Mu Folwok rok Jehovah ni Aram e Ngam Lemnag Rarogon e Girdi’ mag Gol Ngorad

1. Uw rogon ni ma dag e pi tapigpig rok Jehovah ni yad ma t’ufeged yad?

PI TAPIGPIG rok Jehovah u ga’ngin yang e fayleng e yad bang u chon reb e tabinaw. Yad bogi walag ni yad ma t’ufeged yad. (1 John 4:16, 21) Yu ngiyal’ e yad ma pag farad u boch ban’en nrib mo’maw’ ngorad ni ngar rin’ed ni bochan e ngar ayuweged pi walagrad, machane yooren e ngiyal’ e yad ma dag e re t’ufeg ney u daken nochi ban’en ni yad ma rin’ ni fan ngak pi walagrad. Bod nrayog ni nga rogned boch e thin nib fel’ ngak pi walagrad ara ur rin’ed boch ban’en ngorad u fithik’ e gol. Ere nap’an nra ud lemnaged rarogon yugu boch e girdi’, ma aram e gad ‘be folwok rok Got, ni bochan e gadad pi fak ni gadad ba t’uf rok.’​—Efe. 5:1.

2. Uw rogon ni folwok Jesus u rogon ni ma dag e Chitamangin e t’ufeg?

² Rib fel’ rogon ni ma folwok Jesus rok e Chitamangin. Gubin ngiyal’ ni ma rin’ boch ban’en ngak e girdi’ u fithik’ e gol. Aram fan ni yog ni gaar: “Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed . . . ya gub munguy ma gub sobut’an.” (Matt. 11:28, 29) Ere nap’an ni gad ra folwok rok Jesus ngad lemnaged rarogon e “piin gafgow” ma aram e gad ra felfelan’nag Jehovah maku gad ra felfelan’. (Ps. 41:1, BT) U lan e re article ney e gad ra weliy rogon nrayog ni ngad daged ni gad ma lemnag rarogon e girdi’ u lan e tabinaw rodad, nge pi walagdad u lan e ulung, nge piin ni gad ma mada’nag u nap’an e machib.

MU LEMNAG RAROGON E GIRDI’ U LAN E TABINAW ROM

3. Uw rogon nrayog ni nge dag reb i figirngiy ni be lemnag rarogon leengin? (Mu guy e sasing ni bay u tabolngin e re article ney.)

³ Piin figirngiy e ba t’uf ni yad e ngar daged e kanawo’ nrayog ni nge folwok chon e tabinaw rorad riy u rogon ni ngan lemnag rarogon be’, ni aram e ngar daged rogon ni yad ma lemnag rarogorad. (Efe. 5:25; 6:4) Be yog e Bible ni piin figirngiy e thingar ra lemnaged rarogon pi leengirad mar guyed rogon ni ngar nanged fan lanin’rad. (1 Pet. 3:7) Reb i figirngiy ni manang fan laniyan’ leengin e manang ni boor ban’en nib thil u rarogorow nge pi n’en nrayog rorow, machane der ma lemnag ni kab fel’ ngak leengin. (Gen. 2:18) Aram fan ni ma lemnag laniyan’ e ppin rok ma ma rin’ ban’en ngak u fithik’ e tayfan. Bay reb e ppin nu Canada ni weliy murung’agen figirngin ni gaar: “Dariy ba ngiyal’ ni ma darifannag e pi n’en ni gu ma lemnag ara gaar ngog, ‘Susun e dab mu lem ni aram rogon.’ Ku ir be’ nri ma motoyil ngog nib fel’ rogon. Nap’an nra ayuwegeg ni nggu yal’uweg rogon ni gu be lemnag ban’en, ma ma rin’ u fithik’ e gol.”

