Rogon ni Ngan Fanay Boch Ban’en ni Bay ko fare Babyor ni Mang e Ri Be Fil e Bible? nib Fel’ Rogon

Nap’an nra fil be’ e n’en nri be fil e Bible me fol ko n’en ni ke fil, mab mudugil nra ilal ko tirok Got ban’en miki yib wom’engin nib fel’. (Ps. 1:1-3) Rayog ni ngad ayuweged faen ni gad be fil e Bible ngak ni nge mon’og ko tirok Got ban’en ni faan gad ra fanay boch ban’en ni bay ko fare babyor ni Mang e Ri Be Fil e Bible?

Pi Deer ni Bay u Tabolngin Reb e Guruy: Gubin e guruy ni bay boch e deer u m’on riy, nrayog ni ngan pirieg e fulweg riy u lan fare guruy. U m’on ni ngam weliyew fare guruy ko re babyor ney, ma rayog ni ngam fith ngak facha’ e pi deer ni bay u tabolngin fare guruy. Faan ga ra rin’ ni aray rogon ma aram e ga be pi’ e athamgil nga laniyan’ ni nge adag ni nge gay e fulweg ko pi deer nem u nap’an ni gimew ra weliy e re guruy nem. Fa rayog ni nga mog ngak ni nge weliy e n’en ni be lemnag u murung’agen fapi deer. Faanra ke yog ban’en nde puluw ko fapi deer, ma dariy fan ni nga mog e bin nib puluw e fulweg e ngiyal’ nem. Pi fulweg ni be pi’ e rayog ni nge ayuwegem ni ngam nang e pi n’en nib t’uf ni ngam tamilangnag u nap’an ni gimew ra weliy fare guruy.​—Prov. 16:23; 18:13.

Yugu Boch e Thin: Faanra ke nang fan e n’en ni be fil mab m’agan’ ngay, ma rayog ni ngam pi’ e athamgil nga laniyan’ ni nge sul u daken boch ban’en ni bay ko fare yugu boch e thin u tomur ko re babyor nem ko ngiyal’ ni bay e tayim rok. Ma yay ni migid ni gimew ra fil e Bible u taabang, ma aram mag fith boch ban’en ngak ni murung’agen fare yugu boch e thin ya nge yag ni ngam nang ko ke nang fan fapi n’en ni ke beeg fa danga’. Machane faanra ra yib angin ngak mi gimew weliy boch ban’en ni bay ko fare yugu boch e thin ara yu yang riy ni aram e ngam beegew boch e paragraph riy mag fith boch e deer ngak ni kam fal’eg rogon u m’on riy.

N’en ni Be Fil e Bible: Fare kahol ni n’en ni be fil e Bible ni bay u tungun gubin e guruy e bay boch e thin riy ni be pi’ e fulweg ko fapi deer ni bay u tabolngin gubin e guruy. Rayog ni ngam weliyew murung’agen e pi n’en ni bay ko re kahol ney ya nge yag ni ngam nang ko ke nang fan e pi n’en ni kam weliyew ko fare guruy maku rayog ni nge weliy e tin nib ga’ fan riy. Mu beegew fapi thin ni bay riy nib muun ngay fapi thin nu Bible. Ma gog ngak ni nge fanay fapi thin nu Bible ni nge weliy ko mang fan nib riyul’ e pi thin nem.​—Acts 17:2, 3.