Mu Siyeg e Lem nu Fayleng

1. Mang fonow e yoloy apostal Paul nge pi’ ngak e pi Kristiano kakrom? (Mu guy e sasing ni bay u tabolngin e re article ney.)

I YOLOY apostal Paul e babyor rok ngak e pi Kristiano u Kolose u nap’an ni immoy u Roma nib kalbus u bang u thilin e duw ni 60 nge mada’ ko 61 C.E. I weliy ngorad feni ga’ fan ni nge yag ngorad e “gonop nge tamilangan’” ni ma pi’ gelngin Got nib thothup. (Kol. 1:9) Ki ulul Paul ngay ni gaar: “Ere nggog ngomed ni nge lungug: mu guyed rogon ya ri bannagmed be’ ko tugthin ni bay ra feked i yib ngomed ni gathi ir e tin nib riyul’, ndemturug feni manigil ni gimed be rung’ag ma dab mu folgad riy. Mu guyed rogomed ya ri kolmed be’ ngam manged kalbus rok ni be’ ni be maruwel ko gonop rok e girdi’ nge sabanban ndariy rogon nga bayang, ni yib ko machib ni sum rok e girdi’ ni yibe fil ngak reb e mfen nge reb, ma ki yib ko pi kan ni yad be gagiyeg u lan e gin’en ni ba’ urngin ban’en nu lan e lang riy nib muun e fayleng ngay, ma gathi Kristus e yib rok.” (Kol. 2:4, 8) Tomuren ni yog Paul e pi thin ney, ma aram me weliy fan ni bay boch e lem ni ke garer u gubin yang nde puluw nge fan nib mom ni nge adag e girdi’ e lem nu fayleng. Bod ni, lem ni aray rogon e rayog ni nge k’aring be’ nge lemnag ni boor ban’en ni manang ara ba sorok ko tin ni ka bay e girdi’. I yoloy Paul e gi babyor nem ni fan e nge ayuweg e pi walag ni ngar siyeged e lem nu fayleng nge ngongol nib kireb.​—Kol. 2:16, 17, 23.

2. Mang fan ni ngad weliyed murung’agen boch e lem ni ma tay e girdi’ nu fayleng?

² Lem nu fayleng e ma k’aring e girdi’ ni nge dab ra folgad ko pi kenggin e motochiyel rok Jehovah. Ere faanra dab da kol ayuwgad, ma re lem ney e rayog ni nge munmun me warnag e michan’ rodad. Ngiyal’ ney e gubin ngiyal’ ni gad ma guy rogon e lem ni ma tay e girdi’ nu fayleng. Gad ma guy e re n’ey u TV, ara Internet, ara tabon e maruwel, ara skul. Re article ney e gad ra weliy riy e n’en nrayog ni ngad rin’ed ya nge dab da paged e mit ney e lem ni nge kirebnag rogon ni gad ma lem. Gad ra weliy rogon lal mit e lem ni ma tay e girdi’ nu fayleng nge rogon nrayog ni ngad siyeged.

BA T’UF NI NGE MICH GOT U WAN’DAD, FA?

3. Mang reb e lem ni boor e girdi’ ni baadag, ma mang fan?

³ “Rayog ni nggu mang be’ nib fel’ ni yugu aram rogon nde mich Got u wan’ug.” Boor e nam ni boor e girdi’ riy ni yad ma yog nde mich Got u wan’rad. Pi girdi’ ney e yad ma yog ndariy barba’ e teliw ni yad ba muun ngay. Bin riyul’ riy e, girdi’ ni aray rogon e sana dawor ra fal’eged i lemnag ko rriyul’ ni bay e Got fa dariy. Kemus ni yad ba felfelan’ ngay nib puf mat’awrad ni ngar rin’ed e tin ni yad baadag. (Mu beeg e Psalm 14:1.) Ku bay boch e girdi’ ni yad ma lemnag nra m’ug ni yad ba llowan’ ni faan yad ra yog ni lungurad, “Rayog ni ngaug rin’ e ngongol nib fel’ ni yugu aram rogon nde mich Got u wan’ug.”

