Mu Ayuweg Yugu Boch E Girdi’ Ni Ngar Ngongolgad Nrogon Ni Baadag Jehovah

“Erera’ fan ni gubin ngiyal’ ma gamow be meybil ni fanmed . . . Ma aram me yog ni um ngongolgad nrogon ni ba adag Somol, mu um rin’ed e tin nib m’agan’ ngay ni gubin ngiyal’.”​—KOLOSE 1:9, 10.

1, 2. Mang e n’en ni ma yib e falfalan’ nge lem nib fel’ riy?

“GAMOW MA PAR u milay’ ko naun ni karro e ma girngiy ara trailer. Bochan ni kug mel’egew e par nib mom, ma arfan ni boor e tayim ni gamow ma fanay ni fan ni nggu weregew e thin nib fel’ ngak e girdi’. Ma kan taw’athnagmow ni boor ya ke yog ni nggu ayuwegew boor e girdi’ ni ngar ognaged yad ku Jehovah.”​—Thin ni yog ba wu’ i mabgol, ni yow e pioneer u South Africa.

² Ba puluw u wan’um ni ra ngan ayuweg yugu boch e girdi’ ma ra yibnag e falfalan’ fa? Boch e girdi’ e ma guy rogon ni gubin ngiyal’ e yad ma ayuweg e piin nib m’ar, nge piin gafgow, ara piin ni ke kireban’rad​—ma yad be falfalan’ nbochan. Tin riyul’ e Kristiano e ke mudugil lanin’rad ni fare maruwel rorad ni ngan wereg e tamilangan’ ni yib rok Jehovah Got nge Jesus Kristus ngak yugu boch e girdi’ e aram e ayuw ni tha’bi ga’ nrayog ni ngar pied ngak e girdi’. Ke mus ni aram e n’en nra pow’iy e girdi’ nra fel’ e biyul ni pi’ Jesus u wan’rad, ma ra fel’ thilrad Got, ma aram rogon e rayog ni nge yog ngorad e yafas ni manemus.​—Acts 3:19-21; 13:48.

3. Mit i mang e ayuw ni ffel’ ni ngada tiyan’dad ngay?

³ Machane, piin ni yad be pigpig ku Got e chiney, ba uw rogon ni ngan ayuwegrad ngar ululgad i lek “Fare Kanawo’”? (Acts 19:9) Dariy e maruwar riy ni ka be par nib gel e runguy rom ngorad, machane sana dawor mu nang ko uw rogon ni ngam yoornag e ayuw rom ngorad ara ngan pi’ e ayuw ngorad ni gubin ngiyal’. Sana biromed e yafas e chiney e be dag ni dabkiyog ni ngam pi’ e ayuw ngorad ni boor, ma arfan ni gathi rib gel e falfalan’ nra yib riy ngom. (Acts 20:35) Rayog ni ngada filed boch ban’en u murun’agen fare babyor ni Kolose.

4. (a) Nap’an ni ke yol Paul ngak piyu Kolose ma mang e n’en ni bay u rom? (b) Uw rogon ni ba l’ag Epaphras ngay?

⁴ Nap’an ni ke yol Paul ni apostal ngak e pi Kristiano u Kolose, ma immoy u Roma ni kan kalbusnag, machane rayog ni nge yib boch e girdi’ ngak ngar guyed. Taab rogon ko n’en ni ga be finey, i fanay Paul e tayim rok u rom ni de yoor ni nge machibnag e thin ngak e girdi’ u murung’agen Gil’ilungun Got. (Acts 28:16-31) Boch e Kristiano e ma yib ngak Paul ngar guyed, ma boch i yad e sana kan kalbusnagrad mi yad par rok Paul u kalbus. (Kolose 1:7, 8; 4:10) Bagayad e Epaphras ni reb e tamachib nib pasig ma ma par ko mach nu Kolose u Phrygia, ni bay ko nam ni plateau bang ko ngek u Efesus u Asia Minor (chiney e Turkey). I ayuweg Epaphras u nap’an ni yibe toy e ulung nu Kolose, me un ko maruwel ni ngan ayuweg e pi ulung nib chuchugur nga Laodicea nge Hierapolis. (Kolose 4:12, 13) Mang fan ni ke yib Epaphras ngak Paul nge gu’ u Roma, ma mang e be fil ngodad e n’en ni ke rin’ Paul?

