‘Ra Kam Nanged e Pi N’ey, ma Faan Gimed Ra Maruwel Ngay ma Ra Um Pired ni Gimed Ba Felfelan’!’

1. Nap’an ni gad ra gay rogon ni ngad daged e sobut’an’, ma mang e rayog ni nge buch ni faan gad ra pag e lem ni fel’ ngak ni bay ko re fayleng ney ni nge af ngodad?

MANG FAN nib mo’maw’ ni ngad folgad ko pi n’en ni gad be fil ko Thin rok Got? Reb i fan e ra ngad rin’ed e ngongol nib mat’aw, mab t’uf ni ngad sobut’naged lanin’dad. Ngiyal’ ney ko “tin tomren e rran” e ba mo’maw’ ni ngad pared ni gad ba sobut’an’ ni bochan e yooren e girdi’ u toobdad e “ke mus ni yad e yad be lemnagrad, ma kari gel e chogow rorad, ma kar ufanthingad, ma ke tolangan’rad,” ma “dariy fan ban’en u wun’rad.” (2 Tim. 3:1-3) Gadad e pi tapigpig rok Got e gad manang ni miti ney e ngongol e de fel’. Machane yu ngiyal’ e rayog ni nge m’ug ni piin ni yad be ngongol ni aray rogon e ba fel’ rogon e par rorad, ma yad be felfelan’ ko yafos rorad. (Ps. 37:1; 73:3) Ere rayog ni ngad lemnaged ko: ‘Gur, bay fan ni nggu m’oneg e tin nib t’uf rok yugu boch e girdi’ ko tin nib t’uf rog? Faan gu ra ngongol u fithik’ e sobut’an’, ma ra tay e girdi’ fag, fa?’ (Luke 9:48) Faan gad ra pag e lem ni fel’ ngak ni bay ko re fayleng ney ni nge af ngodad, ma rayog ni nge kirebnag e tha’ u thildad e pi walag, me mo’maw’nag ngak e girdi’ ni ngar nanged ni gadad boch e Kristiano. Machane faan gad ra fil murung’agen e pi tapigpig rok Got kakrom ni yad ba sobut’an’ ma gad guy rogon ni ngad folwokgad rorad, ma aram e rayog ni nge yib angin ngodad.

2. Mang e rayog ni ngad filed rok e pi tapigpig rok Got kakrom ni yad ba yul’yul’?

² Mang e ayuweg e pi tapigpig rok Got kakrom ni yad ba yul’yul’ ni ngar manged fager rok? Uw rogon ma ke yag ni ngar fel’gad u wan’? Uw rogon ni ke yib gelngirad ni ngar rin’ed e ngongol nib mat’aw? Faan gad ra beeg murung’agen e pi cha’ney u lan e Bible, ma gad fal’eg i lemnag e pi n’en ni gad be beeg, ma aram e ra gel e michan’ rodad.

N’EN NI MA AYUWEG E MICHAN’ RODAD NI NGE PAR NIB GEL

3, 4. (a) Uw rogon ni ma skulnagdad Jehovah? (b) Mang fan nde gaman ni kemus ni ngad filed murung’agen e tin riyul’?

³ Ma pi’ Jehovah e pi n’en nib t’uf rodad ya nge yag ni nge par e michan’ rodad nib gel. Ma pi’ e fonow ngodad, me skulnagdad u daken e Bible, nge pi babyor rodad nib puluw e thin riy ko Bible, nge fare website rodad, nge JW Broadcasting, nge pi muulung nge assembly rodad. Machane ke tamilangnag Jesus ni gathi kemus ni ngaud filed murung’agen e tin riyul’, ya ka bay ban’en nib t’uf ni ngkud rin’ed. Ke yog ni gaar: “Ggan rog e nggu fol ko tin ni be finey e en ni l’ugeg ku gub, ma nggu mu’nag e maruwel ni ke pi’ ngog ni nggu muruwliy.”​—John 4:34.

⁴ Ra i rin’ Jesus e n’en nib m’agan’ Got ngay ma bod e ggan ni be kay. Ya re n’ey e bod rogon nnap’an ni gad ra kay e ggan nib fel’ nga fithik’ i dowdad, ma gad ma felfelan’ ma ma yib angin ngodad. Ere ku aram rogon ni faan gad ra rin’ e n’en nib m’agan’ Got ngay, ma gad ra felfelan’ me gel e michan’ rodad. Bod nsana bay ba ngiyal’ ni kam un ko muulung ni ngan yarmiy e machib ma kari aw parowom. Machane nap’an ni kam mu’ ko machib kam sul nga tabinaw rom, ma kam felfelan’ ni ke baud lanin’um.

