Ma ‘Lemnagem’ Jehovah

MANG FAN nrayog ni nge mich u wan’um nriyul’ ni ma lemnagem Jehovah? Reb i fan e bochan ni aram e n’en ni be yog e Bible. Be yog e 1 Peter 5:7 ni gaar: “Mpaged fan urngin e magafan’ romed ngak, ya be lemnag rogomed.” Mang e mich riy nri ma lemnagem Jehovah Got?

MA PI’ GOT E TIN NIB T’UF KO PAR KO GIRDI’

Bay boch i fel’ngin Got ni ga ma yaliy rok e pi fager rom nrib pach e thin romed. Piin ni yad ma dag e sumunguy ngorad maku yad ba gol ngorad e ba ga’ nri ma chugur e tha’ u thilrad e pi fager rorad. Rayog ni ngam guy ni Jehovah e ba sumunguy mab gol ngak e girdi’ ni gubin e rran. Mu lemnag reb i kanawoen ni ma rin’ e re n’ey riy: “Be mateg ramaen e yal’ rok nga daken e girdi’ nib tagan nge girdi’ nib fel’ ntaareb rogon, ma be pi’ e n’uw ngak e piin ni yad be rin’ e tin nib mat’aw nge piin ni yad be rin’ e tin nib kireb.” (Matt. 5:45) Mang e ma rin’ e yal’ nge n’uw? Yugu aram rogon ni boor ban’en ni ma rin’ e yal’ nge n’uw, machane reb riy e aram e ma fanay Got ni nge ‘pi’ e ggan ngodad me fal’eg lanin’dad.’ (Acts 14:17) Arrogon, Jehovah e ma guy rogon ni gubin ngiyal’ ma bay wom’engin e pi woldug u roy u fayleng, ma gad gubin ni gad manang ni bay e felfelan’ riy ni faanra da ked boch e ggan nib manigil.

Ere, mang fan ni boor e girdi’ ni yad ma yim’ ko bilig? Bochan ni piin ni yad be gagiyeg e ba ga’ ni yad be guy rogon ni nge ga’ lungurad me yoor e salpiy rorad ko bin ni ngar guyed rogon ni ngar mon’ognaged rogon e par ko girdi’. Machane, dab ki n’uw nap’an ma bayi pithig Jehovah e re magawon ney ni aram e bayi chuweg e pi am nu roy u fayleng me tay e birok e gagiyeg nga lon ni Jesus ni Fak e ir e Pilung riy. Ngiyal’ nem e dakuriy be’ nra yim’ ko bilig. Machane ngiyal’ ney e ku ma ayuweg Got e pi tapigpig rok ni yad ba yul’yul’. (Ps. 37:25) Ere gur, gathi aram e pow riy ni ma lemnagdad?

BAADAG JEHOVAH NI MA TAY E TAYIM NI FAN NGODAD

Reb e fager nib manigil e ma tay e tayim ni fan ngom. Rayog ni ngam nonow nib n’uw nap’an ni gimew be weliy boch ban’en ni gimew baadag. Maku reb e fager nib manigil e ra motoyil ngom nib fel’ rogon u nap’an ni ga be weliy e magawon nge magafan’ rom ngak. Ere gur, aram rogon ni ma tiyan’ Jehovah ngodad, fa? Arrogon, ya ma motoyil ko meybil rodad. Ere, be pi’ e Bible e athamgil nga lanin’dad ni ngad “meybilgad ni gubin ngiyal’.”​—Rom. 12:12; 1 Thess. 5:17.

Uw n’umngin nap’an ni baadag Jehovah ni nge motoyil ko meybil rom? Bay reb e ban’en ni ke buch ni bay murung’agen u lan e Bible nrayog ni nge pi’ e fulweg riy. U m’on ni nge mel’eg Jesus e pi apostal rok, ‘me par ni reb e nep’ ni be meybil ngak Got.’ (Luke 6:12) U lan e re meybil rok nem e weliy Jesus riy ngak e Chitamangin murung’agen pi gachalpen ni tat’abagayad ni be yog ngak pi fel’ngirad nge pi meewar rorad, ma be yog ngak ni nge ayuweg u rogon ni nge mel’egrad. Ere, nap’an ni af ko bin migid e rran, ma ke nang Jesus ni ke mel’eg e piin nib fel’ nrayog ni ngar manged e pi apostal rok. Baadag Jehovah ni nge motoyil ko meybil rok e piin ni yad ba yul’yul’ ni bochan e ir e ma “fulweg taban e meybil.” (Ps. 65:2) Der ma lemnag Jehovah n’umngin nap’an ni be meybil be’ ngak ni mus ni faanra be meybil facha’ nib n’uw nap’an ni be weliy boch ban’en ngak nib ga’ fan.

