Got E Bin Th’abi Fel’ E Fager Nrayog Ngom

Ga ra mang fager rok Got ma aram e n’en nth’abi fel’ ni ke yog ngom. Got e ra fil rogon ngom ni nga um par ni gab falfalan’ mab pagan’um. Ra chuwegem ko boch ban’en ni ke michan’uy ngay nib kireb nge boch e ngongol ni bay riya’ riy. Ma ra i motoyil ko meybil rom. Ra ayuwegem ni ngam par ni gab falfalan’ mab gapas lanin’um. (Psalm 71:5; 73:28) Ra i ayuwegem u nap’an e magawon rom. (Psalm 18:18) Ma ra ognag ngom e tow’ath ni aram e yafos ni manemus.​—Roma 6:23.

Nap’an ni ga ra chuchugur ku Got ma ga ra chuchugur ko pi fager rok Got. Maku yad ra mang pi fager rom. Ma riyul’ ni yad ra bod pi walagem ni pumoon nge ppin. Yad ra falfalan’ ni ngar filed murung’agen Got ngom mi yad ayuwegem ma ra ur pied e athamgil nga lanin’um.

De taareb rogodad Got. Nap’an ni ga be gay rogon ni ngam mang fager rok Got ma bay ban’en ni rib ga’fan ni thingar mu nang. Fager ngak Got e gathi ba fager nib taareb rogon thilmew. Ya ir e ba th’abi kakrom mab th’abi llowan’ ma kub th’abi gel gelngin ngodad. Ir e rib mat’aw ni ma gagiyegnagdad. Ere faanra gad baadag ni ngad manged fager rok ma nga ud motoyilgad ngak muuda rin’ed e tin ke yog ngodad ni ngad rin’ed. Pi n’ey e ra maruwel ni fan ko tin ba fel’ ngodad.​—Isaiah 48:18.