Bay Rom “Fare Lem Rok Kristus”?

“I Got ni ir e ma yib e gum’an’ nge athamgil laniyan’ rok ngodad e nge ayuwegmed . . . nga um lemgad ni wod e lem rok Kristus Jesus.”​—ROMANS 15:5, New World Translation.

1. Uw rogon yaan Jesus ko boch e sasing ni kan faleg, ma mang fan ni gathi riyul’ ni aram rogon Jesus?

“DAN GUY taabyay ni ke minmin.” Aram e n’en ni kan weliy u murung’agen Jesus u reb e babyor ni de riyul’ ni yima yog ni reb e girdi’ nu Roma nib tolang e liw rok e ke yoloy e re n’em. Re ke babyor nem, ni kan nang e rogon yaan e chiney e yibe sananag ni ka nap’an fa bin 11 e chibog, ma re babyor nem e be fol e girdi’ ni ma yoloy yaan ban’en riy yad be yoloy yaan Jesus ni ir be’ nib kireban’ ma gathi ri ma minmin.a Machane gathi aram rogon Jesus ni be weliy e Gospel murung’agen ya be’ nib gol mab ta runguyey.

2. Uw rogon ni ngad maruweliyed ni nge yog ngodad “fare lem ni taabrogon ko lem rok Kristus,” ma rayog ni nge ayuwegdad e re n’ey ni ngad rin’ed e mang?

² Ba tamilang, ni faanra ngada nanged ko mini’ Jesus ni riyul’, ma thingarda suguyed laniyan’dad nge gum’ercha’dad ko tamilangan’ nib puluw nga rogon ko mit i mang girdi’ e riyul’ ni Jesus ko ngiyal’ ni immoy u fayleng. Ere ngada yaliyed boch e thin ko fare Gospel ni ngada nanged “fare lem rok Kristus”​—nib muun ngay ko uw rogon ni be thamiy ban’en, nge tamilangan’ rok, nge lem rok, nge rogon ni tamilangnag ban’en. (1 Corinthians 2:16) Nap’an ni gad ra rin’ ni ara’ rogon, ma gad weliy ko uwrogon me yog ngodad “e lem ni taabrogon ko lem rok Jesus Kristus.” (Romans 15:5) Ma aram rogon, ma sana ra manigil e yafas rodad ma ra manigil rogon ni ngad chaggad ngak yugu boch e girdi’ ni ngad folwokgad ko n’en ni ke rin’ ni fan ngodad.​—John 13:15.

Mmom ni Ngan Chuchugur Ngak

3, 4. (a) Mang boch ban’en ni ke buch ni kan yoloy u Mark 10:13-16? (b) Mang e ke rin’ Jesus ko ngiyal’ ni pi gachalpen e kar guyed rogon ni ngar taleged e pi bitir ni nge dabra bad ngak?

³ Boor e girdi’ ni kar adaged daken Jesus. Ma boor yay, ni girdi’ nib thil thil e duw rorad nge gin ni ra bad riy e yad urngin ni kara chuchugurgad ngak u fithik’ e falfalan’. Ngam mu lemnag e n’en ni ke buch ni kan yoloy ko Mark 10:13-16. Ke buch e re n’ey ko ngiyal’ ni ke chuchugur ni nge m’ay e maruwel rok i wereg e machib ma aram e yay ntomur ni yan nga Jerusalem ni ngan gafgownag me yim’.​—Mark 10:32-34.

⁴ Ngam mu lemnag e n’en ni ke buch. Ke tabab e girdi’ ni ngar feked e pi bitir rorad, nib muun ngay e pi bitir ni kab madway, ni fan ni nge tay Jesus pa’ nga dakenrad.b Machane, ke guy rogon pi gachalpen ni ngar taleged yad ni dabiyog ni ngar chuchugurgad ku Jesus. Sana yad be lemnag ni dubun Jesus ni ngeb e pi bitir nem ngak ngar magawonnaged ko pi wik nem nib mo’maw’. Machane kara olobochgad. Faani nang Jesus e n’en ni be rin’ e pi gachalpen me ri dubuy. Me pining Jesus e pi bitir nem, me gaar: “Mpaged e pi bitir nir ngar bad ngog; dab mu taleged yad.” (Mark 10:14) Nge mu’ ma ke rin’ boch ban’en ni be dag ni riyul’ ni ir be’ ni ba gol mab t’uf e bitir rok. Thin nu Bible e be gaar: “Me kunuy Jesus fapi bitir ngak me tay pa’ nga dakenrad, ni aram e ke yibilayrad.” (Mark 10:16) Ba tamilang ni nap’an ni ke kunuy Jesus e pi bitir ngak me fel’ laniyan’rad nbochan.

