Nge Tamilang Uwan’uy “Fare Lem Rok Kristus”

“ ‘Mini’ e ke tamilang uwan’ e lem rok, ma rayog ni nge fil’ ban’en ngak?’ Machane gadad e fare lem rok kristus e bay rodad.”​—1 CORINTHIANS 2:16, New World Translation.

1, 2. Ke guy Jehovah nib puluw ni ngan dag e mang u murung’agen Jesus?

UW ROGON yaan Jesus? Mang ramaen piyan lolugen? nge yalach u dow? nge lan owchen? Uw n’umngin? Uw tomalngin? Boch e chibog ni ke yan, ma kan fal’eg yaan Jesus nib thil thil ya boch e bmanigil ma boch e dawori chuchugur ko tin riyul’. Boch i yad e kar fal’eged yaan ni bod e pumoon nib tagyet ma ba pasig, ma boch i yad e kar fal’eged yaan ni ir bod be’ ni ba war ma ba ol ramaen dow.

² Machane, fare Bible e der sapeg laniyan’ e girdi’ nga yaan Jesus. Ya Jehovah ke dag n’en nib puluw ma rib ga’ fan: ni aram e mit i mang girdi’ Jesus. Fare thin nu Bible ni kan nog fare gospel ngay e gathi kemus ni be weliy ko mang e ke yog Jesus nge mang e ke rin’ ya ku ke dag ko uw rogon ni be thamiy ban’en nge rogon ni ma lemnag ban’en nib puluw ko thin ni be yog nge tin ni be rin’. Fa aningeg i gospel ni kan thagthagnag e ra ayuwegdad ni ngad guyed e n’en ni ke yog Paul ni apostal ni “fare lem rok Kristus.” (1 Corinthians 2:16, NW) Baga’ fan ni nge tamilang uwan’dad e lem rok, nge rogon ni be thamiy ban’en, nge ngongol rok. Mang fan? Ya sogonapan bay l’agruw i fan.

3. Faanra ke tamilang uwan’dad fare lem rok Kristus ma rayog ni ngad nanged e mang?

³ Som’on, e aram fare lem rok Kristus ni ra ayuwegdad ni ngad guyed e lem rok Jehovah ni Got rodad. Ri manang Jesus e Chitamangin ma arfan ni ke yog ni gaar: “Dariy be’ ni manang ko mini’ e en ni Fak, ya ke mus ni en ni Chitamangiy e manang; ma dariy be’ ni manang ko mini’ e en ni Chitamangiy, ya ke mus ni en ni Fak e manang, nge piin ni baadag e en ni Fak nem ni ngar nanged e Chitamangin.” (Luke 10:22) Bod ni be yog Jesus ngorad ko ngiyal’ nem ni gaar, ‘Faanra gimed baadag ni ngam nanged ko uw rogon yaan Jehovah, mu sapgad ngog.’ (John 14:9) Arfan, ni faan gad ra fil e pi thin ko pi Gospel nem u murung’agen nge rogon ni ma lem nge rogon ni ma thamiy Jesus ban’en, ma ku rayog ni ngad filed murung’agen Jehovah. Ma re tamilangan’ n’ey e ra ayuwegdad ni ngad pared nib chuchugur ku Got.​—James 4:8.

