Kam Fl’eg Rogom ko Ba Magawon ko Yafang?
1. Mang ni ba ga’ fan ni ngad fl’eged rogodad ko pi magawon ko yafang?
1 U gubin e duw, ma bokum i million e girdi’ u fayleng i yan nib muun e pi walagdad ngay, e kar gafgowgad ko durru’, yoko’, tornado, nge rran ni ke tharey e but’. Bochan e pi magawon nem e ma m’ug nib papey ma rayog ni nge buch ko binaw rodad, ma ba gonop ni ngad fl’eged rogodad ko pi magawon ko yafang.—Prov. 21:5.
2. Mang fan e susun ni ngad tamilangnaged e telefon namba nge address rodad ngak e piin ni piilal?
2 U M’on ni M’ug: Yu ngiyal’ ma ra pi’ e am e ginang ngak e girdi’ u murung’agen ba magawon nra yib i m’ug. Ri ba ga’ fan ni ngan tiyan’uy ngay. (Prov. 22:3) Ngiyal’ nem ma ra dengwanag e piin ni piilal urngin e girdi’ ko ulung rorad ni fan ni ngar fl’eged rogorad ngay. Maku u tomren e magawon, ma ra dengwanag e piin ni piilal urngin e girdi’ nib m’ag ko ulung rorad biyay ni fan ni nge tamilang u wan’rad ni ke fel’ rogorad riy ma faanra ba t’uf boch e ayuw rorad. Rayog ni nge adbey e tayim rok e piin ni piilal ni faanra dariy e telefon namba nib mat’aw rok e girdi’. Ere mmanigil ni nge pi’ e pi publisher e telefon namba nge address rorad ngak fa en ni secretary nge piilal ni ma conductnag e muulung ni fol babyor ni yad ma un ngay.
3. Uw rogon ni ngad folgad rok e piin ni piilal nfaanra gad be par u lan e binaw ni ba ga’ ni bay e magawon ko yafang?
3 Faanra ba ga’ ni ma yib i m’ug e magawon ko yafang, ma ra ning e piin ni piilal rok e pi publisher e ngochol nge telefon namba ko girdi’ rorad ara tafager rorad nder ma par u lan e binaw ni fan ni ngar dengwanaged nfaanra bay e magawon. Aram rogon nrayog rok e piin ni piilal ni ngar pirieged e pi publisher nfaanra kan chuwegrad ko binaw rorad. Maku ba puluw ni nge fl’eg e piin ni piilal ba yaram ni fan ko ulung, ni ba muun ngay e babyor ni checklist ni bay e emergency supplies riy, nge rogon nra chuw e girdi’ ko binaw rorad, nge rogon ni ngan ayuweg e girdi’ nib mugutgut mab m’ar. Ri ba ga’ fan ni ngan fol ko re yaram ney.—Heb. 13:17.
4. Mang e susun ni ngad rin’ed nfaanra yib e magawon ko binaw rodad?
4 Tomren e Magawon: Mang e susun ni ngad rin’ed nfaanra m’ug e magawon ko yafang u lan e binaw rodad? Mu ayuweg e tin nib t’uf ko giridien e tabinaw rom. Faan rayog rom, mu ayuweg yugu girdi’. Mu guy rogon ni ngam dengwanag e piilal ni ma conductnag e muulung ni fol babyor rom ara yugu reb e piilal ko ngiyal’ nrayog rom. Susun ni ngam rin’ ni yugu aram rogon ni ke fel’ rogom ma de t’uf e ayuw rom. Faanra ba t’uf e ayuw rom, ma rayog ni nge tamilang u wan’um ni be athamgil e pi walag rom ni ngar ayuweged gur. (1 Kor. 13:4, 7) Dab mu pag talin ni manang Jehovah salpem; mu pagan’um ngak ni nge ayuwegem. (Ps. 37:39; 62:8) Mu guy rogon ni ngam ayuweg e girdi’ ko tirok Got ban’en nge tin nib emotional. (2 Kor. 1:3, 4) Nga mu sul ko urngin e muulung nge machib nib papey.—Matt. 6:33.
5. Uw rogon e pi magawon ko yafang u wan’dad?
5 Yugu aram rogon ni be gafgow e fayleng ko magawon ko yafang, machane rayog ni ngad sapgad nga m’on nge par lanin’dad nib puluw. Dabi n’uw nap’an ma bayi chuw urngin e magawon ko yafang. (Rev. 21:4) Machane nge mada’ ko ngiyal’ nem, gad ra fl’eg rogodad ko ngiyal’ nra yib i m’ug e pi magawon nem ma gad ra athamgil ni nguuda wereged fare thin nib fel’ ngak yugu girdi’.