Mu Ulul ni Ngam Guy Rogon ni Nge Yag e “Bin nib Beech” e Pangin Ngom u Tomuren e Taufe

1. Mang e ba ga’ ni ma m’ug u rarogodad?

DEMTRUG ko ka fini gaman in e rran ni kad uned ko taufe ara ke yoor e duw, ma gad gubin ni gad baadag ni nge yag e pi fel’ngin ngodad ni baadag Jehovah. Ra ngad rin’ed e re n’ey, mab t’uf ni ngad gagiyegnaged rogon ni gad ma lem. Mang fan? Bochan nib ga’ ni pi n’en gad ma lemnag e ma m’ug u rarogodad. Faanra gubin ngiyal’ ni gad ma lemnag e tin nib kireb ni gad ma ar’arnag, ma aram e ra u dogned ma gad be rin’ e tin nib kireb. (Efe. 4:17-19) Machane faanra ud lemnaged e tin nib fel’ ban’en, mab mudugil nra ud nonad ma gad be ngongol u reb e kanawo’ nib m’agan’ Jehovah ngay ni Chitamangidad.​—Gal. 5:16.

2. Mang deer e gad ra weliy ko re article ney?

² Kad weliyed ko fa binem e article ndabiyog ni ngad pared ni gubin ngiyal’ ndab da lemnaged boch ban’en nib kireb. Machane rayog ni ngad mel’eged ndab da rin’ed e pi n’em nib kireb ni gad ma lemnag. U m’on ni ngad uned ko taufe mab t’uf ni ngad talgad i yog ma gad be rin’ boch ban’en nib fanenikan Jehovah. Aram e n’en som’on mab ga’ fan ni ngad rin’ed ya nge yag nda n’aged e bin kakrom i gadad. Machane ra ngar da fel’gad u wan’ Jehovah ma thingar da folgad ko fare thin ni kan tay chilen ni be gaar: “Bin nib beech i gimed e [nga] mon’ed nga dakenmed.” (Kol. 3:10) U lan e re article ney e gad ra weliy riy e fulweg ko gal deer ni baaray ni be gaar: Mang e ‘bin nib beech i gadad’? Ma uw rogon ni nga don’ed nga dakendad e bin nib beech e pangin ma dab kud sulod nga pangidad ni kafram?

MANG E ‘BIN NIB BEECH I GADAD’?

3. Mang e ‘bin nib beech i gadad,’ ma uw rogon be’ ni ke yon’ nga daken e bin nib beech e pangin nrogon ni be yog e Galatia 5:22, 23?

³ ‘Bin nib beech i gadad’ e be yip’ fan reb i kanawoen e lem nge ngongol ni be m’ug rarogon Jehovah riy. Be’ ni ke yon’ nga daken e bin nib beech e pangin e ma m’ug wom’engin gelngin Got nib thothup rok, ma ma pag gelngin Got nib thothup ni nge gagiyegnag rogon e lem nge ngongol rok. (Mu beeg e Galatia 5:22, 23.) Ir be’ ni ma t’ufeg Jehovah nge girdi’ rok. (Matt. 22:36-39) Ma par nib felfelan’ ni yugu aram rogon ni be mada’nag e magawon. (Jas. 1:2-4) Ir be’ ni ma guy rogon ni nge par ni bay e gapas u thiliy. (Matt. 5:9) Kub gum’an’ ma ma sumunguy ko girdi’. (Kol. 3:13) Baadag e tin nib fel’ maku aram e n’en ma rin’. (Luke 6:35) Ma m’ug ko ngongol rok nrib mich u wan’ e Chitamangin ni bay u tharmiy. (Jas. 2:18) Ku ma dag e sumunguy u nap’an nra guy e girdi’ rogon ni ngar chamgad ara ngar k’aringed e damumuw ngak, maku ma t’ar laniyan’ u nap’an nra yib e lumel ngak.​—1 Kor. 9:25, 27; Titus 3:2.

4. Faanra nge yag e bin nib beech e pangin ngodad, ma mang fan nib t’uf ni nge m’ug rodad gubin fapi fel’ngin ni bay ko Galatia 5:22, 23 nge tin ni bay u yugu boch e thin nu Bible?

