Rayog ni Ngam Nang e Gin ni Ngam Mus Riy u Nap’an ni Kam Mada’nag e Skeng

1-3. Mang e de yag ni nge rin’ reb e profet nu Judah, ma mang wenegan ni yib riy ngak? (Mu guy e sasing ni bay u tabolngin e re article ney.)

IMMOY ba ngiyal’ u nap’an ni be gagiyeg Jeroboam ni Pilung, ma aram me l’og Jehovah reb e profet rok ni ma par u Judah ni nge yan i weliy ko re pilung nu Israel nem nib kireb murung’agen e gechig ni bay ni tay ngak. I fol e re profet nem ko n’en ni yog Got ngak, ma aram me yan i yog e thin rok Got ko re pilung nem. I damumuw Jeroboam ko n’en ni yog e re profet nem ngak, machane me ayuweg Jehovah e re profet nem nde buch ban’en rok.​—1 Ki. 13:1-10.

² Tomuren e re n’ey u nap’an ni be sul fare profet i yan nga tafen, ma aram me mada’nag be’ nib moon ni ke pilibthir u bangi ban’en nib chugur nga Bethel. Ma aram me ban fare moon me yog ngak fare profet ni ku ir reb e profet rok Jehovah. Ere, bannag e re moon nem fare profet nib bitir ngak, ma aram e daki fol fare profet ko n’en ni yog Jehovah ngak ni aram e ‘dabi ka’ fa unum ban’en, maku dabi sul nga tabinaw ko re pa’ i kanawo’ ni yib riy.’ De m’agan’ Jehovah ko n’en ni rin’ e re profet rok nem. Ere, boch nga tomuren u nap’an ni be sul i yan nga tafen, ma aram me yib ba layon i og ngak u kanawo’ me li’ nge yim’.​—1 Ki. 13:11-24.

³ Ere, mang e rin’ me tolang e lem ko re profet nem ma aram me fol ko n’en ni yog fare pilibthir ngak? Der yog e Bible. Machane, sana rayog ni ke pagtalin nib t’uf ni nge ‘fol rok Got u fithik’ e sobut’an’.’ (Mu beeg e Mikah 6:8.) Ra ngad folgad rok Got u fithik’ e sobut’an’ ni bod rogon ni be yog e Bible, ma aram e be yip’ fan ni nge pagan’dad ngak Jehovah, ma gad tayfan mat’awun e gagiyeg rok, ma gad fol u rogon ni be pow’iydad. Be’ ni manang e gin ni nge mus riy e manang nib t’uf ni nga i meybil ko Chitamangidad ni bay u tharmiy ni ir reb e Got ni ma t’ufegey ma gubin ma rayog rok. Rayog rok fare profet ni nge yog ngak Jehovah ni nge tamilangnag ngak fapi n’en ni ke yog ngak ni nge rin’, machane der yog e Bible ni rin’ e re n’em. Ku arrogodad ni bay yu ngiyal’ nib t’uf ni ngad dugliyed boch ban’en nib mo’maw’, machane gathi rib tamilang e n’en nib fel’ ni ngad rin’ed. Machane, faan gad ra sobut’nag e lem rodad ma gad pag Jehovah ni nge pow’iydad, ma aram e rayog ni ngad siyeged boch e oloboch nrib gel e kireb riy.

4. Mang e gad ra weliy ko re article ney?

⁴ Kad weliyed ko fa binem e article fan ni kab ga’ fan ni nge nang e piin Kristiano e gin ni ngar musgad riy nge boch ban’en nib t’uf ni nge rin’ be’ ni manang e gin ni nge mus riy. Machane, mang boch ban’en ni ma buch rodad nrayog ni nge mo’maw’nag ngodad ni ngad nanged e gin ni ngad musgad riy? Ma uw rogon ni ngad maruweliyed e re fel’ngin ney ni nge yag ngodad ya nge yag nda pared nib sobut’an’dad u nap’an ni kad mada’naged boch e magawon? Chiney e ngad weliyed dalip ban’en nrayog ni nge mo’maw’nag ngodad ni ngad nanged e gin ni ngad musgad riy, nge rogon ni ngad ngongolgad u fithik’ e gonop u nap’an ni kad mada’naged e pi n’ey, ya nge yag nda nanged e fulweg ko gal deer ney.​—Prov. 11:2.

