Be Par Ni Yad Be Fol Ko Thin Riyul’

“Dariy ban’en nrib gel e felfelan’ nra pi’ ngog ko bin ni nggu rung’ag murung’agen pi fakag, ni be par ni yad be fol ko tin riyul’.”​—3 JOHN 4, NW.

1. “Tin riyul’ ko thin nib fel’” e ri be weliy murung’agen e mang?

JEHOVAH e kemus ni piin ni be liyor ngak “u daken e ayuw ko kan ni thothup nge tin riyul’” e ra fel’ u wan’. (John 4:24) Yad be fol ko tin riyul’, ni urngin e machib ko Kristiano nib puluw ko Thin rok Got e yad baadag. Re “tin riyul’ ney u murung’agen e thin nib fel’” ney e ri be weliy murung’agen Jesus Kristus ma ri be tamilangnag e gagiyeg rok Jehovah nth’abi tolang Jehovah u daken fare Gil’ilungun. (Galatia 2:14) Be pag Got ni “nge oloboch” e piin ni baadag e tin riyul’, machane rogon ni ngan thap ngak e be tor nga daken e michan’ ko fare thin nib fel’ min fol ko tin riyul’.​—2 Thessalonika 2:9-12; Efesus 1:13, 14.

2. John ni apostal e ri be pining e magar nbochan e mang, ma uwrarogon thilrow Gaius?

² Piin tamachib ko Gil’ilungun e “yad be maruwel u taabang u fithik’ e tin riyul’.” Ni bod John ni apostal nge Gaius ni fager rok, ni ur yul’yul’gow ko tin riyul’ ma ur folgow riy. Ba’ Gaius u wan’ John me yoloy ngak ni gaar: “Dariy ban’en nrib gel e felfelan’ nra pi’ ngog ko bin ni nggu rung’ag murung’agen pi fakag ni be par ni yad be fol ko tin riyul’.” (3 John 3-8) Yugu aram rogon ni John ni ke pillibthir e gathi ir e ke fil e thin riyul’ ngak Gaius, machane bochan ke yoor e duw rok, ma ir e Kristiano ni ke ilal ko tin riyul’, ma bay e runguy rok ni bod e chitamangiy ma ra puluw ni re moon nem ni bbitir ngak John e nga nog ni reb i fak.

Fare Thin Riyul’ nge Liyor ko Kristiano

3. Fapi muulung ni ke ta’ e piin Kristiano kakrom e fan ko mang ma uw rogon ni ke fel’ rogorad riy?

³ Rogon ni ngan nang e tin riyul’, ma piin Kristiano kakrom e yad ma muulung u taabang ni reb e ulung nge reb, ni baga’ ni yima ta’ u lan e tabinaw rok bagayad. (Roma 16:3-5) Mu rom e ma yib e athamgil nga lanin’rad riy ma ra bagayad ma be pi’ e athamgil nga laniyan’ bagayad ma be dag e t’ufeg nge maruwel nib fel’. (Hebrews 10:24, 25) Ma rogon e piin ni yad ma yog ni yad e Kristiano ko bin tomur e tayim, ni yoloy Tertullian (c.155–after 220 C.E.) e gaar: “Kug muulunggad ni nggu bieged boch fapi babyor rok Got . . . Kug gelnaged e michan’ romad u daken e pi babyor nem, kug gelnaged e athap romad, ma kug gelnaged e pagan’ romad.”​—Apology, chapter 39.

