Ngan Par Ni Rib Mudugil Lanin’uy

“Gubin ngiyal’ nri [ma] pi’ e meybil romed, ni ma wenignagmed ngak Got ni nge ayuwegmed ngam pired ni gimed be par ni rib mudugil, ma kari mudugilan’med, ma gimed be rin’ e tin nib m’agan’ Got ngay.”​—KOLOSE 4:12, New World Translation.

1, 2. (a) Girdi’ nu fayleng e mang e kara guyed ko piin Kristiano kakrom? (b) Uw rogon ni fare babyor ni fan ko piyu Kolose e be dag e t’ufeg?

PI gachalpen Jesus e rib t’uf e pi walagrad rorad. I Tertullian ni ir e (ta yol babyor u nap’an fa bin l’agruw nge fa bin dalip e chibog C.E.) e ke weliy u murung’agrad ni yad ba gol ko piin ni dakuriy e gallabthir rorad, nge piin nib gafgow, nge piin pillibthir. Pi n’en nem ni kar rin’ed ni kar daged e t’ufeg u daken e ngongol rorad e ke falfalan’ag e piin ni gathi Kristiano ma arfan ni boch i yad e kar rogned u murung’agen e pi Kristiano ni gaar, ‘Am sap nga rogon nib t’uf bagayad rok bagayad.’

² Fare babyor ni fan ko piyu Kolose e be micheg nib t’uf e pi walag ni pumoon nge ppin u Kolose rok Paul ni apostal nge Epaphras. Me yol Paul ngorad ni: Epaphras e “gubin ngiyal’ nri ma pi’ e meybil romed, ni ma wenig nagmed ngak Got ni nge ayuwegmed ngam pired ni gimed be par nrib mudugil, ma kari mudugilan’med, ma gimed be rin’ e tin nib m’agan’ Got ngay.” Nap’an e duw ni 2001, ma Pi Mich rok Jehovah e ra fanay e pi thin nu Bible ney ni bay ko Kolose 4:12 nge mang thin nu Bible ni fan ko re duw nem, ni gaar: “Gimed be par nrib mudugil, ma kari mudugilan’med, ma gimed be rin’ e tin nib m’agan’ Got ngay.”

3. Mang l’agruw ban’en ni ke yibilay Epaphras?

³ Rayog ni ngad guyed ni bay l’agruw ban’en ko meybil rok Epaphras’ ni fan ko piin ni yad ba t’uf rok: (1) ni ngar “pared ni yad be par nrib mudugil” nge (2) ni ngar pared ni “yad be rin’ e tin nib m’agan’ Got ngay.” Pi thin ney e kan uneg ko fare Babyor nib Thothup ni nge fel’ rogodad riy. Ere ngam fithem, ‘Mang e ba t’uf ni nggu rin’ ma rayog ni nggu par nib mudugil ma gu be rin’ e tin nib m’agan’ Got ngay? Ma faanra nggu rin’ ni aray rogon, ma mang angin ni ra yib riy ngog?’ Ngad guyed.​—2 Timothy 3:16.

Ngan Athamgil ni “Ngan Par nib Mudugil”

4. Piyu Kolose e ba t’uf ni ngar pared nib mudugil lanin’rad ko mang?

⁴ Epaphas e kari athapeg ni pi walagen ni pumoon nge ppin u Kolose ni ngar “pared nrib mudugil.” Fare bugithin ni “nrib mudugil,” eb sorfan ko n’en nib ba flont, ke ga’, ara ke ilal. (Matthew 19:21; Hebrews 5:14; James 1:4, 25) Sana ga manang ni bochan ni kan taufenag be’ ni ir e Mich rok Jehovah ma re n’ey e gathi be micheg ni ke ilal ko tirok Got. I yol Paul ngak piyu Efesus, ni be par u ngal ko fare binaw ni Kolose, ni pi ta chugul saf nge pi sensey e yad be guy rogon ni ngar ayuweged yad “ni yad gubin ni bay ra bad nga taabang ngar taab girdi’gad u daken e michan’ rodad ngak Fak Got nge murung’agen ni kar nanged; ma aram yad ilal i yan nge mus rogodad ngar boded mam’ungun Kristus.” Boch e thin rok Paul u bayang e be fanownag e piin Kristiano ni ngar “lemgad nrogon e piilal.”​—Efesus 4:8-13; 1 Korinth 14:20.