NAP’AN NRA THIL BOCH BAN’EN U RAROGODAD

5, 6. Uw rogon ni dag Barzillai ni manang e gin ni nge mus riy?

⁵ Nap’an nra thil boch ban’en u rarogodad ara maruwel rodad ma rayog ni nge mo’maw’ ni ngad nanged e gin ni ngad musgad riy. Nap’an ni yog David ngak Barzillai ni nge un ko par u tafen e pilung ni yugu aram rogon ni ke gaman 80 e duw rok, ma dabisiy ni manang nrib manigil e n’en ni ke yog David ngak. Ya faanra un ko par u rom ma aram e rayog ni nga i chag ngak e en pilung ni gubin ngiyal’. Machane, i siyeg Barzillai ni nge rin’ e re n’em. Mang fan? Bochan ni manang ni ke pilibthir ma dabun ni nge magawonnag David ni pilung. Ere, yog ngak David ni nge fek Chimham nsana reb e pagel ni fak ni ngar parew.​—2 Sam. 19:31-37.

⁶ Bochan ni manang Barzillai e gin ni nge mus riy, ma aram e n’en ni ayuweg ni nge dugliy e n’en nib fel’ ni nge rin’. De siyeg e n’en ni yog David ngak ni bochan e be lemnag ndabiyog ni nge rin’ e n’en ni yira yog ngak ara bochan ndabun ni ngan yoornag pa’ nga puluwon, ya rin’ e re n’em ni bochan e manang ni ke thil boch ban’en u rarogon maku bay boch ban’en ndabkiyog ni nge rin’. Dabun ni nge fek reb e maruwel ndabiyog rok. (Mu beeg e Galatia 6:4, 5.) Faanra ga’ fan u wan’dad e liw nib tolang, ara gad baadag ni nge gilbuguwdad, ara ngan nangdad, ma aram e rayog ni ngad ufanthingad, ara ud tagenginggad ngodad, me munmun me yib wenegan nib kireb ngodad. (Gal. 5:26) Machane, faanra gad manang e gin ni ngad musgad riy ma aram e ra ud maruwelgad pi walagdad u taabang ni ngad rin’ed boch ban’en ni yira pining e sorok riy ngak Got ma gad ayuweg yugu boch e girdi’.​—1 Kor. 10:31.

7, 8. Faanra gad manang e gin ni ngad musgad riy, ma uw rogon nra ayuwegdad ni nge dab da taga’gad ko tin ni gad be finey ni gad manang?

⁷ Faanra yoor ban’en ni be tay be’ murung’agen ma aram e ke yoor ban’en nib milfan ngak. Ma re n’ey e rayog ni nge mo’maw’nag ngak ni nge nang e gin ni nge mus riy. Nap’an ni rung’ag Nehemiah murung’agen e magawon ni be mada’nag e girdi’ u Jerusalem, ma aram me wenig ngak Jehovah ni nge ayuwegrad. (Neh. 1:4, 11) Nap’an ni dugliy Artaxerxes ni Pilung Nehemiah ni nge mang governor u Jerusalem, ma aram me fulweg Jehovah taban e meybil rok. Machane, yugu aram rogon nib tolang e liw rok Nehemiah, ma kub fel’ rogon, mab ga’ lungun u boch ban’en, machane dariy ba ngiyal’ ni i pagan’ ngak ara i pagan’ ko pi salap rok. I par ni be fol rok Got. Ma gubin ngiyal’ ni i beeg e Motochiyel rok Jehovah ni bochan e nge nang e n’en nib m’agan’ ngay ni nge rin’. (Neh. 8:1, 8, 9) Da i gelnag e thin ko girdi’ u tan pa’; ya i fanay boch ban’en ni bay rok ni nge ayuweg yugu boch e girdi’ ngay.​—Neh. 5:14-19.

