Fare Motochiyel Rok Kristus

“I gag . . . e gu ba’ u tan e motochiyel rok Kristus.”​—1 KORINTH 9:21.

1, 2. (a) Uw rogon nrayog ni ngan siyeg e tin kafram e oloboch ko girdi’? (b) Mang e de fil Kristendom ko chepin Judaism?

“GIRDI’ nge pi am e dawor ra filed ban’en u chepin e tin ni buch kakrom nib riyul’ maku dawor ra rin’ed ban’en nib ga’ fan riy.” Aram rogon ni yog be’ u Chiamen ni ma fil morngaagen ban’en ni ke buch kakrom u nap’an e bin 19 e chibog. Ma riyul’ ni chepin e girdi’ e be m’ug ni “yad be sor iyan nga bang ni gowa be yan e aliliy” ni dabkiyog ni ra taleged yad, ma faan gomanga boch ma kar filed ban’en ko tin ni ke buch kafram ni faanra yad baadag.

² Ku taareb rogon ni kan siyeg ni ngan fil ban’en ko tin kafram e oloboch ma ku er fan ni yibe weliy fare motochiyel rok Got. Ma ke ta’ Jehovah Got reb nga tagil’ ni kab manigil ngay​—ni fare motochiyel rok Kristus. Ma ke mada’ ko chiney ma ku dawori yog ko pi tayugang ko Kristendom ni ngar filed mu ur folgad ko re motochiyel ney ya ku de yog rorad nra filed riy rogon fan ni gel e balyang ko pi Farise. Arrogon ni ke pingeg e Kristendom fan nga bayang e motochiyel rok Kristus yad be kirebnag i fanay ni bod rogon ni i rin’ Judaism ko Motochiyel rok Moses. Ke diin ma ke yodor? Som’on, e ngad weliyed e re motochiyel nem ni go’ ir rok​—Ma ir e mang, me mini’ e i gagiyegnag ma uw rogon, ma mang e ba thil riy ko motochiyel rok Moses. Ma aram e fin nrayog ni da gayed ko uw rogon ni ke kirebnag Kristendom i fanay. Ma fin nrayog ni da nanged rogon chepin kakrom ma ra fel’ rogodad riy!

Fare M’ag nib Biech

3. Mang e ke micheg Jehovah ko fare m’ag nib biech?

³ Go’ Jehovah Got e rayog ni nge fl’eg e motochiyel ni kab fel’ ko motochiyel nib flont fa? Fare M’ag ko Motochiyel Rok Moses e ba flont. (Psalm 19:7) Yugu aram rogon ni ba flont, me micheg Jehovah ni gaar: “Mu sap! Bay yib boch e rran nga m’on . . . ma bay gu yarmiy reb e m’ag nib biech ko naun rok piyu Israel nge naun rok piyu Judah; ni de bod fa bin gu yarmiy u thilmad pi chitamangirad.” Ni fa Ragag i Motochiyel​—u fithik’ e fapi Motochiyel Rok Moses​—ni kan yoloy nga daken fagali yang i malang ye gaar Jehovah: “Bay gu ta’ e motochiyel rog nga lanin’rad mu gu yoloy nga lan gum’ercha’rad.”​—Jeremiah 31:31-34.

4. (a) Bin ngan e Israel e ba l’ag fare m’ag nib biech ngay? (b) Gathi ke mus ni piyu Israel e yad ba m’ag ko fare motochiyel rok Kristus, ere ku mini’ ni yad be l’ag ngay?

⁴ Chon mini’ e yira fekrad ko re m’ag nib biech ney? Dariy e maruwar riy ni gathi bin riyul’ e “naun rok Israel,” faani n’ag fare tamaaf ko fare m’ag nib biech. (Hebrews 9:15) Danga’, ya re “Israel” nib biech ney e ra yan i aw ni fare “Israel rok Got,” ba nam i Isreal ni taareb lanin’rad. (Galatia 6:16; Roma 2:28,29) Chi ulung i Kristiano ney ni yad buchuw ni kan dugliyrad e ra yan ni boch ngaram ma ra chag reb e “ulung ni baga’” ngorad nra yib u gubin e nam ni yad be gay Jehovah ni ngar liyorgad ngak. (Revelation 7:9, 10; Zekariah 8:23) Yugu aram rogon ni ra dawor ra manged bayang ko fare m’ag nib biech, ma ke m’agrad e motochiyel ngay. (Levitikus 24:22; Numbers 15:15) Ra par ni “taab ran’ i saf” ma “ta’ be’ e be pow’iyrad” ma urngin “ni bay u tan e motochiyel rok Kristus,” faani ke yoloy Paul. (John 10:16; 1 Korinth 9:21) Ke yog Paul e re m’ag nib biech ney nib “m’ag nib fel’.” Mang fan? Ya be micheg u daken ta’ ban’en ni ke lebug ni ke fek luwan fare tagalul ni bay yib.​—Hebrews 8:6; 9:11-14.