4. Nap’an e muulung ma uw feni ga’ fan ni nganin’ e tang?

⁴ Tang e baga’ ni bang ko pi muulung ko Kristiano kakrom. (Efesus 5:19; Kolose 3:16) I yoloy Professor Henry Chadwick ni Celsus ni reb e critic ko fa bin l’agruw e chibog e ke pirieg e tang nrib fel’ ni ke fanay e piin ni yad e Kristiano ni “rib fel’ me dabuy e n’en ni ke rin’ e lem rok ni bochan e pi tang nem.” Me ulul Chadwick ngay ni gaar: “Clement ni be’ nu Alexandria e ir e bin som’mon e tayol ni Kristiano ni ke weliy ko mit i mang e musik e ba fel’ ko Kristiano. I motochiyelnag ni susun gathi musik ni yima fanay ko churu’ ni ma pug e arar ko darngal.” (The Early Church, pages 274-5) Bochan fapi Kristiano kakrom e ba tamilang ni ka ron’ed e tang u nap’an e muulung rorad, ere Pi Mich Rok Jehovah e baga’ ni yad ma yon’ e tang nib puluw ko Bible nib muun ngay e pi tang nib gel ni ma pining e sorok ngak Got nge fare Gil’ilungun.

5. (a) Uw rogon ni kan pow’iy e ulung ko piin Kristiano kakrom ko tirok Got? (b) Uw rogon ni ke fol e tin riyul’ e Kristiano ko thin rok Jesus ni bay ko Matthew 23:8, 9?

⁵ U lan e pi ulung ko Kristiano kakrom, ma piin ma guy e ulung e kara filed e tin riyul’ ngorad, ma pi ministerial servant e ka ra ayuweged e pi walagrad u boor e kanawo’. (Filippi 1:1) Piin ni ka nog e governing body ngorad ni be pagan’rad ko Thin rok Got nge kan ni thothup e kara pied e ayuw ko tirok Got riy. (Acts 15:6, 23-31) Dan fana’ fithingan e liw ko teliw ya bochan i motochiyelnag Jesus ngak pi gachalpen ni gaar: “Thingar dabni pining e Rabbi ngomed, ya taareb e sensey romed, ma gimed gubin e walag. Maku, dariy bigimed u roy u fayleng ni ngan pining ni chitamangimed, ya ri taareb e Chitamangimed, ni Ani ma par u tharmiy.” (Matthew 23:8, 9) Pi n’ey nge ku boor ban’en, nib taareb e piin Kristiano kakrom riy nge Pi Mich Rok Jehovah.

Kan Togopuluw ni Bochan e Yibe Wereg e Tin Riyul’

6, 7. Yugu aram rogon ni yad ma wereg e machib ni ma pi’ e gapas, ma mang e kan rin’ ngak e tin riyul’ e Kristiano?

⁶ Yugu aram rogon ni piin Kristiano kakrom e kara wereged e thin ko Gil’ilungun ni ma pi’ e gapas, min gafgownagrad ni bod rogon Jesus. (John 15:20; 17:14) Reb e historian ni John L. von Mosheim fithingan e ke yog ni fapi Kristiano ko fa bin som’mon e chibog e yad “reb e ulung ko girdi’ ni pangirad e derma k’aring e damumuw, ma der ma aw nga lanin’rad e n’en nra kirebnag fare am.” Dr. Mosheim e ke yog ni n’en ni ke “k’aring e damumuw ngak piyu Roma e aram kaygi mom e liyor ni ma ta’ e Kristiano, nrib thil ko tin nib thothup ni ma rin’ yugu boch e girdi’.” Me ulul ngay ni gaar: “Dariy e maligach rorad, nge tempel, nge liyos, nge oracles, ara motochiyel ko prist; ma ke gaman e pi n’em ni piin ndariy ban’en ni yad manang e ra gathibthibnaged yad, ya yad be lemnag ndariy e teliw ni aram rogon. Ma aram e yibe lemnag ni yad ba mit e atheist; ma, rogon ni yog fare motochiyel nu Roma, e piin ni ka nog e atheist ngorad e kan ta’ ni yad e girdi’ ni ma k’aring e wagey ngak e girdi’.”