5. Mang boch e thin ni bay ko Mark 10:13-16 ni be weliy ngodad ko miti mang girdi’ Jesus ko ngiyal’ nem?

⁵ Pi thin nem ni buchuw e ke skulnagdad u boor ban’en u murung’agen ko mmit i mang girdi’ Jesus. Yi ra guy ni ir be’ ni mom ni ngan chuchugur ngak. Yugu aram rogon ni ba tolang e liw rok u tharmiy, machane der ma k’aring e ma rus ma der ma dariyfannag e girdi’ ni dawora flontgad. (John 17:5) Maku, gathi ir be’ ni baga’ fan, ni bochan e mus ko bitir ma yad baadag daken? Ba mudugil ni dabra chuchugurgad ngak be’ ni dariy fan yugu boch e girdi’ u wan’, ma de falfalan’ ma der ma siminmin ara ma minmin! Girdi’ nib thil thil e duw rorad e kara chuchugurgad ngak Jesus ya kar nanged ni ir be’ ni ba fel’, ni ma lemnag e girdi’, ma ke mudugil laniyan’rad ni dabi tulufrad.

6. Mang e susun ni nge rin’ e piin piilal ma ra mom ni nge chuchugur yugu boch e girdi’ ngorad?

⁶ Ngan lemnag e pi thin ney, ma rayog ni ngad fithed gadad, ‘Ba rog e lem rok Kristus? Mom ni nge chuchugur yugu boch e girdi’ ngog?’ Ngiyal’ n’ey ni aram e tayim ni ba mo’maw’, ma bat’uf rok e pi saf fapi tachugol saf nib mom ni ngan chuchugur ngorad, ni piin ni pumoon ni yad bod “ba manaf ni ngan naf ngay ko nifeng nge yoko’.” (Isaiah 32:1, 2; 2 Timothy 3:1) Gimed e piin ni piilal, faan gimed ra maruweliy ni nge t’uf pi walagmed romed ma gimed baadag ni ngam pied gimed ni fan ngorad, ma rayog ni ngara guyed ni gimed be lemnagrad. Rayog ni ngar guyed e re n’ey u owchemed, mi yad rung’ag u lammed, mi yad ra guy ko ngongol romed fanmed gol. Ngan dag e re ngongol n’ey ni ri yima lemnag e girdi’ ma ra ayuweg ni ngar pagedan’rad ngomed ma ra mom ko girdi’, nib muun ngay e pi bitir, ni ngar chuchugurgad ngomed. Reb e ppin ni Kristiano e weliy ko mang fan ni de maruwaran’ ni nge yog ban’en ngak reb e piilal ni gaar: Ke non ngog u fithik’ e sumunguy nge fithik’ e runguy. Ya faanra danga’, ma dabiyog ni gog taabug e thin. Tin ni ke rin’ e ke ayuwegeg ni nge pagan’ug.”

Ma Lemnag Yugu Boch e Girdi’

7. (a) Uw rogon ni ke dag Jesus ni ma lemnag yugu boch e girdi’? (b) Susun mang fan ni ke golnag Jesus fare pumoon ni malmit ni buchuw nge buchuw?

⁷ Jesus e ir be’ ni ma lemnag yugu boch e girdi. Papay ni nge nang e n’en ni be lemnag yugu boch e girdi’. Ke mus ni nge guy e piin ni kar gafgowgad me runguyrad nib gel ma baadag ni nge chuweg e gafgow rorad. (Matthew 14:14) Ku ma lemnag Jesus e magawon ko yugu boch e girdi’ nge tin nib t’uf rorad. (John 16:12) Immoy ba ngiyal’, ni ke fek e girdi’ i yib reb e pumoon nib malmit mi yad wenignag ngak Jesus ni nge golnag e cha’ nem. Ke ayuweg Jesus fare pumoon ni nge guy ban’en biyay, machane ke rin’ e re n’ey ni buchuw nge buchuw. Som’mon, ke guy fare pumoon boch e girdi’ ni de mutabugol​—“yad bod yaan e gek’iy, machane be yan yan.” Me ere, fini sulweg Jesus e changar rok nga rogon ni polo’. Mangfan ni ke golnag fare pumoon ni buchuw nge buchuw? Sana ke rin’ e re n’em ko fare pumoon ni ke macham u fithik’ e lumor ni dabi gin ni nge guy e tamilang nib tomgin nge fayleng nib wagey.​—Mark 8:22-26.