4. Uw rogon nrayog ni nge dag reb i figirngiy ni be lemnag rarogon leengin u rogon ni ma ngongol ngak yugu boch e ppin?

⁴ Reb i figirngiy ni ma lemnag rarogon leengin e der ma ngongol i dawol ngak yugu reb e ppin ara i ngongol ngak nde puluw rogon u nap’an ni yow bay u taabang. Maku dabi rin’ e re n’ey u daken e pi n’en ni bay ko Internet ni yima non riy ngak yugu boch e girdi’, ara u daken yugu boch ban’en ni bay ko Internet. (Job 31:1) Ku der ma yaliy boch e website nde fel’. Arrogon, ma par nib yul’yul’ ko ppin rok ni bochan e ba t’uf rok, ma kub t’uf Jehovah rok ma ma fanenikay e n’en nib kireb.​—Mu beeg e Psalm 19:14; Amos 5:15.

5. Uw rogon ni nge dag e en leengiy ni be lemnag rarogon figirngin?

⁵ Faanra folwok reb i figirngiy rok Jesus Kristus ni ir lolugen, ma aram e ra mom ngak leengin ni nge “ta’ fan.” (Efe. 5:22-25, 33) Ma nap’an nra tayfan e en leengiy figirngin, ma aram e re n’en nra ayuweg ni nge nang fan laniyan’ me rin’ boch ban’en ngak u fithik’ e gol. Re n’ey e ban’en nib t’uf ni nge rin’ ko ngiyal’ nra t’uf ni nge rin’ e pumoon rok boch e maruwel u lan e ulung ara ngiyal’ ni nge pithig e magawon. Bay reb i figirngiy u Britain ni gaar: “Yu ngiyal’ e manang e ppin rog ni ke thil rarogog ni bochan e bay ban’en ni be magawonnag lanin’ug. Ma aram e ngiyal’ ni ma fol ko fare kenggin e motochiyel ni bay ko Proverbs 20:5, ni aram e nge sonnag e ngiyal’ nib fel’ ni nge ‘l’ing’ ara nge guy rogon ni nge nang lanin’ug ni faanra ban’en nrayog ni nggu weliy ngak.”

6. Uw rogon nrayog ni gad gubin ni ngad ayuweged e piin bitir ni ngar lemnaged rarogon yugu boch e girdi’ mar golgad ngorad? Ma mang angin nra yib ngorad?

⁶ Nap’an nra dag e gallabthir ni yow be lemnag rarogorow, ma aram e yow be dag e kanawo’ nib fel’ nrayog ni nge folwok e bitir rorow riy. Kub t’uf ni ngar filew ngak pi fakrow ni ngar lemnaged rarogon e girdi’ mar golgad ngorad. Bod nrayog ni ngar filew ngak pi fakrow ndab ur milmilgad u lan Tagil’ e Liyor rodad ara u nap’an reb e abich. Maku rayog ni ngar rognew ko bitir rorow ni ngar songad nge fek e piin pilibthir garad ni som’on. Riyul’ ni gad gubin u lan e ulung nrayog ngad ayuweged fa gallabthir. Ere ba t’uf nnap’an nra rin’ reb e bitir ban’en ni be m’ug ni be lemnag rarogon e girdi’ ni bod ni ke bing e mab ngodad, ma ngad pininged e magar ngak. Ya re n’ey e ra k’aring e felfelan’ ko fare bitir, ma ra ayuweg ni nge nang ni “ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.”​—Acts 20:35.

MU LEMNAG RAROGON E GIRDI’ U LAN E ULUNG

7. Uw rogon ni dag Jesus ni be lemnag rarogon fare moon nib biling? Ma mang e rayog ni ngad filed ko n’en ni ke rin’ Jesus?