5. Mang fan fare m’ag nib biech, ma mang fan nra fel’ rogoy riy?

⁵ Ri fan ko mang e re m’ag ney? Ra sum ba nam i pilung riy nge prist nra flaabnag gubin e girdi’. (Exodus 19:6; 1 Peter 2:9; Revelation 5:10) Ya fare Motochiyel ko M’ag rok Moses e dabi sunmiy e re nam ney nge yan i mus rogon ga’ngin, ya bochan ni ke togopuluw fare nam nu Israel ni polo’ ma ke mul e fel’ u pa’rad. (Mu taarebnag ko Roma 11:17-21.) Ere fare m’ag nib biech e bay rogon nra fel’ rogon ya kan chagiy boch e motochiyel ngay nib thilthil. Mang e n’en ni ke thil riy?

Fare Motochiyel nib Mil Fan ko Puf Rogon

6, 7. Uw rogon ni kab baga’ e puf rogon ko motochiyel rok Kristus ko fare Motochiyel rok Moses?

⁶ Fare motochiyel rok Kristus e kan uneg boch ngay ni fan ko puf rogon. (John 8:31, 32) Ku ba sor fan ko “motochiyel rok e piin ba puf rogorad” nge “fare motochiyel nib flont nib mil fan ko puf rogon.” (James 1:25; 2:12) Ba riyul’, ya bay e puf rogon u fithik’ e girdi’ nib taareb. Ma biney e motochiyel e ka ba’ ni ka baga’ e puf rogon riy ko fa bin som’on ni aram fare Motochiyel rok Moses. Ni ba uw rogon?

⁷ Baaray taa ban’en, dariy be’ ni kan gargeleg u tan fare motochiyel rok Kristus. Bin riyul’ riy e der ma yan u rogon e gin ni kan gargeleg be’ riy ara raen downgin. Ya tin nriyul’ e Kristiano e ba puf rogorad ni ngar mel’eged u lanin’rad ngar feked fare mat’ ko fol ko re motochiyel ney. Yad ra rin’ ni aray rogon mi yad pat ko fare mat’ ni aram e gol mab baud. (Matthew 11:28-30) Ma tomren urngin ban’en ma fare motochiyel e be fil ngak e girdi’ ni yad ba sug ko denen ma ri ba t’uf reb e biyul’ ni maligach ni fan ko kireb rok. (Galatia 3:19) Fare motochiyel rok Kristus e be skulnag ni ke yib fare Messiah ni nge pi’ e yafos rok ni maligach, me bing e kanawo’ ngodad nge pithigdad ko togopuluw nge denen nge yam’! (Roma 5:20, 21) Ra nge yib angin ngodad, ma rib t’uf ni nga un maruweliy e tin ke michan’uy ngay ko tin kun ognag.​—John 3:16.

8. Mang ni kub chagil ko fare motochiyel rok Kristus, machane mang fan nde t’uf ni ngan ta’ ngan’uy bokum miriay fapi motochiyel nge yalen?

⁸ Faanra nga “un maruwel ko michan’” ma ba l’ag ngay e fol ko motochiyel rok Kristus. Kub chagil ngay ni nga un fol ko gubin e tin ni ke ta’ chilen. Fan e re n’ey e ngan ta’ ngan’uy bokum miriay fapi motochiyel nge yalen? Danga’. Ya nap’an ni yoloy Moses ni ir e tamaaf u thilin fa bin ni kan nog e Motochiyel rok Moses ngay, me Jesus ni ir e tamaaf u thilin e bin nib biech e m’ag e mus nga taareb e motochiyel ma de yoloy nga but’. Ma i par ni yugu be fol riy. Ma fan e ba flont e yafos rok ma ke ta’ e kanawo’ ni nga ud leked. (1 Peter 2:21) Ma sana arfan ni bpuluw e liyor ko tin som’on e Kristiano ko “Fare Kanawo’.” (Acts 9:2; 19:9, 23; 22:4; 24:22) Ma fare motochiyel rok Kristus e aram rarogon e yafos rok Kristus ngorad. Ra ngan lek Kristus, ma nga un fol ko re motochiyel ney. Ma bochan nib gel e runguy rorad ngak, ma gowa kan yoloy e re motochiyel ney nga lan gum’ercha’rad ni bod ni kan yiiynag. (Jeremiah 31:33; 1 Peter 4:8) Ma piin ni ma fol ni bochan e runguy e dabi i kireban’​—ma reb i fan fare motochiyel rok Kristus e ka nog “fare motochiyel ko girdi’ nib puf rogorad” ngay.