⁴ Ra nge yag e bin nib beech e pangin ngodad, mab t’uf ni ngad maruweliyed ni nge yag ngodad gubin e pi fel’ngin ni bay ko Galatia 5:22, 23 nge tin ni bay u yugu boch e thin nu Bible.b Pi fel’ngin ney e gathi bod e mad ni gad ma chuw ngay ni ta taareb. Bin riyul’ riy e, boor ko pi fel’ngin ney e ba chugur ni nge taareb rogon nga yugu boch e fel’ngin. Bod ni faanra riyul’ nib t’uf rom e en nib migid ngom, ma ga ra gum’an’ u puluwon mag dag e sumunguy ngak. Ma faanra ngarim mang be’ nib manigil, ma thingar um dag e sumunguy ma ga be t’ar lanin’um.

UW ROGON NI NGA DON’ED NGA DAKENDAD E BIN NIB BEECH E PANGIN?

5. Mang e be yip’ fan ni nge yag “laniyan’ Kristus” ngodad, ma mang fan nsusun e ngad filed murung’agen Jesus? (1 Korinth 2:16)

⁵ Mu beeg e 1 Korinth 2:16. Ra nge yag e bin nib beech e pangin ngodad, mab t’uf ni nge yag “laniyan’ Kristus” ngodad. Re n’ey e be yip’ fan nthingar da guyed rogon ni ngad nanged rogon ni ma lem Jesus ma gad folwok rok. Jesus e ri i m’ug wom’engin gelngin Got nib thothup rok nrib fel’ rogon. I m’ug pi fel’ngin Jehovah rok nrib fel’ rogon ni bod bangi therek ndariy bang riy nib kireb. (Heb. 1:3) Faanra ud lemgad ni bod Jesus, ma aram e rayog ni ngaud ngongolgad ni bod ir ma be m’ug rarogon rodad.​—Fil. 2:5.

6. Mang e susun ndab da paged talin u nap’an ni gad be guy rogon ni nge yag e bin nib beech e pangin ngodad?

⁶ Gur, rayog ni ngar da folwokgad rok Jesus, fa? Sana ra lungudad u wan’dad: ‘Jesus e ir be’ nib flont. Ere dabiyog ni ngari taareb rogog ngak!’ Faanra aray rogon e lem rom, ma baaray boch ban’en ndab mu pagtalin. Bin som’on e, kan sunmiyem ni ngam bod Jehovah nge Jesus. Ere rayog ni ngam mel’eg ni ngam folwok rorow, me taareb rogom ngorow u boch e kanawo’. (Gen. 1:26) Bin migid e, gelngin Got nib thothup e aram e re gelngin nth’abi gel u ga’ngin e palpalth’ib. Ere rayog ni nge ayuwegem ni ngam rin’ boch ban’en ndabiyog ni ngam rin’ u gelngim. Bin dalip e, der lemnag Jehovah ni nge m’ug wom’engin gelngin nib thothup rom e chiney nrib fel’ rogon. Ya bin riyul’ riy e, ra pi’ 1,000 e duw ngak e piin yad be athapeg e par u fayleng ni ngar flontgad. (Rev. 20:1-3) N’en ni baadag Jehovah ni fan ngodad e chiney e ngad rin’ed e tin rayog rodad ma gad taga’ ngak ni nge ayuwegdad.

7. Mang e ngad weliyed?

⁷ Mang boch e kanawo’ nrayog ni ngad folwokgad rok Jesus riy? Ngad weliyed aningeg e fel’ngin ni aram bang u wom’engin gelngin Got nib thothup. Ngemu’ ma gad guy e n’en nrayog ni ngad filed u rogon ni dag Jesus e pi fel’ngin nem. Tomuren ma gad weliy e fulweg u boch e deer nra ayuwegdad ni ngad mon’oggad u rogon ni be m’ug e bin nib beech e pangin rodad.

8. Uw rogon ni i dag Jesus e t’ufeg?

⁸ Bochan nrib t’uf Jehovah rok Jesus, ma aram fan ni pag fan ir ni fan ngak e Chitamangin nge gadad. (John 14:31; 15:13) I dag gelngin nrib t’uf e girdi’ rok u rogon e par rok u fayleng. Gubin e rran ni i dag e t’ufeg nge runguy ko girdi’ ni yugu aram rogon ni bay boch i yad ni i togopuluw ngak. Reb e kanawo’ nib ga’ fan ni i t’ufeg e girdi’ riy e aram e i fil ngorad murung’agen Gil’ilungun Got. (Luke 4:43, 44) Ki pag fan ir nge dag nib t’uf Got rok nge girdi’ ni aram e m’agan’ ngay ni nge gafgow u pa’ e pi tadenen mar thanged e fan rok. Bochan e re n’ey, ma aram fan nrayog ni nge yag e yafos ni manemus ngodad.

