Mu Dag E T’ufeg Nib Yul’yul’ Ngak E Piin Nib Gafgow

“Ra bagadad ma nge dag ngak bagadad e t’ufeg nib yul’yul’.”​—Zekariah 7:9, NW.

1, 2. (a) Mang fan nib puluw ni ngada daged e t’ufeg nib yul’yul’? (b) Mang boch e deer ni gad ra weliy?

THIN ROK GOT e be fonownagdad ni ngada chaariyed e “t’ufeg nib yul’yul’.” (Mikah 6:8, footnote) Re n’en ney e ku be pi’ boch i fan ngodad ko mang fan ni ngada rin’ed ban’en ni aram rogon. Ya reb, “en ni ma dag e t’ufeg nib yul’yul e be rin’ ban’en nib fel’ ko yafas rok.” (Proverbs 11:17, NW) Rib riyul’ e re n’eney! Ran dag e t’ufeg nib yul’yul’, ma ra ayuwegey ni nge fel’ thiliy nge yugu boch e girdi’. Ma angin nra yib riy, e nge yog e pi tafager ngodad nib yul’yul’​—ni aram e taw’ath nib tolang puluwon!​—Proverbs 18:24.

² Maku reb, e thin nu Babyor nib Thothup e be yog ngodad ni gaar: “En ni be athamgil ni nge rin’ e tin nib mat’aw ma ma dag e t’ufeg nib yul’yul’ e ra fas.” (Proverbs 21:21, NW) Arrogon, gad ra athamgil ni ngada daged e t’ufeg nib yul’yul’ ma ra ayuwegdad ni ngada chuchugurgad ku Got me bing e kanawo’ ngodad ni nge yog ngodad e pi flaaab boch nga m’on, nib muun ngay e yafas ndariy n’umngin nap’an. Machane uw rogon ni ngada daged e t’ufeg nib yul’yul’? Ma mini’ e gad ra dag ngak? Mab thil fare t’ufeg nib yul’yul’ ko gol ni ma dag e girdi’?

Gol ni Ma Dag e Girdi’ nge T’ufeg nib Yul’yul’

3. Uw rogon ma t’ufeg nib yul’yul’ e ba thil ko gol ni yigoo ma dag e girdi’?

³ Gol ni ma dag e girdi’ nge t’ufeg nib yul’yul’ e ba thil u boch e kanawo’. Ni bod ni, piin ni be dag e gol ni yigoo ma dag e girdi’ e baga’ ni yad ma rin’ ni gathi ri yad ma lemnag ni rib chuchugur e yafas rorad ngorad, ara bay e tha’ u thilrad e en ni yad be rin’ ban’en ngorad u fithik’ e gol. Machane, faan gad ra dag e t’ufeg nib yul’yul’ ngak be’, ma ngada m’aged e yafas rodad ngak e cha’ nem u fithik’ e t’ufeg. U lan e Bible, ma rogon ni ngan dag e t’ufeg nib yul’yul’ ngak e girdi’ e rayog ni nge yib ni bochan e tha’ nib fel’ ni ba’ u thilrow. (Genesis 20:13; 2 Samuel 3:8; 16:17) Ara rayog ni ke fel’ thilrow nbochan e tin ni kan rin’ kafram u fithik’ e gol. (Joshua 2:1, 12-14; 1 Samuel 15:6; 2 Samuel 10:1, 2) Rogon ni ngan dag e n’en nib thil riy, e gad ra taarebnag l’agruw ban’en ni bay u Bible, reb e murung’agen felngin e gol ma reb e murung’agen e t’ufeg nib yul’yul’ ni kan dag u tilin e girdi’.

4, 5. Uw rogon ma l’agruw ban’en ni bay u Bible ni be weliy u roy e thil u thilin e gol ni yigoo ma dag e girdi’ ni ba thil ko t’ufeg nib yul’yul’?

⁴ Reb e tayim ni kan dag e gol ni aram fare gol ni yigoo ma dag e girdi’ e ba l’ag ko n’en ni buch u reb e ulung ko girdi’, nib muun Paul ni apostal ngay u nap’an ni ke ligil fare barko ni kara uned ngay. Ke fekrad e day nga l’ay u bochi donguch ni Malta fithingan. (Acts 27:37–28:1) Yugu aram rogon ndariy ban’en ni ke buch u m’on riy ni susun e nge yib fan ni nge ayuweg piyu malta e pi cha’ nem ni kar magawongad, ma dariy e tha’ u thilrad e girdi’ ko nochi donguch nem machane kara ayuweged e pi cha’ nem ni milekag u fithik’ e falfalan’, ma yad be dag ngorad ni “ri yad ba gol ngorad.” (Acts 28:2, 7, NW) Kara ayuweged yad u fithik’ e gol, machane ke buch e re n’em ni dan lemnag ma kara daged ngak e girdi’ ni dar nanged yad. Meere, eram e gol ni yigoo ma dag e girdi’.