9. Mang e ri baga’ fan ko fare motochiyel rok Kristus, ma uw rogon nib muun ngay e motochiyel nib biech?

⁹ Ere faanra t’ufeg e baga’ fan ko fare Motochiyel rok Moses, me ere kab th’abi riyul’ ko motochiyel rok e Kristiano. Ya fare motochiyel rok Kristus e ba muun ngay fare motochiyel nib biech​—ni bay ko pi Kristiano ni aram fare t’ufeg ni yima pag fay ni fan ngak yugu be’. Yad ma t’ufegey ni bod ni ma rin’ Jesus; ni m’agan’ ngay ni nge pi’ e yafos rok ni fan ko pi tafager rok. (John 13:34, 35; 15:13) Ere rayog nnog ni fare motochiyel rok Kristus e kari tolangnag morngaagen theocracy rok Got nge gelngin ko birok Moses e Motochiyel ni kafram. Kaan weliy morngaagen kafram ni: “Theocracy e Got e be gagiyegnag; Got ni ir e t’ufeg; ma arfan ni theocracy e t’ufeg e be gagiyegnag.”

Jesus nge Pi Farise

10. Uw rogon nib thil e machib rok Jesus ko machib ni tay e pi Farise?

¹⁰ Ba mo’maw’ ni ngan gin ngay ni i maluag thin Jesus nge pi tayugang ko teliw ni Jew u nap’an ni immoy. Ya “fare motochiyel nib mil fan ko puf rogon” e dariy ban’en ni aram rogon nga fan i mal’af u laniyan’ e pi Farise nge pi tamachib ko motochiyel. Yad ma guy rogon ni nguur gagiyegnaged e girdi’ ko tin girdi’ e ke turguy. Machib rorad e kaygi pag rogon ni de mudugil nga bayang. Ma machib rok Jesus e ba togopuluw ko tirorad, ya ma ubingey mab mudugil! Ma ma rin’ e tin ni ma fil ni bochan e ri ma lemnag e girdi’. Ma fanay boch e fanathin nib ga’ ni tin ni yima rin’ u gubin e rran ni nge mom ni ngan nang mat’awun e thin rok Got. Aram fan ni “ri ma ngat e girdi’ ni yoor nga rogon e machib rok.” (Matthew 7:28) Arrogon, ri ma yan i taw e machib rok Jesus nga gum’ercha’rad!

11. Uw rogon ni dag Jesus ni susun ni ngan fanay fare Motochiyel rok Moses u fithik’ e runguy?

¹¹ Ma dag Jesus rogon ni nge fanay piyu Jew fare motochiyel rok Moses nib mom rogon u fithik’ e runguy ni yugu aram rogon nra ngkun puthuy boch ngay. Aygum lemnag faram, nap’an ni yib fare pin ngak ni ke magawon nib molul. Ma rogon ko Motochiyel rok Moses faram e cha’ nra math ngak e ku ra alit, ere susun ndabi maathuk nga fithik’ e yoor! (Levitikus 15:25-27) Machane kari yim’ ni bochan ni manga yigi gol, ma aram me yib ni be wurgiy fithik’ e girdi’ ni nge math ko thal ni wuru’ e mad rok Jesus. Me tal rachaen ni ka chingiyal’ nem. Ke puwan’ ngak ni fan ni ke th’ab e motochiyel fa? Danga’, ya ke nang fan e magawon rok ma ke dag rogon ngak ni ri ka baga’fan fare Motochiyel ko​—t’ufeg. Me dag ngak ko thin ni yog nib fel’ rogon ni gaar: “Fakag, michan’ rom e ke golnagem. Mman u fithik’ e gapas, ni ke chuw e m’ar rom.”​—Mark 5:25-34.

Fare Motochiyel Rok Kristus e Kaygi Puf Rogon ko Girdi’ Fa?