5. Mang e susun ni ngan rin’ ma aram rogon me yog ni ngad nameged nib m’on ko yafas rodad rogon ni nge ‘mudugil’ lanin’dad’?

⁵ Faanra immoy boch u Kolose ni dawora ilalgad ko tirok Got ban’en, ma ba t’uf ni ereray e n’en ni ngar nameged. Gathi riyul’ ni susun aram e n’en ni ngan rin’ ko ngiyal’ n’ey? Demtrug ko ke yan boor e duw ni kada uned ko taufe fa dawori n’uw nap’an, ma kam gu’ ni kam mon’og u rogon ni ngam weliy fan ban’en nge uw rogon ni ga ma tafinaynag ban’en, fa? Gad ma lemnag boch e kenggin e motochiyel u m’on ni ngan dugliy ban’en? Riyul’ ni pi n’en ni tirok Got nge pi n’en ko ulung e aram e n’en ni ri baga’ fan ko yafas rodad, ma gathi ban’en ni ngan rin’ nfaanra ffel’ urngin ban’en? Dabiyog ni ngad daged urngin e kanawo’ nrayog ni ngad fal’eged i lemnag ko u rogon ni ngan mon’og i yan min ilal ko tirok Got ban’en, machane ngam lemnag l’agruw ban’en.

6. Mang taa ban’en nrayog rok be’ ni nge mon’og riy nge mang be’ nib flont, ni bod rogon Jehovah?

⁶ Ni bod e n’en ni baaray ni: Kam ilal iyan u reb e binaw ni pi girdi’ u toobem e ba laniyan’ ara piin ni yad ma magawonnag e girdi’ nib thil ramaen dowrad, mab thil e nam rorad, ara binaw rorad. Gad manang ni Got e gathi ba laniyan’ ma susun aram rogon gadad. (Acts 10:14, 15, 34, 35) U lan e ulung ara circuit rodad, bay boch e girdi’ ni aram rogon pangirad kafram, ere ga ma chag ngorad. Machane, uw feni gel e lem rodad ni de fel’ ara ka be maruwaran’dad u murung’agen e piin ni aray rogon pangirad kafram? Papey ni ‘ngad damumuwgad,’ ma arfan ni kaygi papey ni ngad lemnaged e tin kireb rorad nfaanra bagayad e ke oloboch ara ke rin’ boch ban’en ni dabum ya aram rogon pangin kafram? Mu fithem, ‘Ba t’uf rog ni nggu maruweliy ban’en ma aram rogon e rayog ni nge yog ngog e lem rok Got ni der laniyan’?’​—Matthew 5:45-48.

7. Ra mang be’ reb e Kristiano u polo’ i laniyan’ ma mang lem u murung’agen yugu boch e girdi’ e ba l’ag ngay?

⁷ Bin l’agruw: Rogon ni yog ko Filippi 2:3, e be gaar thingari “dabi suk’ ngan’med ni ngam maruweliyed ban’en ni gimed e ngam m’onod riy ni fan e nga nognimed riy ni gimed e soromed, ara bochan e nge yib ufan ngomed; machane nge bigimed me sobut’nagan’, ma dabi finey bigimed ni ir e ba sorok ngak e tin ni ka bay e girdi’.” Uw rogon e ngongol rodad? Ra be’ ma bay ban’en ni ba war riy ma ku bay boch ban’en nib mudugil laniyan’ riy. Faanra kaygi papey ni ngad guyed thibngin be’ kafram, me re ke thil e lem rodad e chiney, ni dabkuuda lemnaged ni pi walag e kar chuchugurgad ni ngar “flontgad”? (James 3:2) Chiney, kab fel’ boch ko kafram, rayog ni ngad guyed​—fa dagayed boch ban’en—​ni kab fel’ yugu boch e girdi’ riy ngodad? ‘Ri gu manang ni kab gum’an’ e re walag nem ni ppin ngog.’ ‘Cha’ nem e be dag ni kab gel e michan’ rok.’ ‘Riyul’, ni ir e sensey ni kab fel’ ngog.’ ‘Re ppin nem e ri bay gelngin ni nge gagiyegnag laniyan’ ni nge dabi yib e damumuw ngak nib papey.’ Sana ba t’uf rok piyu Kolose ni ngar maruweliyed ban’en ni ngar mon’oggad ngar daged e re ngongol ney. Aram rogon gadad, fa?

