Deer ko Piin Ma Beeg

Uw rogon ni ke tamilangnag fare article ni kenggin e “Ngan Tay Fan Fithingam nib Thothup” ni bay ko Fare Wulyang ko Damit ko June 2020 e n’en gad ma machibnag u murung’agen fithingan Jehovah nge mat’awun e gagiyeg rok?

Da filed ko re article nem ni kemus ni taareb e deer ni bay nrib t’uf ni ngan gagiyelnag e fulweg riy. Re n’em e: rogon ni ngan tayfan fithingan Jehovah. Mat’awun Jehovah ni nge gagiyeg e bang ko re deer ney. Ma rogon e yul’yul’ nra tay e girdi’ e ku bang riy.

Mang fan ni chiney e ba ga’ ni gad ma tamilangnag ni bin th’abi ga’ e deer ni bay e bay rogon nga fithingan Jehovah nge rogon ni ngan tayfan? Ngad weliyed dalip i fan.

Bin som’on e togopuluw Satan nga fithingan ara thin Jehovah u lan fare milay’ nu Eden. Deer ni fith Satan ngak Efa e be m’ug riy ni Jehovah e ir reb e Got nde gol ma de mat’aw e motochiyel ni ke pi’ ngorow Adam. Ngemu’ me yog ban’en nib togopuluw ko n’en ni yog Jehovah. Ere be m’ug riy ni ke yog ni Got e ba malulfith l’igin. Bin riyul’ riy e ke yog boch ban’en nde riyul’ u murung’agen e ngachal rok Jehovah. Aram e ngiyal’ ni mang Satan “fare moonyan’” ni be yip’ fan “be’ ni ma t’ar e thin nga daken be’.” (John 8:44) Bochan ni mich u wan’ Efa e ban ni yog Satan ma aram e daki fol rok Got me togopuluw nga mat’awun e gagiyeg rok. (Gen. 3:1-6) Ke mada’ ko chiney ni ka be ulul Satan ni nge yog boch ban’en nde riyul’ u murung’agen e ngachal rok Got, ni aram e be wereg boch ban’en nde riyul’ u murung’agen Jehovah. Piin nra mich u wan’rad e pi ban ney e rayog ni nge dab kur folgad rok Jehovah. Ere rogon u wan’ e girdi’ rok Got e pi n’en nde riyul’ ni kan weliy u murung’agen e ngachal rok Jehovah nib thothup e aram ban’en ni kan rin’ nri de mat’aw. Ma aram lik’ngin urngin mit e gafgow nge kireb ni be buch u fayleng.

Bin migid e ra thothupnag Jehovah e ngachal rok ni aram e nge micheg nde riyul’ urngin ban’en ni ka nog nib togopuluw nga fithingan, ya nge yib angin nga urngin ban’en ni ke sunmiy. Aram e n’en th’abi ga’ fan u wan’. Aram fan ni ke gaar: “Bay gu dag ngak e pi nam feni thothup fithingag nib gilbuguwan.” (Ezek. 36:23) Ki tamilangnag Jesus e n’en nsusun e nge m’ug nth’abi ga’ fan u lan e meybil rok urngin e tapigpig rok Jehovah ni yad ba yul’yul’ u nap’an ni gaar: “Ngan tay fan fithingam nib thothup.” (Matt. 6:9) Boor yay ni ke tamilangnag e Bible feni ga’ fan ni ngan tayfan fithingan Jehovah. Baaray in ko pi thin nem: “Nguun pining e sorok nga fel’ngin fithingan Somol.” (1 Kron. 16:29, BT; Ps. 96:8) “Mu tangniged feni gilbuguwan fithingan.” (Ps. 66:2, BT) “Bay gu gilnag fithingam ni dariy n’umngin nap’an.” (Ps. 86:12, BT) Bay bayay ni non Jehovah u tharmiy ngak Jesus ko fare tempel u Jerusalem, ma aram me gaar: “Ah Chitamag, mu ta’ fan fithingam!” Me fulweg Jehovah ni gaar: “Kug ta’ fan ma bay kug rin’ bayay.”​—John 12:28.a