⁷ Piin prist, nge piin ma fal’eg yaan e liyos, nge yugu boch e girdi’ ni maruwel rorad ni fan e nge yog boch e salpiy ngorad e be tor nga daken e liyor ko liyos ma kar k’aringed e girdi’ ni ngar togopuluwgad ko piin Kristiano, ya yad e piin ni der ma un ko liyor ko liyos. (Acts 19:23-40; 1 Korinth 10:14) I yoloy Tertullian ni gaar: “Kar ted ni fapi Kristiano e yad be k’aring urngin e gafgow ko Am, nge urngin e buch waathan ni keb ngak e girdi’. Faanra ke yoor e ran u Tiber ke taw nga daken e rungrung ko fare mach, ma faanra de yoor e ran u Nile nge taw nga daken e milay’ rorad, ma faanra dabi aw e n’uw ara faanra keb e durru’, nge faanra keb e uyungol, nge faanra keb reb e gafgow, ma chi ngiyal’ nem e ra tolulnag ni: ‘Nganin’ fapi Kristiano nga tafen e layon!’” Demtrug e n’en nra buch, ma tin riyul’ e Kristiano e ‘kar paloggad ko liyos.’​—1 John 5:21.

Tin Riyul’ nge Boch e Madenom ko Teliw

8. Mang ni piin ni be fol ko tin riyul’ e dar ma madenomnag e Baynag?

⁸ Piin ma fol ko tin riyul’ e ma siyeg e madenom ndariy u Bible ya bochan ‘dabi chag nga taabang e tamilang nge talumor.’ (2 Korinth 6:14-18) Ni bod ni, der ma madenomnaged e Baynag, ni yima ta’ ko December 25. “Dariy be’ ni manang e rorran ni rib puluw ni kan gargelnag Kristus riy,” rogon ni yog fare The World Book Encyclopedia. The Encyclopedia Americana (1956 Edition) e be yog ni gaar: “Fare Saturnalia, ni reb e madenom ko piyu Roma ni yima madenomnag u lukngun e pul ni December, e ke mang ban’en ni ma fol boor e girdi’ riy ko fafel ni yad ma rin’ ko Baynag ngar felfelan’gad.” Fare M’Clintock and Strong’s Cyclopædia e be yog ni gaar: “Fare madenom ko Baynag e gathi motochiyel rok Got, ma ku dabiyog ni ngan gu’ u Bible ni N[ew] T[estament].” Ma fare babyor ni Daily Life in the Time of Jesus e be yog ni gaar: “Fare ran’ i gamanman . . . e immoy u bang nib upong u nap’an e winter; ma kemus nu roy ma rayog ni ngan gu’ ni fare rran’ ni yima tay e Baynag riy, u nap’an e winter e de puluw, ya fare Gospel e be yog ni piin ma gafaliy e gamanman e ur moyed u wen.”​—Luke 2:8-11.

9. Mang fan ni pi tapigpig rok Jehovah kakrom nge chiney e yad ma siyeg fare madenom ni Easter?

⁹ Fare Easter e ka nog ni ireray e madenom ni fan ko fas ko yam’ ni tay Kristus, machane boch ban’en ni yima pagan’ ngay e be yog ni ba l’ag e re n’ey ko liyor ni googsur. Fare The Westminster Dictionary of the Bible e be yog murung’agen e Easter ni “som’mon ireray e madenom u nap’an e spring ni be tayfan fare got ni ppin ni Teutonic ni got ko tamilang ma ireray e spring ni kan nang u Anglo-Saxon ni Eastre,” ara Eostre. Demtrug rogon, ma fare Encyclopædia Britannica (11th Edition) e be yog ni gaar: “Dariy reb e pow ko madenom ni Easter u lan fare New Testament.” Easter e gathi reb e madenom ko Kristiano kakrom ma girdi’ rok Jehovah e chiney e der ma un ngay.

10. Mang madenom ni Jesus e i tababnag, ma mini’ e be madenomnag e re n’ey nrogon nib puluw?

¹⁰ De motochiyelnag Jesus ngak pi gachalpen ni ngar madenomnaged fare rran ni kan gargelnag riy ara fare rran ni kan faseg ko yam’ riy, machane i tababnag fare Puguran ko yam’ ni tay nib maligach. (Roma 5:8) Riyul’, ni ke mus ni ireray e madenom ni i motochiyelnag ngak pi gachalpen ni ngar madenomnaged. (Luke 22:19, 20) Maku ka nog e Abich ni Balayal rok Somol ngay, ma re madenom ney ni yu duw e ma madenomnag e Pi Mich Rok Jehovah.​—1 Korinth 11:20-26.