4. Faanra gad baadag ni ngad boded Kristus, ma mang e susun ni ngad filed, nge mang fan?

⁴ Fa bin migid, e rogon ni gad ra nang e lem rok Kristus e ra ayuwegdad nga ud “leked luwan ay nib chuchugur.” (1 Peter 2:21) Ran lek luwan ay Jesus ma gathi ke mus ni ngan nog fa pi thin ni ke yog nge ngan rin’ e tin ni ke rin’. Bochan ni tin ni yibe lemnag nge tin ni yibe thamiy e ra k’aringey ni ngan nog e thin nge ngan rin’ ban’en, ere bat’uf ni nge yog ngodad e “lem” ni immoy rok Kristus ma aram rogon me yog ni ngad leked luwan ay. (Philippians 2:5) Fan e re thin ney, e faan gad ra fol ko ngongol ni ke dag Kristus, ma susun som’on ma ngad filed ko uw rogon ni ngan lemnag nge ngan thamiy ban’en ni bod ir, u rogon ni rayog rodad, ni gadad e girdi’ ni daworda flontgad. Ere piin ni yad e kar yoloyed e thin ni kan nog e Gospel ngay, e ra ayuwegdad ni ngad guyed nib fel’ rogon fare lem rok Kristus. Ere som’on ma ngad weliyed e pi nen ni ke k’aring Jesus nge rogon ni ma lem nge ma thamiy ban’en.

Yafas Rok U M’on ni Ke Mang Ba Girdi’

5, 6. (a) Mit i mang e ngongol ko piin ni gad ma chag ngorad e rayog ni nge af ngodad? (b) Fak Got ni bin nganni’ e ke chag ngak mini’ u nap’an ni immoy u tharmiy u m’on ni ke yib nga fayleng, ma mang angin ni ke yib ngak ni bochan?

⁵ Piin ni gad ma chag ni gubin ngiyal’ e ra af ngodad e ngongol rorad, ni bod rogon ni yad ma lemnag ban’en, nge rogon ni yad ma thamiy ban’en, nge tin ni ma rin’ ni demtrug ko ba fel’ fa ba kireb.a (Proverbs 13:20) Ngam mu lemnag ko mini’ e i chag Jesus ngak u tharmiy u m’on ni ke yib nga fayleng. Fare Gospel rok John e be weliy murung’agen e yafas rok Jesus u m’on ni ke mang ba girdi’ ma kan pining “fare Thin,” ngak ara ma yog lungun Got ya ir e ma yog e thin ni yib rok Got. Be gaar John: “Fare Thin e immoy ko tabolngin, ma be chag ngak Got. Ma reb e kan fare Thin ni immoy rok Got ko tabolngin.” (John 1:1, 2, NW) Bochan ni Jehovah e dariy tabolngin, ere fare Thin ni immoy rok ko tabolngin e mutrug ni be weliy murung’agen “fare tabolngin” ni tabab ni nge ngongliy ban’en. (Psalm 90:2) Jesus e ir “e bin ni m’on i fak ko urngin ban’en ni sunmiy Got.” Ere, immoy ko ngiyal’ ni dawori sunmiy e pi engel nge fare palpalthib.​—Colossians 1:15; Revelation 3:14.

⁶ Be sananag boch e girdi’ ni kan nog e scientist ngorad, ni ka nap’an ni kan sunmiy fare palpalthib ma ke 12 bilyon e duw nge mada’ ko ngiyal’ n’ey. Faanra ke chuchugur ko tin riyul’ e thin ni kar rogned, ma aram Jesus ni ir Fak Got ni bin nganni’ rib falfalan’ ni ke chag ngak Chitamangin kakrom u m’on ni kan sunmiy Adam kari nuw nap’an ndabiyog ni ngan theeg. (Mu taarebnag Micah 5:2.) Arfan ni rib fel’ thilrow. Ma kan pining ngak e en ni fak Got ni bin nganni’ ni rib tamilangan’ u m’on ni ke mang ba girdi’, ni yima yog ni: “I par ni gubin e rran ni be [Jehovah] falfalan’ ngog, ma gubin ngiyal’ ni gu be par rok ni gub falfalan’.” (Proverbs 8:30, NW) Ba mudugil ni ke yib angin ngak Jesus ni fak Got ya ke chag ngak e en ni ir i Yib Rok e t’ufeg ni dan nang n’umngin nap’an e re n’em! (1 John 4:8) Ke tamilang uwan’ re fak Got ney e ngongol rok e Chitamangin me dag ngak e girdi’ rogon ni ma lemnag Got ban’en, nge rogon ni be thamiy ban’en, nge boch e kanawo’ ni dariy be’ ni rayog rok.​—Matthew 11:27.