8, 9. (a) Mang fan ni i meybil Epaphras ni fan ko piyu Kolose ni ngar “pared” nib mudugil? (b) ‘Ngan par nib mudugil’ e ba sor fan ko mang u murung’agen e gabul nge langleth?

⁸ I meybil Epaphras ni “ra par piyu Kolose nrib mudugil.” Ba tamilang, ni i meybil ngak Got ni piyu Kolose ni ka nog ni ba mudugil lanin’rad, ma kar ilalgad ko tirok Got, ni ngar “pared,” nib mudugil ara ngar pared ni aray rogorad.

⁹ Dabiyog ni ngad lemnaged ni gubin e girdi’ ni kar manged e Kristiano, ni mus ko en ke ilal ko tirok Got, e ra par ni aram rogon. I weliy Jesus ni fare engel ni fak Got e “de par nib yul’yul’ ko tin riyul’.” (John 8:44, NW) Ma i puguran Paul ngak piyu Korinth u murung’agen boch e girdi’ kakrom ni kar pigpiggad ku Jehovah nib ngoch nap’an mi yad tal. Me ginang e piin ni kan dugliyrad ni gaar: “En nra finey ni ke par ni ke mudugil e nge ayuw ya ri mul.” (1 Korinth 10:12) Ra ayuwegey e re n’ey ko n’en ni kan yibilay ni fan ko piyu Kolose ni “ngar pared nrib mudugil.” Nap’an ni ke mudugil lanin’rad, ma kar ilalgad, ma ba t’uf ni ngar kadedan’rad, ma dabra sulod nga tomur, ngar wargad, ara ngar man’gad nga orel. (Hebrews 2:1; 3:12; 6:6; 10:39; 12:25) Ma aram rogon ni ra m’ug ni ke “polo’” lanin’rad ko ngiyal’ ni ngan yaliyrad min taw’athnagrad.​—2 Korinth 5:10; 1 Peter 2:12.

10, 11. (a) Mang boch ra rogon e meybil ni ke dag Epaphras ngodad? (b) Ba puluw ko n’en ni ke rin’ Epaphras, ma mang e kam dugliy ni ngam rin’?

¹⁰ Kada weliyed kafram feni ga’ fan ni ngan meybil ni fan ko yugu boch e girdi’ ma ngan pining fithingrad, ngan nog ngak Jehovah nib tamilang ni nge ayuwegrad, nge fal’eg laniyan’rad, nge taw’athnagrad, ma nge pi’ e kan thothup ngorad. Ma aram rogon e meybil ni ke ta’ Epaphras’ ni fan ko piyu Kolose. Ma rayog ni ngad rin’ed e n’en ni aray rogon​—ma riyul’ ni aram e n’en ni thingarda rin’ed—​ngan gay e n’en nib fel’ ko pi thin nem ni ngad fanayed ko meybil rodad ngak Jehovah. Dariy e maruwar riy, ni thingarda ninged e ayuw ku Jehovah nge mada’ ko tomur nra bagadad ma ra “par ni rib mudugil.” Ga ma meybil ni nge ayuwegnem riy?

