Um Changarnag Felngin Urngin E Girdi’

“Umu lemnigeg, A Got rog, ko tin ffel’.”​—NEHEMIAH 13:31, NW.

1. Uw rogon ni ma rin’ Jehovah e tin nib fel’ ngak urngin e girdi’?

TOMUREN boor e rran ni ba limolang, ma raen e yal’ e ra yibnag reb e n’en nib thil. Ma fel’ laniyan’ e girdi’, me par e girdi’ ni kar falfalan’gad. Maku aram rogon, ni ku ra mat e yal’ nib gel ma ba n’uw nap’an nge tafengfeng, ma ra aw bochi yang i n’uw​—ara taanwuth—​ma ra baud laniyan’uy min pogofan. Ani Sunmiydad nib tarunguyey, ni Jehovah, e ke fal’eg rogon ke ta’ nga fithik’ i nifengin e fayleng e biney e taw’ath ko yafang ni rib fel’. Jesus e fal owchey nga feni gol Got ko ngiyal’ ni i fil ban’en ni gaar: “Nge t’uf romed e pi toogor romed, mpied e meybil rok e piin ni yad be ngongliy e kireb ngomed, ya nge yog ni mmanged pi fak e Chitamangimed ni bay u tharmiy. Ya be mateg ramaen e yal’ rok nga daken e girdi’ nib tagan nge girdi’ nib fel’ ntaareb rogon, ma be pi’ e n’uw ngak e piin ni yad be rin’ e tin nib mat’aw nge piin ni yad be rin’ e tin nib kireb.” (Matthew 5:43-45) Arrogon, Jehovah e ma rin’ e tin nib fel’ ngak urngin e girdi’. Pi tapigpig rok e thingara athamgilgad ni ngaur folwokgad rok ni aram e ngaur yaliyed felngin u boch e girdi’.

2. (a) U daken e mang e ma rin Jehovah e tin nib fel’ riy? (b) Mang e n’en ni ma yaliy Jehovah ko pi n’en ni gadad ma rin’ ni fan ni ma dag ngodad feni gol?

² U daken e mang e be rin’ Jehovah e tin nib fel’ riy? Ka nap’an ni denen Adam, ma dawori pag Jehovah i sap nga felngin e girdi’. (Psalm 130:3, 4) N’en nib m’agan’ ngay e nge fulweg biyay e girdi’ ni ma fol ko yafas u Paradis. (Efesus 1:9, 10) Ma t’ufeg rok nib gel e ke pi’ ngodad fare athap ni bay ni chuwegdad ko denen ma dab kud pired ni daanda flontgad ni bochan fare owchen ni micheg. (Genesis 3:15; Roma 5:12, 15) Bochan nni fanay fare biyul ma aram e ke bung rogon kanawoen ni bay ni sul i yan ngan flont. Jehovah e chiney e reb n’en ni be yaliy u fithik’ urngin ban’en ni gadad be rin’ ni be’ nge be’ e aram e n’en gad be rin’ ni bochan ni ma dag ngodad nib gol. (1 John 3:16) Be guy urngin e pi n’en ni gadad be rin’ ni ngad daged rogon nib fel’ u wan’dad feni manigil. “Got e gathi de mat’aw ni nge pagtalin e maruwel romed nge t’ufeg ni gimed be dag ni bochan fithingan,” rogon ni yoloy apostal Paul.​—Hebrews 6:10, NW.

3. Mang deer e ba t’uf ni ngauda lemniged?

³ Ere, uw rogon, ni gadad ra folwok rok Jehovah ni nga uda sapgad nga felngin boch e girdi’? Ngada lemnaged boch e fulweg ko re deer ney u aningeg ban’en ko yafas: (1) pigpig ko Kristiano, (2) tabinaw, (3) ulung, nge (4) rogon e tha’ u thildad nge boch e girdi’.