Tin Riyul’ e Kan Wereg Nga Ga’ngin Yang u Fayleng

11, 12. Uw rogon ni ma ayuweg e piin ni ma fol ko tin riyul’ e maruwel ni ngan wereg e machib ni gubin ngiyal’?

¹¹ Piin kar nanged e tin riyul’ e yad ma ta’ ni reb e maruwel ni bay fan ni ngar fanayed e tayim rorad ngay, nge gelngirad, nge boch ban’en ni bay rorad ni fan ko maruwel ni ngan wereg fare thin nib fel’. (Mark 13:10) Fare maruwel ko Kristiano ni ngan wereg e machib kakrom e yima pi’ boch e ayuw nrogon ni ke m’agan’uy ngay. (2 Korinth 8:12; 9:7) I yoloy Tertullian ni gaar: “Yugu aram rogon ni ra bay ba kahol ni yima ta’ e salpiy ngay, ma gathi ireray e salpiy ni ke pi’ be’ ni nge mang bang ko re ulung ney, ni gowa be fanay e teliw ni fol chuway. Urngin e pumoon u reb e pul ma taab yay ni ma fek buchuw e salpiy nge pi’​—ara demtrug e rran ni baadag, ma kemus nfaanra baadag, ma faanra rayog rok; ya danir ma towasariy e girdi’; ya ireray e maligach nrogon e n’en ni kan dugliy u lanin’uy.”​—Apology, chapter 39.

¹² Maku yima pi’ e ayuw nrogon ni ke dugliy lanin’uy ni fan ko maruwel ko Pi Mich Rok Jehovah ni yad be wereg e machib u ga’ngin yang e fayleng. Ma gathi kemus ni Pi Mich, ya piin baadag e machib e ku yad be ta’ ni reb e taw’ath ni rayog ni ngar pied boch e salpiy ni fan ko re maruwel ney. U roy, e ba taareb rogon riy e piin Kristiano kakrom ko Pi Mich Rok Jehovah.

Tin Riyul’ nge Pangin Be’

13. Murung’agen e ngongol rorad, mang fonow rok Peter e be fol e Pi Mich Rok Jehovah riy?

¹³ Bochan yad e piin ni ma fol ko tin riyul’, ma fapi Kristiano kakrom e kar folgad ko fonow rok Peter ni apostal ni gaar: “Ma susun e ngar um pired u fithik’ e girdi’ nu fayleng nib fel’ pangimed, ya nga rogned nib kireb e ngongol romed, ma bochan kam daged e ngongol nib fel’ e sana ngar pininged e sorok ngak Got ko ngiyal’ ni yad be yaliymed.” (1 Peter 2:12) Rib fel’ e pi thin nem u wan’ e Pi Mich Rok Jehovah.

14. Uw rogon u wan’ e piin Kristiano e fafel ni ma k’aring e ngongol nib kireb?

¹⁴ Tomren ni ke sum e piin kar digeyed e tin riyul’, ma piin yad e Kristiano e ku ur paloggad ko ngongol ni darngal. W. D. Killen, ni reb e professor ko chepin e Galesiya, ke yoloy ni gaar: “Nap’an fa bin l’agruw nge bin dalip e chibog ma naun ni ka nog play house ngay u urngin e mach e ke mang gin ni yima fafel riy; yugu aram rogon ni piin ma un ngay e ri yad ma un ko ngongol ni darngal, ma tin ni yad ma rin’ u rom e rib fel’ u wan’ e piin ni ma un ko ar’ar nib kireb ko ngiyal’ nem. . . . Kari dabuy e tin riyul’ e Kristiano e re n’em. . . . Kar gingad nga feni puwlag e re n’em; ma bochan yad ma pining e got ni pumoon nge ppin ko piin ka nog e pagan’ ngorad e be dariy fannag e tin riyul’ ni kari mich u wan’rad.” (The Ancient Church, pages 318-19) Pi gachalpen Jesus nib riyul’ e chiney e ku yad be siyeg e fafel ni puwlag nra kireb’nag e gafarig rorad.​—Efesus 5:3-5.