⁷ Bay reb e rran ni immoy Jesus u lan fagi nug nu Decapolis ma aram me fek boch e girdi’ “be’ nib moon i yib ngak nib biling ma ba tagan e thin u l’ugun.” (Mark 7:31-35) Ere ke golnag Jesus e re moon nem machane de rin’ e re n’ey u p’eowchen e girdi’. Mang fan? Bochan e re moon nem e bbiling, ma sana ra magagawon u fithik’ e girdi’ ni yoor. Manang Jesus rogon laniyan’ e re moon ney, aram fan ni fek “faanem ni go ir nga orel” nga bang ndariy e girdi’ riy mfini golnag. Ere riyul’ ndabiyog ni ngad ngongliyed e maang’ang, machane thingar da lemnag rarogon e pi n’en nib t’uf ko pi walagdad nge rogon lanin’rad ma gad gol ngorad. Ke yoloy apostal Paul ni gaar: “Nge bagadad ma ngi i lemnag bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak.” (Heb. 10:24) Manang Jesus rogon laniyan’ fare moon nib biling ma aram fan ni gol ngak. Ireray reb e kanawo’ nrib manigil ni ke dag Jesus nrayog ni ngad folwokgad riy!

8, 9. Uw rogon ni ngad daged ni gad be lemnag rarogon e piin pilibthir nge piin marwoth? (Mu weliy murung’agen boch e girdi’.)

⁸ Ngam lemnag rarogon e piin pilibthir nge piin marwoth. N’en th’abi ga’ fan ni nge m’ug u lan e ulung ko Kristiano e t’ufeg ma gathi rogon feni fel’ ni yad ma rin’ boch ban’en. (John 13:34, 35) T’ufeg e ma k’aringdad ni ngad rin’ed e tin rayog rodad ni ngad ayuweged pi walagdad ni kar pilibthirgad ara yad ba marwoth ya nge yag ni ngar uned ko muulung ara machib. Gad ma rin’ e re n’ey ni yugu aram rogon nib mo’maw’ ngodad ara buchuuw ban’en nrayog ni ngar rin’ed. (Matt. 13:23) Michael ni ir be’ nib m’ar e yugu ma par u wheelchair e rib ga’ fan u wan’ e ayuw ni ma pi’ e tabinaw rok nge pi walag u lan e ulung ngak. Ke yog ni gaar: “Ke yag ni nggu un ko muulung nge machib ni bochan e ayuw ni kar pied ngog. Ma ri gu baadag ni gu ma un ko machib u fithik’ e girdi’ ni yoor.”

⁹ Boor e Bethel ni bay e pi walag nib yul’yul’ riy ni kar pilibthirgad ma boch i yad e ba marwoth. Ma bochan ni ma lemnag e pi walag ni yad ma yarmiy e tin ni ngan rin’ u rom rarogon e pi walag ney, ma aram fan ni kar dugliyed ni nge machib e pi walag ni kar pilibthirgad ma yad ba marwoth ni aram e ngar yoloyed e babyor ngar pied ko girdi’ nge machib u taban e telefon. Bay bagayad e pi walag ney ni Bill fithingan ni ke gaman 86 e duw rok ni ma yoloy e babyor ngak e piin nib palog e gin ni yad ma par riy e yog ni gaar: “Rib ga’ fan u wan’mad e re maruwel ney ni kan pi’ ngomad ni aram e nggu yoloyed e babyor nggu pied ko girdi’.” Me Nancy ni ke chugur ni nge gaman 90 e duw rok e ki yog ni gaar: “Dagur ma lemnag ni pi babyor ney ni yibe yoloy e kemus ni yibe tay nga lan e envelope. Ya re n’ey e aram reb e kanawo’ ni gad ma machib riy. Ba t’uf ni nge nang e girdi’ e tin riyul’.” Me Ethel ni kan gargeleg ko duw ni 1921 e yog ni gaar: “Amith e ke mang bang ko yafos rog. Bay boch e rran nib mo’maw’ rogon ni nggu chuw nga mad rog.” Yugu aram rogon mab felfelan’ Ethel ngay ni ma machib u taban e telefon, maku bay boch e girdi’ ni ku ma sul nge kolnagrad ya yad baadag e machib. Ki weliy Barbara ni ke gaman 85 e duw rok ni gaar: “Bochan ni kug m’ar, ma aram fan nib mo’maw’ ngog ni nggu un ko machib ni gubin e rran. Machane machib u taban e telefon e ke ayuwegeg ni nge yag ni nggu machibnag e girdi’. Ke magar Jehovah!” De gaman reb e duw nga tomuren, ma pi pilibthir ney nrib ga’ farad e 1,228 urngin e awa ni kar machibgad riy, ma 6,265 urngin e babyor ni kar yoloyed kar pied ko girdi’, ma ba pag ko 2,000 urngin e girdi’ nra machibnaged u taban e telefon, ma 6,315 urngin e babyor nra pied! Rayog ni nge pagan’dad ni kari felfelan’ Jehovah ko athamgil ni ke tay e pi cha’ney!​—Prov. 27:11.