Fithik’ e Machib nge Ngan Pingeg e Girdi’ Ngar Manged Gachalpen

4. Uw rogon ma ra un wereg e machib ko Kristiano ma be dag ni yibe changarnag e tin nib fel’ rok boch e girdi’?

⁴ “Fare gi milay’ e aram fare fayleng,” i fal’eg Jesus i weliy ni fulweg ngak pi gachalpen ni yad be gay murung’agen fan fare fanathin ni awochngin e woldug nge pan. Bod rogon pi gachalpen Kristus ko tiney e rran, gadad be dag ni kada nanged e re thin ni riyul’ ney ko ngiyal’ ni gadad be machib riy. (Matthew 13:36-38; 28:19, 20) Maruwel ni gad be tay e ba muun ngay ni gadad be weliy ko girdi’ gubin e michan’ rodad. Fare n’en ni rriyul’ ni Pi Mich rok Jehovah e goo kan nangrad ko machib ni yad ma tay u mit e tabinaw ngo kanawo’ i yan e be micheg ni gad be maruwel nib gel ni gadad be gaweg e piin ni ba’ rogorad ni ngar nanged murung’agen fare Gil’ilungun. Riyul’, i yog Jesus rogon ni gaar: “Demtrug e mach ara binaw nim marod nga lan, mi gimed gay ko mini’ e ani bay nib adag ni nge nang.”​—Matthew 10:11; Acts 17:17; 20:20, NW.

5, 6. Mang fan ni gadad ma ulul ko sulsul ngak e girdi’ u tabinaw rorad?

⁵ Faan gad ra yan da guyed be’ ni dad madilgad, ma gad fal’eg i yaliyrad ko uw rogon e thin rodad u wan’rad. Yu ngiyal’ ma gad ma pirieg taa be’ ko fare tabinaw ni be motoyil ngodad, me non yugu be’ ni gaar, “Gamad e dabumad,” me mus fare numon u rom. Uw feni ri ma kireban’dad ni taabe’ e togopuluw ara dabun me non nge magawonnag e n’en nge rin’ be’! Ere mang e n’en, ni rayog ni ngad rin’ed, nga kuuda ululgad i maruweliy nib gel ni nga uda yaliyed felngin e girdi’?

⁶ Bin migid e wub rodad ko fare tabinaw ko ngiyal’ ni gad be machib ko gin’enem e rayog ni nge pi’ ngodad e tayim ni nge yog ni ngad nonod ngak faanem ni taleg ni de yog ni non ko fayanem ndabad. Gadad manang ko mang e buch fayanem ma aram e rayog ni nge ayuwegdad ngad fal’eged rogodad. Facha’ ni togopuluw e sana ba fel’ fan u wan’ e n’en ni ke rin’, be mich u wan’ ni thingari taleg facha’ ni motoyil nga murung’agen fare Gil’ilungun. Rogon e pi n’en ni be lemnag e sana ke k’aring e pi n’en ni ke rung’ag ni de riyul’ u murung’agen e n’en ni gad be lemnag ni ngada rin’ed. Machane re n’em e dabi talegdad ni nga kud ululiyed i machibnag fare thin nib fel’ ni murung’agen fare Gil’ilungun ko re tabinaw nem, ni gadad be rin’ e ti nib fel’ ni gad be guy rogon ni nge yal’uw e ti ni danir nang fan. Gadad baadag ni ngada ayuweged urngin e girdi’ ni nge tamilangan’rad u murung’agen Got. Ma aram e sana ra chugurnag Jehovah e cha’ nem ngak.​—John 6:44; 1 Timothy 2:4.

