Mu Tang u Fithik’ e Felfelan’!

1. Mang e ma ayuwegdad e pi tang rodad ni ngad rin’ed?

BAY be’ ni ma yoloy e tang nib gilbuguwan ni yog ni gaar: “Thin ni ka nog e ra k’aringem ni ngam lemnag e n’en ni ke yog be’. Ma musik e ra k’aringem ni ngam thamiy e felfelan’ ara kireban’. Machane, tang e ra k’aringem ni ngam thamiy e pi n’en ni yibe weliy ko fare tang.” Pi tang ni gad ma yon’ e be pining e sorok ngak Jehovah ni Chitamangidad ni bay u tharmiy, ma be weliy gelngin e t’ufeg rodad ngak. Aram fan ni pi tang ni gad ma yon’ e aram bang ko bin riyul’ e liyor nib ga’ fan, ndemtrug ko yigoo gadad ni gad be tang ara gad be tang pi walagdad u taabang u nap’an e muulung.

2, 3. (a) Uw rogon u wan’ boch e walag ni ngar tanggad nib ga’ lamrad u nap’an e muulung? (b) Mang boch e deer ni gad ra weliy e fulweg riy?

² Machane, uw rogon u wan’um ni ngam tang nib ga’ lamam u nap’an e muulung? Ga be tamra’ ni ngam tang nib ga’ lamam, fa? Bochan rogon e yalen u boch e nam, ma rayog ni nge tamra’ boch e pumoon ni ngar tanggad u fithik’ e girdi’. Re n’ey e rayog ni nge magawonnag rogon e tang ni yima tay u nap’an e muulung, ya rayog ni nga i tawey e piin piilal nga boch ban’en ni bochan e nge dab ra uned ko tang ara ra tababgad i rin’ boch e maruwel u nap’an ni yibe tang.​—Ps. 30:12.

³ Faanra gad manang ni pi tang ni gad ma yon’ e aram bang ko liyor rodad, me ere ba mudugil ndab da chuwgad u nap’an ni yibe tang, fa reb e ngan tang u nap’an e muulung ma dad moyed. Ere, ba fel’ ni nge bagadad me fith ir ni nge gaar: ‘Uw rogon u wan’ug e tang ni yima tay u nap’an e muulung rodad? Mang e rayog ni nggu rin’ ni faanra gu be tamra’ ni nggu tang nib ga’ lamag u fithik’ e girdi’? Ma uw rogon ni nggu tang u fithik’ e felfelan’ ni ke yib gum’irchaeg?’

PI TANG NI YIMA YON’ E ARAM BANG KO BIN RIYUL’ E LIYOR NIB GA’ FAN

4, 5. Mang boch ban’en ni un rin’ ni fan ko pi tang ni yima yon’ ni bay rogon ko liyor ni un tay u Israel kakrom?

⁴ Tin riyul’ e tapigpig rok Jehovah e kab kakrom i yib ni yad ma fanay e musik ni ngar pininged e sorok ngak Jehovah. Nap’an ni i par piyu Israel ni yad ba yul’yul’ ngak Jehovah, ma pi tang ni yad ma yon’ e aram bang ko liyor ni ur ted nib ga’ fan. Bod nnap’an ni be yarmiy David ni Pilung boch e maruwel ni ngaun rin’ u tempel, ma aram me yarmiy 4,000 e pi Levite ni ngaur chubeged e pi talin e musik ni ngar pininged e sorok riy ngak Got. Ma 288 u fithik’ e pi Levite nem e “ri yad ba salap ko musik.”​—1 Kron. 23:5; 25:7, BT.

⁵ Maku reb e, nap’an ni yibe madnomnag fare tempel u nap’an ni ke m’ay, ma musik nge tang ni un tay e ku aram reb e ban’en nib ga’ fan ni un rin’ u nap’an e re madnom nem. Be gaar e Bible: “Yad be thoy e rappa, nge cymbal, nge ku boch e talin e musik, ni yad be pining e sorok ngak Somol ko tang . . . mi yigi suguy bangi manileng lan fare Tempel ni be matmat raen nga malup’lup’en Somol.” Dariy e maruwar riy nri gelnag e re n’ey e michan’ rok e piin ni ur moyed u rom!​—2 Kron. 5:13, 14, BT; 7:6.