5. Mang angin nra yib ngodad ni faanra gad ba gonop?

⁵ Gadad ba gonop ni faan gad ra rin’ e n’en nib m’agan’ Jehovah ngay. (Ps. 107:43) Boor ban’en nib fel’ ni ma buch rok e piin ni bay e gonop rorad. Aram fan ni be yog e Bible ni gaar: “Dariy ban’en ni gab adag nrayog ni ngam puluwnag ngay. . . . Piin nra ur pired ni yad ba gonop e yad ba felfelan’, ya gonop e ra pi’ e yafos ngorad, ni bod rogon ba ke gek’iy ni yugu be k’uf.” (Prov. 3:13-18) Ke yog Jesus ni gaar: ‘Ra kam nanged e pi n’ey, ma faan gimed ra maruwel ngay ma ra um pired ni gimed ba felfelan’!’ (John 13:17) Faanra ulul pi gachalpen Jesus ngar rin’ed e n’en ni ke yog ngorad, ma aram e yad ra par ni yad ba felfelan’. Ere rogon e fol ni yad be tay ko pi n’en ni fil Jesus ngorad, nge rogon e kanawo’ ni ke dag ngorad ni ngaur folwokgad rok riy, e ke mang bang ko yafos rorad.

6. Mang fan nib t’uf ni ngad ululgad ni ngad folgad ko pi n’en ni kad filed?

⁶ Ngiyal’ ney e kab t’uf ni ngad folgad ko pi n’en ni gad be fil. Am lemnag be’ ni ma fal’eg e masin ara karrow ni ke kireb. Bay talin e maruwel rok, nge ku yang u boch e karrow ni nge maruwel ngay, maku bay e llowan’ rok u rogon ni nge rin’ e re maruwel ney. Gubin e pi n’ey e rayog ni nge ayuweg ni nge mang be’ nib salap i ngongliy e masin ara karrow ni ke kireb ni faan ra maruwel ko pi n’em ni bay rok. Yugu aram nsana ke yoor e duw ni be rin’ e re maruwel nem, machane kub t’uf ni nge maruwel ko tin ni ke fil ni faanra baadag ni nge par nib salap ko maruwel rok. Ere ku arrogodad. Som’on u nap’an ni kad nanged e tin riyul’, ma kad felfelan’gad ni bochan e gad be fol ko pi n’en ni kad filed. Machane ra ngad pared ni gad ba felfelan’ ndariy n’umngin nap’an, ma thingar da ululgad ni ngad folgad ko pi n’en ni be fil Jehovah ngodad ni gubin e rran.

7. Mang e thingar da rin’ed ya nge yag nda filed ban’en rok e pi girdi’ nem ni be weliy e Bible murung’agen?

⁷ U lan e re article ney e gad ra weliy boch ban’en nrayog ni nge buch nra mo’maw’nag ngodad ni ngad pared nib sobut’an’dad. Gad ra fil murung’agen boch e pi tapigpig rok Got kakrom ni yad ba yul’yul’ nge rogon nra pared nib sobut’an’rad. Machane de gaman ni kemus ni ngad beeged murung’agen e pi n’ey. Ya ku thingar da fal’eged i lemnag, ma gad fanay nga lan e yafos rodad.

NGE TAAREB ROGON E GIRDI’ U WAN’UM

8, 9. Mang e rayog ni ngad filed u murung’agen e sobut’an’ ni dag Paul nrogon ni bay ko Acts 14:8-15? (Mu guy e sasing ni bay u tabolngin e re article ney.)

⁸ Baadag Got ni nge gubin mit e girdi’ ma “ngar thapgad ngak ma ngar nanged e tin nib riyul’.” (1 Tim. 2:4) Uw rogon u wan’um e girdi’ ndawor nanged e tin riyul’? Ke machibnag apostal Paul piyu Jew ni yugu aram rogon ni bay boch ban’en ni yad manang u murung’agen Jehovah. Miki machibnag e piin ni yad ma liyor ngak yugu boch e got ni googsur. Re n’ey ni rin’ Paul e ri skengnag rogon ni nge par nib sobut’an’. Ni uw rogon?

