Jesus​—Rib Fel’ ni Ngan Folwok Rok

GA BAADAG ni ngam mang be’ ni gab fel’ ma gab felfelan’, fa? I weliy Peter ni apostal ko uw rogon ni ngad rin’ed. Me yoloy ni gaar: “Kristus e ir e gafgow ni bochmed me dag ngomed rogon ni ngam folwokgad rok, ni aram e nguum leked luwan ay.” (1 Peter 2:21) Bochan ni rib fel’ e ngongol rok Jesus, ma boor ban’en nrayog ni ngad filed rok. Gad ra fil murung’agen Jesus ngad puluwniged e yafas rodad ko yafos rok, ma mudugil ni gad ra mang e girdi’ nib fel’ mab felfelan’. Gad ra fal’eg i yaliy pi fel’ngin ni dag e re moon nrib fel’ ney ma gad ra guy angin.

Jesus e be’ nib mudugil. Yugu aram rogon ni yog Jesus ni “dariy bang ni nge pag ir riy nga but’ nge toffan,” ma gathi yugu ma par rok, maku de yog nib fel’ e girdi’ ni aram rogon. (Matthew 8:20) Ke un nga boch e madnom nib ga’. (Luke 5:29) Bin som’on e maang’ang ni ngongliy e pilyeg e ran nge ngal’ ni wain u nap’an e madnom ko mabgol e be dag ni gathi be’ ni yugu ma par rok. (John 2:1-11) Machane i weliy Jesus nib tamilang e n’en th’abi ga’ fan u wan’ ni gaar: “Ggan rog e nggu fol ko tin ni be finey e en ni l’ugeg ku gub, ma nggu mu’nag e maruwel ni ke pi’ ngog.”​—John 4:34.

□ Kam gonopiy rogon e yafos rom kam guy ko ba fel’ rogon ni ga be lemnag e chugum nge rogon ni nge fel’ thilmew Got?

Jesus e be’ nib mom ni ngan non ngak. Be weliy e Bible ni Jesus e ir be’ nib gol mab mom ni ngan non ngak. Nap’an nra yib boch e girdi’ ni ngar weliyed e magawon rorad ngak, ara ra fithed boch e deer nib mo’maw’ ni ngan fulweg ma dabi damumuw. Ba’ bayay ni immoy u fithik’ e girdi’ ni yoor, me yib be’ nib pin ni ke gafgow ya ragag nge l’agruw e duw nib m’ar ni ke molul. Me yib i math ko mad rok. De damumuw ni bochan ni ke rin’ ban’en ni be lemnag boch e girdi’ ndabin rin’ ma de puwan’ Jesus ngak me gaar: “Fakag, michan’ rom ngak Got e ke golnigem.” (Mark 5:25-34) Maku baadag e bitir ni ngar chaggad ngak, ya dabi puwan’ ngorad. (Mark 10:13-16) Ma non nib sumunguy ngak pi gachalpen. Maku darir tuntungad ni ngar nonad ngak.​—Mark 6:30-32.

□ Gur mom rok boch e girdi’ ni ngar nonad ngom?

Ma lemnag rarogon e girdi’ ma ma runguyrad. Reb i fel’ngin Jesus nrib fel’ e ri ma taganan’ ko girdi’, ma ri ma lemnag rarogorad, ma ma ayuwegrad. John ni apostal e yog ni nap’an ni guy Jesus Maria ni be yor ya ke yim’ Lazarus ni walagen, “me ri taganan’” “me yor.” Piin ni be guy e n’en ni ke rin’ e kar guyed gelngin e runguy rok Jesus ko re tabinaw nem, ma de tamra’ ni nge dag e re n’em ko girdi’. Ma rib gel e runguy rok Jesus u nap’an ni faseg e fager ko yam’!​—John 11:33-44.

Ma bayay, e be’ nib moon nib daraw ni ma par nib palog ko girdi’ e wenig ngak Jesus ni gaar: “Faanra mm’agan’um ngay ni ngam chuweg e daraw rog ma ga chuweg, ya rayog rom.” N’en ni rin’ Jesus e riyul’ ni ma k’aring e felfelan’. Me k’iyag Jesus pa’ nge math ngak. Me fulweg ni gaar, “Mm’agan’ug ngay, ere nge chuw e daraw rom!” (Matthew 8:2, 3) I golnag Jesus e girdi’ ni gathi kemus ni fan e nge lebug e thin ko yiiy. Ya ke m’agan’ ngay ni nge ayuwegrad. Urngin ban’en ni ke rin’ e bay rogon ko thin ni ke yog ni gaar: “Mu rin’ed ngak boch e girdi’ e tin ni ir e gimed ba adag ni ngar rin’ed ngomed.”​—Luke 6:31.