Ayuw nni Pi’ Ngak Piyu Kolose ni Rib Fel’

5. Mang fan ni ke yoloy Paul e n’en ni ke rin’ ngak piyu Kolose?

⁵ Bochan ni baadag Epaphras ni nge yog ngak Paul u murung’agen e ulung nu Kolose, ma aram me yan nga Roma ni ereram e milekag nib mo’maw’. Me weliy murung’agen e michan’, t’ufeg, nge machib nib gel ni tay e pi Kristiano u rom. (Kolose 1:4-8) Machane, ku i weliy murung’agen e tin kireb ni ke yib nga lan e ulung nra kirebnag e michan’ rok piyu Kolose. Bochan e re n’em ma aram me yoloy Paul reb e babyor ni kan thagthagnag ni be weliy boch ban’en nib togopuluw ko pi thin ni be wereg e pi tamachib ni googsur. Ma u lan e re babyor rok nem e baga’ ni be weliy murung’agen e maruwel rok Jesus ni thingari rin’ ya baga’ fan.a Ayuw ni pi’ Paul ngorad e kemus ni i weliy murung’agen e kenggin e thin riyul’ u Bible? Mang boch e kanawo’ ni ku rayog ni nge ayuweg piyu Kolose riy, ma mang e gad ra fil ko uw rogon ni ngan ayuweg boch e girdi’?

6. Mang e n’en ni kari weliy Paul ko babyor ni ke pi’ ngak piyu Kolose?

⁶ Tin som’on e thin ko babyor rok Paul, e aram i pi’ e gonop riy ko uw rogon ni ngan pi’ e ayuw ngak be’ ni sana dad tiyan’dad ngay. Ereram fare kanawo’ u rogon ni ngan pi’ e ayuw ngak e en ni bay ko gin nib palog nra yib angin, ya Paul nge Epaphras e ur moyew ko gin nib palog u Kolose. I weliy Paul, ni gaar: “Gubin ngiyal’ ni gamow ma pining e magar ngak Got, ni Chitamangin E Somol rodad i Jesus Kristus, ko ngiyal’ ni gamow ma pi e meybil [footnote, “meybil u gubin ngiyal’”] romed riy.” Arrogon, ereram e pi meybil nib tamilang ni fan ko piin Kristiano u Kolose. I ulul Paul ngay ni gaar: “Erera’ fan ni gubin ngiyal’ ma gamow be pi’ e meybil ni fanmed, ni fa ngiyal’ ni baaram ni gu rung’agew murung’agmed riy ke mada’ ko chiney. Gamow ma wenignag ngak Got ni nge tamilangnag lanin’med ngam nanged e tin nib m’agan’ ngay ni ir e ngam rin’ed, nib chag urngin e gonop nge tamilangan’ ngay ni ma pi e Kan ni Thothup rok.”​—Kolose 1:3, 9.

7, 8. Meybil ni goo gadad nge meybil ni fan ko ulung e baga’ ni ba muun ngay e mang?

⁷ Gad manang ni ir e Got ni “Ma motoyil ko meybil,” ere rayog ni nge pagan’dad ni baadag ni nge rung’ag e meybil rodad nib m’agan’ ngay. (Psalm 65:2; 86:6; Proverbs 15:8, 29; 1 John 5:14) Machane, faan gad ra meybil ni fan ku yugu boch e girdi’, ma uw rogon e meybil rodad?

⁸ Sana gad ma lemnag ma gad ma meybil ni fan ko ‘urngin e girdi’ ni walagdad u ga’ngin yang e fayleng.’ (1 Peter 5:9) Ara rayog ni ngad meybilgad ku Jehovah ni fan ko piin Kristiano nge yugu boch e girdi’ ni ke yib e gafgow ngorad nib gel. Nap’an ni ke rung’ag e piin ni ke mich Kristus u wan’rad ko fa bin som’on e chibog murung’agen e gafgow ni ke yib nga Judea, ma susun ngara meybilgad ni boor yay ni fan ko pi walagrad u rom u m’on ni dawora pied boch e chugum ngorad. (Acts 11:27-30) Ngiyal’ ney, ma meybil ni ma tay e girdi’ rib yoor ara meybil u reb e ulung ko pi walag ni boor e girdi’ riy e baga’ ni yima ta’ u nap’an e muulung ko Kristiano, ya aram e tayim ni boor e girdi’ nra nang fan ma rayog ni ngar rogned e “Amen.”​—1 Korinth 14:16.

