay reb e tang nib beech ni yira motoyil ngay u tomuren fare Service Meeting, ma taab yay ni nge motoyil girdien e ulung ko fare piano recording riy. Ma aram mi yad un i yon’ ni bod ni yima rin’ ko tin ni ka bay e tang.

⁶ Faan ga ra fal’eg i lemnag e re n’ey ma aram e ngiyal’ ni gadad ma tang u taabang u fithik’ e felfelan’ ni gad be pining e sorok ngak Jehovah. Ere, susun ni dab ud chuwgad u tagil’dad ni yugu dariy fan u nap’an ni yibe yon’ e tang ko pi muulung ko Kristiano.

⁷ Ku bay yugu reb e kanawo’ nrayog ni ngad daged nib ga’ fan e pi tang ni gad ma yon’. U nap’an e pi assembly nge convention ma yima cheleg e musik u m’on ni nge tabab e muulung. Boch e pi walag ko ulung ni kar bad u ga’ngin yang u fayleng e yad e yad ma pi’ puluwrad ni nga ranod nga Patterson, New York ni l’agruw yay u reb e duw ya nge yag ni ngar fal’eged e musik ni fan ko liyor rodad ngak Jehovah. Ere, nap’an nra yog fare chairman ni ngad pired nga tagil’dad ngad motoyilgad ko musik, mab t’uf ni ngan rin’. Gadad ra rin’ e re n’ey ma rayog ni ngad fal’eged rogodad ni fan ko pi n’en ni yira weliy u nap’an e muulung.​—Ezra 7:10.

⁸ Kenggin reb fapi tang nib beech e “The Kingdom Is in Place​—Let It Come!” Ireray e re tang ni kan cheleg u nap’an fare muulung ni tay e Watch Tower Bible and Tract Society of Pennsylvania ma re tang ney e ni fal’eg ni fan ko re duw ney ni ke gaman raay e duw ni ke gagiyeg Gil’ilungun Got.

⁹ Pi tang nib beech e riyul’ ni boch ban’en “nib fel’” ni ke yib rok Jehovah. (Matt. 12:35a) Ere, thingar da dugliyed u lanin’dad ni ngad filed e pi tang ya nge yag ni mit ngodad, ma gad tang ni be yib u gum’ircha’dad ni gad be tay fan min pining e sorok ngak Got!​—Ps. 147:1.