10. Uw rogon nrayog ni ngad ayuweged pi walagdad ni nge yib angin e muulung ngorad?

¹⁰ Ngam dag ni ga be lemnag rarogon e pi walag u nap’an e muulung ko piin Kristiano. Faanra ud lemnaged rarogon laniyan’ e pi walagdad ma rayog ni ngad ayuweged yad nge yib angin e muulung ngorad. Ni uw rogon? Reb e kanawo’ e ngad bad ko muulung u m’on ni nge tabab ya nge dab da magawonnaged yad u nap’an ni gad ra yib nib sagaal. Yu ngiyal’ e ma buch boch ban’en ndad lemnaged nra buch me k’aringdad e re n’ey ni ngad sagaalgad. Machane faanra gubin ngiyal’ ni gad ma yib ni gad ba sagaal ko muulung, mab t’uf ni ngad lemnaged ko mang e ra rin’ e re n’ey ngak pi walagdad, nge n’en nib t’uf ni ngad thilyeged ya nge yag ni ngad daged ni gad be lemnag rarogorad. Ku dab mu pagtalin ni Jehovah nge Fak e yow e ra piningew gadad ko muulung. (Matt. 18:20) Ere rib t’uf ni ngad daged ni gad be tay farow ni aram e ngad bad ko muulung ndab da sagaalgad!

11. Mang fan nsusun ni nge fol e pi walag ni bay e welthin rorad ko fare fonow ni bay ko 1 Korinth 14:40?

¹¹ Faanra gad ma lemnag rarogon e pi walagdad, ma aram e gad ra fol ko fare fonow ni be gaar: “Urngin ban’en ma thingar nrin’ nib fel’ rogon ma ba yaram.” (1 Kor. 14:40) Pi walag ni pumoon ni bay e welthin rorad u nap’an e muulung e yad ma fol ko re fonow ney ni aram e yad ma guy rogon ni ngar mu’naged e welthin rorad ko tayim ni kan dugliy. Faan yad ra rin’ ni aray rogon, ma gathi kemus ni yad be dag ni yad be lemnag e en ni migid ni ngki pi’ e welthin, ya ku yad be lemnag gubin e pi walag u lan e ulung. Am lemnag rogon laniyan’ e pi walag ni faanra ni mu’ ko muulung nib sagaal. Ya bay boch e walag nib n’uw e kanawo’ rorad nga tabinaw. Ma bay boch i yad e ba t’uf ni ngan mu’ me yan ni un u bus ara train. Maku bay boch i yad nder ma pigpig e en mabgol rorad ngak Jehovah ere mmudugil e tayim nthingari taw nga tabinaw.

12. Mang fan ni bay rogon ni ngad daged e tayfan nge t’ufeg ngak e piin piilal? (Mu guy fare kahol ni kenggin e “Mu Dag ni Ga Be Lemnag Rarogon e Piin ni Yad Be Yog e Thin u Lan e Ulung.”)