Mog nib Tamilang ko Meybil Rom

9, 10. (a) Mang e n’en ni be dag ni ngan meybil ni ngan pining fithingan be’ e ba puluw? (b) Uw rogon ni kan ta’ reb e meybil ni thin ni kan nog riy e kemus ni fan ku Paul?

⁹ Machane, fare Bible e be dag ngodad boch e meybil nrib tamilang ma be pining fithingan yugu boch e girdi’, ma kan nog fithingrad ni be’ nge be’. Mu lemnag e thin ni ke yog Jesus ni bay ko Luke 22:31, 32. Ma fa 11 e apostal rok nib yul’yul’ e kara longobiyed Jesus. Yad gubin ma ba t’uf rorad e ayuw rok Got ko tayim ni bay yib nib mo’maw’, me meybil Jesus ni fan ngorad. (John 17:9-14) Machane, me meybil Jesus ni kemus ni fan ku Peter, me ning ngak Got boch ban’en nib tamilang ni fan ko re gachalpen nem. Ka bay boch e girdi’ ni aray rogon: I meybil Elisha ngak Got ni nge ayuweg reb e pumoon, ni ir e tapigpig rok. (2 Kings 6:15-17) I meybil John ni apostal ngak Got ni nge par Gaius nib fel’ ni fan ko tirok Got nge fan nga downgin. (3 John 1, 2) Ma boch e meybil e kan rin’ ni fan ko boch e girdi’ ni kan nang ko yad mini’.​—Job 42:7, 8; Luke 6:28; Acts 7:60; 1 Timothy 2:1, 2.

¹⁰ Fare babyor rok Paul e be weliy murung’agen e meybil ni ngan weliy urngin ban’en riy nrib tamilang. I wenignag Paul ngorad ni ngar meybilgad ni fan ngak ara meybil ni fan ngak nge boch e girdi’ ni ma chag ngak. Kolose 4:2, 3 e be gaar: “Dab mpaged e meybil, mu tedan’med ko ngiyal’ ni gimed be pining e magar ngak Got. Mu ku um yibiliyed gamow nge bing Got e kanawo’ ngomow nge yog ni gu machibnigew e thin rok ngak e girdi’, ma gamow weliy e tin immoy nda nnang ni murung’agen Kristus. Ya ereray fan ni gu ba’ u kalbus e chiney.” Maku, mu lemnag e pi thin ney ni bay ko: Roma 15:30; 1 Thessalonika 5:25; 2 Thessalonika 3:1; Hebrews 13:18.

11. Nap’an ni immoy Epaphras u Roma, me meybil ni fan ku mini’?

¹¹ Maku aram rogon fa en ni ke un ngak Paul u Roma. “I Epaphras, ni gimed nga baraba’ . . . e ke yog e t’ufeg rok ngomed, ma gubin ngiyal’ nri ma athamgil ni nge pi’ e meybil romed.” (Kolose 4:12) Fare bugithin ni “ma athamgil” e ba sor fan ko “ngan maruwel nib gel,” ni bod rogon e girdi’ kakrom ni ma un ko gosgos. I meybil Epaphras u fithik’ e yul’yul’ ni kemus ni fan ko urngin e Kristiano u fayleng, ara ke meybil ni kemus ni fan ko tapigpig rok Got u Asia Minor ni polo’? I yog Paul ni ke meybil Epaphras ni kemus ni fan ko piin ni ma par u Kolose. Manang Epaphras salaprad. Dad nanged ko mini’ fithingrad ni yad gubin, maku dad nanged ko mang e pi magawon ni keb ngorad, machane rayog ni ngan sananag boch ban’en. Sana Linus ni kab pagal e ke athamgil ni nge togopuluw ko n’en ni kan nog e philosophies ngay, ma Rufus e ba t’uf ni nge yib gelngin ma aram rogon ni rayog ni nge togopuluw ko machib ni ma tay e teliw ni Judaism ni ereram e teliw rok kakrom. Ma Persis ni figirngin e gathi Kristiano ni ba t’uf ni nge par nib mudugil laniyan’ mab gonop ma aram rogon ma rayog ni nge ayuweg e pi bitir rok ngar pared nib yul’yul’ ku Somol, nge Asyncritus ni ke ubchiya ko m’ar rok, ma ri ba t’uf ni ngan fal’eg laniyan’rad? Arrogon, manang Epaphras ko uw rarogon girdien e ulung rok, ma ma meybil ni fan ngorad u fithik’ e yul’yul’ ya ir nge Paul e yow baadag ni pi Kristiano nem nib yul’yul’ e nga ur ngongolgad nrogon ni baadag Jehovah.

