Reb e Kanawo’ nib Beech u Rogon ni Ngan Tababnag e Sabethin

Nap’an ni tabab e pul ni March ko 2016 ma fare Wulyang ko Damit ni yima pi’ u nap’an e machib e bay fare kenggin e thin riy ni “Mang e N’en ni Be Yog e Bible?” Re n’ey ni kan fal’eg e ra ayuwegdad ni ngad tababnaged e sabethin u murung’agen boch ban’en u Bible. Taareb rogon ni kan fal’eg e re n’ey ko fapi tract ni gad ma pi’. Bay reb e deer riy ni ngan fith, me yag ni ngan nang rogon laniyan’ faen ni kan mada’nag maku bay e thin nu Bible nib puluw ngay. Maku bay boch e thin ni ku rayog ni ngan weliy nib l’ag rogon ko fare n’en ni kan weliy.

Nap’an ni yira weliy murung’agen boch ban’en u Bible nra adag be’ ni ngki nang boch murung’agen, mab ga’ nrayog ni ngan tababnag e fol Bible ngak. Ngan fanay e re n’ey ya nge yag ni ngan ayuweg yugu boch e girdi’ ni ngar nanged boor ban’en u murung’agen Got.​—Mt 5:6.

ROGON NI NGAN RIN’ E RE N’EY:

1. Ngam fith ngak faen ni kam mada’gow ko uw rogon e lem rok u murung’agen reb e pi deer nem

2. Ngam motoyil ko fulweg rok, mag pining e magar ngak

3. Mu beeg fare thin nu Bible ni bay u tan fare thin ni kenggin e “N’en ni Be Yog e Bible,” mag fith ngak ko mang e be lemnag ko re verse nem. Faanra ka bay e tayim rok, mag weliy reb e ban’en ni bay ko fare kenggin e thin ni “Mang e Ku Rayog ni Ngad Filed u Lan e Bible?”

4. Ngam pi’ fare babyor

5. Ngam yarmiy ni ngam sul ngam weliy e bin migid e deer