¹² Piin piilal e yad ma maruwel nib gel u lan e ulung ngu nap’an e machib, ere bay rogon ni ngad daged e tayfan nge t’ufeg ngorad. (Mu beeg e 1 Thessalonika 5:12, 13.) Mudugil nrib ga’ fan u wan’um e pi maruwel ni yad ma rin’ ni fan ngom. Ma rayog ni ngam dag e re n’ey ni faanra ba m’agan’um ngay ni ngam fol ko pi n’en ni yad be yog mag ayuwegrad. Ya yad be rin’ e pi n’ey ni bochan e yad ‘be matanagiy lanin’dad ndarir talgad, ni bochan e thingar rogned ngak Got rogon e maruwel rok ni ur ngongliyed.’​—Heb. 13:7, 17.

MU LEMNAG RAROGON E GIRDI’ U NAP’AN E MACHIB

13. Mang e rayog ni ngad filed u rogon ni ma ngongol Jesus ngak e girdi’?

¹³ Ke yiiynag Isaiah murung’agen Jesus u lan reb e yiiy rok ni gaar: “Dabi t’ar ba ley i rouy ni ke m’ing, ma dabi thang ba magal ni be n’en ni nge math.” (Isa. 42:3) Bochan nib t’uf e girdi’ rok Jesus ma ireray e n’en ni k’aring ni nge dag ni manang rogon laniyan’ e girdi’. Manang fan laniyan’ e piin ni kar mochuchgad mab meewar lanin’rad ni bod e “rouy ni ke m’ing” ara “ba magal ni be n’en ni nge math,” ere aram fan ni ngongol ngorad u fithik’ e gol nge gum’an’. Mus ko piin bitir ma yad baadag ni nga ranod ngak Jesus. (Mark 10:14) Riyul’ ndabiyog ni ngad nanged fan laniyan’ e girdi’ ni bod rogon Jesus ara da machibgad ni bod rogon ni rin’! Machane rayog ni ngad daged ni gad be lemnag rarogon e piin ni gad be machibnagrad. Rayog ni ngad rin’ed e re n’ey u rogon ni gad ma non ngorad, nge ngiyal’ ni gad ma non ngorad, nge n’umngin nap’an ni ngan non riy.

14. Mang fan nthingar da lemnaged rogon ni ngad nonad ko girdi’?

¹⁴ Uw rogon ni ngad nonad ngak e girdi’? Bokum milyon e girdi’ e ngiyal’ ney e “ke magafan’rad ndar nanged e n’en ni ngar rin’ed” ni bochan e sasalap nge ngongol ni be tay e pi siyobay nge pi am u roy u fayleng nge pi tayugang’ ko teliw ni be m’ug riy ndarur runguyed e girdi’. (Matt. 9:36) Ere wenegan ni ke yib riy e yooren e girdi’ e dakuriy be’ ni be pagan’rad ngak maku dakuriy e athap rorad. Aram fan nib t’uf ni ngad daged ngorad ni gad ba gol ma gad be lemnag lanin’rad u rogon e thin ni gad ma yog nge rogon ni nga dogned e pi thin nem ngorad! Yooren e girdi’ e yad baadag ni ngar motoyilgad ko pi n’en ni gad be machibnag ni gathi bochan e ba fel’ rogon ni gad ma tamilangnag e thin u lan e Bible ngorad, ya ku bochan nriyul’ ni gad be lemnag rarogorad ma gad be tayfarad.