12. (a) Mang fan e susun ndabda lemnaged ni kaygi puf rogon e motochiyel rok Kristus? (b) Mang e be dag nra yoor e kanawo’ ni ngan gay ni ngan siyeg i th’ab e motochiyel nfaan ran fl’eg boor e motochiyel?

¹² Susun ni nge dugil u wan’dad ni kaygi puf rogon e motochiyel rok Kristus ya “rib yal’uw ni ir e ma pithig e girdi’ ko kireb,” ma ba math keru’ ko pi motochiyel ni i yog e pi Farise u lugun’rad mi ayuweg e girdi’ ni ngar pired nib yal’uw boch? Danga’. Ya fare m’ag ko motochiyel ni bay e ngiyal’ ney e be dag nfaanra bay boor e motochiyel ma baga’ ni ra yoor e kanawo’ ni ngan gay ni ngan siyeg i th’ab e motochiyel.a Nap’an Jesus ma fapi motochiyel ni ke ngongliy e pi Farise e ke k’aring e girdi’ ni ngar gayed e kanawo’ ni ngar siyeged ngar th’abed e motochiyel, ya ur maruweliyed e maruwel ni dariy e t’ufeg riy, mi yad dake modingniged yad ni yad ba mat’aw ni fan ni ngar mitheged e kireb rorad.​—Matthew 23:23, 24.

13. Mang fan ni kab fel’ wenegan e motochiyel rok Kristus ko yugu reb e motochiyel ni kan yoloy?

¹³ Machane gathi aram rogon e motochiyel rok Kristus, ya der mon’ognag ni aram rogon. Ba riyul’, faan ran fol ko motochiyel ni bochan e t’ufeg ku Jehovah ma rogon ni ngan fol ngan folwok rok Kristus ma t’ufeg rok me pag fan ni fan ko yugu boch e girdi’ ma ra yan i aw ni wenegan e ngongol ni kab fel’ ko ngongol ni yima ngongliy ni bochan e thingar ni fol ko pi motochiyel. T’ufeg e dabi gay rogon ni nge siyeg i th’ab e motochiyel; ya ra talegey ni dabni rin’ e tin nib kireb nder ma weliy e motochiyel morngaagen. (Mu guy e Matthew 5:27, 28.) Ere, motochiyel rok Kristus e ra mithmithegdad ni ngad rin’ed ban’en ni fan ko yugu girdi’​—ni ngad daged e gol nge t’ufeg ngorad, ma da pininged yad ko tabinaw rodad​—ni aram e n’en ndabiyog ni nge rin’ e pi motochiyel.​—Acts 20:35; 2 Korinth 9:7; Hebrews 13:16.

14. Mang angin ni yib ngak e pi Kristiano ko fa bin som’on e chibog ni bochan e kar folgad ko fare motochiyel rok Kristus?

¹⁴ Bochan e i fol e girdi’ ko fare motochiyel rok Jesus, ma i falfalan’ e ulung rok Kristus kakrom ko runguy ni immoy u fithik’rad, ya ur pired nib puf rogon ko pi motochiyel nib togopuluw ni kagyi tomal ni immoy u tafen e muulung ko ngiyal’ nem. Dabi siy ni ke nang girdien e tin biech e ulung rok Kristus ni kar pired u fithik’ e girdi’ ko “fare motochiyel ni ir e ma chuweg e girdi’ ko kireb”!

15. Mang boch ban’en ni i rin’ Satan ni fan ni nge kirebnag e ngongol ko girdien e ulung rok Kristus?

¹⁵ Machane, ba adag Satan ni nge kirebnag e ngongol ko girdien e ulung rok Kristus ni bod rogon ni i kirebnag e ngongol ko girdien e nam nu Israel. I weliy apostal Paul morngaagen e pi pumoon ni yad bod e wolf ni nga “rogned e tin nde riyul’” ma dar runguyed fare ulung i saf rok Got. (Acts 20:29, 30) I k’adan’ Paul ko girdi’ ko Judaism, ya ur gayed rogon ni ngar yoned lon’ e puf rogoy ko fare motochiyel rok Kristus ko fare Motochiyel rok Moses ni ke kol e girdi’ ni kar manged sib, ni aram e motochiyel ni ke m’ay fan ya yib Jesus i taleg e motochiyel. (Matthew 5:17; Acts 15:1; Roma 10:4) Tomren ni yim e tin tomren e apostal, dariy ban’en ni nge taleg e pi tatogopuluw. Ma aram me yoor e kireb riy.​—2 Thessalonika 2:6, 7.