6. Mu weliy rogon nni yarmiy e piin ni ngaur tanggad u nap’an ni Nehemiah e ir e governor u Jerusalem.

⁶ Nap’an ni be yarmiy Nehemiah rogon e maruwel ni be tay e piin ni yad ba yul’yul’ u Israel u nap’an ni yibe toy bayay fare yoror u Jerusalem, ma aram miki yarmiy boch e Levite ni ngaur chubeged boch e talin e musik ma yad be tang. Nap’an nni madnomnag fare yoror u tomuren ni ke m’ay, ma rib gel e felfelan’ ni tay e girdi’ ni bochan e pi musik nge tang ni un tay u nap’an e re madnom nem. Nap’an e re madnom nem, ma aram me yarmiy Nehemiah “l’agruw i ulung nib ga’ [“l’agruw ulung i girdi’ ni yad ma tang ni yad be og e magar ngak Got,” NW ].” Gal ulung nem e ur moyed u p’ebugul e yoror, mar ki’gad nge reb e ulung me yan u barba’ e re yoror nem mar bad ra gak’gad ko gin baaram ko fare yoror nib chugur ko tempel. Ur tanggad nrib ga’ lamrad nrayog ni ngan rung’ag nga palog. (Neh. 12:27, 28, 31, 38, 40, 43, BT) Dariy e maruwar riy nri felfelan’ Jehovah u nap’an ni rung’ag laman e pi tapigpig rok ni yad be tang u fithik’ e felfelan’ ni yad be pining e sorok ngak.

7. Uw rogon ni dag Jesus nib ga’ fan e tang ni ma tay e piin Kristiano ni fan ko liyor rorad?

⁷ Nap’an ni sum e ulung ni Kristiano, ma musik ni yima tay e ku aram bang nib ga’ fan ko bin riyul’ e liyor. Nap’an fare nep’ nth’abi ga’ fan u chepin e girdi’, ma aram mi i tang Jesus nge pi apostal rok u tomuren ni kar ted fare Abich ni Blayal’ rok Somol.​—Mu beeg e Matthew 26:30.

8. Uw rogon ni dag e pi Kristiano ko bin som’on e chibog e kanawo’ nib manigil u rogon e pi tang ni yad ma yon’ ni fan ko liyor rorad?

⁸ Ki dag e piin Kristiano ko bin som’on e chibog e kanawo’ nib manigil u rogon ni ur pininged e sorok ngak Got u daken e tang. Yugu aram rogon ni yad ma mada’ u tafen boch e walag ni gathi rib fel’ e naun rorad, machane kur ululgad ni ngaur tangnaged Jehovah u fithik’ e pasig. Nni thagthagnag nga laniyan’ apostal Paul ni nge fonownag pi walagen ni Kristiano ni gaar: “Um filed ngomed ma gimed be fonownagmed ngay u fithik’ e gonop. Umon’ed e tang ni thin rok Got ni bay ko Psalm, nge tang ni machib, nge tang ni murung’agen Got; um tangniged Got ni gimed be pining e magar ngak Got u wun’med.” (Kol. 3:16) Pi tang ni bay ko babyoren e tang rodad e bogi tang ni be weliy murung’agen e tirok Got ban’en nthingar u don’ed ni ‘gad be pining e magar riy ngak Got u wun’dad.’ Pi tang ney e aram bang ko pi n’en ni ma pi’ “fare tapigpig nib yul’yul’ ma ba gonop” ngodad ni fan ko tirok Got ban’en.​—Matt. 24:45.

N’EN NI NGAM RIN’ NI FAANRA GA BE TAMRA’ NI NGAM TANG

9. (a) Mang e rayog ni nge k’aring boch e girdi’ ni nge dab ra tanggad nib ga’ lamrad u nap’an e pi muulung nge assembly ni gad ma tay? (b) Susun ni uw rogon ni ngad pininged e sorok ngak Jehovah u daken e tang? Mini’ e piin nsusun e ngar daged e kanawo’ nrayog ni ngan folwok riy u rogon ni ngaun rin’ e re n’ey? (Mu guy e sasing ni bay u tabolngin e re article ney.)

