Ngan Lemnag e Girdi—Min Runguyrad
1 “Jehovah e ma runguy e girdi’.” (Ps. 145:8) Yugu aram rogon ni ir e Ani Ga’ u Palpal Th’ib, ma ir be’ nib gol, ma ma lemnag e girdi’ ndar flontgad ma ma runguyrad. (Gen. 13:14; 19:18-21, 29) Rayog ni ngad ayuweged i wereg fare thin nib fel’ ni faanra ngad folwokgad rok Got ni ma runguy e girdi’. (Kol. 4:6) Gathi ke mus ni ngan non nib fel’ ma ngan tay fan e girdi’ ko thin rodad.
2 U Mit e Tabinaw Iyan: Mang ni faanra kad bad ko ngiyal’ nde m’ag fa dariy e tayim ni nge non be’ ngodad? Fel’ ni ngad ted fan e girdi’ ma dabda nongad nib n’uw nap’an fa ngad dogned ni ngad sulod ko yugu ba ngiyal’. Dabda towarsariyed e girdi’ ngar feked e babyor ni faanra dubrad. Maku faanra gad ma lemnag e girdi’ ma gad ra tay fan e binaw rorad ma ngad ninged e garog nge mab ma ngad skulnaged e bitir rodad ni ngar rin’ed ni aram rogon. Susun ni ngad guyed rogon ni faanra demoy be’ ma ngad ted e babyor u bang ni dabi guy e yugu girdi’. Arrogon, faanra gad ma runguy e girdi’ ma gad ra ngongol ngorad uw rogon ni gad ba adag ni ngan ngongol ngodad.—Luke 6:31.
3 Machib u Kanawo’: Nap’an ni gad be wereg e machib u kanawo’ ma gad ra lemnag e girdi’ ni faan dabda magawonnaged e girdi’ u nap’an ni yad be yan ma dabda muulunggad u mit e kantin ara yugu boch e naun. Gad ra lemnag e girdi’ ma ngad nonad ko piin ni bay boch e tayim ma gathi piin ni be gur. Yu ngiyal’ ma ba t’uf ni ngad nongad nib ga’ lamdad ni fan ni ngan rung’agdad u fithik’ e wagey u kanawo’. Machane susun ni ngad rin’ed uw rogon nib fel’ ma gathi rogon ni ngan sap ngodad.—Matt. 12:19.
4 Nap’an ni Ngan Machib ko Telefon: Faan gad ma lemnag e girdi’ ma gad ra machib ko telefon u bang ni dariy e wagey ni ngan rung’ag. Gad ma lemnag e girdi’ u nap’an ni gad ra yog ko gad mini’ ma ngad weliyed ko mang fan ni gad be telefon. Ngan non ko telefon nib fel’ rogon mab munguy ma ra ayuweg e girdi’ ngar uned ko sabethin ko tirok Got ban’en. (1 Kor. 14:8, 9) Faan gad ra gol ko girdi’, ma gad ra lemnagrad, ma gad ra runguyrad, ma aram ma gad be folwok rok Jehovah ni Got rodad ni ma runguy e girdi’.