⁹ Nap’an e bin som’on e milekag ni tay Paul ni be machib, ma ranow Barnabas ko fare mach nu Lystra. Nap’an ni ur mew u rom, ma aram me ngongol e girdi’ nu Lykaonia ngorow ni gowa yow l’agruw e got, mar pininged ngorow fithingan e got rorad nde riyul’ ni aram e Zeus nge Hermes. Ere gur, baadag Paul nge Barnabas e re n’ey ni kan rin’ ngorow? Gur, kar lemnagew nre n’ey e ban’en nib fel’ ni ke buch rorow mab thil ko n’en ni buch rorow u lan fa gal mach ni kar bow riy ni un gafgownagrow? Gur, kar lemnagew ni aram ban’en nra ayuweg e girdi’ ni ngar motoyilgad ko fare thin nib fel’? Danga’! Ya ke kireban’row ngay mi yow non nib ga’ lungurow ni yow be gaar: “Mang ni ngam rin’ed e biney e pa’? Ya gamow l’agruw i girdi’ ni gamow bod gimed!”​—Acts 14:8-15.

10. Mang fan nde lemnag Paul nge Barnabas ni yow ba tolang ngak e girdi’ nu Lykaonia?

¹⁰ Nap’an ni yog Paul nge Barnabas ni yow l’agruw ni’ ni taareb rogorow ngak e tin ni ka bay e girdi’, ma aram e yow be yip’ fan ndawor ra flontgow. Machane re n’ey e der yip’ fan ni taareb rogon e liyor ni yow ma tay ko liyor ni ma tay e girdi’ nu Lykaonia. Ya ke l’ogrow Jehovah ni ngar machibgow ni yow l’agruw i missionary. (Acts 13:2) Ma kan dugliyrow u daken gelngin Got nib thothup ma ka bay e athap rorow nrib manigil. Machane gathi ireray fan ni ngar lemnagew ni yow ba tolang ngak e girdi’ nu Lykaonia. Ya yow manang ni ku rayog ko pi girdi’ nem ni nge yag fare athap ngorad ni nga ranod nga tharmiy ni faan yad ra motoyil ko fare thin nib fel’.

11. Uw rogon ni ngad sobut’naged lanin’dad u nap’an ni gad be machib ni bod rogon Paul?

¹¹ Baaray reb e kanawo’ u rogon nrayog ni ngad daged nib sobut’an’dad ni bod Paul. Dab da lemnaged nre maruwel ney ni machib ni gad be un ngay, ara pi n’en ni ke ayuwegdad Jehovah ke yag ni ngad rin’ed e ke taydad ni gadad ba fel’ ngak yugu boch e girdi’. Rayog ni ngad fithed gadad ni nge lungudad: ‘Uw rogon u wan’ug e girdi’ ni bay ko gin ni gu ma machib riy? Gur, gu ma laniyan’ ngak e girdi’ u yugu boch e nam?’ Be gay e Pi Mich Rok Jehovah rogon ni ngar pirieged e piin ni yad ra motoyil ko fare thin nib fel’ u ga’ngin yang e fayleng. Bay boch i yad ni yad ma fil e thin ara yalen u boch e nam ni ma sap e girdi’ ngay nga but’. Machane darur lemnaged ni ka yad ba fel’ ko pi girdi’ ney ni yad be machibnag. Ya yad ma gay rogon ni ngar nanged rarogon e pi girdi’ ney ya nge yag ni ngar ayuweged urngin e girdi’ nrayog ni ngar nanged murung’agen Gil’ilungun Got.

MU UNEG FITHINGAN BOCH E GIRDI’ U LAN E MEYBIL ROM

12. Uw rogon ni ke dag Epafras nri ma lemnag e pi walag?

¹² Yugu reb e kanawo’ nrayog ni ngad daged nib sobut’an’dad riy e aram e ngaud pied e meybil ni fan ngak pi walagdad ni bochan e ‘ke yog ngorad e michan’ ntaareb rogon feni ga’ fan ko birodad e michan’.’ (2 Pet. 1:1) Ireram e n’en ni rin’ Epafras ni cha’ney e kemus ni dalip yay ni ke weliy e Bible murung’agen. Nap’an ni kan kalbusnag Paul u tafen u Roma, me yol ngak e pi Kristiano u Kolose ni be weliy murung’agen Epafras ni gaar: “Gubin ngiyal’ nri ma pi’ e meybil romed.” (Kol. 4:12) Ri manang Epafras rarogon e pi walag ma ri ma lemnagrad. Machane ku bay e magawon rok, ya be yog Paul ni ‘ba’ rok u kalbus.’ (Flm. 23) Yugu aram maku be lemnag e pi n’en nib t’uf ko pi walag, ma aram fan ni rin’ ban’en ni nge ayuwegrad. Ere ma pi’ Epafras e meybil ni fan ngorad, ma i uneg fithingrad ngay ni be’ nge be’. Ere ku arrogodad ni ku rayog ni ngad folwokgad ko n’en ni rin’. Miti ney e meybil e rib gel gelngin.​—2 Kor. 1:11; Jas. 5:16.