⁸ N’en ni rin’ Nehemiah e be dag ni faanra gad manang e gin ni ngad musgad riy, ma rayog ni nge ayuwegdad ni ndab da taga’gad ko tin ni gad be finey ni gad manang u nap’an ni kan thilyeg e maruwel rodad, ara kan yoornag boch ban’en ni nge milfan ngodad. Bod ni, faanra taga’ reb e piilal ko salap rok, ma aram e rayog ni nge tabab i rin’ boch ban’en u lan e ulung ndabi ning e ayuw ngak Jehovah ko som’on. Fa reb e rayog ni nge dugliy be’ ban’en ngemu’ mfini meybil ngak Jehovah u tomuren ni nge ayuweg ni nge yib angin e n’en ni ke dugliy. Faanra rin’ be’ ban’en ni aray rogon, ma gur, aram e manang e gin ni nge mus riy? Be’ ni manang e gin ni nge mus riy e der ma taga’ ko tin ni be finey ni manang ni yugu aram rogon ni be rin’ ban’en ni ke yoor yay ni ke rin’, ya manang nde taareb rogon e salap rok ko salap rok Jehovah. (Mu beeg e Proverbs 3:5, 6.) Bochan ni gad boch i girdien e tabinaw rok Got, ma aram fan ni gad ma guy rogon ni ngad maruwelgad u taabang ni bod rogon reb e tabinaw ara reb e ulung ko bin ni nge bagadad me guy rogon ni nge mang ir e ba tolang u fithik’ e tin ni ka bay e walag.​—1 Tim. 3:15.

NAP’AN NI YIBE GATHIBTHIBNAGDAD ARA YIBE N’UFDAD NGA LANG

9, 10. Faanra gad manang e gin ni ngad musgad riy, ma uw rogon nrayog ni nge ayuwegdad ni ngad k’adedan’dad ko gathibthib ni yibe tay ngodad?

⁹ Rayog ni nge mo’maw’ rogon ni ngad gagiyegnaged e lem rodad u nap’an ni be gathibthibnagdad yugu boch e girdi’. I par Hannah ni yugu be yor ni bochan e i par Peninnah ni yugu be moningnag. Rib t’uf Hannah rok figirngin, machane dabiyog ni nge diyen. Boch nga tomuren u nap’an ni be meybil u tabernacle, ma aram me yog Eli ni ir e Prist nib Tolang ni ke chingaw. Aygum lemnag e re n’em! Machane, yugu aram rogon urngin e magawon ni mada’nag Hannah, ma i par nib gapas me fulweg lungun Eli u fithik’ e tayfan. Fare meybil ni tay Hannah ni ke yib u gum’irchaen e kan yoloy nga lan e Bible. Ma boor e thin ni yog riy ni be weliy rogon gelngin e michan’ rok ngak Got, ma be pining e sorok ngak, ma be yog ngak gelngin nib t’uf rok.​—1 Sam. 1:5-7, 12-16; 2:1-10.

¹⁰ Faanra gad manang e gin ni ngad musgad riy, maku ra ayuwegdad ni ‘ngad ngongliyed e ngongol nib fel’ ngad gelgad ngak e kireb.’ (Rom. 12:21) Kari yoor e kireb ko re fayleng rok Satan ney, ere ba t’uf ni ngaud guyed rogon ndabi magawon lanin’dad ni bochan e ngongol ni be rin’ e piin ni yad ba kireb. (Ps. 37:1) Nap’an nra sum e magawon u thildad boch e walag u lan e ulung, ma rayog ni ngari kireban’dad nib gel. Machane, be’ ni manang e gin ni nge mus riy e ra folwok rok Jesus. Be gaar e Bible: “Faan nog e thin nib kireb ngak ma de ta’ puluwon ni thin nib kireb . . . . machane me pag fan urngin ban’en ngak Got, ni ir fare Tapufthin nib mat’aw.” (1 Pet. 2:23) Manang Jesus ni Jehovah e ir e bay mat’awun ni nge fulweg taban e kireb. (Rom. 12:19) Ere, ku arrogon e piin Kristiano ni kan fonownagrad ni ngar sobut’naged lanin’rad ma dab ur “puluwniged e tagan.”​—1 Pet. 3:8, 9.