7. Mang e rayog ni nge ayuwegdad nge fel’ rogon ni ngad nonad ngak e girdi’?

⁷ Pi n’en i yog Jesus ngak pi gachalpen e ba muun ngay e togopuluw u tabinaw. Gathi faani yog ni gaar: “Ka gub ni nga gu kieg e girdi’, be’ nib pumoon e bay i togopuluw ko chitamangin, ma fak nib ppin e bayi togopuluw ngak e chitiningin, ma be’ ni leengiy ni kab rugod e bay i togopuluw ngak e chitiningin figirngin”? Miki puthuy Jesus ngay ni gaar: “Pi toogor rok be’ e ra yan i aw ni girdi’ nu lan e tabinaw rok.” (Matthew 10:35, 36, NW) Machane, ma thil e lem nge rarogoy. Ba m’ar nib tomgin, fa kem’ be’ rodad, fa reb e magawon nib gel e magothgoth riy, ara kireban’ nib gel, nge ku boor ban’en ni dabiyog i theeg ni ma k’aring e girdi’ u rogon e n’en ngaur rin’ed ngodad ko machib ni gadad be ta’. Faan gad ra lemnag​—ni pi girdi’ nem ni gad be machibnagrad e bay ur pired ni aram rogon ni dabra motoyilgad—​me ere riyul’ ni gad be changar nga felngirad? Mang fan ni dab mu falan’ ngay ni nge ba ngiyal’ mu kum man nga taferad ngam guyrad? Ra buch ni gad ra pirieg ni kar thilgad. Yu ngiyal’ ma gathi kemus ni n’en ni gad be yog ya rogon ni gad be yog e ra thiliyeg rogorad nge fel’ boch. Meybil nib gel ngak Jehovah u m’on ni ngad tababgad ko machib e rib mudugil ni ra ayuwegdad ngada rin’ed nib fel’ ma gadad weliy murung’agen fare Gil’ilungun me m’aguwan’ urngin e girdi’.​—Kolose 4:6; 1 Thessalonika 5:17.

8. Mang angin ni ra yib u nap’an nra i changar e piin Kristiano nga felngin pi be’ rorad ni dawori michan’rad?

⁸ Boor e girdi’ ni yad taab tabinaw ni yad ma pigpig ku Jehovah u lan boch e ulung. Baga’ ni n’en ma k’aring e piin ni bitir ngar adaged mi yad ta fan e rogon e tayan’ ni ma tay reb i pi be’ rorad nib ilal ma ba fel’ e tha’ u thilrad chon e tabinaw rok nge rogon e mabgol rok e ma fl’eg kanawoen ni nge thil e lem rok e piin ni ki yad bbitir. Fonow rok apostal Peter ni kan tiyan’uy ngay e ke ayuweg boor i pi leengiy ni Kristiano nge yog ni un pi figirngiyrad ngorad ni “daan roged bbugithin ngorad.”​—1 Peter 3:1, 2.

U Lan e Tabinaw

9, 10. Uw rogon ni chag Jakob nge Joseph ngaur changargad nga felngin e girdi’ u tabinaw rorow?

⁹ Fare m’ag ni ma chugurnag chon e tabinaw nga taabang e ku aram bayang ni ku rayog ni ngada guyed felngin boch e girdi’ riy. Mu lemnag reb e skul ni yib rok Jakob u rogon e n’en i rin’ ngak pi fak ni pumoon. U Genesis ko guruy 37, ko verse 3 nge 4, e fare Bible e be dag ni Jakob e rib t’uf Joseph rok. Ma aram me awan’ pi walagen ngak, nge ni taw ko gin baaram ni ur ta’red liben ni ngar li’ed walagrad ni pumoon nge yim’. Machane, a mu guy rogon ngongolen Jakob nge Joseph boch nga tomur ko yafas rorow. Yow l’agruw ni ur changargow nga felngin e girdi’ u lan e tabinaw rorow.