12. Uw rogon ni nap’an e meybil rodad ni goo gadad ma ngad dogned e thin riy nib tamilang ni fan ku boch e girdi’?

¹² Kam guy boch ban’en nib fel’ ni ngad folgad riy​—ni ir fare kanawo’ u rogon ni ngad ayuweged boch e girdi’? Kan dag, ni meybil ni yima ta’ u fithik’ e yoor e baga’ ni yima yog e thin riy ni fan ko urngin e girdi’, ya bochan nib thilthil e girdi’ ni bay. Machane meybil ni gad ma ta’ ni goo gadad ara meybil niy ma ta’ u tabinaw e rayog ni ngan nog boch e thin riy nib tamilang u murung’agen yugu boch e girdi’. Yu ngiyal’ e gad ma ning e ayuw rok Got ni ra pow’iy me taw’athnag urngin e piin piilal ni ma lekag e ulung ara piin ni ma ayuweg e ulung ko tirok Got, gathi rayog rodad ni ngadogned ban’en u murung’agrad nrib tamilang? Ni bod ni, mang fan ni dabmu meybilgad ni ngan pining fithingan e circuit overseer romed ni keb nge guymed ara piin ni ma ayuweg e Fol Babyor ni fan ko ulung? Filippi 2:25-28 nge 1 Timothy 5:23 e be dag ni ma lemnag Paul salpen Thimothy nge Epafroditus ya i pining fithingrow. Rayog ni ngada pininged fithingan e piin nib m’ar ni gad manang fithingrad?

13. Mang boch e magawon ko girdi’ ni rayog ni ngad uneged ko meybil rodad ni goo gadad?

¹³ Riyul’, ni thingar dabda rin’ed e tin nra magawonnag yugu boch e girdi’, machane ffel’ ni ngada daged ko meybil rodad ni piin ni gad manangrad e ri yad ba t’uf rodad. (1 Timothy 5:13; 1 Peter 4:15) Sana bay reb e walag ni kan chuweg ko maruwel rok, ma dabiyog ni ngad pied reb e maruwel ngak. Machane, rayog ni ngad uneged fithingan ko meybil rodad ma ngada tiyan’dad i yog ngak Got murung’agen e gafgow ni ke yib ngak. (Psalm 37:25; Proverbs 10:3) Ga manang reb e walag ni ppin ni ke pillibthir ni dariy figirngin ma dariy e bitir rok ma ba mudugil laniyan’ nra un ko mabgol kemus nrogon “nib puluw ko lem rok Somol”? (1 Korinth 7:39, New World Translation) Nap’an e meybil romed, ma mang fan ni dabmu ning ngak Jehovah ni nge taw’athnag ma nge ayuweg ni nge par nib yul’yul’ ko pigpig ngak? Maku reb, e susun l’agruw e piilal e kar piew e fonow ngak reb e walag ni ke denen. Mang fan ni dabra piningew fithingan ko ngiyal’ ni yow ra meybil?