□ Gur, ma m’ug e runguy rom ko n’en ni ga ma rin’ ko girdi’ ni kar gafgowgad?

Jesus e ba gol ma ri ma lemnag e girdi’. Yugu aram rogon ni dariy ban’en nib kireb ni ke rin’, ma der lemnag ni dabi oloboch e girdi’ ni bod ir. Ma de tolangan’ nyugu aram rogon ni boor ban’en ni manang mab gol ngorad. Bay reb e ppin ni ‘goo yimnang nrib ta denen’ ni ke dag e michan’ rok u nap’an ni luknag e rifrif u ay Jesus ko lu’ rok. Ma en ni pining Jesus ko re madnom nem e ke dugliy nib kireb fare pin ma ke gin u nap’an ni guy ni ke pag Jesus fare pin ke rin’ ni aram rogon. Bochan ni manang Jesus nib yul’yul’ fare pin ma de puwan’ ngak ni bochan e denen rok. Me gaar: “Michan’ rom ngak Got e ke thapegem ngak; ere mman u fithik’ e gapas.” Bochan e n’en ni ke rin’ Jesus, ma ke pag fare pin e ngongol rok nib kireb.​—Luke 7:37-50.

□ Gur be’ ni ga ma yog e tin nib fel’ u murung’agen e girdi’ ma dabum ni nga mog thibngirad?

Ma tay fan e girdi’ ma de laniyan’. Rib t’uf John rok Jesus ni sana bochan ni yow tabinaw maku bay ban’en nib taareb rogon ko ngongol rorow.a Yugu aram rogon, ma de m’ug ko ngongol rok nib thil John ko tin ka bay i gachalpen. (John 13:23) Bin riyul’ riy, e nap’an ni ning John nge James ni walagen ngak Jesus ni ngar parew nga tooben ko ngiyal’ nra mang Pilung ko Gil’ilungun Got, me fulweg ngorow ni gaar: “Dariy mat’awug ni nggu dugliy e en ni nge par nga ba’ ni mat’aw rog nge en ni nge par nga ba’ ni gilay’ rog.”​—Mark 10:35-40.

Gubin ngiyal’ ni ma tay Jesus fan e girdi’. Der ma laniyan’ ni bod boch e girdi’ ni yad ma laniyan’. Ni bod ni, yima tay ni piin ni ppin e yad ba sobut’ ko pumoon. Machane, ma tay Jesus fan e piin ni ppin. Ya som’on, ma be’ ni ppin u Samaria e yog ngak ni ir fare Messiah ma aram e girdi’ ni der ma tay piyu Jew farad. (John 4:7-26) Nap’an nni faseg Jesus ko yam’ ma ppin e som’on ni m’ug ngorad.​—Matthew 28:9, 10.

□ Taareb rogon e girdi’ u wan’um nib thil thil raen dowrad nge thin rorad nge nam rorad?

Ma ayuweg e tabinaw rok. Ba tamilang ni yim’ Josef ma dawori piilal Jesus. Ba ga’, ni ma maruwel Jesus ni daiksang ni nge ayuweg e chitiningin nge pi walagen. (Mark 6:3) Ma tomuren e yafas rok, me tay chilen e chitiningin ngak John ni gachalpen ni nge ayuweg.​—John 19:26, 27.

□ Rayog ni ngam folwok rok Jesus ngam ayuweg e tabinaw rom ni bod rogon ni i rin’?

Ba yul’yul’ Jesus ko pi fager rok. Jesus e fager nrib fel’. Ni uw rogon? Yugu aram rogon ni yad ma oloboch u taa ban’en ni boor yay ma de pagrad Jesus. Gathi gubin ngiyal’ ni ma rin’ pi gachalpen e tin ni baadag. Ke micheg ni ir reb e fager nib fel’ ya ba ga’ ni ma sap ko tin nib fel’ ni ma rin’ pi gachalpen ma der ma lemnag ni bay e lem nib kireb rorad. (Mark 9:33-35; Luke 22:24-27) Gathi goo ir e ma turguy e n’en ni ngan rin’ ya ma piningrad nge fith lanin’rad.​—Matthew 16:13-15.

