“Piin Ba Gonop E Ba Moding”

“Mang e be ning Jehovah ngom . . . ngam marow e Got rom u taabang ni gab moding?”​—MIKAH 6:8, New World Translation.

1, 2. Mang fare ngongol ni moding, ma uw rogon nib thil e re n’ey ko ngan rin’ ban’en ni dan pi’ mat’awuy?

REB e apostal nib gilbuguwan e de rin’ ban’en ni nge k’aring e girdi’ ni ngar sapgad ngak. Reb e tapuf oloboch u Israel nib gel e ke yog ir ni ir e th’abi sobut ko tabinaw rok e chitamangin. Fare moon nib gilbuguwan ni immoy e i yog ni dan pi’ ngak e liw ni bin th’abi tolang. Ra bagayad ma i dag ni ir be’ nib moding.

² Moding e ba togopuluw ko fanowan’. Be’ nib moding e be sananag e salap rok nge puluwon ma der ma uf. Gathi ir be’ nib tolangan’, fa ba ufanthin, ara ba adag e liw ni tolang, ya ani ma gagiyegnag laniyan’ e ri manang e tin ndabiyog rok. Arfan, ni ma tay fan ma ma tiyan’ ko uw rogon ni be thamiy e girdi’ boch ban’en nge n’en ni yad be lemnag.

3. Uw rogon ni bay e gonop ko “piin ni yad ba moding”?

³ Ri bay tapgin ni fare Bible e be gaar: “Piin yad ba moding e yad ba gonop.” (Proverbs 11:2) Be’ nib moding e ba gonop ya bochan e be yan ko kanawo’ nib fel’ u wan’ Got, ma ra siyeg ni nge rin’ ban’en ni dan pi’ mat’awon ya ri tamra’ ngay. (Proverbs 8:13; 1 Peter 5:5) Fare gonop ko fare ngongol ni moding e ke m’ug nib riyul’ ko n’en ni i rin’ e pi tapigpig ku Got. Gad ra lemnag fa dalip i girdi’ ni bay ko bin somm’on e paragraph.

Paul​—e “Ba Sobut”’ Ma nni Tay ni ‘Ke Mil Fan’ Ban’en Ngak

4. Mang e maruwel nib thil ni ke yog ngak Paul?

⁴ Paul e ir be’ nib gilbuguwan u fithik’ e piin ni Kristiano kakrom, ma yira nang ko mang fan. Nap’an ni be un ko machib kakrom, ma ma milekag nge yan nga bang ni bokum biyu’ e mile palongin u maday maku ma yan u but’, ma ma ayuweg ni nge tababnag boch e ulung. Maku, I taw’athnag Jehovah Paul min piliyeg e changar rok ma ke nang rogon ni nge non ni thin nu ba yang ni dan fil ngak. (1 Korinth 14:18; 2 Korinth 12:1-5) Maku i thagthagnag Got ku Paul ni nge yoloy 14 e babyor ni pi n’ey e ke mang bang ko fare Christian Greek Scriptures. Ba tamilang, ni rayog ni nganog ni fare maruwel ni i tay e kab gel ko tin i rin’ yugu boch e apostal.​—1 Korinth 15:10.

5. Uw rogon ni i dag Paul nib thabthabel laniyan’ nrogon ni be lemnag ir?

⁵ Bochan nib gel e maruwel ni i tay Paul ko maruwel ko Kristiano, ma sana boch e girdi’ e ma lemnag ni i falfalan’ ya bochan ni ma sap yugu boch e girdi’ ngak, me uf ko mat’awon nni pi’ ngak. Machane, gathi aram rogon, ya ma gagiyegnag Paul laniyan’. I yog ni ir e “th’abi sobut’ u fithik’ urngin e apostal,” me ulul ngay ni gaar: “Ya dariy rogog ni nganog ni gag reb e apostal, ni fan e u gu gafgownag girdien e galesiya rok Got.” (1 Korinth 15:9) Bochan ni somm’on e ir e tatogopuluw ko piin Kristiano, ma aram fan nde pagtalin ni goo runguy rok Got e ke bing e kanawo’ ni nge fel’ thilrow Got, maku ke yog ni nge un nga boch e maruwel nib thil nbochan. (John 6:44; Efesus 2:8) Arfan, nde lemnag Paul ni tin ni i rin’ nib thil ni fan ko machib e i ayuweg ni nge mang be’ ni kab tolang ko yugu boch e girdi’.​—1 Korinth 9:16.