¹¹ Mang fan ni dab mog boch salpem ko meybil rom nge rarogom? Ma ga weliy ngak Got ko kam mon’og me “mudugil lanin’um,” ma kam ilal ko tirok Got. Mu ning e ayuw ngak ni nge ayuwegem ma aram rogon rayog ni ngam gu’ boch i yang ni ba t’uf ni ngam maruweliy ban’en ngam mon’og ko tirok Got. (Psalm 17:3; 139:23, 24) Dariy e maruwar riy, ni ka bay boch ban’en ni bay e magawon rom riy ni aray rogon. Ere, susun dabi mulan’um nbochan, machane ngam meybil ku Got nib tamilang, ngam ning e ayuw ni ngam mon’og boch. Ma ngam rin’ e re n’ey ni gathi kemus taab yay. Riyul’, mang fan ni dabmu dugliy ni bin migid e wik ma ngam meybil nra yog ngom ni ‘ngam par nrib mudugil e chiney. Ma ngam lemnag ni ngam rin’ e re n’ey ni boor yay u nap’an ni ga be fal’eg i lemnag fare thin nu Bible ko re duw n’ey. Nap’an e meybil rom, ma ngam tiyan’um nga boch ban’en ni ga be lemnag nrayog ni nge sulwegem nga tomur, ma nge war lanin’um, ara n’en nra k’aringem ni ngam tal ko pigpig ku Got ma ngam palog ko girdi’ rok.​—Efesus 6:11, 13, 14, 18.

Ngan Meybil ni Ngari Pagan’uy

12. Mang fan ni ri ba t’uf ko piyu Kolose e “michan’ nib gel”?

¹² Maku i yibilay Epaphras yugu reb ni baga’ fan ma aram rogon ma rayog ni nge m’ug ni piyu Kolose e ur pared ni yad ba fel’ u wan’ Got. Ku ba t’uf rodad e re n’em. Be mang e re n’em? I meybil ni ngar pared ni “kar pagedan’rad ko urngin e tin nib m’agan’ Got ngay.” Kar pared ko tayim ni boor e machib nib togopuluw nge llowan’ ko girdi’ nra kirebnagey, ma boch e gowa bod yaan e thin riyul’ ma ma oloboch e girdi’ riy. Ni wod ni, piyu Kolose e kan diliiy lanin’rad ni ngar madenomnaged e rran ni yima pag e abich ara rran ni yima fal’eg e mur, ya aram e n’en ni ma rin’ e teliw ni Jewish. Yugu boch e tamachib ni googsur e yad ma tiyan’rad ko pi engel, ni aram e pi kan nib gel ni kan fanayrad ni ngar pi’ed fare Motochiyel rok Moses. Mu lemnag ni ke yib e magawon ngom ni aram rogon! Ke yoor e lem ko girdi’ nib thilthil ni ke balyangan’ e girdi’ ngay.​—Galatia 3:19; Kolose 2:8, 16-18.

13. Susun ni ngan nang boch ban’en ma aram rogon e rayog ni ngan ayuweg piyu Kolose, ma uw rogon ni nge ayuwegdad e pi n’en nem?

¹³ I togopuluw Paul ko re n’em ma aram me weliy murung’agen e liw rok Jesus Kristus. “Ke mich u wun’med ni Kristus Jesus e ir e Somol romed, ere um pired rok. Mu tiyed lik’ngimed nib toar nga fithik’ Kristus, mu ubinged e ngongol romed nga daken yi ir e def romed, mi i gel i yan e mich u wun’med ngak, ni bod rogon ni kan fil ngomed.” Arrogon, ba t’uf rok (piyu Kolose nge gadad) ni nge michan’ rodad ko fare liw rok Kristus ko yaram rok Got nge yafas rodad. I weliy Paul ni gaar: “Ma taab girdi’ ni kam tiyed Kristus e ke yognag ngomed urngin e pi n’en ni nge ayuwegmed nguum rin’ed e tin nib m’agan’ Got ngay. I ir e tha’bi tolang u fithik’ urngin e kan ni ma gagiyeg nge tin ni ma tay murung’agen ban’en.”​—Kolose 2:6-10.

