“Mini’ E En Ni Ir Fare Tapigpig Nib Yul’yul’ Ma Ba Gonop?”

1, 2. Mini’ e be fanay Jesus ni nge pi’ e tin nib t’uf rodad ni fan ko tirok Got ban’en e ngiyal’ ney? Mang nib ga’ fan ni ngad nanged ko mini’ e re tapigpig ney?

“PI WALAGEG, dabiyog ni nggu theeg urngin yay ni kam pied e article nib m’ag e thin riy ngog ma kub puluw ngal’an.” Aram rogon ni weliy reb e walag nib pin laniyan’ u bangi babyor ni yoloy nge yan ko pi walag ni yad ma maruwel ko tochuch rodad. Ba puluw e n’en ni ke yog e re walag ney u wan’um, fa? Boor i gadad e ra lemnag nib puluw. Ere gur, ngad gingad ko re n’ey? Danga’.

² Thin rok Got ni yima pi’ ngodad ni bod e ggan ni yima pi’ ko ngiyal’ ni ngan pi’ riy e aram e mich riy ni Jesus ni ir Lolugen e ulung e be rin’ e n’en ni ke micheg ni aram e nge pi’ e tin nib t’uf rodad ni fan ko tirok Got ban’en. Mini’ e be rin’ e re maruwel ney u daken? Nap’an ni be weliy murung’agen e pow ko ngiyal’ ni bay riy me yog nra fanay “fare tapigpig nib yul’yul’ ma ba gonop” ni nge pi’ gan e tin ni ka bay e tapigpig ko “ngiyal’ ni yima pi’ riy.” (Mu beeg e Matthew 24:45-47.) Ere, re tapigpig nib yul’yul’ nem e ir e be fanay Jesus e ngiyal’ ney ko tin tomuren e rran ni nge pi’ e tin nib t’uf ko tin riyul’ i gachalpen ni fan ko tirok Got ban’en. Rib ga’ fan ni ngad nanged ko mini’ e re tapigpig nib yul’yul’ nem, ya rarogodad ko tirok Got ban’en nge tha’ u thildad Got e be tor nga daken.​—Matt. 4:4; John 17:3.

3. Mang e unog ko pi babyor rodad kafram u murung’agen fare fanathin ko fare tapigpig nib yul’yul’?

³ Ere, uw rogon ma gad nang fan fare fanathin rok Jesus ni murung’agen fare tapigpig nib yul’yul’? Kafram e unog ko pi babyor rodad ni: Nap’an e Pentekost ko duw ni 33 C.E., me tay Jesus fare tapigpig nib yul’yul’ ni nge milfan e tin ni ka bay e tapigpig rok ngak. Fare tapigpig e be yip’ fan gubin e pi Kristiano ni kan dugliyrad ni yad ba ulung ni tabab ko ngiyal’ nem ke mada’ ko chiney. Ma tin ni ka bay e tapigpig e ku yip’ fan e piin ni kan dugliyrad, machane tatabagayad. Nap’an e duw ni 1919, me tay Jesus fare tapigpig nib yul’yul’ ni nge “mil fan urngin ban’en rok ngak,” ni aram e gubin ban’en ni yibe fanay u fayleng ni fan ko fare maruwel ni ngan machibnag murung’agen Gil’ilungun Got. Machane, tomuren ni kan fal’eg i fil murung’agen e re n’ey ma kan fal’eg i lemnag u fithik’ e meybil, ma kan nang nib t’uf ni nge tamilang u wan’dad e pi n’en ni yog Jesus u murung’agen fare tapigpig nib yul’yul’ ma ba gonop. (Prov. 4:18) Chiney e ngad weliyed e re fanathin ney nge rogon ni gad ba l’ag ngay, ndemtrug ko gad be athapeg ni nga darod nga tharmiy ara ngad pared u fayleng.

WUIN E KE LEBUG FARE FANATHIN?

4-6. Mang fan nrayog ni nga dogned ni fare fanathin rok Jesus ni murung’agen fare tapigpig nib yul’yul’ e fini tabab ni nge lebug u tomuren e duw ni 1914?