4. Uw rogon nrayog ni ngad ayuweged be’ nib mich u wan’ ndariy be’ ni Ke Sunmiy urngin ban’en?

⁴ Gur, ba puluw ni nge mich u wan’uy ndariy be’ ni Ke Sunmiy urngin ban’en? Bay boch e girdi’ ni ma maathuk lanin’rad u nap’an ni yad ra sap ko pi n’en ni ke fil e piin llowan’ ni nge ayuwegrad ni ngar nanged ko rriyul’ ni bay be’ ni ke sunmiy urngin ban’en fa danga’. Machane bin riyul’ riy e, rib mom e fulweg ko re deer ney. Gur, bay reb e naun ni kaygi par me sum? Dariy, ya ba mudugil ni bay be’ ni ir e ke toy! Machane, tin nib fos ban’en e ka boor nochi ban’en u rarogon nrib mo’maw’ ni ngan nang fan ni kab gel e thil riy ko naun ni kan toy. Mus ko tin th’abi achig e cell ni bay u fithik’ e yafos nrayog ni nge yoor ni ir rok. Re n’ey e dabiyog ni nga yigi buch u reb e naun ni ir rok. Re n’ey e be yip’ fan ni pi cell ni bay u fithik’ e pi n’en nib fos e rayog rok ni nge chaariy boch ban’en ni ma ayuweg e pi cell nem ni ngki yoor, maku rayog ni ngki pi’ nge yan nga reb e cell nge reb. Ere, mini’ e sunmiy e pi cell nem nrayog ni nge rin’ e pi n’ey? Be pi’ e Bible e fulweg riy ni gaar: “Urngin e naun ma mmudugil ni ba’ be’ ni ir e toy​—mi Got e ir e ke sunumeg urngin ban’en.”​—Heb. 3:4.

5. Mang e rayog ni nga dogned u murung’agen fare lem ni ma tay boch e girdi’, ni aram e rayog ni nge nang be’ e n’en nib fel’ ni nge rin’ ni yugu aram rogon nde mich Got u wan’?

⁵ Mang e rayog ni nga dogned u murung’agen fare lem ni ma tay boch e girdi’, ni aram e rayog ni nge nang be’ e n’en nib fel’ ni nge rin’ ni yugu aram rogon nde mich Got u wan’? Riyul’ ni be yog e Thin rok Got ni mus ko girdi’ nde mich Got u wan’rad ni yad ma rin’ boch ban’en nib fel’. (Rom. 2:14, 15) Bod nrayog ni ngaur t’ufeged ma yad be tayfan e gallabthir rorad. Machane bin riyul’ riy e, faanra dab ra folgad ko pi motochiyel rok Jehovah, ma rayog ni ngar dugliyed boch ban’en nrib gel e kireb riy. (Isa. 33:22) Boor e girdi’ e ngiyal’ ney nib tamilangan’rad ni ke mich u wan’rad nib t’uf ni nge ayuweg Got e girdi’ ni bochan urngin e kireb ni be buch u roy e fayleng. (Mu beeg e Jeremiah 10:23.) Ere, de puluw ni ngad lemnaged nrayog rok be’ ni ngari nang e n’en nib fel’ ni nge rin’ ni ir rok ni faanra de mich Got u wan’ ma der fol ko pi motochiyel rok.​—Ps. 146:3.

BA T’UF NI NGAD UNED NGA BARBA’ E TELIW, FA?