11, 12. (a) Faanra gad manang e gin ni ngad musgad riy, ma uw rogon nrayog ni nge ayuwegdad ni ngad pared nib sobut’an’dad u nap’an ni yibe n’ufdad nga lang? (b) Uw rogon ni nge m’ug ni gad manang e gin ni ngad musgad riy u rogon e munmad ni gad ma tay, nge rogon ni gad ma fal’eg yaadad, nge rogon e ngongol ni gad ma dag?

¹¹ Ku rayog ni nge mo’maw’ ni ngad nanged e gin ni ngad musgad riy u nap’an ni yibe n’ufdad nga lang nib pag rogon. Machane, am lemnag e n’en ni rin’ Esther u nap’an ni thil boch ban’en u rogon e par rok. Esther e ir be’ nrib pidorang ma reb e duw ni un maluknag ko falay ni ngari gel e pidorang rok. Gubin e rran ni ur pared e pi rugod nu Persia u taabang ni yad be guy rogon ko mini’ e arorad nra adag e en pilung. Yugu aram rogon ma i par Esther ni be tayfan urngin e girdi’ u tooben mab gapas. Ku de ufanthin ara tolangan’ u tomuren ni mel’eg e en pilung ni nge mang leengin.​—Esther 2:9, 12, 15, 17.

¹² Faanra gad manang e gin ni ngad musgad riy ma ra ayuwegdad e re n’ey ni ngaud munmadgad, ma gad be fal’eg rogon yaadad, ma gad be ngongol u reb e kanawo’ nra m’ug riy ni gad be tayfan yugu boch e girdi’. Gad manang ni “lem nib sumunguy ma ba gapas” e aram e n’en nra fal’egdad u wan’ e girdi’, ma gathi ngad ufanthingad ara ngad rin’ed boch ban’en ni bochan e nge guydad e girdi’. (Mu beeg e 1 Peter 3:3, 4; Jer. 9:23, 24) Pi n’en ni gad ma lemnag u rarogodad e ra munmun me m’ug ko thin nge ngongol rodad. Bod nrayog ni ngad guyed rogon ni ngad k’aringed yugu boch e girdi’ ni ngar lemnaged nib ga’ fadad ni bochan e maruwel ni gad ma rin’, ara bochan boch ban’en ni gad manang, ara boch e walag ni gad manangrad. Fa reb e rayog ni ngad weliyed boch ban’en u reb e kanawo’ ni nge m’ug riy ni fapi n’em e gadad e ke sum rodad ara ke yag ni nge buch ni bochdad ni yugu aram rogon ni bay boch e girdi’ ni kar ayuweged gadad. Machane, ke dag Jesus e kanawo’ nrayog ni ngad folwokgad riy. Gad manang nrayog ni nge k’aring e girdi’ ni ngar ngatgad nga rogon feni ga’ e gonop rok. Machane, ba ga’ ni ma yog e thin ni bay u lan e Pi Babyor ko Bible nni Yoloy Nsom’on ni Thin ni Hebrew. Fan ni i rin’ e re n’em e bochan ni nge nang e piin ni yad be motoyil ngak ni n’en ni be yog e ke yib rok Jehovah ma gathi bochan e llowan’ ara gonop rok.​—John 8:28.

NAP’AN NRA T’UF NI NGAD DUGLIYED BOCH BAN’EN

13, 14. Faanra gad manang e gin ni ngad musgad riy, ma uw rogon nrayog ni nge ayuwegdad ni ngad dugliyed boch ban’en nib fel’ rogon?

¹³ Nap’an nra t’uf ni ngad dugliyed boch ban’en ma rayog ni nge mo’maw’ ni ngad nanged e gin ni ngad musgad riy. Nap’an ni immoy apostal Paul u Cesarea, ma aram me yog Agabus ni profet ngak ni faanra yan nga Jerusalem, ma yira kalbusnag u rom, fa reb e nni li’ nge yim’. Ere, ri wenig e pi walag u rom ngak ndabi yan e ngaram. Yugu aram rogon me dugliy Paul ni nge yan nga Jerusalem. De taga’ ko tin ni be finey ni manang ara pag e re n’em ni nge k’aring e marus ngak. Ri pagan’ ngak Jehovah me fal’eg rogon ni fan ko maruwel nib t’uf ni nge rin’, me pag Jehovah ni nge pow’iy ko gin ni nge yan ngay. Ere, nap’an ni rung’ag e pi walag e re n’ey, ma aram e da kur guyed rogon ni ngar taleged ndab ki yan nga Jerusalem.​—Acts 21:10-14.