⁴ Thin ni bay u m’on ngu tomuren fare fanathin ni murung’agen fare tapigpig nib yul’yul’ ma ba gonop e be dag nde lebug e re thin ney ko Pentekost ko duw ni 33 C.E., ya ke lebug ko ngiyal’ ney ko tin tomuren e rran. Ngad weliyed rogon ni be tamilangnag e Bible nib puluw e re n’ey.

⁵ Fare fanathin ni murung’agen fare tapigpig nib yul’yul’ e bang ko fare yiiy rok Jesus ni murung’agen e ‘ngiyal’ ni bay nge ngiyal’ ni ke chugur nga tomuren e re m’ag ney.’ (Matt. 24:3) Gin nsom’on ko re yiiy ney ni bay ko Matthew 24:4-22 e l’agruw e kanawo’ ni ke lebug riy​—som’on e nap’an e pi duw ni tabab ko 33 C.E. nge mada’ ko 70 C.E., ma bin l’agruw e ra lebug ko ngiyal’ ney ni gad bay riy. Ere gur, re n’ey e be yip’ fan ni fapi thin ni yog Jesus ni murung’agen fare tapigpig nib yul’yul’ e l’agruw e kanawo’ nra lebug riy? Danga’.

⁶ I weliy Jesus boch ban’en nra buch ko ngiyal’ ni gad bay riy ni tabab ko fapi thin ni bay ko Matthew 24:29. (Mu beeg e Matthew 24:30, 42, 44.) Nap’an ni be weliy murung’agen e pi n’en nra buch u nap’an fare gafgow nib ga’ me yog ni bayi guy e girdi’ e “en ni Fak e Girdi’ ni be yib nga but’ u daken e manileng.” Miki yog boch ban’en ni fan ngak e piin ni yad be par ko tin tomuren e rran ni gaar: “Da mu nanged e chirofen ni bay yib e Somol romed riy” nge “En ni Fak e Girdi’ e ra yib u reb e awa ndamur fineyed nra yib riy.”a Tomuren ni weliy Jesus murung’agen e pi n’en nra buch ko tin tomuren e rran me weliy e re fanathin nem ni murung’agen fare tapigpig nib yul’yul’. Ere, ba tamilang ni fapi thin ni yog u murung’agen e re tapigpig nem e tabab ni nge lebug u tomuren ni ke tabab e tin tomuren e rran ko duw ni 1914. Ba puluw e re n’ey. Mang fan?

7. Mang reb e deer nib ga’ fan ni ke sum u nap’an ni tabab ngal’an e mokun woldug, ma mang fan?

⁷ Am lemnag fare deer ni gaar: “Mini’ e en ni ir fare tapigpig nib yul’yul’ ma ba gonop?” Nap’an e bin som’on e chibog ma de t’uf ni ngan fith e re deer ney. Kad weliyed ko fa binem e article nrayog ko pi apostal ni ngar ngongliyed e maang’ang, mu kur pied boch e tow’ath ni nge micheg ni be ayuwegrad Got. (Acts 5:12) Ere, mang nib ga’ fan ni ngan nang ko mini’ e ke tay Kristus ni nge pow’iy e ulung? Nap’an e duw ni 1914 me thil boch ban’en. Aram e re duw ni tabab e mokun woldug. Ke taw nga nap’an ni ngan chuweg e pan u fithik’ e wheat. (Matt. 13:36-43) Ere, nap’an ni tabab e mokun woldug, ma bay reb e deer ni ke sum, ni aram e: Bochan ni ke yoor e piin ni yad ma dake yad e Kristiano ni yad ma yog ni yad boch i gachalpen Jesus, ma uw rogon ni ngan nang ko mini’ e piin ni yad bod e wheat u fithik’rad, ara pi Kristiano ni kan dugliyrad? Bay e fulweg riy ko fare fanathin ni murung’agen fare tapigpig nib yul’yul’. Pi gachalpen Kristus ni kan dugliyrad e yad e piin nra yag e tin nib t’uf ngorad ni fan ko tirok Got ban’en.