¹⁰ Nap’an ni ke mang Joseph pilungen e ggan u nap’an ni aw e uyungol nga Egypt, me pag pi walagen ngar bad nib felan’ ngay. Aram rogon ni de yog ir ngorad ni papey ko ir mini’, me gagiyegnag e pi n’en ni ngan rin’ ni nge mudugil ni kan ayuwegrad nib fel’ rogon ma bay e ggan ni ngar feked ngar sulod ko chitamangirad ni ke pillibthir. Arrogon, dariyfan ni ir e cha’ ni yad ba fanenikan, ya ri maruweliy Joseph ni nge yog e tin nib t’uf rorad. (Genesis 41:53–42:8; 45:23) Ku arrogon, ni be n’en ni ngem’ Jakob u bet rok me thum’ nge yiiynag e taw’ath nga daken pi fak ni pumoon ni urngin. Yugu aram rogon ni angin ngongolrad nib kireb mini chuweg boch e tawaath rorad, ma dariy bagayad nni digey ni dan pi’ bayang e binaw ngak. (Genesis 49:3-28) Uw feni fel’ rogon ni dag Jakob e binem e t’ufeg ni dabi m’ay!

11, 12. (a) Mang thin ni kan yiinag e be dag ban’en u feni ga’ fan ni ngaun changar nga felngin e girdi’ u lan e tabinaw? (b) Mang e n’en ni kad filed ko n’en ni i rin’ fare matam ko fare fanathin ni yog Jesus u murung’agen fak ni pumoon nib ta adbey ban’en?

¹¹ Guman’ rok Jehovah ko ngongol rok ngak e pi nam nu Israel ni dariy e michan’ rorad e ke pi’ boch e tamilangan’ u rogon ni be changar nga felngin e girdi’ rok. Jehovah e fanay rarogon e tabinaw rok fare profet ni Hosea, ni nge fanathinnag rogon e t’ufeg rok u fithik’ e guman’. Gomer, ni leengin Hosea, e yigi i sul nga i ngongliy e ngongol ko darngal. Yugu aram rogon, me Jehovah e yog ku Hosea e n’en ni nge rin’ ni gaar: “Mman biyay, ngam t’ufeg e re pin ni ke adag be’ ma be ngongliy e darngal, ni bod rogon e t’ufeg rok Jehovah ngak pi fak yu Israel ko ngiyal’ ni yad be chel ngak yugu boch e got ma yad baadag e raisin cake.” (Hosea 3:1, NW) Mang fan ni aram rogon e pi n’en ni ka nog? Manang Jehovah u fithik’ fare nam ni kar sorgad nga bayang ko pi kanawo’ rok, ma ka bay e girdi’ riy ni ki yad ra adag e gum’an rok. Me tamilangnag Hosea ni gaar: “Ra tomur riy ma pi fak yu Israel e yad ra sul ma ba mudugil ni yad ra changarnag Jehovah ni Got rorad, nge David ni pilung rorad; ma rib mudugil ni yad ra yib ni yad be t’on ngak Jehovah nge nga felngin ko tin tomuren e rran.” (Hosea 3:5, NW) Rriyul’ nib fel’ e biney e n’en ni kan dag ni rayog ni ngan fol riy ko ngiyal’ ni kan pirieg e magawon u tabinaw. Yugu ra uni ulul i changar nga felngin boch i gothon e tabinaw ma reb e kanawo’ nib fel’ ni ra dag e gum’an.

¹² Fare fanathin rok Jesus u murung’agen fare pagel nib ta adbey ban’en ni fak be’ e ku be pi’ boch e tamilang nga rogon ni rayog ni ngauda changargad ko ti nib fel’ nib l’eg rogon ko tabinaw rodad. Fa bin ni wen e pagel ni fak ni sul nga tabinaw u tomuren ni ke digey e bin baaram e par rok ni ta adbey ban’en. Ma n’en ni rin’ fare matam ngak e dag e runguy nib gel. Mang e rin’ fare matam ko gun’gun’ ni tay fa bin nganni’ e pagel ni fak ni dawori pag biid e tabinaw? I non fare matam ngak fa bin nganni’ i fak, nge tamilangnag ni gaar: “Fakag, gubin ngiyal’ ni kuum moy rog, ma urngin ban’en ni fanag e gur e fanam.” Re n’eney e gathi ke yog e thin ni ra amithnag laniyan’ ya kemus ni be micheg e t’ufeg ko matam. “Kemus ni nge fel’ lanin’dad ngaud falfalan’gad,” miki ulul ngay nge gaar, “ya cha’ ni walagem ney e yim’ ma ke fas, ke malog ma kan pirieg.” Ere ku arrogodad ni ku rayog ni ngaud changarniged felngin boch e girdi’.​—Luke 15:11-32.