9. Uw rogon ni ngad daged e t’ufeg ni bod ni rin’ Jesus?

⁹ Kad ognaged gadad ngak Jehovah kad uned ko taufe ni bochan e ba t’uf rodad e Chitamangidad ni bay u tharmiy. Ere susun e ngad daged nib t’uf Jehovah rodad u rogon e ngongol rodad ko girdi’ ni bod ni i rin’ Jesus. I yoloy apostal John ni gaar: “Dabiyog [rok be’] ni nge t’uf Got rok, ni be’ nder guy ni faanra de t’uf rok walagen ni girdien Kristus ni be’ ni be guy.” (1 John 4:20) Ere rayog ni ngad fithed gadad ni nge lungudad: ‘Rib t’uf e girdi’ rog, fa? Gu ma dag e runguy ko girdi’ ni mus ni faanra ka rogned e thin nib kireb ngog, fa? Gu ma fanay e tayim rog nge tin bay rog ni nggu ayuweg e girdi’ ni ngar filed murung’agen Jehovah ni bochan e yad ba t’uf rog, fa? Ba m’agan’ug ni nggu rin’ e re n’ey ni yugu aram rogon ni yooren e girdi’ e de ga’ fan u wan’rad e tin gu be rin’ ara yad be togopuluw ngog, fa? Rayog ni nggu gay boch e kanawo’ ni nggu yoornag e tayim rog riy ni nggu ayuweg e girdi’ ni ngar manged boch i gachalpen Jesus, fa?’​—Efe. 5:15, 16.

10. Uw rogon ni ma guy Jesus rogon ni nga i par ni bay e gapas u thiliy?

¹⁰ Jesus e ir be’ ni ma guy rogon ni nga i par ni bay e gapas u thiliy. Nap’an ni rin’ e girdi’ boch ban’en nib kireb ngak, ma de guy rogon ni nge sulweg taban e kireb rorad. Machane gathi kemus e n’en ni rin’, ya ki guy rogon ni nge aw e gapas u thilrad, me pi’ e athamgil nga laniyan’ boch e girdi’ ni ngar pithiged e magawon ni ke sum u thilrad. Bod ni fil ngorad ni faanra yad baadag ni nge m’agan’ Jehovah ko liyor ni yad be tay ngak mab t’uf ni ngar awnaged e gapas u thilrad walagrad. (Matt. 5:9, 23, 24) Ku boor yay ni guy rogon ni nge ayuweg e pi apostal rok ni ngar talgad i luag e thin ko mini’ rorad e th’abi tolang u fithik’rad.​—Luke 9:46-48; 22:24-27.

11. Uw rogon ni ngad manged boch e girdi’ ni yad ma guy rogon ni nga i par ni bay e gapas u thiliy?

¹¹ Faanra ngad manged boch e girdi’ ni yad ma guy rogon ni nga i par ni bay e gapas u thiliy, ma gathi kemus ni ngad guyed rogon ndab da k’aringed e magawon nga thildad yugu boch e girdi’, ya kub t’uf ni ngad guyed rogon ni ngad awnaged e gapas u thildad yugu boch e girdi’ ma gad pi’ e athamgil nga laniyan’ pi walagdad ni ngar pithiged e magawon ni ke sum u thilrad. (Fil. 4:2, 3; Jas. 3:17, 18) Ere rayog ni ngad fithed gadad ni nge lungudad: ‘Mang e ra m’agan’ug ngay ni nggu pag fan ya nge yag ni nggu awnag e gapas u thilmad yugu boch e girdi’? Nap’an nra kirebnag reb e walag lanin’ug, ma gu ma par ni gub damumuw ngak, fa? Gu ma son ni be’ e nge yib i awnag e gapas u thilmow, fa gag e som’on nug ma guy rogon ni nge aw e gapas ni yugu aram rogon nug be lemnag ni ir tapgin fare magawon? Gu ma pi’ e athamgil nga laniyan’ e piin ke sum e magawon u thilrad ni ngar awnaged e gapas u thilrad ko ngiyal’ nib puluw ni nggu rin’ riy, fa?’