MINI’ FARE TAPIGPIG NIB YUL’YUL’ MA BA GONOP?

8. Mang fan nib puluw ni ngan mel’eg fare tapigpig nib yul’yul’ u fithik’ e pi Kristiano ni kan dugliyrad?

⁸ Fare tapigpig nib yul’yul’ e thingar ni mel’eg u fithik’ e pi Kristiano ni kan dugliyrad ni ka yad bay u fayleng. Pi girdi’ ney e yima yog e “pi prist rok e en ni Pilung” ngorad, ma kan mel’egrad ni ngar “wereged murung’agen e n’en nrib fel’ ni ke ngongliy Got, ni ir e [piningrad] u fithik’ e lumor [ngar] bad nga fithik’ e tamilang rok nrib fel’.” (1 Pet. 2:9) Ere, ba puluw ni nge par ni pi girdi’ nem ni yima yog e “pi prist rok e en ni Pilung” ngorad e yad e ngar filed e tin riyul’ ngak e piin taareb e michan’ rorad.​—Mal. 2:7; Rev. 12:17.

9. Gubin e piin ni kan dugliyrad ni ka yad bay u fayleng ma yad bang ko fare tapigpig nib yul’yul’, fa? Mu weliy rogon.

⁹ Ere gur, gubin e piin ni kan dugliyrad ni ka yad bay u fayleng ma yad bang ko fare tapigpig nib yul’yul’? Danga’. Ya bin riyul’ riy e gathi gubin e piin ni kan dugliyrad ma yad be un i pi’ e tin nib t’uf ko pi walag u ga’ngin yang e fayleng ni fan ko tirok Got ban’en. Fapi walag ni kan dugliyrad ni yad bod e wheat e bay boch i yad ni ministerial servant ara piilal u lan e ulung. Maku yad ma un ko machib u mit e tabinaw ma yad ma fil ban’en ko girdi’ u lan e ulung, maku yad ma fol ko pi yaram ni ma yib ko pi tochuch rodad. Machane, darur uned i pi’ e tin nib t’uf ko fare ulung i walag u ga’ngin yang e fayleng ni fan ko tirok Got ban’en. Maku reb, e bay boch e walag nib pin ni ku yad boch e Kristiano ni kan dugliyrad, ma pi walag ney e darur guyed rogon ni ngar filed ban’en ko girdi’ u lan e ulung ni bod rogon ni ma rin’ e pi walag ni pumoon.​—1 Kor. 11:3; 14:34.

10. Mini’ fare tapigpig nib yul’yul’ ma ba gonop?

¹⁰ Ere, mini’ fare tapigpig nib yul’yul’ ma ba gonop? Re tapigpig nem e ba ulung nib achig ni gubin e walag riy ma yad ba muun ko piin ni kan dugliyrad ni yad e yad ma ngongliy rogon ma yad ma pi’ e tin nib t’uf ko tirok Got ban’en u nap’an e ngiyal’ ni bay Kristus riy. Ma n’en ni yad ma rin’ e bod rogon e n’en ni rin’ Jesus ni aram e fanay in e girdi’ ni ngar duruw’iyed bokum e girdi’. Nap’an ni tabab e tin tomuren e rran, ma pi walag ni kan dugliyrad ni yad bang ko fare tapigpig nib yul’yul’ e yad ma pigpig ko pi tochuch rodad i yan. Ma in e duw kafram, me yan i par ni aram fare Governing Body ara fare Ulung ni Ma Pow’iyey ko Pi Mich Rok Jehovah. Machane, ngam tay fanam i yan riy ni taareb e “tapigpig” ni weliy Jesus murung’agen u lan fare fanathin rok. Ere, pi n’en ni ma dugliy fare Ulung ni Ma Pow’iyey e gubin ni yad ma dugliy u taabang.

MINI’ E TIN NI KA BAY E TAPIGPIG?

11, 12. (a) Mang l’agruw ban’en ni kan tay ni nge milfan ko fare tapigpig nib yul’yul’ ma ba gonop? (b) Wuin e tay Jesus fare tapigpig nib yul’yul’ ni nge milfan e tin ni ka bay e tapigpig rok ngak, ma mini’ e mel’eg?