6. Uw rogon ni i gagiyegnag Paul laniyan’ u nap’an ni be chag ngak piyu Korinth?

⁶ Ke lingagil nib moding Paul ko ngiyal’ ni be chag ngak piyu Korinth. Ba tamilang, ni boch i yad e kar pininged e sorok ngak e piin piilal ni yad be lemnag ni yad e piin nib gilbuguwrad, ni ba muun ngay Apollos, Cephas, nge Paul. (1 Korinth 1:11-15) Machane de ning Paul ngak piyu Korinth ni ngar pininged e sorok ngak maku de lemnag ni ngar pied boch ban’en ngak nbochan e n’en ni i rin’. Nap’an ni yib Paul ni nge guyrad, ma de weliy “e thin nib pag rogon ara ngu daken e tamilangan’.” Machane, i weliy Paul murung’agen nge piin ni ma un ngak ni gaar: “Susun e ngam changargad ngomad ni gamad ba sobut’ ku Kristus min ta’mad ni ke mil fan ngomad e tin nib thothup rok Got ni dan nang.”a​—1 Korinth 2:1-5; 4:1, NW.

7. Uw rogon ni ku i gagiyegnag Paul laniyan’ u nap’an ni be pi’ e fonow ngak be’?

⁷ Nap’an ni thingar i pi’ Paul e fonow nib gel ngak be’ ma ku ke dag ni ma gagiyegnag laniyan’. I wenig ngak pi walagen ni Kristiano ni “bochan e runguy rok Got” ngu “daken e t’ufeg ma gathi daken gelngin mat’awon ni apostal. (Roma 12:1, 2; NW Filemon 8, 9, NW) Mang fan ni i rin’ Paul e n’en ni aray rogon? Ya bochan ni lemnag ni ir nge pi walagen e taareb rogorad ni ‘yad e tamaruwel’ ma gathi ir e ‘masta ko michan’ rorad.’ (2 Korinth 1:24, NW) Dariy e maruwar riy nbochan nib moding Paul ma arfan ni rib t’uf rok e piin kristiano ko fa bin somm’on e chibog.​—Acts 20:36-38.

Ngad Lemnaged e Maruwel Rodad nib Thabthabel

8, 9. (a) Mang fan nib fel’ ni ngada lemnaged gadad nib fel’ rogon? (b) Uw rogon ni ma dag e piin kan pag fan boch e maruwel ngorad ni yad ba moding?

⁸ I dag Paul e wok nib fel’ ni fan ko piin Kristiano ko ngiyal n’ey. Demtrug ko mang e maruwel ni kan tay ni ke mil fan ngodad, ma susun dariy bagadad ni ra lemnag ni ir e kab tolang ko yugu boch e girdi’. I yol Paul ni gaar, “Faanra be finey be’ ni ir e ba sorok, ma bin riyul’ riy e dariy rogon, ma aram e faanem e ir e be bannag ir.” (Galatia 6:3) Mang fan? Ya bochan “urngin e girdi’ ni ngongliy e denen.” (Roma 3:23; 5:12) Arrogon, thingar dabda paged talin ni fare denen nge yam’ ni yib nbochan Adam e ke af ngodad ni gadad gubin. Fare maruwel ni kan pi ngodad nib thil thil rogon e dabi thiliyeg rarogodad ni gadad e ta denen. (Eklesiastes 9:2) Ni bod rogon Paul, ya goo runguy rok Got e i ayuwegdad ni kada chuchugurgad ku Got, ku arrogon fare maruwel ni kan pi’ ngodad e kari yog ngodad nbochan.​—Roma 3:12, 24.

⁹ Ra nge tamilang u wan’uy e re n’ey, ma be’ ni ba moding e dabi tolangnag ir nbochan e maruwel ni kan pi’ ngak ara nge uf ko pi n’en ni be rin’. (1 Korinth 4:7) Nap’an ni nge pi’ e fonow ara thin nra pow’iyey, ma ra rin’ e re n’ey ni be lemnag ni yow l’agruw e ta maruwel​—ma gathi ir e masta. Ba riyul’, ni tin ba kireb e baaray ni en nib cheg u boch e maruwel e nge dabi lemnag ni nganog e sorok ngak ara nge lemnag ni nge yog boch ban’en riy ngak. (Proverbs 25:27; Matthew 6:2-4) Ra nganog e sorok ngak be’ ma kemus nra fel’ nfaanra yugu boch e girdi’ e ka rogned​—ma de t’uf ni ngan ning. Faanra ke yib ngodad e n’en ni aram rogon, ma dabda paged talin ni ra k’aringdad e re n’ey ni ngada lemnaged ban’en nib pag rogon.​—Proverbs 27:2; Roma 12:3.