12. Uw rogon ni i dag Jesus e sumunguy?

¹² Jesus e ir be’ nib sumunguy. (Matt. 11:28-30) I m’ug e re fel’ngin ney rok u rogon ni ma dag e gol ma ma t’ar laniyan’ ngki mada’ ko ngiyal’ nib mo’maw’. Bod nnap’an ni wenig be’ nib pin nu Fonicia ngak ni nge golnag fak, ma som’on e de rin’ e n’en ni yog fare pin ngak, machane nap’an ni dag fare pin gelngin e michan’ rok, ma aram me golnag fak. (Matt. 15:22-28) Yugu aram rogon ni ma dag Jesus e sumunguy, machane ku der ma digey e girdi’ ndabi fonownagrad. Yu ngiyal’ e ma dag e re fel’ngin ney ngak e piin yad ba t’uf rok ni aram e ma yog ngorad e n’en nib t’uf ni ngar nanged. Bod nnap’an ni guy Peter rogon ni nge taleg ndabi rin’ e n’en nib m’agan’ Jehovah ngay, ma aram me yal’uweg u p’eowchen e tin ka bay i gachalpen. (Mark 8:32, 33) Gathi fan ni rin’ e re n’ey e bochan ni nge tamra’nag Peter, ya rin’ ni bochan e nge fil ban’en riy ngak miki puguran ngak e tin ka bay i gachalpen ndab rrin’ed ban’en ndawor ni pi’ mat’awrad ni ngar rin’ed. Dariy e maruwar riy ni tamra’ Peter ko re n’ey, machane i yib angin ngak.

13. Uw rogon ni ngad daged e sumunguy?

¹³ Ra ngam dag e sumunguy ngak e piin nib t’uf rom, ma yu ngiyal’ e rayog nib t’uf ni ngam fonownagrad. Machane nap’an ni ga be rin’ e re n’ey, ma ngam folwok rok Jesus ni aram e ngam puluwnag e fonow ni ga be pi’ ko pi kenggin e motochiyel ni bay ko Thin rok Got. Mu gol ngorad, mag lemnag ni yad baadag ni ngar rin’ed e tin nib fel’, ma nge pagan’um ngay ni piin nib t’uf Jehovah rorad ma ka gab t’uf rorad e yad ra motoyil ko fonow ni kam pi’ ngorad u fithik’ e t’ufeg. Ere mu fithem ni nge lungum: ‘Nap’an nug ra guy be’ nib t’uf rog ni be rin’ ban’en nib kireb ma rayog rog ni nggu non ngak, fa? Faanra ba t’uf ni nggu fonownag, ma gu ma rin’ u fithik’ e sumunguy fa ba gel e thin nug ma yog ngak? Mang fan nug be fonownag e cha’ney? Gu be rin’ ni bochan e be kankanan’ug ngak, fa gu be rin’ ni bochan e gu baadag ni nggu ayuweg?’

14. Uw rogon ni i dag Jesus fare fel’ngin ni fel’ ngak e girdi’?

¹⁴ Gathi kemus ni manang Jesus e tin nib fel’ ya ku ma rin’. Ba t’uf e Chitamangin rok, ere gubin ngiyal’ nib puluw fan ni ma rin’ e tin nib fel’. Be’ nib manigil e gubin ngiyal’ ni ma gay e kanawo’ ni nge ayuweg yugu boch e girdi’ riy, maku ma rin’ boch ban’en nib fel’ ni fan ngorad. De gaman ni kemus ni ngad nanged e n’en nib fel’ ni ngad rin’ed, ya thingar kud rin’ed e tin nib fel’ ma ngki puluw fan ni ngad rin’ed. Rayog ni nge fith be’ ir ni gaar, ‘Gur, rayog ni nge rin’ be’ ban’en nib fel’ machane de puluw fan ni ke rin’, fa?’ Rayog. Bod ni weliy Jesus murung’agen boch e girdi’ ni ur pied boch e tow’ath ngak e piin gafgow mu ur guyed rogon ni nge nang e girdi’ murung’agen e pi n’em. Yugu aram rogon nib fel’ e pi n’ey ni ur rin’ed, machane de m’agan’ Jehovah ngay.​—Matt. 6:1-4.

15. Uw rogon ni nge m’ug nriyul’ ni gadad boch e girdi’ nib manigil?

¹⁵ Faan gad ra rin’ e tin nib fel’ ni gathi bochan e gadad e nge yib fel’ngin ngodad, ma aram e ra m’ug nriyul’ ni gadad boch e girdi’ nib manigil. Ere rayog ni ngam fithem ni nge lungum: ‘Gu manang e n’en nib fel’ ni nggu rin’, ma kug ma guy rogon ni nggu rin’ e re n’ey, fa? Mang fan nug ma rin’ boch ban’en nib fel’?’