Lan e Ulung ko Kristiano

13, 14. Mang reb e kanawo’ ni ngan rin’ riy fare pilungen e motochiyel ko t’ufeg u lan e ulung ko Kristiano?

¹³ Gadad e piin ni Kristiano, e gadad be nameg ni nga uda rin’ed pilungen e motochiyel ko t’ufeg. (James 2:1-9) Riyul’, ya sana rayog ni nge ngad adaged boch e girdi’ nge mang gothon e ulung rodad nib thilthil rogon e par rodad. Machane bay e “yu thal i girdi’ nib thilthil” ni fan ko raen, nge yalen, ara teliw ni ur moyed riy fa? Faanra aram rogon, me ere uw rogon ni gad ra fol ko fonow rok James?

¹⁴ Pining e magar ngak e piin ni yad ma un ko pi muulung ko Kristiano e be dag e mich nga fedad gol. Nap’an ni ra yib e piin ni ka fin ra uned nga Kingdom Hall, ma gad yan da nonad ngorad ko som’mon ma rayog ni m’ay e tatamra’ rorad nge kirkireb u fithik’ey. Bin riyul’ riy, e boch e piin ni kar uned ko muulung ko piin Kristiano ko yay ni som’mon e ka ra gaargad: “Urngin e girdi’ ni ri yad ba gol. Gowa gubin e girdi’ ma yad manangeg. Gu par ni rib pufpuf rogog.”

15. Uw rogon ni yira ayuweg e piin ni bitir u lan e ulung ni ngar adaged ni nga ur nonad ko piin ni kar ilalgad?

¹⁵ Boch e ulung, e bayi n’en me muulung e piin ni fel’ yangaren nga bang u lan ara wuru’ e Kingdom Hall u tomuren reb e muulung, ni yad be sipil pilo’ ni dabra maathukgad ko piin kar piilalgad. Uw rogon ni manga yira rin’ ban’en nib fel’ ni nge chuw e binem e ngongol? Bin som’mon, e ba mudugil, ni gallabthir e ngara skulnaged pi fakrad u tabinaw, ngar fal’eged rogorad ni fan ko muulung. (Proverbs 22:6) Rayog ni ngan pi’ e maruwel ngorad ni ngara feked e tin nib t’uf e babyor ni ngan fek ko muulung nge urngin e girdi’ ma bay e tin ba t’uf rok ni ngan fek ko muulung. Maku arrogon ni gallabthir e yow e ba th’abi fel’ ni ngar pi’ew e athamgil nga laniyan’ pi fakrow ni ngaur weliyed e piin piilal nge piin yad ba meewar boch murung’agen ban’en u Kingdom Hall. Ra ba’ ban’en nib ga’ fan ni nga nog ko pi cha’ nem ma ra pi’ e felfelan’ ngak e piin bitir.

16, 17. Uw rogon u p’eowchen e piin ni kar ilalgad felngin e piin ni ka yad bbitir u lan e ulung?