10. Ngam weliy ko uw rogon ni boch e girdi’ ni be m’ug ni yad ba sobut’ e ba riyul’ ni “fel’ rogorad ko michan’ rorad.”

¹⁰ Faanra kan tay ni ke mil fan ngodad reb e maruwel, ma fare ngongol ni ngan gagiyegnag lanin’uy e ra ayuwegdad ni dabda n’ufed gadad, ma re n’ey e ra k’aring ni nge lemnag e girdi’ ni be mon’og e ulung iyan nbochan e maruwel ni kad ted nge salap rodad. Ni bod ni, gad ba salap i fil ban’en ngak be’. (Efesus 4:11, 12) Machane, faanra gad ma gagiyegnag lanin’dad, ma thingar dabda paged talin ni bay boch ban’en ni ri ma skulnagdad u nap’an e muulung ma gathi ban’en ni yib u platform. Ni bod ni, gathi ke gel e michan’ rom ko ngiyal’ ni kam guy reb e llabthir nib muchugbil ni ir nge pi bitir rok e yad ma yib nga Kingdom Hall gubin ngiyal’? Ara en ni ke kireban’ ma be par nib yul’yul’ ko muulung nyugu aram rogon ni ka be lemnag ni dariy fan e yafas rok? Ara fare fel’ yangaren ni be mon’og ko tirok Got ni yugu aram rogon ni ke gel e kireb u skul nge yu yang? (Psalm 84:10) Pi cha’ ney e sana gathi ba gilbuguwrad. Ma baga’ ni de nang yugu boch e girdi’ fapi skeng ni kara mada’naged. Machane, sana “ba fel’ rogon e michan’ ” rorad ntaabrogon ko pi cha’ nem nib gilbuguwrad. (James 2:5) Ran thabthabelnag ban’en, e aram ngan par nib yul’yul’ ko michan’ ma ra fel’ be’ u wan’ Jehovah.​—Matthew 10:22; 1 Korinth 4:2.

Gideon​—“En Th’abi Sobut’” u Tabinaw Rok e Chitamangin

11. Uw rogon ni i gagiyegnag Gideon laniyan’ u nap’an ni be non ngak e engel rok Got?

¹¹ Gideon, e ir reb e pagal nib fel’ fithik’ i downgin ko ganong rok Manasseh, ni immoy u nap’an e tayim ni kari wagey fare nam nu Israel. U lan medlip e duw, e ke par ni piyu Midian e ur magawonnaged girdien Got. Machane, ke yib e tayim nra ayuweg Jehovah e girdi’ rok. Arfan, ni i m’ug reb e engel ngak Gideon me gaar: “I gur reb e pumoon ni nda mur rus, mi Somol e ba’ rom.” Gideon e ir be’ ni ba moding, ere de uf nbochan e pi thin ni kanog ngak. I non ngak fare engel u fithik’ e tayfan ni gaar: “Mog, rayog ni gu fith ngom e re bugithin ni baaray? Faanra ba’ Somol romad me ere mang fan ni urngin e pi gafgow ney ni ke yib ngomad?” I tamilangnag fare engel urngin ban’en ngak Gideon ni gaar: “Mman u gelngim ni ba’ rom ngam chuweg piyu Israel u tan pa’ yu Midian.” Ma uw rogon ni i fulweg Gideon? De dag Gideon ni ri ba adag ni nge un ko re maruwel nem ya aram e kanawo’ ni nge mang be’ nib gilbuguwan ko nam rok, me fulweg ni gaar: “Somol, uw rogon ni nggu chuweg piyu Israel u tan pa’ yu Midia? Ya ba’ rog e girdi’ e ir e th’abi meewar u fithik’ girdien e ganong rok Manasseh, mi gag e th’abi sobut u fithik’ e girdi’ ko birog e tabinaw.” Rib moding!​—Judges 6:11-15.