Yafas Rok u Fayleng nge Tin ni Ke Suruy Laniyan’

7. Mang reb i fan ni bat’uf ni nge yib Fak Got ni bin nganni’ nga fayleng?

⁷ Boor ban’en ni thingari fil fak Got, ya m’agan’ Jehovah ngay ni Fak e ra mang Prist nib tolang ni ma runguyey, “ma gathi reb e prist ndabi kireban’ ngodad nga fadad meewar.” (Hebrews 4:15) Ba t’uf ni nge rin’ e re maruwel ney ma aram reb i tapgin ni l’og Fak nga fayleng nib girdi’. Bochan ni ke yib nga fayleng ni bay downgin nge rachaen, ma aram ma ke un nga boch e magawon ko girdi’ ya kakrom e ke mus ni i par u tharmiy ni be yaliy rarogon e girdi’. Ma aram e tayim ni rayog ni nge nang rogon ni ma thamiy e girdi’ ban’en nge fare n’en ni kan nog rarogon e girdi’ ngay. Yu ngiyal’ ma ke magar, ma ke yib e belel ngak, ma ke yib e bilig ngak. (Matthew 4:2; John 4:6, 7) Maku, ke yib ngak urngin e magawon nge gafgow ma be athamgil. Ere ke “fil rogon ni ngi i fol ku Got” ma ke bung rogon ni nge rin’ e maruwel rok ko Prist nib tolang.​—Hebrews 5:8-10.

8. Mang e gad manang u murung’agen e yafas rok Jesus u fayleng ko ngiyal’ ni kab bitir?

⁸ Uw rogon e par rok Jesus u nap’an ni kab bitir? Kaygi buchuw e thin ni kan yoloy ni be weliy murung’agen Jesus u nap’an ni kab bitir. Ma riyul’, ni ke mus ni Matthew nge Luke e kar yoloyew boch e thin ni be weliy murung’agen rogon ni kan gargelnag. Ma pi ta yoloy fapi Gospel e kar nanged u m’on ni ke yib Jesus nga fayleng ma immoy u tharmiy. Fare yafas rok u m’on ni ke mang be’, e ke weliy ko mit i mang girdi’ e ke mang Jesus nrib tamilang. Machane, riyul’ ni ke mang Jesus ba girdi’. Yugu aram rogon ni ir be’ nib flont, machane ri bat’uf ni ngan gargeleg nib madway, nge mu’ nge mang reb e bitir ma ra ga’ nge mang reb e pagal ngemu’ ma ra ga’ iyan nge fel’ yangaren nge mu’ ma ke piilal, ma aram nap’an ma ke fil boor ban’en. (Luke 2:51, 52) Be weliy e Bible boch ban’en u murung’agen Jesus’ u nap’an ni kab bitir ma bmudugil ni ke ayuweg e pi n’ey.

9. (a) Mang e be dag ni kan gargelnag Jesus ko tabinaw ni ba gafgow? (b) Baga’ ni uw rarogon e par rok Jesus ko ngiyal’ ni be ilal iyan?

⁹ Ba tamilang, ni kan gargelnag Jesus ko tabinaw nib gafgow. Fare maligach ni ke fek Joseph nge Maria nga tempel ni sogonapan 40 e rran u tomren ni kan gargelnag e be micheg ni aram rogorad. Dar feked e saf ni kab bitir ni ngar pied ni maligach ni kan urfeg, machane kar fekew e bulogol ara turtledove ni ngar pied ni maligach ni fan ko denen, ma kar feked ni demtrug ko “l’agruw i bulogol ara l’agruw i pi fak e bulogol.” (Luke 2:24) Rogon ni yog fare Motochiyel rok Mosaic, ma mit ney e maligach e ma pi’ e piin ba gafgow. (Leviticus 12:6-8) Ma munmun, aram ke yoor e girdi’ ko re tabinaw nem. Sogonapan nel’ e bitir rok Joseph nge Maria ni kan gargelnagrad u tomren ni kan gargelnag Jesus nib maangang. (Matthew 13:55, 56) Ere ke ilal Jesus iyan ko tabinaw ni baga’, ma yad reb e tabinaw nib moding.