Bin th’abi ga’ fan e rib t’uf pi gachalpen rok. (John 13:1) Uw rogon? Be gaar: “Rogon nib th’abi t’uf rok be’ e pi tafager rok e nge pi’ e pogofan rok ni fan ngorad.” (John 15:13) Dariy ban’en ni kab tolang puluwon ko pogofan ku be’ ni ra pi’ ni fan ko fager rok.

□ Faanra k’aring boch e girdi’ e damumuw ngom ma ka ga ra par ni gur e fager rorad, fa danga’?

Ir be’ ni de rus. Ri kab gel e thil uw rogon Jesus nga rogon ni gad ma guy ni ke ngongliy e girdi’ yaan. Ma yog e Bible ni ir be’ nib gel ma de rus. L’agruw yay ni tuluf girdien tafol chuway’ nge chugum rorad u lan e tempel. (Mark 11:15-17; John 2:14-17) Ma nap’an ni yib ba ulung e girdi’ ni ngar koled “Jesus nu Nazareth,” ma de rus me thay nga m’on me gaar, “I gag ir.” (John 18:4-9) Arfan nnap’an ni guy Pontious Pilate Jesus ni de rus u nap’an kan kol min gafgownag, me yog ni gaar: “Mu sapgad! Baaray fare moon!”​—John 19:4, 5.

□ Ga ma turguy nib papey ma dam mu rus u nap’an ni kam nang e n’en ni thingar mu rin’?

Pi n’en ni kad filed faram u murung’agen Jesus e be dag ni ir be’ nrib fel’ ni ngad folwokgad rok. Faan gad ra folwok rok ma gad ra mang girdi’ nib fel’ mab felfelan’. Aray fan ni yog Peter ni apostal ngak e Kristiano ni ngar leked luwan ay Jesus nrogon nrayog rorad. Ga ma gay rogon ni ngam lek luwan ay Jesus nrogon nrayog rom?

Ki Rin’ Boch Ban’en nrib Ga’ Fan

Ka bay boch ban’en ni ke rin’ Jesus. Yi gaar: “I gag e kanawo’, me gag e tin riyul’, me gag e yafos; dariy be’ nrayog ni nge yan ngak e en ni Chitamangiy ya ke mus ni gag e ra yan rog ngak.” (John 14:6) Ke fil e tin riyul’ u murung’agen Got ngak e girdi’ ma be ayuwegrad ni ngar chugurgad ngak Got me bing e kanawo’ ni nge yog e yafas ni manemus ngorad.​—John 3:16.

I yog Jesus fan ni yib nga fayleng ni gaar: “Ni bod e en ni Fak e Girdi’ nde yib ni ngan pigpig ngak, machane yib ni nge pigpig me pi’ e pogofan rok nge biyuliy boor e girdi’ ngay.” (Matthew 20:28) Nap’an ni pi’ Jesus e yafas rok ni maligach, ma aram ke fal’eg e def ni nge yog e yafas ni manemus ngak e girdi’. Mang e thingar da rin’ed nge yib angin e re ayuw nem ngodad? I yog Jesus ni gaar: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.”​—John 17:3.

Ra tamilangan’uy u murung’agen Jesus, min folwok rok, min dag ko ngongol ni ke michan’uy ko maligach ni pi’ Jesus ma aram, me yog e yafas ni dariy n’umngin nap’an. Gamad be piningem ni ngam pithig puluwom ni ngam un ko fol Bible me tamilangan’um, ma ngam athamgil ni ngaum fol riy ni bod Jesus.

Yafas rok Jesus e be fil ngodad ko mang e mit i girdi’ ni ngad boded. Yam’ ni tay e rayog ni nge pithigdad ko denen nge yam’. (Roma 6:23) Gad ra gafgow ni faanra dabda folwokgad rok Jesus Kristus! Dabda paged e yoor pa’ nge magafan’ ko yafas ni nge talegdad ndabkuda leked fare moon nib gilbuguwan ni immoy​—ni aram Jesus Kristus.

[Footnote]

[Pictures on page 5]

Jesus e ba mudugil laniyan’ . . .

mmom ni ngan non ngak . . .

ri ma taganan’ ko girdi’