Deer ko Piin Ma Beeg

Nap’an ni tababnag Jesus fare Abich ni Blayal’ rok Somol, ma uw e bay fa 70 i gachalpen riy ni faani l’ograd ni nga ranod ko machib? Gur, kar digeyed Jesus?

Dab da lemnaged ni bochan nda immoy fa 70 i gachalpen Jesus u nap’an ni tababnag fare Abich ni Blayal’ rok Somol, ma aram e be yip’ fan nda kur fel’gad u wan’ ara kar digeyed. Ya kemus ni baadag ni ngar rin’ed e pi apostal rok ban’en ni yigoo yad ko ngiyal’ nem.

Ba fel’ u wan’ Jesus fa 12 i apostal nge fa 70 i gachalpen ni yad gubin. Som’on e mel’eg Jesus 12 i pumoon u fithik’ pi gachalpen me tunguy fithingrad ni apostal. (Luke 6:​12-16) Nap’an ni immoy u Galile ‘me ulunguy fa ragag nge l’agruw i gachalpen’ nge “l’ograd nga ranod ni ngar machibniged ngak e girdi’ murung’agen e gagiyeg rok Got, mi yad golnag e piin nib m’ar.” (Luke 9:​1-6) Boch nga tomuren u nap’an ni bay u Judea, me “mel’eg yugu boch e girdi’ ni yad 70 u gubin me l’ograd nga ranod ni yad lal’agruw.” (Luke 9:​51, NW; 10:1) Ere ba thilthil e binaw ni immoy pi gachalpen Jesus riy ni yad be machibnag murung’agen.

Pi Jew nra manged boch i gachalpen Jesus e ka ur madnomnaged fare Paluk’af u gubin e duw ndabisiy ni yad chon e tabinaw rorad. (Ex. 12:​6-11, 17-20) Nap’an ni ke chugur ko ngiyal’ ni nge yim’ Jesus riy, ma ranod e pi apostal rok nga Jerusalem. Machane de pining gubin i gachalpen ni yad ma par u Judea, ngu Galile, ngu Perea ni ngar madnomnag e Paluk’af u taabang. Ere ba tamilang ni baadag Jesus ni kemus ni yigoo yad e pi apostal rok e ngar ted e re madnom ney u taabang. I yog ngorad ni gaar: “Kari gum’ ni bochan ni nggu un ngomed ngad ked e re ggan ko Paluk’af ney u m’on ko gafgow ni nggu tay!”​—Luke 22:15.

Bay fan ni rin’ Jesus e re n’ey. Dabki n’uw nap’an ma bayi yim’ ni ir “fare Fak e Saf rok Got ni ir e nge chuweg e denen rok e girdi’ nu fayleng!” (John 1:29) Ra buch e re n’ey u Jerusalem ni aram e gin ke n’uw nap’an nap’an ni yima ognag e maligach riy ngak Got. Fare saf ni yima fanay ko Paluk’af e i puguran ngak piyu Israel ni Jehovah e ir e ke chuwegrad u Egypt. Machane kab ga’ angin e maligach ni pi’ Jesus ni bochan e ra chuweg urngin e girdi’ u tan e denen nge yam’! (1 Kor. 5:​7, 8) N’en ni rin’ Jesus e ra bing e kanawo’ ko fa Ragag nge L’agruw i apostal ni ngar manged bang ko def ko ulung ni Kristiano. (Efe. 2:​20-22) Jerusalem ni fare binaw nib thothup e “ni ubung nga daken ragag nge l’agruw i malang” ma kan yoloy fithingan “fa ragag nge l’agruw i apostel rok fare Fak e Saf ngay.” (Rev. 21:​10-14) Arrogon fapi apostal ni yad ba yul’yul’ e bay ban’en nib ga’ fan ni ngar rin’ed nib l’ag nga rogon ni be lebug e n’en nib m’agan’ Got ngay. Ere rayog ni ngad nanged fan ni baadag Jesus ni ngar uned ngak i madnomnag e bin tomur e Paluk’af nge fare Abich ni Blayal’ rok Somol nra ted nga tomuren.

Fa 70 i gachalpen Jesus nge tin ka bay i gachalpen e dar uned ngak i madnomnag e re madnom nem, machane gubin i gachalpen ni yad ra par ni yad ba yul’yul’ e ra yib angin ngorad fare Abich ni Blayal’ rok Somol ni tababnag Jesus. Ra munmun ma urngin e piin yad ra mang boch e Kristiano ni kan dugliyrad e yad ra mang bang ko fare m’ag ni fan nga gil’ilungun Got ni weliy Jesus murung’agen ko fapi apostal ko re nep’ i n’em.​—Luke 22:​29, 30.