13. Uw rogon nrayog ni ngad folwokgad rok Epafras u nap’an ni gad be meybil?

¹³ Mu lemnag be’ nrayog ni ngam uneg fithingan u lan e meybil rom. Sana rayog ni ga manang boch e pi fager u lan e ulung, ara girdien e tabinaw rom ni yad be yan u fithik’ e magawon. Dabisiy ni bay boch ban’en nib mo’maw’ ni ngar dugliyed, ara boch e skeng ni yad be mada’nag. Ku rayog ni ngam pi’ e meybil ni fan ngak e pi walag ni bay fithingrad ko fare article ni kenggin e “Jehovah’s Witnesses Imprisoned for Their Faith” ni thin nu Meriken ko fare website rodad ni jw.org. (Mu yaliy fare thin ni NEWSROOM > LEGAL DEVELOPMENTS.) Ku rayog ni ngam pi’ e meybil ni fan ngak e piin ni ke yim’ be’ nib t’uf rorad, ara piin ni ka fini buch ban’en rorad ni bod e yoko’, ara durru’ ara boch ban’en ni ma gafgow e girdi’ riy, ara piin ni ka fini mahl ko gin ni yad bay riy, ara piin ni yad be magawon ko salpiy. Boor e pi walagdad nib t’uf ni ngad pied e meybil ni fan ngorad! Nap’an ni gad ra pi’ e meybil ni fan ngorad, ma aram e gad be dag ni gathi kemus ni pi n’en nib t’uf rodad e gad be lemnag, ya ka gad be lemnag e tin nib t’uf rok yugu boch e girdi’. (Fil. 2:4) Ma ri ma motoyil Jehovah ko miti ney e meybil!

‘MU GUR KO MOTOYIL’

14. Uw rogon ni ke dag Jehovah e bin th’abi fel’ e kanawo’ u rogon ni ngan motoyil?

¹⁴ Ku reb e kanawo’ nrayog ni ngad daged nib sobut’an’dad riy e aram e ngad motoyilgad ngak e girdi’ nib fel’ rogon. Be fonownagdad e James 1:19 ni, ‘thingar da gurgad ko motoyil.’ Ke dag Jehovah e bin th’abi fel’ e kanawo’ u rogon ni ngaun motoyil ngak e girdi’. (Gen. 18:32; Deut. 9:19) Bod e n’en ni be weliy e Exodus 32:11-14 u murung’agen rogon ni be non Moses ma be motoyil Jehovah ngak. (Mu beeg.) Yugu aram rogon nde t’uf ni nge motoyil Jehovah ko n’en nra yog Moses, machane ke pag ni nge weliy laniyan’. Ere gur, rayog ni ngam gum’an’nagem ngam motoyil ngak be’ nder puluw rogon ni ke dugliy ban’en kafram, mag rin’ e n’en ni ke yog? Jehovah e ma gum’an’nag ir nge motoyil ngak gubin e girdi’ ni yad ma meybil ngak u fithik’ e michan’.

15. Uw rogon ni nggu folwok rok Jehovah u rogon ni nggu tayfan e girdi’?

¹⁵ Ere nge bagadad ma nge fith ir ni gaar: ‘Faanra rayog rok Jehovah ni nge sobut’nag laniyan’ ni nge motoyil ko girdi’ ni bod rogon ni i motoyil ngak Abraham, nge Rachel, nge Moses, nge Joshua, nge Manoah, nge Elijah, nge Hezekiah, me ere gathi susun ni nggu rin’ ni aram rogon, fa? Rayog ni nggu tayfan gubin e pi walag ni aram e nggu motoyil ngorad mug rin’ e pi n’en ni yad be yog ni faanra rayog, fa? Gur, bay be’ u lan e ulung ara tabinaw rog nrayog ni nggu tay e tayim ni nggu motoyil ngak? Faanra bay, ma mang e nggu rin’ ko re n’ey?’​—Gen. 30:6; Judg. 13:9; 1 Ki. 17:22; 2 Kron. 30:20.