6. Mang e ma lemnag boor e girdi’ u murung’agen e teliw?

⁶ “Rayog ni ngam par ni gab felfelan’ ni yugu aram rogon ndamur un nga barba’ e teliw.” Boor e girdi’ nib puluw u wan’rad e re lem nu fayleng ney ni bochan e yad ma lemnag ni teliw e ban’en ni ma k’aring e chalban ko girdi’ ma dariy gam’engin ngorad. Maku reb e, boor e girdi’ ni kar dabuyed ni ngar uned nga yurba’ e teliw ni yad ma machibnag murung’agen e nifiy ndabi math biid, ara yad ma towasariy e girdi’ ni ngaur pied e salpiy ko galesiya, ara yad ma pi’ e ayuw ko pi n’en ni ma rin’ e am. Dariy e maruwar riy ni aram fan ni be yoor e girdi’ i yan ni yad be lemnag nrayog ni ngar pared ni yad ba felfelan’ ni yugu aram rogon ndarur uned nga barba’ e teliw! Pi girdi’ ney e sana rayog ni nge lungurad, “Gu baadag ni nggu nang murung’agen Got, machane dabug ni nggu un nga barba’ e teliw.”

7. Uw rogon ni ma ayuweg e bin riyul’ e liyor e girdi’ ni ngar pirieged e felfelan’?

⁷ Ere gur, riyul’ nrayog ni nge par be’ nib felfelan’ ni yugu aram rogon nder un nga barba’ e teliw? Bin riyul’ riy e, rayog ni nge par be’ nib felfelan’ ni faanra der un ko teliw ni googsur. Machane, dabiyog ni ngari felfelan’ be’ ni faanra dariy e tha’ u thilrow Jehovah ni ir “fare Got nib felfelan’.” (1 Tim. 1:11, NW) Gubin ban’en ni ma rin’ Got ni ma yib angin ko girdi’. Ba felfelan’ e pi tapigpig rok ni bochan e yad ma ayuweg e girdi’. (Acts 20:35) Am lemnag rogon nrayog ni nge ayuweg e bin riyul’ e liyor chon e tabinaw ni nge yib e felfelan’ nga lan e tabinaw rorad. Bin riyul’ e liyor e yima fil riy ngodad ni ngad ted fan e en mabgol rodad, ma gad tayfan e n’en ni kad micheged ko en mabgol rodad, ma dab da pared be’ ni gathi mabgol rodad, ma gad chuguliy boch e bitir ni yad ma tayfan e girdi’, mu ud daged e bin riyul’ e t’ufeg. Bin riyul’ e liyor e be ayuweg e girdi’ rok Jehovah u ga’ngin yang e fayleng ni ngar maruwelgad u taabang u fithik’ e gapas mu ur daged e t’ufeg ngorad u lan e ulung.​—Mu beeg e Isaiah 65:13, 14.

8. Uw rogon nrayog ni ngad fanayed fare thin ko Matthew 5:3 ni ngad fal’eged i lemnag fare deer ni be gaar, Mang e ma yibnag e felfelan’ ko girdi’?

⁸ Uw rogon ni ngad gayed ngad nanged ko ba puluw fare lem ni ma tay e girdi’ nu fayleng ni aram e rayog ni nge par be’ nib felfelan’ ni yugu aram rogon nder pigpig ngak Got? Am lemnag e re deer ni baaray ni be gaar, Mang e ma yibnag e felfelan’ ko girdi’? Boch e girdi’ e yad ma felfelan’ ko maruwel rorad, ara ba mit e gosgos ni yad ma un ngay, ara boch ban’en ni yad baadag ni yad ma rin’. Ma yugu boch e girdi’ e yad baadag ni ngar ayuweged chon e tabinaw nge pi fager rorad. Gubin e pi n’ey nrayog ni nge yibnag e felfelan’ ko girdi’. Machane, bay ban’en ni kab ga’ fan nrayog ni ngad rin’ed ko yafos rodad nra yibnag e felfelan’ ngodad ndariy n’umngin nap’an. Gad ba thil ko gamanman ni bochan e rayog ni ngad nanged murung’agen e En ni Ke Sunmiydad ma gad pigpig ngak u fithik’ e yul’yul’. Kun sunmiydad u reb e kanawo’ nrayog ni ngad felfelan’gad ko pigpig ni gad be tay ngak e En ni Ke Sunmiydad. (Mu beeg e Matthew 5:3.) Bod ni, tin riyul’ e tapigpig rok Jehovah e nap’an ni yad ra muulung nga taabang ni ngar liyorgad ngak mab gel e felfelan’ ni yad ma tay, ma kub gel e athamgil ni ma pi’ nga lanin’rad. (Ps. 133:1) Ku yad ma felfelan’ ni bochan e ba taareban’rad pi walagrad u lan e ulung, mab beech e ngongol rorad, ma kub manigil e athap rorad ni fan ko gabul nge langlath.