Kristendom e Ma Alitnag e Motochiyel Rok Kristus

16, 17. (a) Mang boch e kireb ko Kristendom? (b) Uw rogon nri de puluw e pi motochiyel ko fare Galesiya ko Katolic ko pi n’en nib m’ag ko par ko pumoon nge ppin?

¹⁶ Bod rogon ni buch ko Judaism, ke yoor mit e kireb ko Kristendom. Ya ku ke un ko machib ni googsur nge ngongol nde yalen. Ma baga’ nde yib angin nga rogon ni kan ayuweg fare ran’ i saf ko tin nib kireb ni immoy u wuru’ e ulung ya kan kirebnag e tin ni ka bay e liyor nib machalbog ni immoy. Ma i yoor e pi motochiyel nib tomal nde moy u Bible.

¹⁷ Fare Galesiya ko Katolik e th’abi yoor e motochiyel ko galesiya ni ke sunmeg. Pi motochiyel nem e ri de puluw ko pi n’en nib m’ag ko par ko pumoon nge ppin. Be weliy e babyor ni Sexuality and Catholicism, ni ke lek e galesiya e pi machib nu Greece ni kan nog e Stoicism ngay, ni ke par nib togopuluw ko urngin mit e falfalan’. Ke skulnag e galesiya ni ba siin e falfalan’ ko par ko pumoon nge ppin nib muun ngay e tin nib m’ag ko girdi’ ni kar mabgolgow. (Mu taarebnag ko Proverbs 5:18, 19.) Kan weliy ni par ko pumoon nge ppin e ke mus ni fan ni ngan sunmiy ban’en ma gathi ko falfalan’. Ere motochiyel ko galesiya e kan tay chilen ni dab kun rin’ ban’en ni ngan siyeg e diyen ya ri aram e denen nib togopuluw, ma yu ngiyal’ ba t’uf ni ngan kalngan’uy ngay ko in e duw. Maku, kan motochiyelnag ni dabiyog ni nge mabgol e prist ma aram me yoor e magawon ko ngongol nde yalen, nib muun ngay e ngan gafgownag e bitir.​—1 Timothy 4:1-3.

18. Mang wenegan ni yib ko ngiyal’ ni kari yoor e pi motochiyel ko galesiya?

¹⁸ Ngiyal’ ni kari yoor e motochiyel ko galesiya, ma kan yarmiy e pi motochiyel min fl’eg boch e babyor. Pi babyor ney e ke ga’ fan iyan me par ni kab gel ko Bible. (Mu taarebnag ko Matthew 15:3, 9.) Bod Judaism, de pagan’ e Katolicism ko tayol nu fayleng ye lemnag ni bay e riya’ riy. Ma aram me yan i pag rogon e ginang ni bpuluw ko Bible u morngaagen e re n’ey. (Eklesiastes 12:12; Kolose 2:8) Ke weliy Jerome ni reb e tayol e thin ko galesiya ko fa bin aningeg e chibog C.E. ni gaar: “Somol, faanra gu ra fek e pi babyor nu fayleng biyay ara gu ra bieg biyay, ma aram e kug pagem.” Munmun me turguy e galesiya e tin nib fel’ e babyor nge tin nib kireb​—ni mus ko pi n’en ni m’ag ko fayleng. Me ere kan togopuluw ngak Galileo ni reb e girdi’ ni i fil morngaagen lan e lang ko fa bin 17 e chibog ya i yog ni be liyeg e fayleng e yal’. Kan tay ni baga’ lungun e galesiya ko urngin ban’en​—ni mus ko pi deer u morngaagen e pi t’uf u lan e lang​—me ere munmun me kirebnag e michan’uy ko Bible.

19. Uw rogon ni ke gel e galesiya ni nge ngongliy e pi motochiyel ko gin ni ma par e monk riy?

¹⁹ Ke gel e galesiya ni nge ngongliy e pi motochiyel ko gin ni ma par e monk riy, ya kar pired nib dar ko re fayleng ney ni fan ni ngu ur pired ni ngar paged e falfalan’. Baga’ ni ke fol e pi monasteries ko Katolic ko “Fare Motochiyel rok St. Benedict.” I par e abbot (ni aram e thin ni kan tunguy ni fan ko fare thin ni “chitamangiy” nthin nu Aramaic) ni ir e baga’ lungun. (Mu taarebnag ko Matthew 23:9.) Faanra pi’ e gallabthir e tow’ath ngak reb e bitir rok ni monk, ma ra turguy e abbot ko ra fek fare monk ara yugu reb e monk e tow’ath. Gathi ke mus ni kan togopuluw ko thin nib kireb, machane immoy reb e motochiyel ni ke togopuluw ko urngin mit e sabethin nge gosgos, ni ke gaar: “Dariy reb e gachalpen nra yog e pi n’em.”

