Rayog Ni Ngad Pied Ban’en ku Jehovah
1 Ga manang nrayog rok e girdi’ ni ngar pied ban’en ku Got, fa? Abel, nge Noah, nge Job e ra pied boch e gamanman rorad ku Jehovah. (Gen. 4:4; 8:20; Job 1:5) Riyul’ nde fel’ rogon e En Tasunmiy ko pi maligach nem, ya gad manang ni gubin ban’en ma bay rok. Machane pi maligach nem e ke micheg nrib t’uf Jehovah rok e pi pumoon nib yul’yul’ nem. Ngiyal’ ney e rayog ni ngad fanayed e tayim rodad, nge gelngidad, nge salpiy nge chugum rodad ni fan ngak Jehovah me “mang maligach rodad.”—Heb. 13:15.
2 Tayim: Rib fel’ ni nge ‘tay be’ e tayim’ ni fan ko tin nde ga’ fan ban’en nge fanay ko machib u mit e tabinaw! (Efe. 5:15, 16) Sana rayog ni ngad thiliyeged e schedule rodad ni fan e ngad uned ko pioneer ni ayuw u lan taareb ara in e pul u reb e duw. Maku rayog ni ngad yoornaged e tayim ni gad be tay ni fan ko machib u mit e tabinaw. Faan gad ra yoornag e tayim ni gad ma machib riy u 30 minit u gubin e wik ma ra mun l’agruw e awa ko awa ni gad ma machib riy u reb e pul!
3 Gelngiy: Ra nge yib gelngidad ngad fanayed ko machib mab t’uf ni ngad siyeged e fafel nge maruwel nra k’aring e magar ngodad me taydad ndabkiyog ni ngad pied e tin nth’abi fel’ rodad ngak Jehovah. Kub t’uf ni nge dabi magafan’dad ko tin nra k’aring gum’erchadad nge ‘lumel nga but’,’ me m’ay gelngidad nrayog ni ngad fanayed ko pigpig ku Got. (Prov. 12:25) Yugu aram rogon ni bay ban’en ni be magafan’dad ngay, ma rib fel’ ni ngad paged e tin ni be tomalnagdad nga daken Jehovah!—Ps. 55:22; Fil. 4:6, 7.
4 Salpiy nge Chugum: Rayog ni ngkud pied e salpiy nge chugum rodad ni nge ayuweg e maruwel ko machib. I pi’ Paul e athamgil nga laniyan’ e pi Kristiano ni ngar ‘feked boch u puluwrad ngar tayed nga bayang’ nge yog nra pied ban’en ngak e piin nib t’uf ban’en rorad. (1 Kor. 16:1, 2) Ku arogodad nrayog ni ngad ted boch e salpiy rodad nga bayang ni ngad pied ni ayuw ni fan ko tin nib t’uf ko ulung nge fare maruwel ni yibe rin’ u ga’ngin e fayleng. Rib ga’ fan u wan’ Jehovah e tin ni gad ma pi’ u gum’erchadad, nyugu aram rogon nde yoor.—Luke 21:1-4.
5 Boor ban’en ni ke pi’ Jehovah ngodad. (Jas. 1:17) Gad be dag ni gad be tay fan e tin ni ke pi’ ngodad nfaanra gad be pi’ e tayim rodad, nge gelngidad, nge salpiy nge chugum rodad ni fan ko pigpig rodad ngak. Faan gad ra rin’ ni aram rogon ma ra felan’ Jehovah ngay, “ya Got e ba t’uf rok e en ni ma pi’ ban’en u fithik’ e felfelan’.”—2 Kor. 9:7.