Ga Manang ko Ke Mingiyal’?

MANG e ga ra rin’ ni faanra ga baadag ni ngam nang e tayim? Sana mudugil ni ga ra sap ko kolok ni bay u paam, ara mu sap nga yugu reb e kolok. Maku faanra ke fith reb e fager rom ko ke mingiyal’, ma aram e rayog ni ngam mog ngak e tayim. Machane uw rogon ni ga ra yog ngak? Boor e kanawo’ u rogon ni yima yog e tayim riy. Uw rogon e re n’ey?

Re n’ey e be yan u rogon e gin ni ga ma par riy. Bod nrayog ni nga mog ni “ke 1:30” ara “ke 13:30.” Maku bay yu yang nrayog ni nga nog ni “ke baley ko l’agruw,” ni aram e be yip’ fan ni guyey e minit me l’agruw.

Rayog ni ngam lemnag ko uw rogon ni ma yog e girdi’ e tayim kakrom. Boor e kanawo’ ni yima yog e tayim riy. U lan e Pi Babyor ko Bible nni Yoloy Nsom’on ni Thin ni Hebrew ni un fanay boch e thin riy ni bod e, “kadbul,” nge “misiw’,” nge “gonowrug” ni ngan nog e tayim riy. (Gen. 8:11; 19:27; 43:16; 1 Ki. 18:26) Machane bay yu ngiyal’ nib mudugil e tayim ni be weliy e Bible.

Kakrom u nap’an piyu Israel e ba ga’ nra nep’ ma yima tay be’ ni ir e nge mang matanag. Re n’ey e ban’en ni manang piyu Israel ni bochan e rogon ni yad ma yog e tayim kakrom e ba puluw nga rogon ni kan yu guruynag e tayim nnep’ ni dalip guruy. Bod ni weliy e Judges 7:19 murung’agen reb ko pi tayim nem ni kan kieg ni be gaar “ke chugur ni nge lukngun e nep’.” Machane nap’an e ngiyal’ nni gargeleg Jesus riy, ma aram e ke tabab piyu Jew ni ngar folgad u rogon ni ke yu guruynag piyu Greek nge piyu Roma e tayim ke gaman aningeg guruy.

Boor yay ni weliy e pi Gospel murung’agen ngal’an e matanag nnep’. Bod ni weliy e Bible murung’agen e bin aningeg ngal’an e matanag me yog ni ba “ngiyal’ u thilin e dalip nge nel’ e kolok ko tanirran” me yan Jesus u daken e ran ni be yan ko fare bowoch ni bay pi gachalpen riy. (Matt. 14:25) Ki weliy Jesus u lan reb e fanathin ni gaar: “Faan mang e manang e en ntafen e naun e ngiyal’ [“ni aram ngal’an e matanag,” NW] nra yib e moro’ro’ riy, ma ra i par ni be od nge dabiyog ni yan e moro’ro’ nga naun rok.”​—Matt. 24:43.

Ke weliy Jesus murung’agen e pi tayim ney ni fan ko ngal’an e matanag u nap’an ni gaar ngak pi gachalpen: “Mu tedan’med, ya da mu nanged e ngiyal’ nra sul e en ntafen e naun riy: ko nep’, fa lukngun e nep’, fa chochol e nimen, fa kakadbul.” (Mark 13:35) Bin som’on ngal’an e matanag e aram e “nep’” ni tabab ko ngiyal’ ni ke aw e yal’ nge mada’ nga bang ko mereb e kolok ni blayal’. Ma bin l’agruw e aram e “lukngun e nep’” e tabab u bang ko mereb e kolok ni blayal’ nge mada’ nga lukngun e nep’. Ma bin dalip e aram e ngiyal’ ni ma “chochol e nimen” riy ara bang ko tanirran ni tabab ko lukngun e nep’ nge mada’ ko dalip e kolok ni kakadbul. Sana ireray e ngiyal’ ni chorool e nimen ko fare nep’ nni kol Jesus. (Mark 14:72) Ma bin aningeg ngal’an e matanag e “kakadbul” ni aram e tabab ko dalip e kolok ni kakadbul nge mada’ ko ngiyal’ ni ke m’ug e yal’.

Ere yugu aram rogon ndariy e kolok ko girdi’ kakrom ni bod rogon e ngiyal’ ney, machane bay rogon ni yima yog e tayim riy.