12. Uw rogon ni i lebuguy Gideon e maruwel rok u fithik’ e gonop?

¹² I skengnag Jehovah Gideon u m’on ni l’og nge un ko mahl. Uw rogon? Ka nog ngak Gideon ni nge gothey e altar rok e chitamangin ni fan ku Baal ma ra th’ab fre duga’ nib thothup ni kan ta’ u tooben. Ba t’uf ni ra par ni dabi rus Gideon ko re maruwel n’ey, machane ku i dag nib moding mab gonop u rogon ni i rin’ me lebuguy e re n’en nem. I rin’ Gideon e re maruwel nem ni nep’ ni nge dabi nang e girdi’. Maku, i kol Gideon ayuwngin u rogon ni nge rin’ e maruwel rok. I pining fa ragag i tapigpig ngar uned ngak​—ya sana boch i yad e ngi i matanagiy ma boch i yad e nge ayuweg ngar kirebnaged fare altar nge fare duga’ nib thothup.b Demtrug ko aram rogon fa danga’, ma aram i taw’athnag Jehovah, me lebuguy Gideon e re maruwel nem, ma munmun mi fanay Got Gideon ni fan ni nge ayuweg piyu Israel ni nge dabkuura pared u tan pa’ piyu Midian.​—Judges 6:25-27.

Ngan Moding Ma Ngan Gonop

13, 14. (a) Uw rogon ni ngada gagiyegnaged lanin’dad nfaanra kan pi’ ngodad reb e maruwel? (b) Uw rogon ni dag Brother A. H. Macmillan rogon ni ba moding?

¹³ Boor ban’en ni gad ra fil rogon ko moding rok Gideon. Uw rogon, ni gad ra rin’ nfaanra kan pi’ ngodad reb e maruwel ni fan ku Got? Gad ra lemnag ko somm’on ni ra yoor e piin nra sap ngodad ara ra gilbuguwdad nbochan? Ara ngada gagiyegnaged lanin’dad u fithik’ e meybil ma gad lemnag ko rayog rogodad ni ngada lebuguyed e re maruwel n’ey fa? Brother A. H. Macmillan, ni yim’ ko duw ni 1966, e ir e en ni i dag e re ngongol ney. C. T. Russell, ni ir fa bin somm’on e president ko fare Watch Tower Society, e i fith ngak Brother Macmillan biyay ko mini’ e be lemnag ni rayog rok ni nge ulul ko re maruwel nem u nap’an ni ra yim’. U nap’an ni yow be thin, ma de ognag Brother Macmillan ir, nyugu aram rogon ni bay rogon ni nge rin’ e re maruwel nem. Ma tomur riy, i yog Brother Russell ngak Brother Macmillan ni nge fleg i lemnag ban’en ko ba adag ni nge fek e re maruwel nem fa. Ma tomur riy ni ke yan in e duw nga tomren i yol Brother Macmillan ni gaar, “Kug sak’iy ni kug lik’ath,” me ulul ngay ni gaar, “Mug lem gu lemnag nib fel’ rogon u fithik’ e yul’yul’, ma tomren ni ke n’uw nap’an boch ma kug meybilnag ngemu ma kefin gog ngak ni gub falfalan’ ngay ni nggu rin’ urngin ban’en nrayog rog ni nggu ayuweg e cha’ nem.”

¹⁴ De n’uw nap’an nga tomren, ma ke yim’ Brother Russell, ma ke par ndakuriy e president ni be ayuweg fare Watch Tower Society. Bochan ni nap’an fa bin tomur e milekag ni tay Brother Russell ni fan ko machib, ma Brother Macmillan e i par ni fan e nge ayuweg e maruwel rok, ma aram reb e brother e ke yog ngak: ni gaar, “Mac, bay rogom ni ngam mang prisedent. Ya bochan ni gur e ke pi’ Brother Russell ngom mat’awom ni ngam ayuweg e maruwel rok ko ngiyal’ ni ni demoy, ma ke yog ngomad ni gamad gubin ni nggu folgad ko thin ni ga ra yog. Me yan ma daki sul. Be m’ug ni gur e ga ra ayuweg e re maruwel n’ey.” I fulweg Brother Macmillan ni gaar: “Brother, gathi aram rogon ni ngan lemnag e re n’en ney. Ya maruwel rok Somol e re n’ey ma fare maruwel ni rayog ni nge yog ngom u lan e ulung rok Somol e goo aram e n’en ni ke guy nib m’ag ngom; ma ri gu manang ni gathi gag e guib m’ag ko re maruwel ney.” Ngemu’ me pining Brother Macmillan fithingan yugu be’ ni be lemnag nib ffel’ ni ir e ra fek fare gaf i maruwel. Bod rogon Gideon, nib sobutan’ u rogon ni be lemnag ir​—ma aram e lem nib fel’ ni nge yog ngodad.