10. Mang e be dag ni Maria nge Joseph e bay madgun Got u wan’row?

¹⁰ Gallabthir ni kar chuguliyew Jesus e bay madgun Got uwan’row. Chitiningin ni Maria, e ir reb e ppin nib manigil. Ngam mu lemnag ba ngiyal’ ni ke yib Gabriel ni engel me yog e thin ngak ni gaar: “Nge yib e gapas ngom, i Jehovah e ba’ rom, ma ke fal’eg waatham ni baga’.” (Luke 1:28) Ku arrogon Joseph ni ir be’ nib yul’yul’. Gubin e duw ma ba yul’yul’ ni ma milekag ni nge yan nga Jerusalem ni nge un ko madenom ni Paluk’af ni 90-mile palgin. Ku ma un Maria ko re madenom nem, ni yugu aram rogon ni ke mus ni goo pumoon e kan tay chilen ngorad ni ngar uned ngay. (Exodus 23:17; Luke 2:41) Reb e madenom ni Paluk’af ni kar uned ngay, ma tomur riy me Joseph nge Maria, e kar tababgow ni ngar gayew Jesus nib fel’ rogon, ma kar piriegew e cha’ nem ni ke mus 12 e duw rok ko ngiyal’ nem ni bay u lan fare temple u fithik’ fapi tamachib. Ma aram me non Jesus ngak e gallabthir rok ni ke maganfan’row, ni gaar: “Dam mu nangew nthingar gub gu par nga naun rok e Chitamag?” (Luke 2:49) Re thin nem ni “Chitamag”​—e rib ga’ fan uwan’ Jesus ni ir be’ ni ka bochi pagal. Ya reb, ba tamilang ni kan skulnag ni Jehovah e ir e Chitamangin ni riyul’. Maku, Joseph ni ir e ke pof Jesus e ir reb e matam nib fel’. Dariy e maruwar riy ni dabi mel’eg Jehovah e pumoon nib ta damumuw ara ta cham ni nge chuguliy fak nib t’uf rok!

11. Mang e maruwel ni ke fil Jesus, ma nap’an e Bible, mang e ba l’ag ngay ni ngan un ko re maruwel n’ey?

¹¹ Fapi duw ni be par Jesus u Nazareth, ma ke fil rogon fare maruwel ko daykusang, ma sana Joseph ni ir e ke fakay e ku ir i fil ngak. Ma kari cheg Jesus ko re maruwel nem aram fan ni kan pining ngak ni “fare daykusang.” (Mark 6:3) Kakrom ni nap’an e Bible, ma piin ni daykusang e kar toyed e pi naun ni ngan pi’ puluwon ngorad, ma kar ngongliyed boch ban’en ni yima fanay u lan e naun (nib muun ngay e pi tebel, nge pi chiya, nge benches), nge talin e maruwel ni fan ko milay. U lan e babyor rok Justin Martyr ni Dialogue With Trypho, ko fa bin l’agruw e chibog C.E., me yoloy murung’agen Jesus, ni gaar: “Ma un ko maruwel ni daykusang ni ma chag ngak yugu boch e pumoon, ma ma ngongliy talin e maruwel ni ma gi’ e milay’ nge boch e mat’.” De mom e re maruwel nem, ya sana piin ni daykusang kakrom e dabiyog ni ngar chuwiyed e ren ngan fal’eg ban’en. Baga’ ni, kan yan nga mapan ni nge mel’eg e gek’iy, ya ma fanay e tow ngan th’ab e gek’iy ma ran fek fa yu i gek’iy, i yib nga tabinaw. Ere manang Jesus e pi n’en nib mo’maw ni bay ko maruwel ni nge yog boch e salpiy riy, nge rogon ni ngan ayuweg e piin ni ma chuwiy ban’en, nge rogon ni ngan fanay e salpiy ni ngan ayuweg e tabinaw.