20. Mang e be dag ni mus ko Protestant e ke gel ni nge ngongliy e pi motochiyel ndariy u Bible?

²⁰ Ke guy e Protestant rogon ni nge yal’uweg e kanawo’ rok e Katolic ni ke pag rogon, ma de n’uw nap’an me ga’ lungun me ngongliy e pi motochiyel nde m’ag ko fare motochiyel rok Kristus. Baaray taa ban’en, kan tunguy e thin ni “fa en ni ma ngongliy e pi motochiyel ni fan ni nge biechnag e Galesiya” ngak John Calvin ni ir be’ ni ke guy rogon ni nge yal’uweg e galesiya. I gagiyegnag e galesiya ko Protestant u Geneva mi ngongliy boor e motochiyel me par e “Piin ni piilal” ni ke tay tanggin ye gaar Calvin ni “ofis rorad, e ra gagiyegnag e yafos rok gubin e girdi’.” (Mu taarebnag ko 2 Korinth 1:24.) Ke gagiyegnag e galesiya e pi hotel me gagiyegnag rogon e sabethin. Immoy e bak’ing ni ba gel ko girdi’ nra togopuluwgad ngay ma rron’ed e tang ara churu’ nib togopuluw.b

Kan Fil Ban’en ko Pi Oloboch rok Kristendom

21. Mang wenegan ni yib ni bochan e Kristendom e ‘ke thum’ nga wuru’ e pi n’en ni ka yoloy nga but’’?

²¹ Uw rogon, pi motochiyel nem e ke ayuweg Kristendom ko kireb, fa? Danga! Ke yoor raba’ Kristendom e ngiyal’ ney ma bay bokum i miriay raba’, ni boch i yad e ma gagiyeg u daken e pi motochiyel ni rib gel ma boch e kaygi puf rogon ma yima pag ni ngan ngongliy e ngongol nib kireb. Demtrug rogon machane yad gubin e ke thum’ nga wuru’ e pi n’en ni kan yoloy nga but’, me pag ni nge gagiyegnag e lem ko girdi’ fare ran’ i saf me magawonnag e motochiyel ni yib rok Got.​—1 Korinth 4:6.

22. Mang fan ndawori thumur Kristendom ko motochiyel rok Kristus?

²² Machane, chepin Kristendom e dawori thumur e motochiyel rok Kristus. Ya dabi pag Jehovah ni nge thang e girdi’ e motochiyel ni yib rok. Kari gel e motochiyel rok Kristus e ngiyal’ ney u fithik’ e tin nriyul’ e Kristiano, ma bay e tow’ath rorad ni ngar folgad riy u gubin e rran. Machane tomren ni kad yaliyed rogon ni ke maruweliy Judaism nge Kristendom e motochiyel ni yib rok Got, ma rayog ni ngad lemnaged, “Uw rogon ni ngad folgad ko fare motochiyel rok Kristus mu taab ngiyal’ ma ngad siyeged e pi wup ni be alitnag e Thin rok Got ko lem nge motochiyel rok e girdi’ nu fayleng? Uw rogon nsusun ni nge suruy fare motochiyel rok Kristus lanin’dad e ngiyal’ ney? Fa bin migid e thin e ra weliy e pi n’en ney.

[Boch e Thin nra Tamilangnag Murung’agen]

◻ Mang e ri baga’ fan ko fare motochiyel rok Kristus?

◻ Uw rogon nib thil e machib rok Jesus ko machib ni tay e pi Farise?

◻ Uw rogon ni fanay Satan e fl’eg motochiyel nib gel ni nge kirebnag Kristendom?

◻ Mang boch angin nib fel’ nra yib ni faan ran fol ko fare motochiyel rok Kristus?

[Deer ni Ngan Pi’ e Fulweg Riy]

[Sasing ko page 12]

I fol Jesus ko fare Motochiyel rok Moses ni i fil munguyan’ ngay