15. Mang boch e kanawo’ nrayog ni ngada machibnaged yugu boch e girdi’ riy u fithik’ e gonop?

¹⁵ Ku arrogon gadad ma thingar da gagiyegniged lanin’dad u rogon ni ngada rin’ed e maruwel rodad. Gideon e ba gonop, me athamgil ni nge dabi damumuw ko piin ni tatogopuluw ko ngiyal’ ni dariy rogon. Taareb rogon, nap’an ni gad ra un ko machib, ma thingar da gagiyegniged lanin’dad ma ngad gonopgad u rogon ni ngada nongad ngak yugu boch e girdi’. Riyul’, ni gad be un ko mahl ni spiritual ni ngad kirebniged e “tin ni kan richibiy nib fel rogon” nge rogon ni ma “weliy” boch e girdi’ fan. (2 Korinth 10:4, 5) Machane dabda dariyfannaged yugu boch e girdi’ ara ngada rin’ed ban’en nib togopuluw ko machib rodad. Dab da rin’ed e n’en ni aray rogon, ya thingar da ted fan u rogon ni yad be lemnag ban’en, ngam weliy e n’en ntaareb rogon e lem rodad riy ngorad, ngemu’ ngam tiyan’um i weliy e tin nib fel’ ko machib rodad.​—Acts 22:1-3; 1 Korinth 9:22; Revelation 21:4.

Jesus​—Th’abi Fel’ Rogon ni Dag ni Ba Sobutan’

16. Uw rogon ni dag Jesus nib thabthabel laniyan’ nrogon ni be lemnag ir?

¹⁶ Ba th’abi fel’ ni dag Jesus Kristus rogon ni ma gagiyegnag laniyan’.c Yugu aram rogon nib fel’ thilrow e Chitamangin, ma de maruwaran’ Jesus ni nge yog ni bay boch ban’en ni dan pi’ mat’awon riy. (John 1:14) Ni bod u nap’an e chitiningin James nge John ni i wenignag ni fa gali cha’ ni fak e yow ra par nga tooben Jesus u gil’ilungun, me yog Jesus ngak ni gaar: “Dariy mat’awug ni nggu dugliy e en ni nge par nga ba’ ni mat’aw nge en ni nge par nga ba’ ni gilay’ rog.” (Matthew 20:20-23) Ma yug reb e rran nib thil, e de maruwaran’ Jesus ni nge yog ni gaar: “Dariy ban’en ni gu ra rin’ ni lem rog . . . ya gathi tin ni gub adag e ir e gu be guy rogon ni nggu rin’, ya ke mus ni tin ni ba adag e en ni l’ugeg ku gub.”​—John 5:30; 14:28; Filippi 2:5, 6.

17. Uw rogon ni i dag Jesus ni ir be’ nib moding u nap’an ni be chag ngak yugu boch e girdi’?

¹⁷ Kab tolang Jesus ngak e girdi’ ko urngin ban’en, ma bay mat’awom ni yib rok e Chitamangin, ni Jehovah, ni kab tolang ko urngin e girdi’. Machane, ma par Jesus nib moding u nap’an ni be chag ngak pi gachalpen. De dag Jesus ngorad e tamilangan’ ni ngari gin e girdi’ ngay ni fan ni nge tomalnag lanin’rad. Ri ma runguyrad Jesus ma ma lemnag e n’en nib t’uf rorad. (Matthew 15:32; 26:40, 41; Mark 6:31) Arfan, nyugu aram rogon nib flont Jesus, ma de lemnag ni ra flont pi gachalpen ko ngiyal’ nem. De ning ngak pi gachalpen ban’en ndabiyog ni ngar pied ngak, ma de pi’ e maruwel ngorad ndariy rogorad ni ngara rin’ed. (John 16:12) Arfan ni boor e girdi’ ni ma lemnag ni yad ra falfalan’ nfaanra ngar chaggad ngak!​—Matthew 11:29.