12. Mang e be dag ni ke yim’ Joseph nib m’on ku Jesus, ma faanra aram rogon ma uw rarogon Jesus?

¹² Bochan ni Jesus e ir e th’abi ilal i fak Maria, dabi siy ni ke ayuweg girdien e tabinaw rok ko n’en nib t’uf rorad, ya bay boch ban’en ni be dag ni sana ke yim’ Joseph nib m’on ngak Jesus.b Fare Zion’s Watch Tower ko pul ni January 1, ko duw ni 1900, e ke gaar: “Reb e yalen e be micheg ni ke yim’ ko ngiyal’ ni kab bitir Jesus, ma ir e ke fek fare maruwel ni daykusang ku ir e ke ayuweg girdien e tabinaw. Bay boch e thin nu Bible ni be dag ni riyul’ e re n’ey ya kan pining ngak Jesus ni daykusang, ma kan weliy u murung’agen e chitiningin nge pi walagen, machane Joseph e danga’. (Mark 6:3) . . . Ere, baga’ ni fa ragag nge meruk e duw ko yafas rok Somol rodad, ni ka nap’an e tayim ni ke buch fare n’en ni [kan yoloy ko Luke 2:41-49] ke mada’ ko ngiyal’ ni ke un ko taufe, e ke fanay e yafas rok ni nge rin’ boch e maruwel rok ni fan ko tabinaw.” I Maria nge pi bitir rok, nib muun Jesus ngay, e kar nanged e kireban’ ni ngeb ngak be’ ni faanra ke yim’ figirngiy nge chitamangiy nib t’uf rok.

13. Ngiyal’ ni ke tabab Jesus ko machib, ma mang fan ni bay e tamilangan’ rok, nge gonop, ma ri ma runguy e yugu e girdi’ ni dariy be’ ni bod ir?

¹³ Ba tamilang, ni dan gargelnag Jesus ko tabinaw ni ba mom e par ko girdi’ riy. Danga’, ya yafas rok u fayleng e taab rogon ko yug girdi’. Nge mu’, ma duw ni 29 C.E., ma ke taw nga nap’an ni nge rin’ e maruwel ni be sonnag ni ke pi’ Got ngak. Ma bang ko re duw nem ni kanog e fall ara autumn ngay, ma kan taufenag Jesus ma fakay Got ni ke mang Fak ni spiritual. ‘Me mab e tharmiy,’ e ba tamilang ni be dag ni aram e rayog ni nge yib nga laniyan’ rogon e par rok u tharmiy u m’on ni ke mang ba girdi’, ni ba muun ngay e lem rok nge rogon ni ma thamiy ban’en kakrom. (Luke 3:21, 22) Ere nap’an ni ke tabab Jesus ko machib, e aram bay e tamilangan’ rok, nge gonop, nge fene toar ni ma thamiy ban’en nib thil ko urngin e girdi’. Ere bay fan, ni piin kar yoloyed fapi Gospel e kar fanayed e tayim rorad ni ngar yoloyed e thin u murung’agen e pi n’en ni ke buch u nap’an ni i machib Jesus. Machane, dabiyog ni ngar yoloyed urngin e thin ni ke yog nge urngin ban’en ni ke rin’. (John 21:25) Machane urngin ban’en ni kan thagthagnag ngorad ni ngar yoloyed nga babyor e ra ayuwegdad ni ngad guyed e lem rok fa en ni th’abi ga’ ni immoy.