8, 9. (a) Mang i rin’ ndawori n’uw nap’an u tomren ni ke yan Jesus nge pi gachalpen ko fare binaw ni Decapolis? (b) Ngam weliy ko uwrogon ni ke golnag Jesus fare pumoon nib biling.

⁸ Maku ngam lemnag e n’en ni ke buch u tomren fare Paluk’af ko duw ni 32 C.E. Jesus nge pi gachalpen e ka ranod nga bbinaw ni Decapolis fithingan, u ngek ko fare Day nu Galilee. Immoy e girdi’ u rom ni pire’ ni kar pirieged mi yad fek e piin nib m’ar nge piin ni mmarwoth ni boor me golnagrad Jesus ni yad gubin. (Matthew 15:29, 30) Ngam lemnag e re n’ey, ke pi’ Jesus e tayim rok ni nge ayuweg reb e pumoon ni go’ yow. I Mark ni yoloy fare Gospel, e goo ir e ke yoloy e pi thin ney ni be dag ko mang e ke buch.​—Mark 7:31-35.

⁹ Fare pumoon e ba biling ma mo’maw ngak ni nge non. Sana ke poy Jesus ni ke rus ma ke tamra’ fare pumoon. Ma aram me rin’ Jesus ban’en nib thil boch. Ke fek fare pumoon nga ranow ko gin nib palog ko fapi girdi’ ni boor, ni aram e gin dariy be’ riy. Ma ke fal’eg Jesus reb e pow ni be dag ko mang e ra rin’ ngak ni dabki n’uw nap’an. Me “ta’ l’agruw bugul i pa’ nga lan tel, me thuw me math nga blowthen.” (Mark 7:33) Bin migid, me sap nga lang me meybil. Pi n’en ney ni rin’ e gowa be yog Jesus ngak fare moon ni ‘N’en ni ra gu rin’ e chiney ni fan ngom e Got e ke pi’ gelngig. Ma tomur riy, ke gaar Jesus: “Mmab.” (Mark 7:34) Me gol e cha’ nem ma rayog ni nge rung’ag ban’en biyay, me non nrogon ni yima non.

10, 11. Uw rogon ni ngada daged ni gad be lemnag e lem rok yugu boch e girdi’ u lan e ulung? ngu lan e tabinaw?

¹⁰ N’en ni ke rin’ Jesus e be dag ni ri ma lemnag e magawon ko yugu girdi’! Papay ni nge nang e lem rorad, ma bochan ni ir be’ nib tarunguyey, arfan ni ma rin’ ban’en ni fan ni nge baudnag e lem rorad. Bochan ni gadad e piin Kristiano, ma ffel’ ni ngad maruweliyed ni nge yog ngodad e lem rok Kristus ma rayog ni ngad daged e re n’ey ngak e girdi’ ni bod ir. Be fonownagdad fare Bible ni gaar: “Ere thingari gimed gubin ni nge taareb rogon e lem romed mu um runguyed gimed; me bigimed me t’uf rok bigimed nrogon e piin ni walag ni girdien Kristus, mu um pired nib fel’ e thin romed ngomed ma ba sobut laninmed ngomed.” (1 Peter 3:8) Re n’ey e ri be dag ni bat’uf ni nguud sabethingad ma ngad rin’ed ban’en u rogon ni gad be lemnag e n’en ni baadag yugu boch e girdi’.