14. Mang fan ni baga’ fan e athap ko piin ni ur moyed u Kolose?

¹⁴ Piyu Kolose e yad e piin Kristiano ni kan dugliyrad. Ba thil e athap rorad, yad ra par u tharmiy, ma bay tapgin ni nge par nib tamilang e re athap rorad nem. (Kolose 1:5) Ereram e n’en nib “m’agan’ Got ngay” ni ngari michan’rad ni re athap rorad nem e ba mudugil. Bay boch i yad ni be maruwaran’ ko re athap nem? Ri danga’! Urngin e piin ni fare athap ni ke pi’ Got e aram e yafas u paradis, ma susun ba thil e n’en ni yad be lemnag e chiney? Ri danga’! Re athap nem e ba tamilang ni ir bang ko “tin nib m’agan’ Got ngay.” Chiney am mu lemnag e pi deer ney: Faan manga ga be maruweliy ni ngam mang bang ko fare “ulung ni baga’ ” ni ngar magaygad nib fas u nap’an e “gafgow ni baga’,” uw feni riyul’ e athap rom? Ke mang bang e re ney e “michan’ rom nib gel ko urngin e tin nib m’agan’ Got ngay”?

15. Mang boch e thin ni ke weliy Paul ni ba muun ngay e athap?

¹⁵ Fare “athap” e de sor fan ko n’en ni yibe tafinaynag ni de tamilang, yibe tawrengnag ban’en, ara ban’en ni yibe lemnag. Rayog ni ngada guyed e re n’ey ko boch ban’en ni ke weliy Paul faram ngak piyu Roma nib peth. Urngin ban’en ko pi thin nem e ba peth ko n’en ni migid. Mu tiyan’um ko n’en ni ke weliy Paul ni ke tay e “athap” rok riy me gaar: “Ma ku er rogon ni gadad ma falfalan’ u fithik’ e tin ni ma yib ngodad ni gadad ma gafgow riy, ya gadad manang ni pi’ n’ey e ma yognag e k’adan’ ngodad; ma k’adan’ e ma fal’egdad u wan’ Got, ma fel’ u wan’ ni gadad ma tay e ma yognag e l’agan’ ngodad. Re l’agan’ n’ey e dabi m’ing lanin’dad riy, yi Got e ke puog e t’ufeg rok nga fithik’ i lanin’dad u daken fare Kan ni Thothup, ni ir e tow’ath rok Got ngodad.”​—Roma 5:3-5.

16. Nap’an ni kam fil e thin riyul’ u Bible, mang athap e ke yog ngom?

¹⁶ Nap’an ni ra weliy e Pi Mich rok Jehovah ngom e thin nu Bible ko yay ni som’on, ma bay e thin riyul’ riy ni kari mit ngom, ni bod e n’en ni baaray ni rarogon e piin ni kar m’ad ara fare fas ko yam’. Boor i yad, e kar nanged ko yay ni som’on murung’agen e athap nrayog ni ngan par u paradis. Mu lemnag e n’en ke buch ko fa yay nsom’on ni kam rung’ag e re machib nem. Uw feni fel’ e re athap nem​—ni m’ar nge pillibthir e ra m’ay, ma ga ra par ni gab falfalan’ ya ra yib angin ngom e maruwel rom, ma bay e gapas u fithik’ e pi gamanman! (Eklesiastes 9:5, 10; Isaiah 65:17-25; John 5:28, 29; Revelation 21:3, 4) Ke yog ngom e athap nib fel’!

17, 18. (a) Uw rogon ni pi thin ni ke yog Paul ngak piyu Roma e ke pow’iyey ko “athap”? (b) Mit i mang e athap e be weliy ko Roma 5:4, 5, ma bay athap rom ni aray rogon?