Mang Ra Rogon Jesus U Nap’an nib Girdi’

14. Uw rogon ni be tamilangnag e Gospel ni Jesus e riyul’ ni be’ ni ri ma lemnag e girdi’?

¹⁴ Rogon ni be weliy e pi thin ni bay ko fare Gospel ma Jesus e ir be’ ni ba sumunguy ma riyul’ ni ba t’uf e girdi’ rok. Ma ba thil thil rogon ni ke dag ni bat’uf e girdi’ rok: ke dag e runguy rok ngak be’ ni ba daraw (Mark 1:40, 41); ke kireban’ ni be guy e girdi’ ni dariy fan e machib u wan’rad (Luke 19:41, 42); ke damumuw nrogon nib mat’aw ngak e piin ni yad ma thiliyeg e salpiy ni yad ba siin (John 2:13-17). Jesus e ir e en ni ma lemnag salpen yugu boch e girdi’, ma ma yor u fithik’ e yoor ya der ma mithag n’en ni be thamiy. Nap’an ni ke yim’ Lazarus ni fager rok, me guy Maria ni walagen Lazarus ni be dolo’loy ni bochan, ma ke yor nib gel ni rib tamilang u p’eowchen yugu boch e girdi’.​—John 11:32-36.

15. Mang e lem rok Jesus nge mang e ke rin’ ngak yugu boch e girdi’ ni be micheg ni ir be’ nib runguy?

¹⁵ Kan guy nib tamilang ni Jesus e ir e en ni ba gol ko n’en ni ke rin’ ngak yugu boch e girdi’. Ke ayuweg e piin ni ba gafgow nge piin ni kan magawonnagrad, me ayuwegrad ni ‘ngar pirieged e toffan’. (Matthew 11:4, 5, 28-30) Rayog ni nge pi’ e tayim rok ngak e piin ni kan gafgownagrad ni nge ayuwegrad, ni mus ko fare ppin ni ke yib e m’ar ngak ni molul ni ke math nga wuru’ e mad rok nge be’ nib malmit ni dabi th’ab gulungan. (Matthew 9:20-22; Mark 10:46-52) Ma guy Jesus e tin nib fel’ ni ke rin’ yugu boch e girdi, me yog boch e thin nib fel’ ngorad; machane, ku ma fonownagrad ko ngiyal’ nib t’uf. (Matthew 16:23; John 1:47; 8:44) Nap’an ni dan pi’ e mat’awon boor e ppin, me dag Jesus ngorad ni ba thabthabel laniyan’ u fithik’ e tayfan. (John 4:9, 27) Arfan, ni immoy boch e ppin ni yad baadag ni ngar pigpiggad ngak ni yad be fanay boch ban’en rorad.​—Luke 8:3.

16. Mang e be dag ni ba thabthabel laniyan’ Jesus ko yafas nge chugum?

¹⁶ Ba thabthabel rogon ni ma lemnag Jesus e yafas. Chugum e gathi aram e n’en ni ri baga’ fan ngak. Gowa kemus ni buchuw e chugum ni ke yog ngak ko ngiyal’ nem. Ke yog ni “dariy bang ni nge pag ir riy nga but’ nge toffan.” (Matthew 8:20) Ngiyal’ nem, me rin’ Jesus ban’en ni nge falan’ag yugu boch e girdi’. Nap’an ni ke un ko reb e madnom ko mabgol​—ni aram e madenom ni baga’ ni yima chubeg e musik, ma yima yin’ e tang, ma bay e falfalan’ riy—​ma ba tamilang ni de yib nga ram ni nge kirebnag fare madenom. Danga’, ya ke fal’eg Jesus fare maangang ni bin som’on u rom. Faani taw ko tayim ni ke m’ay e wain rorad, me piliyeg e ran ke ngal’ ni wain, fare n’en ni yima unum ni “nge pi’ e falfalan’ ngak e girdi’.” (Psalm 104:15; John 2:1-11) Ere ke par ni be falfalan’ e girdi’ ko re madenom nem, ma de tamra’ fare pumoon nge fare ppin ni yow e kar mabgolgow ko ngiyal’ nem ni bochan. Maku kan guy ni ir be’ nib thabthabel laniyan’ ya kan weliy ni boor yay ni ma un Jesus ko machib ni boor e awa mab n’uw nap’an.​—John 4:34.