Tin Riyul’ nge “Piin Bay Mat’awrad nib Tolang”

15, 16. Mini’ e “piin bay mat’awrad nib tolang,” ma uw rogon e pi cha’, nem u wan’ e piin ma fol ko tin riyul’?

¹⁵ Yugu aram rogon ni fapi Kristiano kakrom e kar daged e ngongol nib fel’, ma baga’ ni fapi pilung nu Roma e kar olobochgad u rogon ni kar turguyed e kireb rorad. E. G. Hardy ni reb e historian e ke yog ni fapi pilung e yad be lemnag ni yad e piin nib “pasig ndariy fan.” Fapi babyor u thilin Governor Pliny the Younger nu Bithynia nge Emperor Trajan e be dag ni girdien e am ko ngiyal’ nem e dar nanged rarogon e Kristiano. Uw rogon fare Am u wan’ e Kristiano?

¹⁶ Taab rogon ko fapi gachalpen Jesus kakrom, ma Pi Mich Rok Jehovah e kara pared u tan girdien e am ni piin “bay mat’awrad nib tolang” ni bay e gin ni ngan mus riy. (Roma 13:1-7) Faanra ba togopuluw e motochiyel ko girdi’ ko tin nib m’agan’ Got ngay, ma yad ra fol ko thin ni ka nog ni: “Thingar gu folgad rok Got ko bin ni nggu folgad rok e girdi’.” (Acts 5:29) Be yog fare babyor ni After Jesus​—The Triumph of Christianity: “Yugu aram rogon ni fapi Kristiano e sana dar liyorgad ko pilung, ma dar ma k’aring e wagey, ma yugu aram rogon nib thil e teliw rorad ma yu ngiyal’ ma piin ni ka nog e pagan ngorad e kar dabuyed e re n’ey, ma der ma magawonnag e am.”

17. (a) Piin Kristiano kakrom e kar pared u tan mang am? (b) Uw rogon ni ke fol pi gachalpen Kristus ko thin ni bay ko Isaiah 2:4 ko yafas rorad?

¹⁷ Fapi Kristiano kakrom e yad ma mon’eg Gil’ilungun Got, ntaareb rogon ku Abraham, nge Isak, nge Jakob ni ka nog e patriarch ngorad ni kari mich u wan’rad fare ‘mach ni Got e ke ngongliy’ ni kan micheg.’ (Hebrews 11:8-10) Taareb rogon ko Masta rorad, ma pi gachalpen Jesus e “gathi yad bang ko fayleng.” (John 17:14-16) Ma murung’agen e mahl ni ma ta’ e girdi’ nge cham, e yad be nameg e gapas ya ka ra ‘pirdiiyed e pi sayden rorad ngar ngongliyed talin e maruwel riy ni ma gi’ e but’.’ (Isaiah 2:4) Ke guy ban’en ni ba taareb rogon, en ma pi’ e welthin ko chepin e galesiya ni Geoffrey F. Nuttall fithingan e ke yog ni gaar: “Rogon e mahl u wan’ e Kristiano kakrom e ba taareb rogon ko girdi’ ni ma yog ni yad e Pi Mich Rok Jehovah ma rib mo’maw ni nga gu lemnaged ni aram rogon.”

18. Mang fan ni susun dariy reb i fan ni nge rus e am ngak e Pi Mich Rok Jehovah?

¹⁸ Bochan yad e girdi’ ni yad ma par u mathilin ma ma par u tan e “piin bay mat’awrad nib tolang,” ma Kristiano kakrom e dar ma k’aring e magawon ko urngin e am ni immoy, maku arrogon e Pi Mich Rok Jehovah. “Ba t’uf e lem ni der ma pagan’uy ni fan ni nge mich u wan’uy ni Pi Mich Rok Jehovah e ra k’aring e magawon ko urngin mit e am,” rogon ni yog reb e editorialist u North America. “Yad reb e ulung ni der ma kirebnag ban’en ma baadag e gapas.” Girdien e am ni kar nanged u murung’agrad e yad ma nang ni Pi Mich Rok Jehovah e dar ma k’aring e marus ko girdi’.