BA T’UF BOCH E MOTOCHIYEL NI NGE GAGIYEGNAG ROGON E NGONGOL RODAD, FA?

9. (a) Mang reb e lem u murung’agen e par ko pumoon nge ppin ni ke garer u fayleng? (b) Mang fan ni be yog e Thin rok Got nib kireb ni nge par l’agruw ni’ ndawor ra mabgolgow?

⁹ “Mang e ba kireb riy ni ngam parew be’ ndawor mu mabgolgow?” Sana rayog ni nge gaar e girdi’ ngodad: “Thingar da felfelan’gad ko yafos rodad. Ere, mang e ba kireb riy ni ngam parew be’ ndawor mu mabgolgow?” Bin riyul’ riy e, de puluw fare thin ni ma yog e girdi’ ni aram e susun e nge m’agan’ e piin Kristiano ko ngongol ndarngal ni yima tay. Mang fan? Bochan e be yog e Thin rok Got nib kireb e ngongol ndarngal.a (Mu beeg e 1 Thessalonika 4:3-8.) Bay mat’awun Jehovah ni nge ngongliy e motochiyel ni ngaud folgad riy ni bochan e ir e ke sunmiydad. Ere, fare motochiyel rok ni be yog ni kemus ni be’ nib pumoon nge be’ nib pin ni yow ba mabgol e rayog ni ngar parew, e aram bang ko yaram ni ke ngongliy ni fan ko piin mabgol. Ke pi’ Got e motochiyel ngodad ni bochan e gad ba t’uf rok, maku ra yib angin ngodad. Faanra fol chon e tabinaw ko pi motochiyel ney, ma aram e rayog ni ngar pared ni bay e t’ufeg, nge tayfan, nge pagan’ u thilrad. Machane, ra gechignag Got e piin ni yad ma th’ab e motochiyel rok ni lem rorad.​—Heb. 13:4.

10. Uw rogon nrayog ni nge siyeg reb e Kristiano e ngongol ndarngal?

¹⁰ Be fil e Thin rok Got ngodad rogon ni ngad siyeged e ngongol ndarngal. Reb e kanawo’ nib ga’ fan nrayog ni ngad rin’ed e re n’ey riy e aram e ngad gagiyegnaged rogon e pi n’en ni gad ma yaliy. I gaar Jesus: “En nra sap ngak be’ ni ppin me finey ni manga yugu ra pirew, e ke kireb e rok, ni fan e kar pirew u fithik’ i laniyan’. Ere faanra waliyem e ba’ ni mat’aw i owchem ngam denen, ma ga luf ngam n’ag!” (Matt. 5:28, 29) Ere, piin Kristiano e thingar dab ur yaliyed yaan e ngongol ni puwlag ara ur motoyilgad nga boch e tang ni bay murung’agen e ngongol ndarngal riy. I yol apostal Paul ngak e pi Kristiano kakrom ni gaar: “Mu lied ngem’ e ar’ar nu fayleng ni be maruwel u fithik’ i dowmed, ni aram e darngal.” (Kol. 3:5) Maku reb e, ba t’uf ni ngad gagiyegnaged rogon e lem rodad nge pi n’en ni gad ma weliy.​—Efe. 5:3-5.

