Ga Be Fal’eg Rogom ni Fan ko Puguran, Fa?

Rofen nem e rorran ni Nisan 13 ko duw ni 33 C.E. Ma manang Jesus ni ireram e bin tomur e nep’ ni yad ra chag pi gachalpen nga taabang u m’on ni yira li’ nge yim’. Maku aram e rofen ni nge un pi gachalpen i madnomnag e bin tomur e Paluk’af ma aram mar tababnaged e bin nib beech e madnom ni aram fare Abich ni Blayal’ rok Somol. Ere ba t’uf ni ngan rin’ boch ban’en ni fan ko re madnom ney. I l’og Jesus Peter nge John ni ngar fal’egew boch ban’en ni fan ko re madnom nem. (Luke 22:7-13) Ere, gubin e duw ni ma fal’eg urngin e Kristiano rogorad ya nge yag ni ngar uned i madnomnag fare Puguran. (Luke 22:19) Ere, mang boch ban’en ni thingar da rin’ed ya nge yag ni ngad fal’eged rogodad u m’on ko fare Puguran nra yan i aw ko April 3?

Pi N’en ni Nge Rin’ e Piin Piilal u M’on ko fare Madnom:

Ngan yarmiy e gin ni yira tay e re muulung ney riy ni bod rogon u Kingdom Hall ara yugu bang ni yibe lemnag ni ir e ba fel’. Fa gin’en ni kan dugliy ni ngan tay e re madnom nem riy e susun nib gaman e chiya riy, mab fel’ rogon e magal riy, maku bay e aircon ara fan riy ya nge dabi yim’ e girdi’ ko gowel. Maku ba t’uf ni ngan klinnag e gin’em u m’on ko rofen ni Puguran.
Ngan dugliy e en nra pi’ fare welthin, nge chairman, nge pi walag ni yad ra fek e meybil ni fan ko fare flowa nge fare wain.
Faanra gathi kemus ni taareb e muulung e yira tay ko fare Kingdom Hall ara gin ni kan mel’eg ni ngan fanay ni fan ko fare madnom mab t’uf ni ngan yarmiy e tayim ni ir e nge tabab reb e muulung nge reb.
Ngan mel’eg e piin ni yad ra ayuweg e girdi’ ni ngar uned ko re madnom nem ni nge yag ni ngar nanged e gin ni ngar pared riy ma ngkun dugliy ko chon mini’ e yad ra pi’ fare wain nge fare flowa.
Ngan yarmiy e pi n’en ni yira fanay u nap’an e re muulung ney ni bod rogon fare flowa nge fare wain, nge plet ni yira tay e flowa ngay, nge kap ko fare wain, nge reb e tebel, nge bang e mad ni ngan tay nga daken e re tebel nem.

Pi N’en ni Nge Rin’ e Pi Walag u M’on ko fare Madnom:

Ngam yarmiy e tayim rom ya nge yag ni ngam un i wereg e pi invitation ni fan ko Puguran.
Ngan yoloy fithingan e girdi’ nrayog ni ngan piningrad ni ngar uned ko re madnom ney ni bod rogon e piin ni yad ma un ko fol Bible, nge girdi’ rodad, nge piin ni gadad nga skul ara maruwel, nge pi tafager rodad.
Ngam beeg mag fal’eg i lemnag e pi thin nu Bible ni gad ma beeg ni fan ko Puguran.
Ra taw ko rofen nem ma gab ni kam fal’eg rogom ni ngam mada’gad e piin ni yad ra yib ni ngar uned ko re muulung ney.