19. Murung’agen e tax, ma mang e rayog ni nga nog u murung’agen e piin Kristiano kakrom nge Pi Mich Rok Jehovah?

¹⁹ Reb e kanawo’ ni piin Kristiano kakrom e ka ra daged ni yad be tay fan e “piin bay mat’awrad nib tolang” e aram yad ma pi’ e tax. Nap’an ni yoloy ngak Antoninus Pius (138-161 C.E.) ni pilung nu Roma, ma Justin Marty e ke yog ni fapi Kristiano e kar pied e tax “nib m’agan’rad ngay ni kab fel’ ko yugu boch e girdi’.” (First Apology, chapter 17) Me yog Tertullian ngak e pi pilung nu Roma ni girdi’ rorad ni tamukun tax nib “t’uf ni ngar pininged e magar ngak e piin Kristiano” ya kar pied e tax rorad nib m’agan’rad ngay. (Apology, chapter 42) Piin Kristiano e ke fel’ rogorad ko fare Pax Romana, ara Gapas ko piyu Roma, ni bay e motochiyel nge yaram rorad, nge kanawo’ nib fel’, ma gathi rib gel e riya’ ni ngan milekag u maday. Kar naabgad ko malfith rorad ngak e girdi’, ma kar folgad ko thin rok Jesus ni gaar: “Faanra arrogon me ere mpied ngak e pilung nu Roma e tirok ban’en, mi gimed pi’ ngak Got e tirok Got ban’en.” (Mark 12:17) Girdi’ rok Jehovah ko ngiyal’ ney e yad be fol ko re fonow ney ma ka nog boch e thin nib fel’ u murung’agrad ya yad ba yul’yul’, nga rogon ni yad ma pi’ e tax rorad.​—Hebrews 13:18.

Tin Riyul’​—Ba Gaf nra Taareban’nigey

20, 21. Murung’agen e walag ni bay e gapas u fithik’, ma mang e tin riyul’ ko piin Kristiano kakrom nge pi tapigpig rok Jehovah ko ngiyal’ ney?

²⁰ Bochan fapi Kristiano kakrom ni ur folgad ko tin riyul’, me taareban’rad me aw e gapas u thilrad ni yad walag, ni taareb rogon ko Pi Mich Rok Jehovah e ngiyal’ ney. (Acts 10:34, 35) Reb e babyor ni kan ta’ ko The Moscow Times e ke yog ni gaar: “[Pi Mich Rok Jehovah] e ri yima nangrad nrib fel’ pangirad, ma yad ba gol, ma yad ba sumunguy mab mom ni ngan chag ngorad, ma dar ma magawonnag yugu boch e girdi’ ma yad ma athamgil ni nge aw e gapas u thilrad yugu boch e girdi’ . . . Dariy bagayad ni ma pi’ ban’en ngak be’ ni bochan ni nge sasalapiy boch ban’en ngak, ma dariy be’ nib ta chingaw ara be’ ni ke mecham ko drug, ma tapgin e de mo’maw’: Kemus ni yad be guy rogon ni nga i pow’iyrad e Bible ma ma gagiyegnagrad urngin ban’en ni ngara rin’ed ara thin ni nga rogned. Faanra urngin e girdi’ u fayleng e ma nga yugu ra guyed rogon ni ngara pared nib puluw ko Bible ni taareb rogon ko n’en ni ma rin’ e Pi Mich Rok Jehovah, ma sana gathi aram rogon e fayleng rodad nib sug ko kireb.”