¹⁶ Pi walag ni pumoon nge ppin ni yad ba piilal e thingara adaged ni ngaur nanged salpen e piin bbitir u lan e ulung. (Filippi 2:4) Ngara guyed rogon ni ngar nonad ni som’mon ngak e piin bitir ni yad be pi’ e athamgil nga lanin’rad. Baga’ ni bay boch ban’en nib ga’ fan ni ma yib i m’ug u nap’an e muulung. Rayog ni ngan fith e piin ni bitir ko yad baadag fare muulung nge bay ban’en ni ri yad baadag riy ni rayog ni ngan rin’. Bochan ni piin ni bitir nge fel’ yangaren e yad bang nib ga’ fan ko ulung, ma aram e thingar un ta’ fan u rogon ni yad be motoyil nge tin ni yad be rin’ mini pining e magar ngorad ko tin kar roged u nap’an e muulung ara tin kar uned ngay ko pi n’en ni ba’ ko program. Rogon e n’en ma rin’ e bitir ko piilal u lan e ulung nge rogon ni yad ma rin’ e tin nib mom e maruwel u tabinaw e ra dag ni rayog ni ngara rin’ed nib fel’ rogon e tin baga’ boch e maruwel boch nga m’on ko yafas rorad.​—Luke 16:10.

¹⁷ Boch e piin fel’ yangaren, ni yad ma rin’ e maruwel ni yima pi’ ngorad e yad ma mon’og nge ni taw nga bang ni felngirad ko tirok Got ban’en e ke bung rogorad ni ngar rin’ed boch ban’en ni baga’ boch fan. Ra bay ban’en ni ngan rin’ maku rayog ni nge ayuwegey ngan par u orel ko ngongol ko balyang. (2 Timothy 2:22) Pi maruwel nem e rayog ni nge ‘skengnag feni ra m’ag’ rok e pi walag ni pumoon ni yad be guy rogon ni nga ra pigpiggad ni ministerial servants. (1 Timothy 3:10) Feni yad ma par ni kar fal’eged rogorad ni ngar uned ko n’en ni yibe rin’ ko pi muulung nge ferad pasig ko machib, nge ku rogon ni yad ma lemnag urngin e girdi’ u lan e ulung, e ra bungnag rogon e piin ni piilal ngar nanged gelngin ni ra yog rorad ni faan yira lemnagrad nga ku boch e maruwel.

Sap Nga Felngin Urngin e Girdi’

18. Mang wup e bay ko ngan turguy ban’en ni ngan pilo’ riy, ma mang fan?

¹⁸ “Ngaun dag e laniyan’ u rogon ni yibe turguy ban’en e de fel’,” ara’ rogon ni tamilangnag e Proverbs 24:23, NW. Gonop nu tharmiy e ba t’uf riy ni piin ni piilal e nga i pilo’ ko laniyan’ ko ngiyal’ ni yibe turguy boch ban’en u lan e ulung. I tamilangnag James ni gaar: “Machane bin som’mon e fare gonop ni yib u tharmiy e mmachalbog; maku er rogon ni ma fal’eg thiliy nge aw e gapas riy, ma ma sumunguynigey, ma ma fal’eg owchey nge thin ngak e girdi’, ma ba sug ko runguy ma ma k’uf ni ngongol nib fel’; ma ma taareb rogonnag e girdi’ u wan’uy ma der ma dake modingnigey.” (James 3:17) Ba tamilang ni nap’an ni yibe sap ko tin nib fel’ u felngin boch e girdi’, ma piin piilal e ba t’uf ni ngar micheged ni rogon e lem rorad e der laniyan’ ni bochan e tha’ u thiliy ara damumuw fa kireban’ nib gel. I yoloy fare psalmist ni Asaph ni, “Got e ke tay ir nga fithik’ fare muulung ko Piin ni ba Thothup.” “U fithik’ e pi got [“ara piin ni kar boded got,” ni be yip’ fan, e pi tapuf oloboch ni girdi’] ni be pufthinnagrad ni be gaar: ‘Uw n’umngin nap’an ni nga u mu turguyed ban’en ni de mat’aw rogon ma gimed be laniyan’ ngak e piin nib kireb?’” (Psalm 82:1, 2, NW) Rogon nib puluw, e piin ni Kristiano ni yad e piin piilal e ngar paloggad ko n’en ni ra k’aring e laniyan’ ni fan e fapi n’en e ba l’eg rogon ngak be’ ni fager ara ba tabinaw. Ra aray rogon ma ka ra ayuweged e taareban’ ko ulung mar paged e kan ni thothup rok Jehovah nge yan nib puf rogon.​—1 Thessalonika 5:23.