¹⁷ Yu ngiyal’, e sana ra yib ngom e togopuluw ara skeng. (Matthew 10:34-39; 24:9) Taab rogon ko n’en ni ke buch dawori n’uw nap’an kafram, ma Pi Mich ni bay u boch e binaw nib thil thil e kan fek e chugum rorad u naun rorad u fithik’ e yargel ma kar ranod ngar pared ko binaw ni gathi binaw rorad nbochan. Ma boch i yad e kan amithnagrad, ma kan fek e Bible nge pi babyor, ma ri yima yog boch e thin nde riyul’ u murung’agrad u media. Demtrug ko miti mang e skeng ni ga ra mada’nag, rogon ni yog ko Roma Roma 5:3 e be gaar, rayog ni ngam par nib falfalan’ ko ngiyal’ ni nge yib e gafgow ngom, ma ra yib angin ngom. Taab rogon ko n’en ni i yoloy Paul ni, fapi gafgow ni ma yib ngom e ra ayuwegem ni ngam par ni kam k’adan’um. Ma kadan’ e ra fal’egdad u wan’ Got. Kam nang ni ga be rin’ e tin nib mat’aw, ya ga be rin’ e tin nib m’agan Got ngay, e re ke mudugil lanin’um ni gab fel’ u wan’. Bochan e pi thin ni yog Paul, ma kam thamiy ni “gab fel’ u wan’ Got.” Me ulul Paul ngay, ni “ngan par ni fel’ u wan’ Got, e ra [yibnag] e athap.” Gowa ra gin e girdi’ ngay. Mang fan ni ke uneg Paul fare “athap” ko pi thin ney ni ke yoloy? Gathi kam athapeg ban’en kakrom, ko ngiyal’ ni kam rung’ag fare thin nib fel’?

¹⁸ Ba tamilang, ni de weliy Paul e n’en ni kad lemnaged ko som’on u murung’agen e athap rodad ni nge yog ngodad e yafas nib flont. N’en ni be lemnag e gathi goo ir; ya n’en nib toar fan, n’en ni ma k’aring e falfalan’. Faan gad ra kadan’dad u fithik’ e yul’yul’ ma kad nanged ni gad ba fel’ u wan’ Got, ma bay angin ni ra yib riy ngodad ya ra gelnag e re n’ey e michan’ rodad. Fare athap ni ke yog ngodad e chiney e ke mang ban’en ni ri ba riyul’, ma ke gel ko kafram, me mang tirodad. Ma re athap n’ey ni ke toar boch e ra galgal ramaen nrib tamilang. Ma ra wer nga fithik’dad, ko pi ngongol rodad ni urngin. “Re athap n’ey e dabi m’ing lanin’dad riy, yi Got e ke puog e t’ufeg rok nga fithik’ i lanin’dad u daken fare Kan ni Thothup.”

19. Uw rogon ni fare athap rom e ra mang bang ko meybil rom u gubin ngiyal’?

¹⁹ Fare meybil rok Epaphras e ir e ke ayuweg e pi walagen ni pumoon nge ppin ni ur moyed u Kolose ni ke par ni kab gel e michan’ rorad ko n’en ni bay nga m’on rorad, me “kari l’agan’rad ko urngin e tin nib m’agan’ Got ngay.” Ku arrogon gadad ngada yibilayed ngak Got u gubin ngiyal’ murung’agen e athap rodad. Nap’an e pi meybil rom ni goo gur, ma ngam uneg ngay e athap rom ko fa bin nib biech e fayleng. Mog ku Jehovah ni ri ga be sonnag e re n’ey, ma kari mich u wan’um nra yib. Mu ning ni nge ayuwegem ni nge toar ma nge ga’ e michan’ rom. Bod rogon Epaphras ni ke yibilay ni nge yog ngak piyu Kolose e “michan’ nib gel ko urngin e tin nib m’agan’ Got ngay,” ma ba fel’ ni ngada rin’ed e n’en ni aray rogon. Mu rin’ e n’en ni aray rogon u gubin ngiyal’.

20. Faanra bay boch e girdi’ ni kar paged fare kanawo’ ko Kristiano, mang fan ni susun dabi mulan’dad nbochan?

²⁰ Susun dabi mulan’um ni bochan e gathi urngin e girdi’ e ra par nib mudugil mab gel e michan’ rok. Boch e ka ra olobochgad, ka ra sorgad nga bang, ara ke mus ni kar talgad. Aram e n’en ni ke buch ko piin ni ba chuchugur ku Jesus, ni pi gachalpen. Machane u nap’an ni ke yognag Judas Jesus, ma ke war yugu boch e apostal fa ka ra talgad? Ri danga’! Ke fol Peter ko thin ko Psalm 109:8 ni be dag ni bay be’ ni ngan tay nga luwan. Kan mel’eg be’ ni ngan ta’ nga luwan, ma piin nib yul’yul’ ku Got e ka ra ululgad i wereg e thin nib fel’ ya ereram e maruwel rorad. (Acts 1:15-26) Ke mudugil lanin’rad ni ngar pared ni rib mudugil ma kari pagan’rad.