¹¹ Rayog ni ngada daged u lan e ulung ni gad ma lemnag e lem rok yugu boch e girdi’ ni faan gad ra tay farad, ma ngada rin’ed ngorad e tin ni gad baadag ni ngar rin’ed ngodad. (Matthew 7:12) Ma ba muun ngay ni ngad lemnaged nsom’on e pi thin ni nga dogned ngorad nge uw rogon ni nga dogned. (Colossians 4:6) Dabmu pagtalin ni ‘pi thin ni dan lemnag u m’on ni ngan nog e rayog ni aw ni bod e sayden ni kan rugoy.’ (Proverbs 12:18, NW) Uw rogon e tabinaw? En figirngiy nge en leengiy ni ra bagayow ma bat’uf rok bagayow e yow ma nang laniyan’row. (Ephesians 5:33) Yad ma palog ko thin ni kaygi gel, nge ngan yal’uweg be’ ni gubin ngiyal’, fa ngan gathibthibnag be’ ni ngan kirebnag laniyan’​—ma pi n’en ni urngin e ma amithnag lanin’uy ma dabiyog ni ngan chuweg nib papey. Ku rayog ni ngan gafgownag e lem rorad, ma pi llabthir ni ba t’uf e pi bitir rorad rorad e yad ma lemnag e pi n’ey. Faanra ba t’uf ni ngan yal’uweg e bitir, ma ra rin’ e gallabthir e re n’ey u fithik’ e tayfan ma dabni tamra’nagrad.c (Colossians 3:21) Ere faanra gad ma lemnag e magawon ko yugu boch e girdi’, ma gad be dag ni bay rodad fare lem rok Kristus.

Ma Pagan’ Ngak Yugu Boch e Girdi’

12. Mang e lem rok Jesus ko pi gachalpen nib thabthabel mab riyul’?

¹² Ba thabthabel laniyan’ rogon ni be guy e pi gachalpen. Ri manang ni dawora flontgad. Maku, manang e n’en ni bay u lan gum’ercha’rad. (John 2:24, 25) Gathi kemus ni thibngirad e ke guy Jesus, ya ku ke guy pangirad nib fel’. Maku ke guy e salap rorad ni yad e piin ni ke pow’iyrad Jehovah. (John 6:44) Nap’an ni be chag Jesus ngak pi gachalpen ma kan guy ni yad ba fel’ u wan’ ya pi n’en ni ke rin’ ngorad e be micheg ni aram rogon. Ya som’mon, aram ke dag ni ri ma pagan’ ngorad.

13. Uw rogon ni ke dag Jesus ni be pagan’ ngak pi gachalpen?

¹³ Uw rogon ni ke dag Jesus ni ke pagan’ ngorad? Ngiyal’ ni nge chuw u fayleng, me pi’ ngak pi gachalpen ni kan duguliyrad e maruwel nib gel. Ke tay Jesus nga pa’rad fare maruwel ni yira rin’ u ga’ngin e fayleng nib m’ag ko Gil’ilungun. (Matthew 25:14, 15; Luke 12:42-44) Nap’an ni be un Jesus ko machib, me rin’ ban’en ni ba achichig ni be dag ni ke pagan’ ngorad. Nap’an ni ke fal’eg e maangang me yoornag e ggan rorad ni ngan duruiy e girdi’ ni boor, ma aram ke pi’ ngak pi gachalpen fare maruwel ni ngan wereg e pi ggan nem ngak e girdi’.​—Matthew 14:15-21; 15:32-37.

14. Uw rogon ni ngam weliy e pi thin ni bay ko Mark 4:35-41?

¹⁴ Maku mu lemnag fare thin ni bay ko Mark 4:35-41. Ngiyal’ nem me yan Jesus nge pi gachalpen u bowoch nga barba’ fare Day nu Galilee u ngek. Dawori n’uw nap’an u tomren ni kar chuwgad, me thig Jesus nga but’ me mol u p’ebuk e bowoch. Machane, de n’uw nap’an “me yib e nifeng nib gel ngorad.” Baga’ ni ma yib e nifeng nib gel u Maday u Galilee. Bochan ni re gin nem e ba sobut’ (ni sogonapan 700 feet nib sobut’ ko nen ni kan nog sea level ngay), ma nifeng u rom e kab gawel ko yu gin ni bay u tooben, ma baga’ ni ma yib e nifeng nib gel u rom ni aram rogon. Ku reb, e ma yib e nifeng nib gel ko Burey ni Hermon u lel’uch ni yan nga loway nu Jordan. Yu ngiyal’ ma ba mocha’ nib ngoch nap’an ma ri darinapan, miki gel e nifeng nib tomgin. Mu lemnag e re n’ey: Dariy e maruwar riy ni manang Jesus fare nifeng nib gel ni ma yib u rom, ya ma par u Galilee ni ka nap’an ni kab bitir. Machane, ke mol nib fel’ rogon, ni be pagan’ ko salap rok pi gachalpen ya boch i yad e tafita.​—Matthew 4:18, 19.