19. Mang boch e kanawo’ ni rayog ni ngad changarnaged riy felngin boch e girdi’?

¹⁹ Ra ud changargad nga felngin pi walagdad ni pumoon nge ppin, ma gadad be dag e ngongol rok Paul u nap’an ni faani non ngak e ulung nu Thessalonika. I gaar: “Maku reb, e ke pagan’mad ngak Somol ni bochemed, ni gimed be rin’ ma bay u mu rin’ed i yan e pi n’en kugogned.” (2 Thessalonika 3:4, NW) Rayog ni nge dabda guyed e kireb rok boch e girdi’ ni faanra uda sapgad nga felngirad. Ngada gayed e pi n’en ni rayog ni nga u dogned felngin ma gad be ta’ fan pi walagdad, ma ba mudugil ni gad ra pilo’ ko thibthibnag be’. “Mang e n’en ni yima changarnag ko stewards,” i yoloy Paul ni, “be’ ni yira pirieg ni ba yul’yul’.” (1 Korinth 4:2, NW) Fare yul’yul’ e gathi kemus ni yigoo piin ni yad ma pigpig u lan e ulung ya urngin pi walagdad ni pumoon nge ppin ma ra k’aring ni ngar t’ufgad rodad. Ma aram ma gadad chuchugur ngorad, me gelnag e m’ag u thilin e fager ni Kristiano. Ngad feked reb e lem ni bod Paul ngak e pi walag u nap’an e tirok e rran. Yad e “piin ni yad nga maruwel ni fan ko fare gil’ilungun Got” nge “ba ayuw ni ma gelnigey” ni fan ngodad. (Kolose 4:11) Ma aram ma gad be dag rarogon Jehovah.

20. Mang taw’ath e ra yib ngak e piin ni yad ma sap nga felngin urngin e girdi’?

²⁰ Rriyul’ ni gadad be sul u daken e meybil rok Nehemiah ni gaar: “Mu lemnigeg, A Got rog, ko tin nib fel’.” (Nehemiah 13:31, NW) Uw feni ri gad ba falfalan’ ni Jehovah e ma sap nga felngin e girdi’! (1 Kings 14:13) Ere ngaud ngongolgad ni ku aram rogon ngak boch e girdi’. Gad ra rin’ ni aram rogon ma ra pi’ ngodad e athap ko biyul nge yafas ni manemus u lan e bin nib biech e fayleng ni kari chugur e chiney.​—Psalm 130:3-8.

Uw Rogon ni Ga Ra Fulweg?

• U daken e mang e ma rin’ Jehovah e tin nib fel’ riy ngak urngin e girdi’

• Uw rogon ni ngad sapgad nga felngin urngin e girdi’

• ko pigpig rodad?

• ngu lan e tabinaw rodad?

• u lan e ulung rodad?

• urngin e tha’ u thildad?

[Picture on page 26]

Dariyfan u wan’ Josef e fanenikan ni tay pi walagen ngak kafram, ya i sap nga felngirad

[Picture on page 27]

Togopuluw e dabi talegdad ni ngaud guyed rogon ni ngad ayuweged urngin e girdi’

[Picture on page 28]

Dariyfan rarogorad kafram, ya dariy reb i fak Jakob ni de pi’ e taw’ath rok

[Picture on page 29]

Mu pining e magar ngak urngin e girdi’ ni karbad ko muulung ko Kristiano