¹¹ Mu tay fanam i yan riy nrogon ni bay ko fare fanathin rok Jesus e l’agruw ban’en ni kan tay ni nge milfan ngak fare tapigpig nib yul’yul’ ma ba gonop. Bin som’on, e tin ni ka bay e tapigpig; ma bin l’agruw, e urngin ban’en rok fare masta. Ere, tomuren e duw ni 1914 ko ngiyal’ ni bay Jesus ni ke pilung e fin yira pag fan e gali n’ey ko fare tapigpig ni bochan ni fare fanathin e ka fini lebug ko ngiyal’ ney ko tin tomuren e rran.

¹² Wuin e tay Jesus fare tapigpig nib yul’yul’ ni nge milfan e tin ni ka bay e tapigpig rok ngak? Ra ngad nanged e fulweg ko re deer ney, ma ba t’uf ni ngad lemnaged e n’en ni buch ko duw ni 1914, ni aram e ngiyal’ ni tabab e mokun woldug. Kad filed faram ni boor ulung e girdi’ e ngiyal’ nem ni u rogned ni yad e Kristiano. Ere, bin ngan e ulung e ra fek Jesus boch e girdi’ riy ni nge dugliyrad ni ngar manged fare tapigpig nib yul’yul’? Ke gagiyel e fulweg ko re deer ney u tomuren nra bow e Chitamangin ni ngar fal’egew i yaliy fare tempel nib fanathin ara rarogon e liyor ni un tay u nap’an e duw ni 1914 nge yan i mada’ nga tabolngin e duw ni 1919.b (Mal. 3:1) Ma aram e ngiyal’ ni kar guyew bochi ulung nib achig nrib t’uf Jehovah nge Thin rok rorad ni ka nog e Piin ni Yad Ma Fil e Bible ngorad. Riyul’ ni bay boch ban’en nib t’uf ni ngar beechnaged u rogon e liyor ni ur ted, machane ke m’agan’rad ngay ni ngar folgad u fithik’ e sobut’an’. (Mal. 3:2-4) Pi Kristiano ni Yad Ma Fil e Bible ni yad ba yul’yul’ e riyul’ ni yad bod e wheat. Ere, nap’an e duw ni 1919, me mel’eg Jesus boch e walag u fithik’rad ni kan dugliyrad ni ngar manged fare tapigpig nib yul’yul’ ma ba gonop ni ir e nge milfan e tin ni ka bay e tapigpig ngorad.

13. Mini’ e ba muun ko tin ni ka bay e tapigpig, ma mang fan?

¹³ Ere mini’ e tin ni ka bay e tapigpig? Yad e piin ni yibe duruw’iyrad ara yibe pi’ e tin nib t’uf rorad ni fan ko tirok Got ban’en. U tabolngin e tin tomuren e rran, ma gubin e tin ni ka bay e tapigpig e yad ba muun ko piin ni kan dugliyrad. Machane, munmun me un fare ulung nib ga’ ngay ara yugu boch e saf. Yooren ko fa “ran’ i saf” ni be pow’iyrad Kristus e yad ba muun nga yugu boch e saf. (John 10:16) Gal ulung ney e ma yib angin ngorow e pi n’en ni ma pi’ fare tapigpig nib yul’yul’ ko ngiyal’ ni ngan pi’ riy ni fan ko tirok Got ban’en. Machane, uw rogon e pi walag ni yad girdien fare Governing Body ara fare Ulung ni Ma Pow’iyey ni aram fare tapigpig nib yul’yul’ ma ba gonop e ngiyal’ ney? Pi walag ney e kub t’uf ni ngan ayuwegrad ko tirok Got ban’en. Ere, yad manang ni faanra tatabagayad maku yad ba muun ko tin ni ka bay e tapigpig ni bod rogon e tin ni ka bay i gachalpen Jesus.