²¹ Fare Encyclopedia of Early Christianity e be yog ni gaar: “Fare galesiya kakrom e kar lemnaged ni yad reb e tabinaw nib biech ni kafram e yad l’agruw e ulung ko girdi’ ni kar chamgad, ni piyu Jew nge girdi’ ni gathi yad piyu Jew, ma chiney e yad be par u taabang u fithik’ e gapas.” Pi Mich Rok Jehovah e kub t’uf e gapas rorad ni yad walag u ga’ngin yang u fayleng​—ni riyul’ ni yad reb e ulung u fayleng nib biech. (Efesus 2:11-18; 1 Peter 5:9; 2 Peter 3:13) Nap’an ni en ga’ ko fare Pretoria Show Grounds u South Africa e ke guy e Pi Mich ko urngin e nam ni kar muulunggad u rom u fithik’ e gapas ya kar uned nga reb e convention, me yog ni gaar: “Urngin e girdi’ e yima tay fan, ma ra bagayad e ma non nib fel’ rogon ngak bagayad, ma pangirad ni kar daged u lan in e rran​—urngin e be micheg e gafarig nib fel’ ko urngin e girdi’ ko ulung romed, ma yad urngin e yad be par u taabang ni bod reb e tabinaw ni ba felfelan’.”

Kan Taw’ath Ya Bochan Yibe Fil fare Thin Riyul’

22. Mang e be buch ya piin Kristiano e yad be gagiyelnag e tin riyul’?

²² Bochan e ngongol rorad ma yad be wereg e machib, Paul nge yugu boch e Kristiano e kar maruweliyed “nge tamilang fare thin riyul’.” (2 Korinth 4:2) Gathi ba puluw u wan’un ni aram rogon e tin ma rin’ e Pi Mich Rok Jehovah ma yad be fil e thin riyul’ ngak urngin e nam? Girdi’ u ga’ngin yang e fayleng e yad be un ko bin riyul’ e liyor ma yad be yan u taabang ko ‘fare burey ni tagil’ Jehovah’ ni yad be yoor i yan. (Isaiah 2:2, 3) Gubin e duw, ma bokum biyu’ e girdi’ ni yima taufenag ni be dag ni kar ognaged yad ngak Got, ma aram kan sunmiy boor e ulung nib biech.

23. Uw rogon e piin be fil e thin riyul’ ngak urngin e nam u wan’um?

²³ Yugu aram rogon ni girdi’ rok Jehovah e kar bad u yuyang nib thilthil, mab taareban’rad ko bin riyul’ e liyor. T’ufeg ni yad ma dag ko ngongol rorad e be dag ni yad e pi gachalpen Jesus. (John 13:35) Rayog ni ngam guy ni ‘riyul’ ni Got e bay u fithik’rad’? (1 Korinth 14:25) Ga be ayuweg e piin ni be fil ngak urngin e nam e thin riyul’? Faanra aram rogon, ma yibe athapeg ni ga ma pining e magar nbochan e thin riyul’ me bung rogom ni nguum fol riy ndariy n’umngin nap’an.

Uw Rogon ni Ngam Pi’ e Fulweg?

• Rogon ni yima liyor, ma uw rogon ni ba taareb rogon e piin Kristiano kakrom nge Pi Mich Rok Jehovah?

• Kemus ni mang madenom ko teliw ni ma madenomnag e piin ma fol ko tin riyul’?

• Mini’ e “piin bay mat’awrad nib tolang,” ma uw rogon e pi cha’ nem u wan’ e Kristiano?

• Uw rogon ni tin riyul’ e bod ba gaf nra taarebnagey?

[Picture on page 16]

Gubin ngiyal’ ma fapi muulung ni ma ta’ e piin Kristiano e ba taw’ath ko piin ni be fol ko tin riyul’

[Pictures on page 18]

I motochiyelnag Jesus ngak pi gachalpen ni ngar madenomnaged fare Puguran ko yam’ ni tay ni maligach

[Picture on page 19]

Taabrogon ko piin Kristiano Kakrom, ma Pi Mich Rok Jehovah e ka ra ted fan e “piin bay mat’awrad nib tolang”