14. Uw rogon nib tamilang e meybil ni yima pining fithingan be’ e ba m’ag nga rogon ni ngan ayuweg yugu boch e girdi’?

¹⁴ Kari mab e kanawo’ ni nap’an ni ngam meybil ni goo gur mag uneg ko meybil fithingan e piin ni ga manang nib t’uf rorad e ayuw rok Jehovah, ngan fal’eg laniyan’, nge gonop, nge kan ni thothup, ara reb fapi wom’engin. Bochan feni palog nge yugu boch e magawon, ma sana ga be lemnag nde gaman e chugum rom ere dabiyog ni ngam pi’ e ayuw ngak. Machane dabmu pagtalin ni ngam meybil ni fan ko pi walag ni pumoon nge ppin. Ga manang ni yad baadag ni ngar ululgad i yan ko kanawo’ nib ma’gan Jehovah ngay, machane sana ri ba t’uf rorad e ayuw ma aram rogon ni rayog ni ngar pared riy ndariy n’umngin nap’an. Meybil e aram e n’en ni rayog ni nge ayuwegrad.​—Psalm 18:2; 20:1, 2; 34:15; 46:1; 121:1-3.

Maruwel ni Nge Gelnag Yugu Boch e Girdi’

15. U rogon ni thingarda adaged e thin ko tin ni tomur ko babyor ni Kolose?

¹⁵ Riyul’, ni meybil u fithik’ e yul’yul’ mab tamilang e gathi kemus ni aram e kanawo’ ni ngan ayuweg yugu boch e girdi’, ma baga’ ni aray rogon ko piin nib chuchugur ngom nge piin ni yad ba t’uf rom. Fare babyor ni Kolose e ke tamilangnag e re n’em. Boor e scholar ni yad be lemnag ni tomren ni ke yoloy Paul boch e thin nra pow’iyrad ngar rin’ed e tin ffel’ nge boch e fonow nib puluw ko par rorad, ma aram me uneg boch e thin ngay ni fan e nge yog e t’ufeg rok ngorad. (Kolose 4:7-18) Machane, kada nanged ni re gin’ n’ey ni aram e bin tomur ko fare babyor rok e bay boch e fonow riy nib ga’ fan, ma ka bay boor ban’en ni ngan fil riy.

16, 17. Mang e rayog ni nga dogned u murung’agen e pi walag nrogon ni yog ko Kolose 4:10, 11?

¹⁶ I yoloy Paul ni gaar: “Aristarkus, ni ba’ rog u kalbus e be gaar nge falan’ Got ngomed, ma ku er rogon Mark, ni be’ rok Barnabas. (Ni ke taw e thin riy ngomed faram u rogon ni ngam t’ufeged ko ngiyal’ nra yib ngomed.) I Joshua, ni yima pining Justus ngak, e ku er rogon ni be gaar nge falan’ Got ngomed. Ke mus e dalip i girdi’ nu Israel nra manged girdien Kristus ni yad be un ngog ko maruwel ni fan ko gagiyeg rok Got, ma ri baga’ e ayuw ni kar pied ngog.”​—Kolose 4:10, 11.

¹⁷ I weliy Paul uroy u murung’agen boch e walag ni rib fel’ ni ngan lemnagrad. I yog ni yad e girdi’ ni kan maadadnagrad, ma yad ma nang e par ko piyu Jew. Boor e girdi’ ni piyu Jew ni kan maadadnagrad u Roma, ma ka ra manged e Kristiano e chiney. Machane, piin ni ke pining Paul fithingrad e ke ayuwegrad. Sana, de maruwaran’rad ni ngar chaggad ko piin Kristiano ni kafram e kar uned ko yalen ko piin ni gathi yad piyu Israel, ma susun ka ra uned ngak Paul kar machibgad e piin ni gathi yad piyu Israel u fithik’ e falfalan’.​—Roma 11:13; Galatia 1:16; 2:11-14.

18. Mang e thin nib fel’ ni ke yog Paul ni fan ko piin ni yad bay rok?

¹⁸ Mu lemnag e thin ni ke yog Paul ni gaar: “Pi cha’ ney ni ma pi’ gelngig.” I fanay Paul e thin ni Greek ni ke mus ni taab yay ni ke sum u Bible. Boor e tathiliyeg thin e kar thiliyeg e re thin ney ni “fal’eg lanin’uy.” Machane, bay yugu reb e thin ni Greek ni (pa·ra·ka·le’o) ni baga’ ni yima thiliyeg ni “fal’eg lanin’uy.” Ke fanay Paul e re n’ey u yu yang machane u Kolose 4:11 e danga’.​—Matthew 5:4; Acts 4:36; 9:31; 2 Korinth 1:4; Kolose 2:2; 4:8.