14. (a) Mang e ba milfan ko fare tapigpig nib yul’yul’, ma mang e ba muun ko re n’ey? (b) Mang fonow e pi’ Jesus ngak fare tapigpig nib yul’yul’ ma ba gonop? (Mu guy fare thin ni kenggin e “Faanra Ir Reb e Tapigpig nib Kireb . . . ”)

¹⁴ Rib ga’ fan e maruwel ni ke pi’ Jesus ni nge rin’ fare tapigpig nib yul’yul’ ma ba gonop. Kakrom e faanra ba yul’yul’ reb e tapigpig ma ir e yima tay ni nge milfan urngin ban’en u reb e tabinaw ngak. (Luke 12:42) Ere, ku er rogon e ngiyal’ ney ni fare tapigpig nib yul’yul’ ma ba gonop e ir e ba milfan ngak ni nge ayuweg urngin ban’en u fayleng nib milfan ngak Kristus. Re n’ey e ba muun ngay e salpiy, nge chugum, nge naun, nge fare maruwel ni machib, nge pi n’en ni yima rin’ u nap’an e pi assembly nge convention, nge pi babyor ni yima ngongliy ni bay e thin nu Bible riy ni ir e gad ma wereg u nap’an e machib, maku gad ma fil u nap’an e muulung ngu nap’an ni gad be fil e Bible ni goo gadad. Gubin e pi n’ey ni ma pi’ fare tapigpig nib yul’yul’ ni fan ko tirok Got ban’en e ireray e pi n’en ni ma ayuweg e tin ni ka bay e tapigpig.

WUIN E YIRA TAY NI NGE MILFAN URNGIN BAN’EN ROK FARE MASTA NGAK?

15, 16. Wuin e ra tay Jesus fare tapigpig nib yul’yul’ ni nge milfan urngin ban’en rok ngak?

¹⁵ Wuin e ra tay Jesus fare tapigpig ni nge milfan “urngin ban’en rok ngak”? I yog Jesus ni gaar: “Rib ga’ ba felfelan’ nra tay e re tapigpig nem ni faanra sul e masta rok nga tabinaw me pirieg ni ereray e n’en ni be rin’! Nggog ngomed nrib mudugil nra tay fare masta fare tapigpig ni ir e nge mil fan urngin ban’en rok ngak.” (Matt. 24:46, 47) Mu tay fanam i yan riy ni fin ra tay Jesus ni nge milfan urngin ban’en rok ngak fare tapigpig u tomuren nra sul me guy ni “ereray e n’en ni be rin’,” ni aram e be pi’ e tin nib t’uf ko tin ni ka bay e tapigpig ni fan ko tirok Got ban’en. Ere, bay ba ngiyal’ nra yib nga thilin e gali n’ey ni yira tay ni nge milfan ko fare tapigpig. Ra ngad nanged rogon nge ngiyal’ nra tay Jesus ni nge milfan urngin ban’en rok ngak fare tapigpig, ma bay l’agruw ban’en nib t’uf ni ngad nanged, ni aram e: ngiyal’ nra sul nge urngin ban’en rok nra tay ni nge milfan ko fare tapigpig.

¹⁶ Mingiyal’ e ra sul Jesus riy? Gad ra pirieg e fulweg ko re deer ney ko tin ni ka bay e verse nga tabolngin e Matthew ko guruy ni 24. Dab mu pagtalin nnap’an ni yira weliy murung’agen e ngiyal’ nra “yib” ara ngiyal’ nra sul Jesus riy, ma yibe weliy murung’agen e ngiyal’ nra yib ni nge thang e piin ni yad ba kireb u tungun e re m’ag nib kireb ney.c (Matt. 24:30, 42, 44) Ere, ngiyal’ nra “yib” ara ngiyal’ nra “sul” Jesus riy ni kan weliy murung’agen ko fare fanathin ko fare tapigpig nib yul’yul’ e aram e nap’an fare gafgow nib ga’.