⁵ Ran taarebnag, ma ngam lemnag e n’en ni i dag David ni Pilung ngak Mephibosheth, ni fak Jonathan ni fager rok. I yog David ngak Mephibosheth ni gaar: “Ga ra kay e flowa u tebel rog ni gubin ngiyal’.” Be weliy David ko mang fan ni ke fal’eg e re yaram nem, me yog ngak ni gaar: “Ri gu ra dag e t’ufeg nib yul’yul’ ngom nbochan Jonathan ni chitamam.” (2 Samuel 9:6, 7, 13, NW) Ayuw ni ke pi’ David ni dabi m’ay e ba mat’aw ni ngan nog ni ke dag e t’ufeg nib yul’yul’, gathi ke mus ni fare gol ni yigoo ma dag e girdi’, ya aram e mich riy ni be par nib yul’yul’ ko m’ag fager ni kan tay. (1 Samuel 18:3; 20:15, 42) Bod rogon e ngiyal’ ney, ma dag e pi tapigpig rok Got ni yad ba gol ngak e girdi’ ni urngin. Machane, yad ma dag e t’ufeg nib yul’yul’ ndabi m’ay ngak e piin ni yad ba fel’ u wan’ Got ni bod yad.​—Matthew 5:45; Galatia 6:10.

6. Mang boch e kanawo’ ni kan dag e t’ufeg nib yul’yul’ u thilin e girdi’ nib tamilang ni be weliy e Thin rok Got?

⁶ Rogon ni ngan nang yugu boch e kanawo’ ni ngan dag e t’ufeg nib yul’yul’, ma gad ra weliy nib ngoch nap’an murung’agen dalip chepin e Bible ni be dag e re felngin ney. U roy ma gad ra guy ni t’ufeg nib yul’yul’ ni ke dag e girdi’ e (1) kan dag u daken e n’en ni kan rin’, ma (2) kan dag nib m’agan’uy ngay, ma (3) karni dag ngak e piin nib gafgow. Maku reb, pi chep ney e ra dag ngodad rogon ni ngada daged e t’ufeg nib yul’yul’ e ngiyal’ ney.

Reb e Matam e Be Dag e T’ufeg nib Yul’yul’

7. Mang e ke yog e tapigpig rok Abraham ngak Bethuel nge Laban, ma mang magawon ni dag fare tapigpig?

⁷ Genesis 24:28-67 e be weliy yugu boch ban’en ni ke buch rok e tapigpig rok Abraham, ni kan ta’ ko fare article ni ke yan. Tomren ni ke mada’nag Rebekah, min pining ni nge yan nga lan e naun rok e chitamangin, i Bethuel. (Verses 28-32) Mu rom e weliy nrogon nib tamilang murung’agen rogon ni i fal’eg i gay fare pin ni nge mang leengin fak Abraham. (Verses 33-47) Kari weliy ni be lemnag ni angin ni keb ngak nge mada’ ko ngiyal’ nem e aram e pow ni yib rok Jehovah, “ni ir e ke pow’iyeg ko bin riyul’ e kanawo’ ni fan ni nga gu fek fare pin ni fak walagen e masta rog ni fan ngak fak ni pumoon.” (Verse 48) Dariy e maruwar riy ni fare tapigpig e be athapeg ni bochan ke weliy e n’en ni ke buch rok e ra ayuweg ni nge pagan’ Bethuel nge Laban ni fak ni be ayuweg Jehovah ko re maruwel rok ney. Tomur riy, me yog fare tapigpig ni gaar: “Faanra riyul’ ni kam dagew e t’ufeg nib yul’yul’ nge pagan’ ngak e masta rog, mognew ngog; machane faanra danga’, mognew ngog, ma aram rayog ni nggu chel ko ba’ ni mat’aw ara ba’ ni gilay’.”​—Verse 49, NW.

8. Uw rogon u wan’ Bethuel e tin nib l’ag ku Rebekah?

⁸ U m’on riy ma ke m’ay i dag rok Jehovah e t’ufeg nib yul’yul’ ngak Abraham. (Genesis 24:12, 14, 27) Ra m’agan’ Bethuel ngay ni nge rin’ ban’en ni aram rogon ma aram e nge pag Rebekah ni nge un ko fare tapigpig rok Abraham? Ra dag be’ e t’ufeg nib yul’yul’ nbochan e t’ufeg nib yul’yul’ ni dag Got ngak? Ara aw nib m’ay fan fare milekag nib n’uw nap’an ni ke ta’ fare tapigpig? Susun kari baud laniyan’ e tapigpig rok Abraham ni ke rung’ag laman Laban nge Bethuel ni ke lungrow: “Ke yib e re n’ey rok Jehovah.” (Verse 50) Yow manang ni bay Jehovah riy ni be ayuweg ma de maruwaran’row ni ngar folgow ko n’en ni ke turguy. Bin migid, ke dag Bethuel e t’ufeg nib yul’yul’ ma ke ulul ngay ni gaar: “Baaray Rebekah. Mfek ngam marow nge leay e cha’ ni beer ni fak e masta rom, ni bod rogon ni ke yog.” (Verse 51) Ma ba m’agan’ Rebekah ngay ni nge un ngak e tapigpig rok Abraham, ma de n’uw nap’an nga tomren ma ke mang leengin Isak nib t’uf rok.​—Verses 49, 52-58, 67.