¹⁴ Faanra gad manang e gin ni ngad musgad riy, maku rayog ni nge ayuwegdad ni ngad dugliyed boch ban’en nib fel’ rogon ni yugu aram rogon ndad nanged ara dabiyog ni ngad gagiyegnaged e n’en nra buch nga tomuren. Bod ni, faanra kad tababgad ni ngad rin’ed boch e maruwel ni fan ngak Got u polo’ e tayim rodad, ma mang e gad ra rin’ u nap’an ni kad m’argad? Ma uw rogon ni faanra ke t’uf ni ngad ayuweged e gallabthir rodad ni kar pilibthirgad? Ma uw rogon ni ngad ayuweged gadad u nap’an ni kad pilibthirgad? Demtrug gelngin e meybil ni gad ra tay ara da fal’eged i gay e fulweg ko pi deer ney, ma dabiyog ni ngad nanged ni gubin. (Ekl. 8:16, 17) Machane, pagan’ rodad ngak Jehovah e ra ayuwegdad ni ngad nanged miki m’agan’dad ko pi n’en ndabiyog rodad. Tomuren ni kad fal’eged i gay murung’agen e pi n’ey, ma kad ninged e ayuw ngak boch e walag, ma kad meybilgad ngak Got ni nge pow’iydad, ma aram e ba t’uf ni ngad folgad u rogon ni be pow’iydad gelngin Got nib thothup. (Mu beeg e Eklesiastes 11:4-6.) Faan gad ra rin’ ni aray rogon ma aram e ra ayuwegdad Jehovah ni nge yib angin e n’en ni kad dugliyed, fa reb e ayuwegdad ni ngad thilyeged e n’en ni gad be lemnag ni ngad rin’ed.​—Prov. 16:3, 9.

NGAD MON’OGGAD U ROGON NI NGAD NANGED E GIN NI NGAUD MUSGAD RIY

15. Faanra ud fal’eged i lemnag rarogon Jehovah, ma uw rogon nra ayuwegdad ni ngad pared nib sobut’an’dad?

¹⁵ Faanra gad manang e gin ni ngad musgad riy, ma boor ban’en nrayog ni nge ayuwegdad riy. Machane, uw rogon ni ngad nanged rogon ni ngad mon’oggad u rogon ni gad ma rin’ e re n’ey? Ngad weliyed aningeg e kanawo’. Bin som’on e, rayog ni ngad mon’oggad u rogon ni gad ma rin’ e re n’ey, miki ga’ fan Jehovah u wan’dad ni faanra ud fal’eged i lemnag pi fel’ngin nrib pag feni fel’ nge rogon feni tolang. (Isa. 8:13) Dab da paged talin ni gad be fol rok Got ni Gubin Ma Rayog Rok, ma gathi reb e engel ara be’ e ir e gad be fol rok. Re n’ey e ra k’aringdad ni ngad ‘sobut’niged lanin’dad u tan pa’ Got nib gel gelngin.’​—1 Pet. 5:6.

16. Faan gad ra fal’eg i lemnag rogon e t’ufeg rok Got ngodad, ma uw rogon nra ayuwegdad ni ngad nanged e gin ni ngad musgad riy?

¹⁶ Bin migid e, faanra ud fal’eged i lemnag rogon ni ma t’ufegdad Jehovah ma ra ayuwegdad ni ngad mon’oggad u rogon ni ngad nanged e gin ni ngad musgad riy. I taarebrogonnag apostal Paul e ulung rok Got nga dowdad e girdi’. Rib ga’ fan urngin yang u dowdad ni ke ngongliy Jehovah. (1 Kor. 12:23, 24) Ere, ku arrogodad ni gad gubin ni ma ayuwegdad Jehovah ni yugu aram rogon ni bay boch i gadad ni bay boch ban’en ndabiyog rok. Der ma taarebnagdad ngak yugu boch e girdi’ ara tal ndab ki t’ufegdad ni bochan e oloboch ni kad rin’ed. Bochan e t’ufeg rok ngodad, ma rayog ni ngad pared nib pagan’dad ni yugu aram rogon nib thilthil rarogon e pi n’en ni gad be rin’ u lan e ulung rok.