BA FEL’ NI NGAD NAMEGED NI NGE YAG REB E MARUWEL NIB FEL’ NGODAD, FA?

11. Mang fan nib mom ni ngad adaged ni ngad uned nga reb e maruwel nib manigil?

¹¹ “Ga ra nameg reb e maruwel nib fel’, ma aram e ga ra felfelan’.” Boor e girdi’ ni yad ma yog ngodad ni ngad nameged ni ngad uned nga reb e maruwel nib manigil ni bochan e rayog ni nge gilbuguwdad, ara yib mat’awdad ni nga dogned e n’en ni nge rin’ e girdi’, ara yoor e salpiy rodad. Ere, bochan ni boor e girdi’ ni yad ma nameg ni nge yag reb e maruwel nib fel’ ngorad, ma aram fan nib mom ni nge af e re lem ney ngak reb e Kristiano.

12. Faanra yag reb e maruwel nib fel’ ngak be’, ma aram e rayog ni nge par nib felfelan’, fa?

¹² Gur, riyul’ ni faanra yag reb e maruwel nib fel’ ngak be’ nrayog ni nge yib mat’awun ni nge yog e n’en ni nge rin’ e girdi’ ara gilbuguwan, ma aram e rayog ni nge par nib felfelan’? Danga’. Dab mu pagtalin ni Satan e ir e som’on ni adag ni nge gagiyegnag yugu boch e girdi’ me gilbuguwan. Bin riyul’ riy e, der yag ni nge felfelan’ ya yugu be par nib damumuw. (Matt. 4:8, 9; Rev. 12:12) Machane, faan gad ra ayuweg e girdi’ ni nge yib angin e gonop rok Got ngorad me yag e yafos ndariy n’umngin nap’an ngorad, ma aram e rayog ni ngad pared ni gad ba felfelan’. Dariy ba mit e maruwel ni yima un ngay u fayleng ni nge yag e salpiy riy nrayog ni nge k’aring e mit ney e felfelan’ ngodad. Maku reb e, lem nu fayleng e ma k’aring e girdi’ ni ngaur tagenginggad ngorad, ara ngar guyed rogon ni ngar rin’ed ban’en ni kab fel’ nga rogon ni ke rin’ be’, ara i awan’rad ngorad. Gubin e pi n’ey e ra yan i tomur ma bod ni “yibe lol’og e nifeng.”​—Ekl. 4:4, BT.

13. (a) Susun ni nge uw rogon u wan’dad e maruwel ni gad ma un ngay ni nge yag e salpiy riy? (b) Mang e n’en nri yibnag e felfelan’ ngak Paul nrogon ni weliy ko babyor ni yoloy nge pi’ ngak piyu Thessalonika?

¹³ Riyul’ nib t’uf ni nge yag e salpiy ngodad ni ngad yognaged e tin nib t’uf ko par rodad, maku dariy ban’en nib kireb riy ni ngad uned nga ba mit e maruwel ni gad baadag. Machane, thingar dabi par e maruwel ni gad ma un ngay ni nge yag e salpiy riy ni aram e n’en nib m’on u lan e yafos rodad. I gaar Jesus: “Dariy be’ nrayog ni nge mang sib rok l’agruw i masta: ya ra fanenikay bagayow me t’uf bagayow rok; ya ra yul’yul’ ngak bagayow me darifannag bagayow. Dabiyog ni ngam manged tapigpig rok Got ma ki gimed e tapigpig rok e salpiy.” (Matt. 6:24) Ere, faan gad ra tedan’dad ko pigpig ni gad be tay ngak Jehovah ma gad fil e Thin rok ko girdi’, ma rib gel e felfelan’ ni gad ra tay. Ireray e n’en ni buch rok apostal Paul. Nap’an ni kab pagel, ma aram me dugliy ni nge rin’ reb e maruwel nra fel’ rogon riy ni aram e nge mang reb e tamachib ko teliw rok e pi Jew. Machane, i yag ni nge pirieg e bin riyul’ e felfelan’ u nap’an ni mang reb i gachalpen Jesus, mi i guy rogon ni be fol e girdi’ ko thin rok Got ma be yib angin nga lan e yafos rorad. (Mu beeg e 1 Thessalonika 2:13, 19, 20.) Dariy reb e maruwel u roy u fayleng nrayog ni ngad felfelan’gad ngay ni aray rogon.