BA M’AGAN’ GOT NGAY NI NGE N’AG FAN E KIREB RODAD

Mus ngak e piin nib fel’ e tha’ ko fager u thilrad ni bay yu ngiyal’ nib mo’maw’ ni ngar n’aged fan e kireb rorad. Bay yu ngiyal’ ni ma math’ e tha’ u thilin boch e fager ni ke n’uw nap’an ni bochan e ba mo’maw’ ni ngan n’ag fan e kireb. Machane, gathi aram rogon Jehovah. Be pi’ e Bible e athamgil nga laniyan’ gubin e girdi’ ni yad ba yul’yul’ ni ngar weniggad ngak Jehovah ni nge n’ag fan e kireb rorad, ya “ba gur ni nge n’ag fan ban’en u wan’.” (Isa. 55:6, 7) Mang fan nib gur ni ma n’ag Jehovah fan e kireb rodad?

Bochan nrogon ni ma dag Got e t’ufeg e dabiyog i taarebrogonnag ko t’ufeg ni ma dag e girdi’. Rib t’uf e girdi’ nu fayleng rok me pi’ Jesus ni Fak ni nge chuweg e girdi’ u tan gelngin e denen. (John 3:16) Bin riyul’ riy e, ka boor angin e re biyul nem nra yib ngodad. Ere, ba gur ni nge n’ag Got fan e kireb rok e piin ni yad ba t’uf rok ni bochan fare biyul ni ke pi’ Kristus. I yoloy apostal John ni gaar: “Faan gadad ra weliy e denen rodad ngak Got ma rayog ni ngad pagedan’dad ngak, ya tin nib mat’aw e ra rin’​—ya ra n’ag fan u wan’ e denen rodad.” (1 John 1:9) Bochan ni ma n’ag Jehovah fan e kireb ko girdi’, ma aram fan nrayog ni ngar pared ni yad e fager rok. Ere, dariy e maruwar riy nrib ga’ fan e re n’ey u wan’dad.

RA AYUWEGEM KO NGIYAL’ NIB T’UF E AYUW ROM

Bin riyul’ e fager e ra ayuwegem ko ngiyal’ nib t’uf e ayuw rom. Ere gur, ku aram rogon Jehovah? Be gaar e Thin rok: “Ra chey ni dol’ [reb e tapigpig rok Got], ma dabi par u luwan u but’, yi Somol e ra ayuweg nge sak’iy nga lang.” (Ps. 37:24) Boor e kanawo’ ni ma “ayuweg” Jehovah e pi tapigpig rok riy. Baaray reb e ban’en ni buch u reb e donguch u lan e Caribbean ni ka nog yu St. Croix ngay.

Bay bochi pin ni chel e piin ni yad nga skul ngaur kak’aringed ni bochan e der un ko siro’ ko flak. Ere, tomuren ni meybil ngak Jehovah ni nge ayuweg, ma aram me dugliy u wan’ ni nge pithig e re magawon nem. Nap’an ni taw ko yay ni migid ni nge weliy murung’agen boch ban’en u class ma aram me mel’eg ni nge weliy murung’agen e siro’ ko flak. I fanay fare ke babyor ni kenggin e Babyor Rog Ni Chep Nu Bible ni nge weliy rogon ni ke ayuweg fare chep ni murung’agen Shadrak, nge Meshak, nge Abednego ni nge mel’eg ndabi siro’ ko flak. I yog ni gaar, “I ayuweg Jehovah e re dalip i pagel ni Hebrew nem ni dabi buch ban’en rorad ni bochan e dar siro’gad nga ba liyos ni kan tay ni nge siro’ e girdi’ ngay.” Ma aram me fith ko bay be’ ni baadag ni nge fanay ba ken e re babyor nem, ma ragag nge taareb e bitir e rogned ni yad baadag ni nge yag ba ken ngorad. Kari felfelan’ fachi pin ni bochan e manang ni Jehovah e ir e ke pi’ gelngin nge gonop ngak ni nge weliy ban’en nib mo’maw’ ngak ni nge weliy.

Faanra be maruwar u wan’um ko ra ayuwegem Jehovah fa danga’, mag fal’eg i lemnag e pi thin nu Bible ni baaray ko Psalm 34:17-19; 55:22; nge 145:18, 19. Maku rayog ni ngam fith e piin ni ke n’uw nap’an ni kar manged boch e Pi Mich Rok Jehovah ko uw rogon ni ke ayuwegrad Jehovah. Ma nap’an nra t’uf e ayuw rom, mag meybil ngak Got ni nge ayuwegem. Faan ga ra rin’ ni aray rogon ma ga ra guy rogon ni ma ‘lemnagem’ Jehovah.