Mu Fanay e Pi Video ni Ngam Fil Boch Ban’en ngak Faen ni Ga Be Fil e Bible Ngak

Yira dag yaan boch ban’en ni nge guy be’, ma ireray reb e kanawo’ nrayog ni nge tiyan’ facha’, min ayuweg ni nge nang fan e n’en ni yibe weliy ma dabi pagtalin. Ireray e n’en ni fanay e Bin Th’abi Tolang e Sensey rodad ni aram Jehovah ni nge fil boch ban’en nib ga’ fan ngodad. (Ge 15:5; Jer 18:1-6) Ku ireray e n’en ni i rin’ Jesus kakrom ni ir Bin Th’abi Fel’ e Sensey. (Mt 18:2-6; 22:19-21) Reb e ban’en ni kan pirieg ni bay angin u lan fapi duw ni ke yan e aram e video ni yima pag. Gur, ga be gay rogon ni ngaum pag e video u nap’an ni ga be fil boch ban’en ngak faen ni ga ma fil e Bible ngak?

Bay ragag e video ni kan fal’eg ni nge ayuwegdad u rogon ni ngad filed fare brochure ni kenggin e Thin nib Fel’ ni Yib rok Got. Ra reb e kenggin e pi video ney mab puluw nga reb e deer ni kan yoloy nib gel ramaen ni bay ko re brochure nem. Faanra bay e re brochure ney ko phone ara tablet rom, ma bay e link riy ni be puguran e ngiyal’ ni ngad paged reb nge reb e pi video ney. Maku reb e, pi video ni gad ma pag e ku aram boch ban’en ni ku gad be uneg ko tin ni ka bay e talin e maruwel rodad ni bay ko fare Tafen Talin e Maruwel ni Yima Fanay ni Ngan Fil Ban’en ko Girdi’, ya nge yag ni ngad filed e Bible ko girdi’.

Gur, ga be weliy murung’agen ban’en ni bay u lan e Bible nsana ba mo’maw’ ngak e en ni ga be fil e Bible ngak ni nge nang fan? Ara gur bay ba mit e skeng ni be mada’nag? Rayog ni ngam gay boch e video ni bay ko jw.org® nge JW Broadcasting® nrayog ni nge yib angin ngak. Ma rayog ni ngam yaliyew reb ko pi video ney mi gimew weliy u taabang.

Ra reb e pul ma bay reb e video nib beech ni kan fal’eg. Nap’an ni ga ra yaliy e pi video ney, ma aram mag lemnag rogon nrayog ni ngam fanay u nap’an ni ga be fil e Bible ngak e girdi’.