“Ri Dab Mu Paged Talin e Pi Thin Ney”

Piin gallabthir e yad bod e piin ni yad ma gafaliy e saf. Ba t’uf ni ngar ayuweged pi fakrad nib fel’ rogon ya ba mom ni ngar maloggad, maku rayog ni nge bannagrad Satan. (Prov. 27:23) Uw rogon nrayog ni nge rin’ e piin gallabthir e re n’ey? Ba t’uf ni ngar ted e tayim ni gubin e rran ni fan ko bitir rorad ma ngaur nonad ngorad, ya nge yag ni ngar nanged e n’en ni bay u lanin’rad. (Prov. 20:5) Piin gallabthir e thingar ra ayuweged pi fakrad nib fel’ rogon ya nge yag ni ngar pared nib gel e michan’ rorad. (1 Kor. 3:10-15) Fare video ni kenggin e “These Words . . . Must Be on Your Heart” e be tamilangnag feni ga’ fan ni ngaun tay e fol Bible ni tabinaw. Mu guyed chon e tabinaw rom e re video ney u taabang mi gimed weliy e pi deer ni baaray.

(1) Mang e n’en ni rin’ Brother Roman nge chon e tabinaw rok ma dakurur tiyan’rad ko tirok Got ban’en? (2) Mang fan nde yag rok Brother Roman nge chon e tabinaw rok ni ngar ted e fol Bible ko yay nsom’on? (3) Mang fonow u Bible e rayog ni nge ayuwegey u rogon ni ngan chuguliy e bitir nib fel’ rogon? (Deut. 6:6, 7) (4) Mang e yira rin’ ma rayog ni nge fel’ e numon u thilin girdien e tabinaw? (5) Mang boch ban’en ni thingari pag fan e piin gallabthir ni fan ko bitir rorad? (6) Mang boch ban’en ni rin’ Brother nge Sister Barrow ni yib angin ko tabinaw rok Brother Roman? (Prov. 27:17) (7) Mang boch ban’en ni thingari fal’eg rogon fare matam u m’on riy, ya nge yag ni yib angin e fol Bible ni ngar ted chon e tabinaw rok u taabang? (8) Uw rogon ni yag rok Brother Roman ni nge thilyeg boch ban’en ya nge ayuweg chon e tabinaw rok ko tirok Got ban’en? (9) Faan yira tay e fol Bible ni tabinaw, ma mang fan nib t’uf ni ngaun rin’ ni gubin ngiyal’? (Efe. 6:4) (10) Mang boch ban’en nrayog ni ngan rin’ u nap’an e fol Bible ni tabinaw? (11) Uw rogon ni ke yag rok Brother Roman ni nge par nib gapas maku ba mudugil u nap’an ni be gay rogon ni nge ayuweg Marcus ni nge nang fan feni rib ga’ fan ni nge rin’ e tin nib mat’aw ban’en? (Jer. 17:9) (12) Mang boch ban’en ni weliy Brother nge Sister Roman ngak Rebecca ya nge yag ni ngar ayuwegew ni nge nang e n’en ni ir e ba puluw ni nge rin’ ni bay rogon ko tha’ u thilrow Justin? (Mark 12:30; 2 Tim. 2:22) (13) Uw rogon ni dag Brother nge Sister Roman nib gel e michan’ rorow u nap’an ni kar dugliyew ni ngar thilyegew boch ban’en ko par rorow? (Matt. 6:33) (14) Uw rogon ni be tamilangnag fare video feni rib ga’ fan ni nge ayuweg e pi matam girdien e tabinaw rorad ko tirok Got ban’en? (1 Tim. 5:8) (15) Bochan ni gur reb e matam, ma mang e ga be nameg ni ngam rin’?

FAN KO PI MATAM: Re drama ney e ni yan u yaan u nap’an fare regional convention ko duw ni 2011. Nap’an nim guy e re drama ney e ngiyal’ nem, ma gur, kam lemnag ni bay boch ban’en nrayog ni ngam mon’ognag ko fol Bible romed chon e tabinaw rom? Ma uw rogon e ngiyal’ ney? Faanra ba t’uf ni ngam mon’og u rogon ni gimed ma tay chon e tabinaw rom e fol Bible, mab fel’ ni ngam meybil ngak Jehovah ya nge yag ni nge ayuwegem ni ngam thilyeg boch ban’en ko biney e yaram ya nge yib angin ko tabinaw rom.​—Efe. 5:15-17.