19, 20. (a) Mang fan fare bugithin ni ke fanay Paul ni fan ko pi walag ni ke ayuweg u Roma? (b) Mang boch e kanawo’ ni pi walag nem e kar ayuweged Paul?

¹⁹ Piin ni ke pining Paul fithingrad e gathi kemus ni kar rogned e thin ni ngar fal’eged laniyan’uy. Fare bugithin ni Greek ni “ma pi’ gelngin” ni bay ko Kolose 4:11 e yu ngiyal’ e kan fanay ni fan ko reb e falay ni ma chuweg e kireban’. Fare Bible ni New Life Version e be gaar: “Rib gel e ayuw ni yad ma pi’ ngog!” Ma fare Bible ni Today’s English Version e bay boch e thin riy ni be gaar: “Be par ni ri yad ma ayuwegneg.” Susun mang e ayuw ni ke pi’ e pi Kristiano ni ma par nib chuchugur ku Paul?

²⁰ Susun immoy boch e girdi’ ni kar bad ngak Paul ngar guyed, machane bay boor ban’en ni dabiyog ni nge rin’, ni bod e n’en ni baaray ni dabiyog ni nge yan nge chuw’iy boch ban’en nib t’uf rok​—ni bod e ggan nge mad rok ni fan ko ngal’an e garbeb. Uw rogon ni nge yog e pi babyor ni kan bachiy ni nge bieg ara boch e babyor ni ngan yoloy ban’en ngay? (2 Timothy 4:13) Rayog ni ngam lemnag e pi walag nem ko uw rogon ni kar ayuweged Paul ni nge yog ngak e tin nib t’uf rok, ni bod e ngan chuw’iy boch ban’en ara ngan rin’ boch ban’en ni fan ngak? Sana baadag ni nge yan nge guy reb e ulung ni fan ni nge pi’ e athamgil nga laniyan’ e girdi’. Ma dabiyog ya kan kalbusnag, ere pi walag nem ni ma yib ngak Paul e sana yad ma yan ngar guyed boch e walag ni yad be fek boch e thin rok Paul iyan, mar sulod ngar weliyed e tin ke buch. Pi n’en nem e ri ma gelnagey!

21, 22. (a) Mang fan nib fel’ u wan’dad fapi thin ni bay ko Kolose 4:11? (b) Mang boch e kanawo’ ni ngad folgad ko tin ni ke rin’ e piin ur moyed rok Paul ko ngiyal’ nem?

²¹ Thin ni ke yoloy Paul u murung’agen e piin ni “ma pi’ gelngin” e ke tamilangnagdad ko uw rogon ni ngada ayuweged yugu boch e girdi’. Sana kar pared ni yad ma fol ko motochiyel rok Jehovah nib m’ag ko gafarig, ma yad ma un ko muulung, maku yad ma un i wereg e machib. Ere bay rogorad ni nga dogned boch ban’en nib fel’ u murung’agrad. Ere rayog ni ngada rin’ed boch ban’en ni kab gel boch ko kafram, ni ngad manged e piin ni ‘ma pi’ gelngin’ be’ ntaabrogon ko pi cha’ nem ni kar ayuweged Paul?