17. Faan gad ra gay rogon ni ngaud sapgad nga fel’ngin yugu boch e girdi’, ma mang angin nra yib ngodad?

¹⁷ Bin dalip e, rayog ni ngari gel feni ga’ fan u wan’dad e maruwel ni ke pi’ Jehovah ngodad ni gad be rin’ ni faan gad ra folwok rok ngaud sapgad nga fel’ngin yugu boch e girdi’. Re n’ey e ra k’aringdad ni ngaud fithed laniyan’ yugu boch e girdi’ u boch ban’en ma gad be fol ko n’en ni ka rogned, ko bin ni ngad guyed rogon ni gadad e ngaud gagiyelgad u gubin ban’en ara ud pared ma gad be yog e n’en ni nge rin’ yugu boch e girdi’. (Prov. 13:10) Ku gad ra felfelan’ u nap’an ni ke yag boch e tow’ath ngorad u lan e ulung. Maku gad ra pining e sorok ngak Jehovah u nap’an ni gad ra guy rogon ni be tow’athnag pi walagdad “u fayleng ni polo’ ni Kristus e ke michan’rad ngak.”​—1 Pet. 5:9.

18. Uw rogon ni ngad skulnaged e nangan’ rodad ni nge ayuwegdad ni ngad nanged e gin ni ngaud musgad riy?

¹⁸ Bin aningeg e, faan gad ra skulnag e nangan’ rodad ni nga i fol ko pi kenggin e motochiyel u Bible, ma aram e rayog ni ngaud nanged e gin ni ngad musgad riy. Ma faan gad ra fil rogon ni ngaud lemnaged boch ban’en nrogon ni ma lemnag Jehovah, ma aram e rayog ni ngad nanged rogon ni ngaud dugliyed boch ban’en nib fel’ rogon. Faanra ud filed e Bible rodad ni gubin ngiyal’, ma gad be meybil, ma gad be fol ko n’en ni gad be fil, ma aram e rayog ni nga i gel e nangan’ rodad i yan. (1 Tim. 1:5) Ku gad ra nang rogon ni ngaud m’oneged yugu boch e girdi’ u wan’dad. Ma faan gad ra rin’ ni aray rogon, ma ke micheg Jehovah nra ‘yal’uwegdad’ me ayuwegdad ni ngad mon’oggad u rogon ni ngad nanged e gin ni ngad musgad riy nge rogon ni ngaud daged pi fel’ngin ko ngongol rodad.​—1 Pet. 5:10.

19. Mang e ra ayuwegdad ni ngad pared nib sobut’an’dad ndariy n’umngin nap’an?

¹⁹ Bochan taab oloboch ni rin’ fare profet nu Judah u fithik’ e tolangan’ rok ma aram me mul e yafos rok u pa’ me kireb e tha’ u thilrow Got. Machane, bin riyul’ riy e rayog ni ngad nanged e gin ni ngad musgad riy u nap’an ni kad mada’naged boch e skeng, ya boor e tapigpig rok Got ni yad ba yul’yul’ ni ur moyed kakrom maku boch i yad e ka bay e ngiyal’ ney ni kar micheged nrayog ni ngad rin’ed e re n’ey. Machane, ra n’uw nap’an ni gad be pigpig ngak Jehovah, ma aram e ri be gel feni ga’ fan ni ngaud taga’gad ngak. (Prov. 8:13) Ere, demtrug rarogodad, maku rayog ni ngaud folgad rok Jehovah. Ma ireray reb e tow’ath nra yag ngodad nrib manigil. Ere, mu guy rogon ni nga i par nib ga’ fan e re tow’ath ney u wan’um, mag athamgil u rogon nrayog rom ni ngaum fol rok Jehovah u fithik’ e sobut’an’ ndariy n’umngin nap’an.