UW ROGON NI NGAD AYUWEGED E BIN NIB BEECH I GADAD?

16. Mang e susun ni ngad rin’ed ni gubin e rran, ma mang fan?

¹⁶ Susun e dab da lemnaged nnap’an ni gad ra un ko taufe, ma aram e ka don’ed nga dakendad e bin nib beech i gadad ndakuriy ban’en nib t’uf ni ngad rin’ed ngay. Bin nib beech i gadad ni ka don’ed nga dakendad e bod ba “mad ni kab beech” nib t’uf ni ngad ayuweged ndabi kireb. Ba t’uf ni nga i m’ug wom’engin gelngin Got nib thothup ko ngongol rodad ni gubin e rran. Mang fan? Ya faanra ud guyed rogon ni nge m’ug e pi fel’ngin ney rodad, ma aram e ra ayuwegdad gelngin Jehovah nib thothup. Ya Jehovah e ma rin’ e tin ke yog, ma gelngin nib thothup e aram gelngin ni ma maruwel. (Gen. 1:2) Ere ba ga’ fan ni nge m’ug e pi n’ey ko ngongol rodad. Bod ni yoloy James nreb i gachalpen Jesus ni gaar: “Ku er rogon e michan’ ngak Got nra de chag e ngongol ngay ma ba yam’ fare michan’.” (Jas. 2:26) Ere ku arrogon e tin ka bay i wom’engin gelngin Got nib thothup. Gubin yay nra m’ug ko ngongol rodad, ma aram e gad be dag e mich riy ni be maruwel gelngin Got nib thothup u dakendad.

17. Mang e susun ni ngad rin’ed ni faanra de yag ni nge m’ug wom’engin gelngin Got nib thothup ko ngongol rodad?

¹⁷ Mus ko pi Kristiano ni ke yoor e duw ni kar uned ko taufe ni ka bay yu ngiyal’ nder ma m’ug wom’engin gelngin Got nib thothup ko ngongol rorad. Machane n’en nib ga’ fan e dabi mulan’dad. Am lemnag e re fanathin ni baaray. Faanra ke mogchoth bang u reb e mad ni ga baadag ni ga ma chuw ngay, ma ga ra n’ag fare mad ni ka chingiyal’ nem, fa? Danga’, ya dabisiy ni ga ra guy rogon ni nga mup’ e gin ke mogchoth riy ni faanra rayog. Ma nga tomuren ma ga ra kol ayuw ndab ki mogchoth fare mad bayay. Ku arrogon ni faanra bay yu ngiyal’ nder yag ni ngam dag e sumunguy, ara gum’an’, ara t’ufeg ngak be’, ma dabi mulan’um. Ya faan ga ra wenig ngak ni ke yib u gum’irchaem, ma aram e rayog ni ngam fal’eg e n’en ke kireb me yag ni ngki fel’ bayay e tha’ u thilmew facha’. Ngemu’ mag guy rogon ndab ki buch e re n’ey bayay.

18. Mang e rayog ni nge pagan’dad ngay?

¹⁸ Ri gad ba felfelan’ ni ke dag Jesus e kanawo’ nrayog ni ngad folwokgad riy! Faanra ud guyed rogon ni ngaud lemgad ni bod rogon ni ma lem, ma aram e ra mom ni ngad ngongolgad ni bod ir. Ma faanra ud ngongolgad ni bod ir, ma aram e rayog ni ngad mon’oggad u rogon ni gad be yon’ e bin nib beech e pangin nga dakendad. Kemus ni aningeg e fel’ngin ni kad weliyed ko re article ney ni aram bang u wom’engin gelngin Got nib thothup. Ba fel’ ni ngam tay e tayim ni ngam fil murung’agen e tin ka bay e fel’ngin ni aram bang u wom’engin gelngin Got nib thothup, mag lemnag rogon ni be m’ug e pi fel’ngin ney rom. Boor e article ni ga ra pirieg u murung’agen e re n’ey ko fare Research Guide for Jehovah’s Witnesses u tan fare thin ni “Christian Life,” ngemu’ mag yaliy fare thin ni “Fruitage of the Spirit.” Rayog ni nge pagan’um ngay ni faan ga ra yon’ nga dakenam e bin nib beech e pangin ma dab kum sul nga pangim ni kafram, ma aram e ra ayuwegem Jehovah.