Bin dalip e n’en nib m’agan’ Jehovah ngay e gubin ngiyal’ ni bay rogon nga fithingan ara thin. Am lemnag e re n’ey: Mang e ra buch u tomuren e bin tomur e skeng ni yira tay u tungun fare Biyu’ i Duw Nra Gagiyeg Kristus riy? Ra taw ko ngiyal’ nem, ma uw rogon e ngachal rok Jehovah u wan’ urngin e engel nge girdi’? Ra ngad nanged e fulweg ko re deer ney, ma ngad lemnaged l’agruw ban’en ni bay rogon ko re n’ey ni aram e yul’yul’ nra tay e girdi’ nge mat’awun Jehovah ni nge gagiyegnag e palpalth’ib. Gur, ra taw ko ngiyal’ nem ma girdi’ ni kar pared ni yad ba yul’yul’ e ku ra t’uf ni ngar micheged ni yad ba yul’yul’, fa? Danga’. Ra taw ko ngiyal’ nem ma kar flontgad ma kun skengnagrad u gubin e kanawo’ nib t’uf ni ngan rin’ riy, ma ke yag e yafos ni manemus ngorad. Gur, ku ra t’uf ni ngan ulul i weliy murung’agen e en bay mat’awun ni nge gagiyegnag e palpalth’ib, ara ku ra k’aringey e re n’ey ni ngan yurba’, fa? Danga’. Ra taw ko ngiyal’ nem ma ke tamilang ni yigoo Jehovah e ir e bay mat’awun ni nge gagiyeg maku ir e th’abi tolang e gagiyeg rok. Machane uw rogon fithingan Jehovah?

Ra taw ko ngiyal’ nem ma urngin e piin yad be par u tharmiy ngu fayleng e kar nanged e tin riyul’ u murung’agen Jehovah, ma kari gagiyel feni thothup fithingan. Machane ku ra ulul ni nge par fithingan Jehovah ni aram e n’en th’abi ga’ fan u wan’ e pi tapigpig rok u tharmiy ngu fayleng. Mang fan? Bochan ni yad ra ulul ni ngar guyed e pi n’en nra rin’ Jehovah ni yira ngat ngay. Am lemnag e re n’ey: Bochan nra sulweg Jesus urngin e gagiyeg nga tan pa’ Jehovah, ma aram e ra par Got ni ir e be “gagiyegnag urngin ban’en.” (1 Kor. 15:28) Tomuren e re n’ey, ma ra felfelan’ e girdi’ u fayleng mi yad un “ko flaab rok pi fak Got.” (Rom. 8:21) Ra taw ko ngiyal’ nem ma ra lebguy Jehovah e n’en ke n’uw nap’an nib m’agan’ ngay ni aram e nge taareban’ chon e tabinaw rok u tharmiy ngu fayleng.​—Efe. 1:10.

Mang e ra rin’ e pi n’ey ngak chon e tabinaw rok Jehovah u tharmiy ngu fayleng? Ra taw ko ngiyal’ nem ma ka gad baadag ni ngaud pininged e sorok nga fithingan Jehovah. Nni thagthagnag nga laniyan’ David ni fare psalmist ni nge yoloy ni gaar: “Ke sorok Somol . . . Fithingan nib gilbuguwan e nguun pining e sorok ngay ndariy n’umngin nap’an.” (Ps. 72:18, 19) Gubin ngiyal’ ni gad ra pirieg boch i fan ni ngad rin’ed e re n’ey ndariy n’umngin nap’an.

Bin riyul’ riy e, gubin ban’en u rarogon Jehovah ni bay rogon nga fithingan. Gad ra lemnag fithingan ma ma yib ngan’dad e t’ufeg rok. (1 John 4:8) Dariy ba ngiyal’ ni gad ra pagtalin ni ke sunmiydad Jehovah ni bochan e gad ba t’uf rok, ma kki pi’ fare biyul ni maligach ni bochan e gad ba t’uf rok, ma kki dag feni mat’aw rogon kanawoen e gagiyeg rok ni bochan e gad ba t’uf rok. Machane ku gad ra ulul ni ngad guyed gelngin feni ri gad ba t’uf rok Jehovah ndariy n’umngin nap’an. Gubin ngiyal’ ni gad ra adag ni ngad chugurgad ngak e Chitamangidad mu ud n’ufed fithingan u daken e tang ndariy n’umngin nap’an.​—Ps. 73:28.