Ba T’uf Ni Ngam Fil Murung’agen Got

Ra ngan fager ngak Got, ma ba t’uf ni ngam fil murung’agen. Manang e pi tafager rom fithingam ma yad ma pining? Ya ma rin’. Ere baadag Got ni ngkum nang fithingan muum pining. Fithingan Got e Jehovah. (Psalm 83:18; Matthew 6:9) Thingar kum fil ko mang e baadag ma mang e de adag. Ku ba t’uf ni ngar mu nang ko mini’ e pi fager rok me mini’ e pi toogor rok. Ra n’uw boch nap’an ma fin mu nang be’. Ma fare Bible e be yog ni bay e gonop riy ni ga ra dugliy ngalan’ ni ngam fil murung’agen Jehovah.​—Efesus 5:15, 16.

Pi fager rok Got e yad ma rin’ e tin nib m’agan’ ngay. Amu lemnag e pi fager rom. Faanra um rin’ ban’en nib t’agan ngorad ma ga be ngongliy e tin dubrad, ku rayog ni nge ulul iyan e fager romed? Mutrug ndanga’! Ku taareb rogon ni faanra ga baadag ni ngam fagergow Got, ma ba t’uf ni nga um rin’ e tin nib m’agan’ ngay.​—John 4:24.

Gathi gubin raba’ e teliw ma ra pow’iyey ni ngan fager ngak Got. Jesus ni ir e fager nib chuchugur thilrow Got e yog murung’agen l’agruw pa’ e kanawo’. Ba pa’ e wo’ e baga’ radan mab sug ko girdi’. Aram fare wo’ ni yan ko magothgoth. Ma yugu ba pa’ e ba wenin ni ba lich e girdi’ ni ma milekag u daken. Aram fare kanawo’ ni yan ko yafos ndariy n’umngin nap’an. Ma re n’ey e be yip’ fan ni faanra gab adag ni ngam fager ngak Got ma thingar mu fil e bin bpuluw e kanawo’ ni nguum ta’ fan riy.​—Matthew 7:13, 14.