T’ufeg—Aram e N’en nra Yibnag Angin e Machib
1 “Mired ngog, . . . mu gu pi’ e toffan ngomed.” (Matt. 11:28) Pi thin nem e be dag ni kari t’ufeg Jesus e girdi’. Gadad e pi Kristiano me ere gad ba adag ni ngad folgad rok Jesus ma ngad t’ufeged e girdi’ ni ke aw parowrad ni bochan e fayleng ni dariy e t’ufeg. Uw rogon nrayog ni ngad rin’ed e re n’em u nap’an ni gad ma wereg fare thin nib fel’?
2 Thin Rodad: Bochan ni i t’ufeg Jesus e girdi’ ma ke guy rogon ni nge wereg fare thin nib fel’ u gubin ngiyal’. (John 4:7-14) T’ufeg e ra ayuwegdad dab da telgad ni ngad machibnaged e girdi’ u fithik’ e sabethin. Reb e buliyel ni nel’ e duw rok e ke par u charen reb e ppin u aspital, ma ke weliy e machib ngak. Mang e ke n’igin nge rin’? Ke weliy ni gaar: “Be m’ug riy ni ba t’uf ni nge nang fare ppin u murung’agen Jehovah.”
3 Rayog ni ngad daged ni ba t’uf e girdi’ rodad ya gad ra siminmin ma gad ra non nib fel’ munguy lamdad. Ngan motoyil ko girdi’ ma ngan lemnag e n’en ni ke magafan’rad ngay ma ngan tiyan’ ngorad ma aram rogon ni ngan dag e t’ufeg. (Prov. 15:23) Gad ra folwok rok Jesus ma susun ni ngad tamilangnaged e thin nib fel’ ko Gil’ilungun Got nge rogon nib t’uf e girdi’ rok Jehovah.—Matt. 24:14; Luke 4:18.
4 Ngongol: I lemnag Jesus e tin nib t’uf ko girdi’ uw rogon nib m’ag ngorad. (Matt. 15:32) Ku rayog ni ngad rin’ed boch ban’en nib gol u nap’an ni gad be un ko machib. Bay reb e walag ni ppin ni ke guy reb e ppin ni be magawon ya de nang fan e n’en ni be yog be’ ko telefon. Fare walag ni ppin e ke pi’ e ayuw ya ke piliyeg e thin rok fa en ni be telefon. Re ayuw ney u fithik’ e t’ufeg e ke bing e kanawo’ ni ngan weliy e thin ko Bible ma aram me adag fare ppin ni nge fil e Bible. Maku bay reb e walag ni pumoon ni ke sul ngak be’ ma ke chalban e cha’ nem ya ke mit e chiya’ u langan e mab. Ma ke pi’ fare walag e ayuw nge mu’ ma ke par ko re chiya’ nem me tababnag e Bible study ko cha’ nem.
5 Nap’an ni gad ma un ko machib ma gad be dag e t’ufeg ko Got nge piin ni migid ngodad. (Matt. 22:36-40) T’ufeg ni m’ug ko thin nge ngongol e ma ayuweg e girdi’ nge tamilang u wan’rad ni ereray e thin nriyul’.