17. Mang e ba muun nga urngin ban’en rok Jesus?

¹⁷ Mang e ba muun nga “urngin ban’en rok [Jesus]”? Fare bugithin ni “urngin,” e gathi kemus ni be yip’ fan e tin ni bay u fayleng ban’en. Ya kub muun ngay e tin ni bay u tharmiy. I yog Jesus ni gaar: “Kan pag fan urngin ban’en ngog u tharmiy ngu but’.” (Matt. 28:18; Efe. 1:20-23) Ere, urngin ban’en rok e ba muun ngay Gil’ilungun fare Messiah ni kan pag fan ngak ni ke nap’an e duw ni 1914 ni ir e yad ra gagiyegnag pi gachalpen ni kan dugliyrad.​—Rev. 11:15.

18. Mang fan nra felfelan’ Jesus ni nge tay fare tapigpig ni nge milfan urngin ban’en rok ngak?

¹⁸ Ere, mang e rayog ni nga dogned? Nap’an nra yib Jesus ni nge pufthinnag e girdi’ u nap’an fare gafgow nib ga’, ma ra pirieg fare tapigpig nib yul’yul’ ni be pi’ e tin nib t’uf ko tin ni ka bay e tapigpig ni fan ko tirok Got ban’en. Ma aram e ra m’agan’ ngay ni nge tay fare tapigpig ni nge milfan urngin ban’en rok ngak. Piin ni yad ba muun ko fare tapigpig nib yul’yul’ e yira tay ni nge milfan e re maruwel ney ngorad u nap’an ni yad ra yan nga tharmiy ni ngar uned ngak Kristus ko gagiyeg.

19. Kab fel’ e tow’ath nra yag ko fare tapigpig nib yul’yul’ u tharmiy ko tin ni ka bay i girdien fachi ulung, fa? Mu weliy rogon.

¹⁹ Ere gur, kab fel’ e tow’ath nra yag ko fare tapigpig nib yul’yul’ u tharmiy ko tin ni ka bay i girdien fachi ulung? Danga’, ya rayog ni ngan micheg ni ngan pi’ reb e tow’ath nga bochi ulung nib achig, machane ku rayog ni ngkur pied boch ko tin ni ka bay e girdi’. Am lemnag e n’en ni yog Jesus ko fa 11 i apostal ni yad ba yul’yul’ ko fare nep’ u m’on ni nge yim’. (Mu beeg e Luke 22:28-30.) I micheg Jesus ngorad nra tow’athnagrad ni bochan e kar pared ni yad ba yul’yul’. I yog ngorad ni yad ra un ngak ngar manged boch e pilung u tharmiy. Machane boch e duw nga tomuren, me yog ni urngin fare 144,000 e girdi’ ni kan dugliyrad e yad ra un ngak ngar manged boch e pilung u tharmiy. (Rev. 1:1; 3:21) Ere ku bod rogon fare thin ni bay ko Matthew 24:47. Ke micheg ni bochi ulung nib achig e ra mang fare tapigpig nib yul’yul’ ma ir e ra tay ni nge milfan urngin ban’en rok ngak. Machane, bin riyul’ riy e urngin i girdien fare 144,000 e yad ra un i gagiyegnag e pi n’en ni kan pag fan ngak Jesus u tharmiy.​—Rev. 20:4, 6.

20. Mang fan ni mel’eg Jesus fare tapigpig nib yul’yul’, ma mang e kam dugliy ni ngam rin’?

²⁰ Boor e girdi’ ni be pi’ Jesus e tin nib t’uf rorad ni fan ko tirok Got ban’en u daken fare tapigpig nib yul’yul’ ma ba gonop ni bod rogon e n’en ni rin’ ko bin som’on e chibog ni aram e fanay in e girdi’ ni ngar duruw’iyed bokum e girdi’. Ke mel’eg Jesus e re tapigpig nib yul’yul’ nem ni nge ayuweg pi gachalpen ndemtrug ko yad e piin ni kan dugliyrad ara yugu boch e saf ma nge pi’ e tin nib t’uf rorad ni fan ko tirok Got ban’en ko ngiyal’ ni ngan pi’ riy u nap’an e tin tomuren e rran. Ere, ngad daged nib ga’ fan u wan’dad e ayuw ni ma pi’ pi walagdad ni kan dugliyrad ni yad bang ko fare tapigpig nib yul’yul’ ma ba gonop ni aram e ngaud folgad rorad.​—Heb. 13:7, 17.