15. Uw rogon ni ngada folwokgad rok Jesus ni ri ma pagan’ ngak pi gachalpen?

¹⁵ Rayog ni ngad folwokgad rok Jesus ni ri ma pagan’ ku pi gachalpen? Boch e girdi’ mab mo’maw’ ngorad ni ngar wereged boch e maruwel ngak yugu boch e girdi’. Yima yog ni ba t’uf ni yad e yad ra kol e yap. Sana yad be lemnag, ni ‘Faanra gu baadag ni ngan rin’ ban’en nrogon nib puluw, ma thingar gu rin’ e re n’em!’ Machane faan gad ra rin’ urngin ban’en, ma ri gad ra magar ma sana ba t’uf ni nga darod nga bang nib palog ko tabinaw ni bochan. Maku, faanra dabda pied boch e maruwel ngak yugu boch e girdi’, ma dabiyog ni ngan skulnagrad ni ngar nanged boch ban’en. Ffel’ ni ngan pagan’uy ngak yugu boch e girdi’ min pi’ boch e maruwel ngorad. Manigil ni ngad fithed gadad u fithik’ e yul’yul’, ‘Bay rog e lem rok Kristus ko re ney? Gu baadag ni nggu pi’ e maruwel ngak yugu boch e girdi’, ni be pagan’ug ni ngar rin’ed e tin ni rayog rorad?’

Ke Dag ni Be Pagan’ Ngak Pi Gachalpen

16, 17. Fare nep’ ni ir e bin tomur e nep’ ko yafas rok Jesus u fayleng, ma mang e ke yog ngak pi apostal, ni yugu aram rogon ni manang ni yad ra mil ngar paged?

¹⁶ Ke dag Jesus reb e kanawo’ nib thil ma baga’ fan ni be dag ni yad ba fel’ u wan’. Ke yog ngorad ni be pagan’ ngorad. Kan dag e re n’ey nib tamilang ko pi thin ni ke yog ngak e pi apostal ko re nep’ ni tomur ko yafas rok u roy ubut’. Am sap ko mang e kan rin’.

¹⁷ Boor e maruwel ni i tay Jesus ko re nep nem. Me dag ban’en ngak pi apostal ni be skulnagrad ko uw rogon ni ngan sobut’nag lanin’uy me luknag ayrad. Ma tomur riy, me tababnag fare abich ko balayal ni aram e puguran ko yam’ ni tay. Ngemu, ma fapi apostal e kara maluagthingad nib gel ko mini’ e arorad e th’abi ga’. De puwan’ Jesus ngorad machane ke weliy ban’en ni fan ngorad ya ir be’ nib gum’an’ u gubin ngiyal’. Me yog ngorad e n’en ni ra buch nga m’on ni gaar: “Nep’ ney e gimed gubin ni bay mmilgad ngam paged gag, ya ke gaar e babyor nib thothup, ‘Nggu li’ e en ni ma gafaliy e saf, ma bay wer e saf.’ ” (Matthew 26:31, NW; Zechariah 13:7) Manang ni piin nib fel’ thilrad e yad ra mil ko ngiyal’ nib t’uf rok e ayuw. Machane, de turguy e gechig rorad. Ba math keru’, ya ke yog ngorad ni gaar: “Machane faan bay ni fasegeg ko yam’ mu gu m’on romed nga Galilee.” (Matthew 26:32) Arrogon, ke yog ngorad ni yugu aram rogon ni ngar paged Jesus machane dabi pagrad. Nap’an ni ke m’ay e re skeng nem, ma ra yib ni ngar mada’gad biyay.

18. Mang e maruwel nib gel ni ke pi’ Jesus ngak pi gachalpen u Galilee, ma uw rogon ni ke fol e pi apostal rok re n’ey?

¹⁸ Ke rin’ Jesus e thin ni yog. Munmun, ma Jesus nni faseg ko yam’ e i m’ug ngak fa 11 e apostal rok nib yul’yul’, ni yad be muulung u rom. (Matthew 28:16, 17; 1 Corinthians 15:6) Me pi’ Jesus ngorad reb e maruwel nib gel u rom ni gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare Kan nni Thothup mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matthew 28:19, 20) Fare babyor ni Acts e be dag ngodad nib tamilang ni ke fol e pi apostal ko pi thin nem ni kan nog ngorad ni ngara rin’ed. Ma kar daged ni yad ba yul’yul’ ko re maruwel n’ey ko bin som’on e chibog.​—Acts 2:41, 42; 4:33; 5:27-32.