15. Mang boch e kanawo’ nrayog ni ngad daged riy ni gad be lemnag rarogon e girdi’ ni gad ma machibnagrad?

¹⁵ Boor e kanawo’ nrayog ni ngad daged riy ni gad be lemnag rarogon e girdi’ ko gin ni gad be machib riy. Ba t’uf ni ngad fithed boch e deer nra m’ug riy ni gad ba gol ngorad ma gad be tayfarad. Bay reb e pioneer ni ma machib u bangi ban’en ni yooren e girdi’ riy e yad ma tamra’. Ere ma siyeg e re walag nem ni nge fith e deer nra k’aring e tamra’ ngorad ni bochan e dar nanged e fulweg riy. Ere dabi fith reb e deer ni bod e, “Ga manang ko mini’ fithingan Got?” ara “Ga manang ko mang Gil’ilungun Got?” Ya ma yog ni gaar, “Kug fil u Bible ni bay fithingan Got. Ere rayog ni nggu dag ngom e re n’ey?” Re n’ey ni rin’ e re walag ney e gathi gubin yang ma rayog ni ngan rin’ riy ni bochan e ba thilthil rarogon e girdi’ nge yalen u reb e binaw nge reb. Yugu aram rogon ma gubin ngiyal’ nthingar da daged e gol nge tayfan ngak e girdi’. Ra ngad rin’ed e re n’ey mab t’uf ni ngad nanged rarogorad.

16, 17. Uw rogon nrayog ni ngad daged e gol u nap’an ni gad be dugliy (a) e ngiyal’ ni nga darod da machibnaged e girdi’? (b) n’umngin nap’an ni ngad nonad?

¹⁶ Mingiyal’ e ba fel’ ni nga darod da machibnaged e girdi’? Nap’an ni gad be machib u mit e tabinaw ma pi girdi’ nem e darur lemnaged ni nga darod nga taferad ni bochan e dawor ra pininged gadad ngaram. Ere ba ga’ fan ni nga darod u reb e tayim nra m’agan’rad ngay ni ngad nonad. (Matt. 7:12) Bod ni, gur baadag e girdi’ ko gin ni ga ma machib riy ni yad ma mol nge misiw’ u nap’an e Sabado nge Madnom? Ra arrogon, ma aram e sana ba t’uf ni som’on e ngam machib u kanawo’, ara u fithik’ e girdi’ ni yoor, ara mu sul ngam guy be’ ni kam mada’nag bayay ni ga manang nrayog ni ngam nonow.

¹⁷ Uw n’umngin nap’an ni ngad nonad ngak e girdi’? Ngiyal’ ney e yooren e girdi’ e rib boor pa’ nga puluwrad, ere ba t’uf ndabi n’uw nap’an ni ngad nonad ngorad, nib ga’ ni faanra ireram e som’on ni kad mada’naged yad. Ere ba fel’ ni ngam museg e thin romew nib papey ko bin ni ngam nonow nib n’uw nap’an. (1 Kor. 9:20-23) Nap’an nra guy e girdi’ ni gad be lemnag rarogorad ni bochan e boor pa’ u puluwrad, ma aram e ra m’agan’rad ngay ni nge yay ni migid ma gad non ngorad. Ere ba tamilang ni faan gad ra dag e pi fel’ngin ni ma pi’ Got u daken gelngin nib thothup, ma re n’ey e be m’ug riy ni gad be ‘maruwel Got u taabang.’ Ma rayog ni nge fanaydad Jehovah ni ngad ayuweged be’ ni nge nang e tin riyul’.​—1 Kor. 3:6, 7, 9.

18. Faan gad ra dag ni gad be lemnag rarogon e girdi’, ma mang tow’ath e rayog ngodad?

¹⁸ Ere ngad rin’ed e tin nrayog rodad ni ngad lemnaged rarogon girdien e tabinaw rodad, nge pi walag, nge piin ni gad ma mada’nagrad u nap’an e machib. Ya faan gad ra rin’ ni aray rogon, ma aram e boor e tow’ath nrayog ngodad e chiney i yang nga m’on. Ya be gaar e Psalm 41:1, 2 (BT): “Nge felan’ e piin ma magafan’rad [“ara piin ni yad ma lemnag rarogon e,” NW] . . . piin gafgow; ya Somol e ra ayuwegrad ko ngiyal’ ni ke yib e oloboch ngorad . . . [ma] ra tayrad ni yad ba felfelan’ u daken fare but’.”