Mu folwok Rok Jesus Nrogon ni Ga Ma Gagiyegnag Lanin’um

18, 19. Uw rogon ni ngad daged ni gad be folwok rok Jesus (a) ko uw rogon ni gad be changar ngodad, nge (b) uw rogon e ngongol ni gad ma dag ngak yugu boch e girdi’?

¹⁸ Faan manga Jesus ni ir e en th’abi tolang ni immoy e yib nib girdi’ e i dag ni ma gagiyegnag laniyan’, mere kub t’uf ni nguuda rin’ed ni aray rogon. Baga’ ni girdi’ ni dawori flont e be mo’maw ni nge non ngak be’ ni dan pi’ ngak mat’awon ni tha’bi tolang. Piin ni Kristiano e ma athamgil ni ngar folwokgad rok Jesus u rogon ni ma gagiyegnag laniyan’. Gathi yad ba tolngan’ ni dabra pied e maruwel ngak e girdi’ ni bay rogorad ni ngar rin’ed e re n’ey; ara ba tolang e lem rorad ni dubrad ni ngar folgad ko thin ni ke yog e ani bay mat’awon. Yad ma dag ni yad baadag ni ngar ayuweged yad, ma aram e yad ma pag ni urngin ban’en u lan e ulung e yira rin’ nib “fel’ rogon mab yaram.”​—1 Korinth 14:40.

¹⁹ Fare ngongol ni ngan gagiyegnag lanin’uy e ra k’aringdad ni nge par nib thabthabel lanin’dad u rogon ni gad be lemnag e n’en nrayog rok yugu boch e girdi’ nge n’en nib t’uf rorad. (Filippi 4:5) Sana bay e salap rodad nge gelngidad ni dariy ku yugu boch e girdi’. Machane, faanra gad ma gagiyegnag lanin’dad, ma dabda athapeged ni gubin ngiyal’ ma rayog ni ngara rin’ed e n’en ni gad baadag ni ngara rin’ed. Bochan ni gad manang ni ra be’ ma bay ban’en ni dabiyog ni nge rin’, ma ra ayuwegdad e re n’ey ni ngada paged talin e oloboch rok yugu boch e girdi’. I yol Peter ni gaar: “Ma re n’en ni ir e th’abi ga’ fan u fithik’ urngin ban’en e ngari bigimed me t’uf rok bigimed, ya rogon nib t’uf be’ rok be’ e ra upunguy boor e denen.”​—1 Peter 4:8.

20. Mang e ngada rin’ed ni fan e nge war fare ngongol ni ngan rin’ ban’en ni dan pi mat’awuy?

²⁰ Rogon e n’en ni kad filed, e ba gonop e piin ni ma gagiyegnag lanin’rad. Ere uw rogon, nfaanra bay e magawon rom ya bay e lem rom ni ga ba adag ni ngam rin’ ban’en ni dan pi’ mat’awum? Dabi mulan’um. N’en nib fel’ ni ngam rin’ e ngam fol ko n’en ni rin’ David, i meybil ni gaar: “Mu kum ayuwegneg rok e denen nib gagiyel; dab mpageg ngi i gagiyegnageg.” (Psalm 19:13) Ngan folwok ko michan’ ko piin ni bod Paul, Gideon, nge​—ani kab ga’ ngak yugu boch e girdi’—​e Jesus Kristus, ma aram e rayog ni ngad riyul’ naged fapi thin ni gaar: “Piin ni ba moding e yad ba gonop.”​—Proverbs 11:2.

[Footnotes]

Ka Ga Manang?

• Mang fare ngongol ni moding?

• Uw rogon ni ngada folwokgad rok Paul u rogon nib moding?

• Mang e gad ra fil riy u murung’agen Gideon ni ba moding?

• Uw rogon ni i dag Jesus feni moding ni be pi’ e kanawo nib fel’?

[Picture on page 25]

Fare ngongol rok Paul ni be’ nib moding e i k’aring e pi walagen ni ngar t’ufeged

[Picture on page 27]

I lebuguy Gideon e maruwel rok u fithik’ e gonop

[Picture on page 28]

Jesus, ni ir fak Got, e i gagiyegnag laniyan’ ko urngin ban’en ni ma rin’