19. Mang e ke rin’ Jesus u tomren ni kan faseg ko yam’ ni be skulnagdad u murung’agen e lem rok Kristus?

¹⁹ Pi thin nem ni be dag ban’en e be skulnagdad ko mang murung’agen e lem rok Kristus? Ke guy Jesus e tin th’abi kireb rok e pi apostal, machane “yigi i par ni yad bat’uf rok nge yan i mada’ ko tomur.” (John 13:1) Ke yog ngorad ni ke pagan’ ngorad ni yugu aram rogon ni kar olobochgad. De oloboch Jesus ni ke pagan’ ngorad. Bochan ni ke pagan’ Jesus ngorad miki yog ban’en ni be dag ni ke michan’rad ma dariy e maruwar riy ni ke gelnagrad e re n’em ni ngar rin’ed e tin ni ke yog ngorad ni ngar rin’ed.

20, 21. Uw rogon ni ngada daged ni gad be lemnag e tin nib fel’ rok e pi walagdad?

²⁰ Ra aram rogon, ma uw rogon ni ngad daged e lem rok Kristus? Dabmu lemnag e tin nib kireb ban’en ko pi walagem. Faanra ga be lemnag e kireb rorad, ma thin rom nge ngongol rom e ra m’ug riy. (Luke 6:45) Machane, fare Bible e be yog ngodad ni t’ufeg e “ma pagan’ ko urngin ban’en.” (1 Corinthians 13:7) T’ufeg e ba m’ag ko tin nib fel’ ban’en, ma de m’ag ko tin nib kireb ban’en. Ma ra ubung ban’en ma gathi ma kirebnag. Ka ba adag e girdi’ e t’ufeg nge tin ni ma athamgiliy ko tin ni ma k’aring e marus. Rayog ni ngada ubunged yugu boch e girdi’ ngu ud pied e athamgil nga lanin’rad ni faanra nga dogned ngorad ni gad be pagan’ ngorad. (1 Thessalonians 5:11) Faanra gad be lemnag e tin nib fel’ ko pi walagdad ni bod rogon e n’en ni ke rin’ Kristus, ma ngad rin’ed ban’en ngorad ni ra ubung e michan’ rorad ma ra k’aringrad ni ngar rin’ed e tin th’abi fel’.

²¹ Yira maruweliy ngan dag fare lem rok Kristus ma kab gel ko bin ngan folwok u boch ban’en ni ke rin’ Jesus. Taabrogon ko pi n’en ni ke weliy fare article ni ke yan, faanra riyul’ ni gad baadag ni ngad boded Jesus, ma thingarda filed ni som’mon rogon ni ma lemnag ban’en. Fapi Gospel e rayog ni nge ayuwegdad ni ngad guyed yugu boch e ngongol rok, ni bod e lem rok nge rogon ni be thamiy fare maruwel ni kan pi’ ngak, ma aram e n’en ni yira weliy ko bin migid e article.

[Footnotes]

Rayog ni Ngam Weliy?

• Mang e ke rin’ Jesus ko ngiyal’ ni pi gachalpen e kar taleged fa pi bitir ni dabra bad ngak?

• Mang boch e kanawo’ ni ke dag Jesus ni ir be’ ni ma lemnag yugu boch e girdi’?

• Uw rogon ni ngad folwokgad rok Jesus ni ri ma pagan’ ngak pi gachalpen?

• Uw rogon ni ngada folwokgad rok Jesus ni ngada pagedan’dad ngak yugu boch e girdi’ ni bod rogon e n’en ni ke yog ngak e pi apostal rok?

[Picture on page 22]

Pi bitir e dar rusgad ni ngar chaggad Jesus

[Picture on page 23]

Piin ni piilal ni mom ni ngan chuchugur ngorad e yad e taw’ath

[Picture on page 24]

I dag Jesus ngak yugu boch e girdi’ ni ir be’ nib runguy