RAYOG NI NGAD PITHIGED E MAGAWON NI BE MADA’NAG E GIRDI’, FA?

14. Mang fan ni boor e girdi’ nib puluw u wan’rad fare lem ni aram e rayog ko girdi’ ni ngar pithiged e pi magawon rorad?

¹⁴ “Rayog ko girdi’ ni ngar pithiged e pi magawon rorad.” Sana boor e girdi’ nib puluw e re lem ney u wan’rad. Mang fan? Ya faanra riyul’ e re n’ey, ma aram e be yip’ fan nde t’uf ni nge pow’iy Got e girdi’, maku rayog ni ngar rin’ed e tin ni yad baadag. Maku reb e, sana boor e girdi’ ni yad be lemnag nrayog ko girdi’ ni ngar pithiged e pi magawon rorad ni bochan e kan pirieg ni ke war e mahl, ma ke buchuuw e kireb ni yibe rin’ nib togopuluw ko motochiyel, nge m’ar, nge gafgow ni be tay e girdi’ ko par. Rogon ni ke yog reb e report e: “Fan ni be mon’og e par ko girdi’ e bochan ni ke dugliy e girdi’ ni ngar fal’eged e re fayleng ney nge fel’ e par riy.” Ere gur, be dag e re thin ney ni aram e rayog ko girdi’ e chiney ni ngar pithiged e pi magawon ni ke n’uw nap’an ni be gafgow e girdi’ riy? Ra ngad nanged e fulweg ko re deer ney, ma aram e ba t’uf ni ngad weliyed murung’agen e pi magawon ney nreb nge reb.

15. Mang boch ban’en ni be buch ni be micheg nrib gel e magawon ni be mada’nag e girdi’ nu fayleng?

¹⁵ Mahl: Sogonap’an 60 milyon e girdi’ fa ka boor ngay ni yim’ u nap’an e bin som’on nge bin l’agruw e mahl ko fayleng. Ka nap’an ni m’ay e bin L’agruw e Mahl ko Fayleng, ma ka dawori tal e girdi’ ko mahl. Nap’an ni taw ko duw ni 2015, ma ke gaman 65 milyon e girdi’ ni yad be n’ag taferad ni bochan e mahl ara gafgow ni yibe tay ngorad. Bin riyul’ riy e, nap’an e duw ni 2015 ma sogonap’an 12.4 milyon e girdi’ e ra n’aged taferad nga ranod nga yugu boch e binaw ara nam. Kireb ni yibe rin’ nib togopuluw ko motochiyel: Yugu aram rogon ni bay boch e kireb ni un rin’ kafram nib togopuluw ko motochiyel ni gathi ri ka yibe rin’ e chiney, machane bay boch e kireb ni be garer i yan nib papey ni bod rogon e, kireb ni yibe rin’ ni yibe fanay e computer ara Internet, nge boch e pumoon ni yad ma gafgownag e ppin rorad, nge kireb ni be rin’ e terrorist. Maku reb e, boor e girdi’ ni kar guyed ni ke gel e sasalap ko girdi’ u ga’ngin yang e fayleng. Der yag ko girdi’ ni ngar taleged e kireb ni yibe rin’ nib togopuluw ko motochiyel. M’ar: Bay boch e m’ar ni kan pirieg e falay riy. Machane, rogon ni ke yog reb e report ko duw ni 2013, e gubin e duw ni mereb milyon e girdi’ nib lich e duw rorad ko 60 ni yad be yim’ ko m’ar ko gum’ircha’, nge stroke, nge cancer, nge m’ar ko suga, nge m’ar ko worrum, nge ku yugu boch e m’ar. Gafgow ko par: Rogon ni ke yog reb e ulung ni ka nog e World Bank ngay e, nap’an e duw ni 1990 ma 280 milyon e girdi’ ni be gafgow ko par u Africa, ma nap’an e duw ni 2012 ma ke yan urngin ke taw ko 330 milyon.