⁹ Uw rogon ni faanra de mecham ngom ni ngaum tanggad chon e tabinaw rom u taabang, ara de m’ag ko yalen ko nam rom ara gin ni ga ma par riy ni ngaun tang u fithik’ e girdi’? Chiney ni ke yib e radio nge TV e sana ga baadag ni ga ma motoyil nga lungun boch e girdi’ ni yad ba cheg ko tang. Machane, nap’an ni ga ra taareb rogonnag lungum ngorad, ma sana rayog ni ngam tamra’ ara mu dabuy ni ngam tang. Machane, susun e dab mu pag e re n’ey ni nge k’aringem ni nge dab mu rin’ e n’en nib milfan ngom ni aram e ngaum pining e sorok ngak Jehovah u daken e tang. Ere, mu pug owchem nga lang, mag fek babyoren e tang rom ngam kol ni kam tay nga puluwon owchem, ma aram mag tang ni ke yib u gum’irchaem! (Ezra 3:11; mu beeg e Psalm 147:1.) Ngiyal’ ney e boor e Tagil’ e Liyor rodad ni bay boch e masin ni kan tay ngay nrayog ni ngaun pag yaan e thin ko pi tang ni gad ma yon’ riy. Re n’ey e rayog ni nge ayuwegdad ni ngad tanggad nib fel’ rogon. Maku reb e ban’en nib manigil e, kan yarmiy ni chiney e ngaun tang u nap’an fare skul ni ka nog e Kingdom Ministry School ngay ni ma un e piin piilal ngay. Re yaram ney ni kan fal’eg e be tamilangnag nib ga’ fan ni nge dag e piin piilal e kanawo’ nrayog ni ngan folwok riy ni aram e ngaur uned ko tang ni yima tay u nap’an e muulung.

10. Mang e susun ndab da paged talin ni faanra dubdad ni ngad tanggad nib ga’ lamdad ni bochan e gad be rus?

¹⁰ Marus e aram reb e ban’en ni ma taleg boor e girdi’ ndab ra tanggad nib ga’ lamrad. Rayog ni yad be rus nri gagiyel lungurad u fithik’ e girdi’ ara yad be lemnag nra dabuy e girdi’ ni ngar motoyilgad nga lamrad. Machane, susun e dab da paged talin ni “gadad gubin ni ba ga’ ni gadad ma oloboch” u nap’an ni gad be welthin. (Jas. 3:2) Yugu aram rogon, ma ka gad ma ulul ngaud nonad. Ere, mang fan ni ngad paged lamdad nde fel’ ni nge talegdad ndab da pininged e sorok ngak Jehovah u daken e tang?

11, 12. Mang boch e fonow ni kan pi’ nrayog ni nge ayuwegdad ni ngad mon’oggad ko tang?

¹¹ Maku reb e, rayog ni gad be tamra’ ni ngad tanggad ni bochan e dad nanged rogon ni ngad tanggad. Yugu aram rogon, ma bay boch e fonow nrayog ni nge ayuwegdad ni ngad mon’oggad ko tang.a

¹² Faan ga ra nang rogon ni ngam pogofan u nap’an ni ga be tang, ma aram e rayog ni ngam nang rogon ni ngam tang nib ga’ lungum mab tamilang. Gamig e ir e ma pi’ gelngin e dengki, ere rogon ni ga be pogofan e aram e n’en ni ma pi’ gelngin lamam u nap’an ni ga be non ara ga be tang. Susun e ngam tang ni bod ga’ngin lamam ni ga ma non ara ba ga’ boch ngay. (Mu guy boch e fonow ni bay ko fare ke babyor ni Benefit From Theocratic Ministry School Education ko page 181 nge mada’ ko 184 u tan fare thin ni kenggin e “Properly Control Your Air Supply” ni thin ni Meriken.) Bin riyul’ riy e, bay yu ngiyal’ ni ma pi’ e Bible e athamgil nga laniyan’ e pi tapigpig rok Jehovah ni ngar “tolulniged e felfelan’” u nap’an ni yad be tang ni yad be pining e sorok ngak Got.​—Ps. 32:11; 33:1-3.