21, 22. Uw rogon ni yira nang ni ga be par nib mudugil ma kari michan’um?

²¹ Ri dariy e maruwar riy ni yira nang ni ga be par nib mudugil ma kari mich u wan’um urngin e tin nib m’agan’ Got ngay. Yira yaliy ma yira falfalan’ ngay. Mini’ e pi cha’ nem?

²² Pi walagem ni pumoon nge ppin, ni manangem ma gab t’uf rorad e yad ra guy. Yugu aram rogon ni boor i yad e de un i yog fare thin, machane taareb rogon ko n’en nrayog ni ngada bieged ko 1 Thessalonika 1:2-6 ni gaar: “Gubin ngiyal’ ma gamad ma pining e magar ngak Got ni bochmed ni gimed gubin, ma gubin ngiyal’ ni gamad ma unegmed ko meybil romad. Ya der m’ay u wun’med u p’owchen Got rodad ni ir e Chitamangidad rogon ni kam maruwelgad ko michan’ romed, nge rogon ni ke ngongliymed nge rogon nib t’uf Got romed nge girdi’ kam maruwelgad nrib gel, nge rogon ni kari l’agan’med ngak e Somol rodad i Jesus Kristus. Ya . . . gu feked i yib ngomed e Thin Nib Fel’ ni yib rok Got, ni gathi ke mus ni ug weliyed, ya ku er rogon gelngin Got nge Fare Kan ni Thothup nib chagil ngay, ma ku er rogon nib mich u wun’med nib riyul’. . . . Ya mu folwokgad romad nge Somol.” Piin Kristiano nib yul’yul’ ni bay u toobmed e ra boded gimed ya yad be yaliy ni gimed be “par ni gimed ba yul’yul’ ma gimed mmudugil ko n’en ni ke michan’med ngay.”​—Kolose 1:23.

23. Nap’an e re duw nem ni be yib, ma susun mang e gad ra dugliy?

²³ Ba tamilang, ni Chitamam u tharmiy e ra yaliy ma ra falfalan’. Mu pagan’um ngay. Mang fan? Ya bochan e gimed be par nib mudugil ma kari michan’med “ko tin nib m’agan’ Got ngay ni urngin.” Me yol Paul ngak piyu Kolose u murung’agen e n’en ni baaray ni ka ra “ngongolgad nrogon ni baadag Somol, mu um rin’ed e tin nib m’agan’ ngay ni gubin ngiyal’.” (Kolose 1:10) Er rogon, rayog ko girdi’ ni dawora flontgad nra falan’naged Got ni polo’. Pi walagmed u Kolose ni pumoon nge ppin e ka ra rin’ed e n’en ni aray rogon. Piin Kristiano u toobmed e aram rogon e n’en ni yad be rin’ e chiney. Gur e ku rayog ni ngam yodor! Arfan, ni lan e re duw ney, ma ngam pag ni meybil nge ngongol rom u gubin e rran e ra dag ni “ke mudugil lanin’um [ni] ngam par ni rib mudugil ma kari michan’um ko urngin e tin nib m’agan’ Got ngay.”

Ka Ga Manang?

• Ngad ‘pared nib mudugil’ ma mang e ba l’ag ngay?

• Mang boch ban’en u murung’agem e thingar mu uneg ko meybil rom?

• Rogon ni yog ko Roma 5:​4, 5, mmit i mang e athap e ga baadag ni nge yog ngom?

• Pi thin ni kad filed e ke gelnigem ni ngam nameg e mang u nap’an fare duw ni be yib?

[Picture on page 26]

I meybil Epaphras ni fen pi walagen ni ngar pared ni yad e Kristiano ni kar ilalgad ko tirok Got, ma kari michan’rad ngak Kristus nge athap rorad

[Pictures on page 28]

Fare athap nib mudugil nge michan’ rom e ke yog ngak yugu boch e girdi’ ni bokum milyon urngin