16. (a) Mang fan ni kemus ni yigoo Gil’ilungun Got e rayog ni nge pithig e pi magawon ko girdi’? (b) Mang boch e tow’ath ni ke yiiynag Isaiah nge be’ ni yoloy e Psalm nra yibnag Gil’ilungun Got boch nga m’on?

¹⁶ Girdi’ ni kemus ni yigoo yad e yad ma lemnagrad e aram e piin ni yad be gagiyegnag e pi ulung ni bay u roy u fayleng ni yad ma gagiyegnag rogon e maruwel ni yibe tay ko salpiy nge pi n’en ni be rin’ e am. Ba tamilang ndabiyog ko pi girdi’ ney ni ngar chuweged e mahl, nge kireb ni yibe rin’ nib togopuluw ko motochiyel, nge m’ar, nge gafgow ko par, ya kemus ni yigoo Gil’ilungun Got e rayog ni nge chuweg e pi magawon ney. Am lemnag e n’en nra rin’ Jehovah ni fan ko girdi’. Mahl: Ra chuweg Gil’ilungun Got e n’en ni be k’aring e mahl ni aram e lem ni fel’ ngak, nge sasalap, nge girdi’ nib t’uf rorad e nam rorad ma yad ba yul’yul’ ngay, nge pi yurba’ i teliw ni googsur, nge Satan. (Ps. 46:8, 9) Kireb ni yibe rin’ nib togopuluw ko motochiyel: Be fil Gil’ilungun Got ngak bokum milyon e girdi’ ni nge bagayad me t’ufeg bagayad me pagan’rad ngorad. Dariy reb e am nrayog ni nge rin’ e re n’ey. (Isa. 11:9) M’ar: Ra tow’athnag Jehovah e girdi’ boch nga m’on ni aram e ra gagiyegnag ni nge sul fithik’ i dowrad ngki fel’ bayay. (Isa. 35:5, 6) Gafgow ko par: Ra chuweg Jehovah e re magawon ney, me flaabnag e girdi’ ko tirok ban’en miki ayuwegrad nge fel’ e par rorad. Re n’ey e kab gel e fel’ riy ko salpiy nge chugum.​—Ps. 72:12, 13.

‘THINGAR MU NANGED ROGON NI NGAM PIED E FULWEG KO TIN NI KE FITH BE’ NGE BE’ NGOMED’

17. Uw rogon ni ngam siyeg e lem nu fayleng?

¹⁷ Faanra kam rung’ag murung’agen reb e lem ni ke garer u fayleng ni be magawonnag e michan’ rom, ma aram e ngam fal’eg i gay murung’agen e re n’ey u lan e Thin rok Got, mu kum weliy lanin’um ngak be’ ni taareb e michan’ romew ni ke ilal ko tirok Got ban’en. Mu lemnag fan nib mom ni nge m’agan’ e girdi’ ko re lem ney, nge fan nde puluw, nge rogon ni ngam siyeg. Arrogon, gad gubin nrayog ni ngad ayuweged gadad ko lem nu fayleng ni aram e ngad folgad ko fare fonow ni pi’ Paul ko ulung nu Kolose ni gaar: “Um gonopiyed rogon pangimed ngak e piin ndawori mich Jesus Kristus u wun’rad . . . Mu nanged rogon ni ngam pied e fulweg nib mat’aw ko tin ni ke fith be’ nge be’ ngomed.”​—Kol. 4:5, 6.