13. Mu weliy rogon nrayog ni nge dab kud rusgad ni ngad tanggad.

¹³ Nap’an e fol Bible ni tabinaw ara nap’an ni ga bay u bang ni yigoo gur, mag gay rogon ni ngam rin’ e re n’ey: Mmel’eg reb e tang u lan e babyor ko tang rodad nri ga baadag. Mu beeg urngin e thin riy nib ga’ lamam mab tamilang. Ngemu’, mag beeg ba yil’ ni n’umngin nge m’ay mag fil e fan rom. Ga’ngin lamam ni kam beeg fare tang ni ga’ngin e ku aram ga’ngin lamam ni ngam beeg fare yil’ i tang. Tomuren e re n’ey, ma aram mag yon’ fare yil’ i tang nib ga’ lamam. (Isa. 24:14) Faan ga ra rin’ ni aray rogon, ma aram e rayog ni nge ga’ lamam ko tang, ma re n’ey e ban’en nib manigil. Dab mu rus ko re n’ey ara mu tamra’ ngay!

14. (a) Faan gad ra fal langadad nib ga’, ma uw rogon nrayog ni nge ayuwegdad u nap’an ni gad be tang? (Mu guy fare thin ni kenggin e “Rogon ni Ngam Mon’og ko Tang.”) (b) Mang boch e fonow ni be weliy rogon ni nge fel’ boch lamay ko tang ni ga be lemnag nrayog ni nge ayuwegem?

¹⁴ Dabiyog ni nge ga’ lamam ko tang ni faanra dab mu fal langam nib ga’. Ere, reb e ban’en ni ku rayog ni nge ayuwegem e aram e ngam fal langam nib ga’ boch ko bin baaray ni kam bing langam ni ngam non. Mang e rayog ni ngam rin’ ni faanra ga be lemnag ni kaygi achig ara kaygi makankan lamam? Rayog ni ngam pirieg boch e fonow nib manigil u murung’agen e re n’ey ko fare ke babyor ni Benefit From Theocratic Ministry School Education ko page 184 ko fare thin ni kenggin e “Overcoming Specific Problems” ni thin ni Meriken.

NGAD TANGNAGED E SOROK NI KEB U GUM’IRCHA’DAD

15. (a) Mang e nog u nap’an fare annual meeting nni tay ko duw ni 2016? (b) Mang boch i fan ni kan ngongliy ba ken e babyor ko tang nib beech?

¹⁵ Ba gel e felfelan’ nni tay u nap’an fare annual meeting ni tay fare Watch Tower Bible and Tract Society of Pennsylvania ko duw ni 2016, ya aram e ngiyal’ ni yog Brother Stephen Lett ni ir reb i girdien fare Ulung ni Ma Pow’iyey ni ke m’ay ba ken e babyor ko tang nib beech ni kenggin e “Ngad Tangnaged” Jehovah u Fithik’ e Felfelan’, ma dabi n’uw nap’an nga tomuren ma aram e yira pi’ e re ke tang nem ni nga u non’ u nap’an e muulung. I weliy Brother Lett nreb i fan ni kan ngongliy ba ken e tang nib beech e bochan ni nge puluw e pi tang riy ko fare ke Bible ni New World Translation of the Holy Scriptures ni kan ngongliy bayay. Bochan e re n’ey, ma aram fan nib t’uf ni ngan chuweg ara ngan thilyeg boch e thin ko pi tang rodad ndariy u lan fare ke Bible ni New World Translation ni kan ngongliy ko duw ni 2013. Maku reb e, kun uneg boch e tang ko pi tang nem ni be weliy murung’agen fare maruwel ni machib ni gad ma tay nge rogon feni ga’ fan fare biyul u wan’dad. Maku reb e, bochan ni tang ni gad ma tay e aram bang ko liyor rodad nib ga’ fan, ma aram fan ni baadag fare Ulung ni Ma Pow’iyey ni ngar ngongliyed ba ken e babyor ko tang nrib manigil ni taareb yaan wuru’ ko fare Bible ni New World Translation ni kan ngongliy bayay.

16, 17. Mang boch ban’en ni kan thilyeg ko ken nib beech e babyor ko tang?

¹⁶ Fare ke tang ni kenggin e “Ngad Tangnaged” Jehovah u Fithik’ e Felfelan’ e kan yarmiy e pi tang riy ni be yan u rogon murung’agen reb e ban’en nge reb. Bod ni fa 12 ni m’on e tang riy e be weliy murung’agen Jehovah, ma 8 ni migid ngay e murung’agen Jesus nge fare biyul, maku aram rogon ni kan yarmiy e tin ni ka bay nga tomuren. Bay murung’agen boch ban’en riy ni kan yarmiy u tabolngin e re ke tang nem nrayog ni nge ayuwegey. Re n’ey e rayog ni nge ayuweg reb e walag ni pumoon u nap’an ni be mel’eg reb e tang ni nga non’ ni bay rogon ko welthin ni fan ko yoor.