²² Faanra ga manang reb e sister ni ke fol ko thin ni bay ko bin 1 Korinth 7:37 ma dakuriy girdien e tabinaw rok nib chuchugur ngak, ma rayog ni ngam pining nge un ngom nga boch e maruwel ara fafel ko tabinaw, ni bod ni baaray ni ngan pining nga reb e abich ni kan yarmiy ni fan ko pi fager ara girdi’ romed? Ma uw rogon nfaanra ngan pining nge un ngomed ko milekag ni fan ni ngam uned ko convention ara ngan yan ko vacation? Ara ngan pining ni nge un ngomed ko ngiyal’ nib puluw ni ngam chuw’iyed boch e ggan u kantin. Ku rayog ni nga nog e pi n’en nem ngak e piin ndakuriy e pumoon ara ppin rorad, ara sana piin ni dabiyog ni ngar ranod ko karrow ni goo yad. Ma ra mu guy nib fel’ ni ngam rung’ag e n’en ni ke buch ko yafas rorad ara ngam fil boch ko tin ni yad manang ni bod e n’en ni baaray ni ngan mel’eg mmit e wom’engin e gekiy nib fel’ ara rogon ni ngan mel’eg e mad ko pi bitir. (Leviticus 19:32; Proverbs 16:31) Ma angin ni yib riy e ngari fel’ thilmew. Ma aram rogon me mom ngorad ni ngar ninged e ayuw ngom nfaanra ba t’uf rorad boch e falay u pharmacy, ara yugu boch ban’en. Susun Paul nge pi walag ni ur moyed u Roma e kar pi’ed e ayuw ngorad ni ke gelnagrad, ni bod gur. Ngiyal’ nem nge chiney e aram e n’en ni ma gelnag e t’ufeg u fithik’ey ma kada turguyed ni ngada pigpiggad ku Jehovah u taabang u fithik’ e yul’yul’.

23. Ba fel’ ni ngad faned e tayim rodad ni nga uda rin’ed e mang?

²³ Gad gubin ma rayog ni ngad fal’eged i lemnag e pi n’en ni ke weliy e re article ney. Pi n’en nem e ke mus ni be dag ban’en ngodad, machane ra ayuwegdad e pi n’ey ni nge tamilang u wan’dad e n’en ni ngad rin’ed ma aram rogon ma rayog ni ngad manged e piin ni “ni ma pi’ gelngin” e pi walagdad ni pumoon nge ppin ni ngar pithiged e magawon rorad. De dag e re n’ey ni gad be folwok rok e piin ni humanitarians ara piin ni ma ayuweg yugu boch e girdi’. Gathi aray rogon e n’en ni be athapeg e pi walag nrogon ni be weliy e Bible ko Kolose 4:10, 11. Ya kara “maruwelgad u taabang ni fan ko gagiyeg rok Got.” Ma gelngin ni ke yib ngorad e ba m’ag ko re maruwel n’ey. Manga yugu da yodoromgad.

24. Mang e bin tha’bi fel’ ko meybil rodad ni gad be gay rogon ni nge gelnag boch e girdi’?

²⁴ Gad ma uneg fithingan yugu boch e girdi’ ko meybil rodad ma gad ma athamgil ni ngada gelnaged yad nbochan e tin ni baaray ni: Gad manang ni pi walagdad ni pumoon nge ppin ni yad baadag ni ngar “ngongolgad nrogon ni baadag Somol ma ngar rin’ed e tin nib m’agan’ Got ngay ni gubin ngiyal’.” (Kolose 1:10) Re n’em e ba peth ko boch ban’en ni ke yog Paul u nap’an ni ke yoloy murung’agen e meybil rok Epaphras ni fan ko piyu Kolose, ni “ngar pired ni yad mmudugil me ilal e lem rorad nrogon girdien Kristus, ma kari mudugil lanin’med, ma gimed be rin’ e tin nib m’agan’ Got ngay.” (Kolose 4:12) Uw rogon ni gad ra rin’ e n’en ni aray rogon? Ngada guyed.

[Footnote]

Kam Nang?

• Uw rogon ni nrayog ni ngad pied e ayuw ko meybil rodad ni goo gadad?

• Uw rogon ma piin Kristiano kakrom e ‘kar pied e ayuw’ ku Paul?

• Mang boch e magawon ni rayog ni ngad ‘pied e ayuw’ riy?

• Mang e gad be nameg u nap’an ni gad be meybil nge nap’an ni gad be athamgil ni ngada gelnaged e pi walagdad ni pumoon nge ppin?

[Picture on page 22]

Rayog ni ngam uneg yugu reb e Kristiano ni nge un ko tabinaw ma ranod ko fafel?

[Credit Line]

Courtesy of Green Chimney’s Farm