17. Mang fan ni bay tapgin ni Jesus e ir e Sensey nib Fel’, ma mang e be m’ug ko machib rok?

¹⁷ Jesus e ir e Sensey nib Fel’. Baga’ ni ma fil Jesus ban’en ngak e girdi’ nib m’ag ko tin yug ma rin’ e girdi’, ma ri manang nib fel’ rogon. (Matthew 13:33; Luke 15:8) Dabiyog ni ngan taarebnag rogon ni ma fil ban’en ngak e girdi’​—ya rib tamilang, ma ba mom, ma ma weliy boch ban’en ni manang e girdi’. Ma tin ni ri baga’ fan e aram e n’en ni ke fil ngorad. Pi thin ni fil ngorad e be dag ni ri baadag ni nge tamilang e lem rok, nge rogon ni be thamiy ban’en, nge tirok Jehovah e kanawo’.​—John 17:6-8.

18, 19. (a) Ke fanay Jesus mang fanathin ni be tamilangnag murung’agen e Chitamangin? (b) Mang e yira weliy ko bin migid e article?

¹⁸ a fanay Jesus e fanathin u gubin ngiyal’, ni be dag murung’agen e Chitamangin ni nge ayuweg e girdi’ ni nge mit nga lolugrad fare machib. Ba thil ko fare n’en ni kemus ni ngan weliy boch e thin ni be dag ni Got e ba runguy. Ma n’en nib thil ni ngan taarebnag Jehovah ngak fare matam ni ma n’ag fan e kireb ko girdi’ u wan’ ni ke falfalnan’ ko ngiyal’ ni ke guy fak ni be yib ma aram me ‘yan ni be mil, me yan i gumuchmuch ngak e chi cha’nem ni fak, nge faray owchen.’ (Luke 15:11-24) De fanay e yalen ko piin ni tayugang ko pi yurba’ i teliw ni yad ma dariy fannag e yug girdi’, me weliy ni Chitamangin e ir e Got ni ba mom ni nge chuchugur e girdi’ ngak ma rung’ag e meybil ni ke tay be’ ni ta mokun tax ma de rung’ag e meybil ko fa en ni Pharisee ni ba ufanthin. (Luke 18:9-14) Ke tamilangnag Jesus ni Jehovah e ir e Got ni manang ni faanra ke mul nga but’ nochi arche’ ni sparrow. “Dab mu tamdaggad,” Ke micheg nga laniyan’ pi gachalpen, “ni ka baga’ famed ngak fa nochi arche’ ni sparrows.” (Matthew 10:29, 31) Aram fan, ni ke gin e girdi’ “nga kanawo’en ni en ni ma fil Jesus ban’en” ma aram mar chuchugurgad ngak. (Matthew 7:28, 29) Arfan, ni immoy ba ngiyal’ ni “girdi ni pire’ ni pire’” e kar pared u tooben u lan dalip e rran, ni yugu aram rogon ni dakuriy e ggan rorad!​—Mark 8:1, 2.

¹⁹ Gad be pining e magar ya ke dag Jehovah thin rok nge lem rok Kristus! Machane, uw rogon ni ngad ayuweged gadad nge yog ngodad e re n’ey ma rayog ni ngad daged e lem rok Kristus u nap’an ni gad be chag ngak yugu boch e girdi’? Yira weliy e re n’ey ko bin migid e article.

[Footnotes]

Ka Ga Manang?

• Mang fan ni baga’ fan ni ngad nanged e “lem rok Kristus”?

• Ke chag Jesus ku mini’ ko ngiyal’ ni dawori mang ba girdi’?

• Nap’an ni immoy Jesus u fayleng, ma uwrarogon e par rok nge mang boch ban’en ni ke mada’nag?

• Fare Gospel e be dag e mit i mang e ngongol ni immoy rok Jesus?

[Picture on page 16]

Ke ilal Jesus u lan e tabinaw ni baga’, ma piin ni ma par riy e yad ba moding

[Pictures on page 18]

Ke gin e pi tamachib ko tamilangan’ nge pi fulweg ni ke pi’ Jesus ko ngiyal’ nem ni ke mus ni 12 e duw rok