¹⁷ Bay boch e thin ko re ke tang ney ni kan thilyeg ni bochan e nge tamilang e n’en ni yibe weliy riy, ma kun chuweg yu bug e thin riy ndakunir yog e chiney ni bochan e nge yag nni ayuweg urngin e girdi’ ni ngar tanggad ni ke yib u gum’ircha’rad. Bod ni fare bugithin ni “shall” ni immoy ko ken ni thin ni Meriken e tang e gathi ri ka yima yog e chiney. Ere, kan thilyeg e re bugithin nem kan tay bbug nga lon nib thil. Maku reb e, fare tang ni kenggin e “Long-Suffering” e kan thilyeg ko “Exercise Patience,” maku arrogon e thin riy ni kan thilyeg. Kun guy nib t’uf ni ngan thilyeg fare tang ni kenggin e “Mu Kol Ayuw u Rogon ni Ga Ma Lem,” kan tay ni “Gad Ma Kol Ayuw u Rogon ni Gad Ma Lem” ni bochan e nge dabki m’ug ni yibe yog ngak be’ e n’en ni nge rin’. Mang fan? Ya kafram e ra yon’ be’ e re tang ney ma rogon e thin riy e be yog ngak be’ e n’en ni nge rin’. Re n’ey e rayog ni nge k’aring e piin ni ka yad bbeech, ara piin ni yad baadag e machib, ara piin fel’ yangaren, ara pi walag nib pin ni kar uned ko muulung, ara assembly, ara convention ni ngar kirkirebgad ni bochan e thin ko re tang ney. Ere, aram fan ni kan thilyeg kenggin e re tang ney nge thin riy.

18. Mang fan nsusun e ngad guyed rogon ni nge mit ngodad e pi tang u lan e ken nib beech e babyor ko tang rodad? (Mu guy e footnote.)

¹⁸ Boor e tang u lan fare ke babyor ko tang ni kenggin e “Ngad Tangnaged” Jehovah u Fithik’ e Felfelan’ e bod yu yil’ i meybil. Pi tang ney e rayog ni ngam weliy lanin’um riy ngak Jehovah. Ku bay boch e tang riy nrayog ni nge ayuwegdad ni nge bagadad me pi’ e athamgil nga laniyan’ bagadad, ‘ma be dag ngak nib t’uf rok ma be rin’ e tin nib fel’ ngak.’ (Heb. 10:24) Ere, dariy e maruwar riy ni gad baadag ni ngad nanged rogon lingan nge payngin e musik riy, miki mit e thin riy ngodad. Rayog ni nge mit e pi tang ney ngom ni faanra mmotoyil nga laman boch e walag ni yad be yon’ e pi tang ney ko fare website ni jw.org. Faan ga ra fil e pi tang ney u tabinaw, ma aram e rayog ni ngam nang rogon ni nga mon’ nib ga’ lamam ni ke yib u gum’irchaem.b

19. Uw rogon nrayog ni nge liyor urngin e girdi’ u lan e ulung ngak Jehovah?

¹⁹ Dab mu pagtalin ni tang ni gad ma yon’ e aram bang ko liyor rodad nib ga’ fan. Aram reb e kanawo’ nrib manigil nrayog ni ngad daged riy ngak Jehovah nib t’uf rodad, ma gad be pining e magar ngak ko pi n’en ni ke rin’ ni fan ngodad. (Mu beeg e Isaiah 12:5.) Ere, nap’an ni ga ra tang u fithik’ e felfelan’, ma aram e ga be pi’ e athamgil nga laniyan’ yugu boch e girdi’ ni ngkur tanggad nib ga’ lamrad. Gad gubin u lan e ulung ni tabab ko piin bitir nge yan i mada’ ko piin pilibthir, nge piin ni ka yad bbeech nrayog ni ngad liyorgad ngak Jehovah ni aray rogon. Ere, dab mu tamra’ ni ngam tang ni ke yib u gum’irchaem. Ya ngam fol ko n’en ni yog fare psalmist ni gaar: “Mu tangniged Somol!” Arrogon, mu tang u fithik’ e felfelan’!​—Ps. 96:1.