“SANA RA GUY SOMOL E GAFGOW NI KUG TAY”

16. Mang e rin’ David ni Pilung u nap’an ni rin’ Shimei boch ban’en nib kireb ngak?

¹⁶ Sobut’an’ e ku ra ayuwegdad ni ngad t’ared lanin’dad u nap’an ni yira rin’ boch ban’en nib kireb ngodad. (Efe. 4:2) Rayog ni ngad guyed reb e ban’en ni buch rok David nib fel’ ni ngad folwokgad riy ni bay ko 2 Samuel 16:5-13. (Mu beeg.) Shimei nreb e girdi’ rok Saul ni Pilung e i yog boch e thin nib kireb ngak David nge pi tapigpig rok ma be darifannagrad. Yugu aram rogon nrayog rok David ni nge taleg Shimei, machane ke athamgil u fithik’ e pi n’em. Ere uw rogon ni ke yag rok David ni nge t’ar laniyan’? Rayog ni ngad nanged e fulweg riy ni faan gad ra fal’eg i yaliy e thin ni bay ko bin dalip e Psalm.

17. Mang e ayuweg David ni nge t’ar laniyan’? Ma uw rogon nrayog ni ngad folwokgad rok?

¹⁷ I yoloy David e bin dalip e Psalm u nap’an ni be guy Absalom ni fak rogon ni nge thang e fan rok. Ku ireray e ngiyal’ ni yog Shimei e thin nib kireb ngak ni be darifannag. Ere yugu aram rogon ni ke mo’maw’ e par ku David, machane ke yag rok ni nge par nib gapas. Ni uw rogon? Ke tamilangnag ko thin rok ko Psalm 3:4 (BT) ni gaar: “Gu yornag e ayuw ngak Somol, me fulweg taban e meybil rog ko fare burey rok nib thothup.” Nap’an nra rin’ be’ ban’en nib kireb ngodad, mab t’uf ni ngad meybilgad ni bod David. Gad ra rin’ ni aray rogon, ma ra pi’ Jehovah gelngin nib thothup ngodad ya nge yag nda athamgilgad. Ere nap’an nra rin’ be’ ban’en nib kireb ngom, ma gur, rayog ni ngam t’ar lanin’um ara mu n’ag fan e kireb rok? Gur, pagan’um ni be lemnag Jehovah e magawon rom, ma ra ayuwegem miki tow’athnagem?

‘GONOP E IRERAM E N’EN TH’ABI GA’ FAN’

18. Mang angin nra yib ngodad ni faan gad ra ulul ni ngad folgad ko fonow rok Jehovah?

¹⁸ Gad ra rin’ e n’en ni gad manang nib mat’aw, ma aram e gad ba gonop ma ra tow’athnagdad Jehovah. Ya be yog e Proverbs 4:7 (BT) ni gaar: “Gonop ni nge yag ngom e ireram e n’en th’abi ga’ fan.” Yugu aram rogon ni gonop e be tor nga daken e tamilangan’, machane ka bay boch ban’en nib muun ko re n’ey. Rogon e gonop ni bay rodad e ma m’ug u rogon e pi n’en ni gad ma dugliy. Mus ko apurgog ma yad ba gonop ya yad ma fal’eg rogorad ni fan ko ngiyal’ nra yib e garbeb. (Prov. 30:24, 25) Kristus ni ir e “gonop rok Got” e gubin ngiyal’ ni ma rin’ e tin nib m’agan’ e Chitamangin ngay. (1 Kor. 1:24; John 8:29) Ere ku arrogodad nra tow’athnagdad Got ni faan gad ra dag ni gad ba gonop u rogon ni ngad dugliyed e tin ni ngad rin’ed nib mat’aw ma gad par nib sobut’an’dad. (Mu beeg e Matthew 7:21-23.) Ere mu ulul ni ngam ayuweg e ulung rom ni nge mang bang nrayog ni nge pigpig gubin e girdi’ riy ngak Jehovah u fithik’ e felfelan’. Bin riyul’ riy e, ba t’uf e tayim ma kub t’uf ni ngad gum’an’naged gadad ni ngad rin’ed e tin nib mat’aw. Machane faan gad ra rin’ ni aray rogon, ma aram e gad be dag ni gad ba sobut’an’, ma re n’ey e ra yibnag e felfelan’ ngodad e ngiyal’ ney nge boch nga m’on.