T’ufeg nib Yul’yul’ ni Dag Fak ni Pumoon

9, 10. (a) I ning Jakob ngak Joseph ni fak ni nge rin’ e mang ni fan ngak? (b) Uw rogon ni ke dag Joseph e t’ufeg nib yul’yul ngak e chitamangin?

⁹ Tungin Abraham i Jakob e ku kan dag ngak e t’ufeg nib yul’yul’. Rogon ni yog ko Genesis guruy ni 47, ma par Jakob u Egypt ko ngiyal’ nem, “ma ke chuchugur e rran ni [nge] yim’.” (Verses 27-29) Ma ke magafan’ ya ra yim’ u wuru’ fare binaw ni ke micheg Got ngak Abraham. (Genesis 15:18; 35:10, 12; 49:29-32) Machane dabun Jakob ni ngan k’eyag u Egypt, ere ke yarmiy ni ngan fek e dowef rok nga lan fare binaw nu Canaan. Mini’ e ri bay rogon ni kab fel’ ngak Joseph ni fak ni bay mat’awon ni nge fal’eg ban’en ni fan ni nge mudugil ni tin ni baadag e yira rin’?

¹⁰ Fare chep e be gaar: “Ere ke pining [Jakob] Joseph ni fak me yog ngak ni gaar: ‘Chiney, faanra ga be runguyeg, . . . ma nga ri mu dag e t’ufeg nib yul’yul’ nge pagan’ rom ngog. (Wenig ngom, dab mu k’eygeg u Egypt.) Ma nggu thig nga but’ nib chuchugur ko pi chitamangig, ma ngam mu fekeg nga wuru’ yu Egypt ma ngam k’eygeg nga lan e low rorad.’” (Genesis 47:29, 30) I micheg Joseph ni nge rin’ e n’en ni ke wenignag ngak, ma de n’uw nap’an u tomren me yim’ Jakob. Joseph nge yugu boch i fak Jakob e kara feked downgin “nga lan fare binaw nu Canaan ma kar k’eyaged u lan fare yiy ni bay u daken e ted u Machpelah, ni aram fangi binaw ni chuw’iy Abraham.” (Genesis 50:5-8, 12-14) Meere i dag Joseph e t’ufeg nib yul’yul’ ngak e chitamangin.

T’ufeg nib Yul’yul’ ni Dag e En Leengin Fak

11, 12. (a) Uw rogon ni dag Ruth e t’ufeg nib yul’yul’ ngak Naomi? (b) Uw rogon ma “fa yay ntomur” ni ke dag Ruth e t’ufeg nib yul’yul’ e kab fel’ ko “fa yay nsom’mon”?

¹¹ Fare babyor ni Ruth e be weliy ko uw rogon ni dag fare pin nu Moab ni leengin fak Naomi e t’ufeg nib yul’yul’ ngak ni yow l’agruw e kem’ e pumoon rorow. Nap’an ni dugliy Naomi ni nge sul nga Bethlehem u Judah, me dag Ruth e t’ufeg nib yul’yul’ nge lem nib mudugil ngak, me yog ni gaar: “Gin ga ra yan ngay, ma nggu un ngom, ma gin ni ngam par riy ni nep’ ma gu ra par riy. Girdi’ rom e ra mang girdi’ rog, ma Got rom e ra mang Got rog.” (Ruth 1:16, NW) Tomur riy i dag Ruth e t’ufeg nib yul’yul’ u nap’an ni dag nib m’agan’ ngay ni nge leay Boaz ni girdi’ rok Naomi ni ke pillibthir.a (Deuteronomy 25:5, 6; Ruth 3:6-9) I yog Boaz ngak Ruth ni gaar: “Kam dag e t’ufeg rom nib yul’yul’ u tomur ni kab fel’ boch ko fa bin som’mon, ya dam fol ko fapi pumoon ni kab pagal ndemtrug ko ba gafgow ara ba fel’ rogon.”​—Ruth 3:10.

¹² “Fa yay ni som’mon” ni ke dag Ruth e t’ufeg nib yul’yul’ ma aram e tayim ni ke digey e girdi’ rok me par rok Naomi. (Ruth 1:14; 2:11) Musko re n’enem ni ke rin’ e kab achichig ko t’ufeg nib yul’yul ni dag ko yay ni “tomur”​—ni aram ke m’agan’ Ruth ngay ni nge leay Boaz. Chiney rayog rok Ruth ni nge gargelnag e bitir ni girdi’ rok Naomi, ni ir be’ ndabkiyog ni nge gargelnag e bitir. Kan m’agpa’, ma nap’an ni ke gargelnag Ruth e bitir, ma piin ni ppin nu Bethlehem e ka rogned ni baga’ lamrad ni gaar: “Kan gargeleg bochi pagel ngak Naomi.” (Ruth 4:14, 17) Cha’ ney i Ruth e riyul’ ni ir “fare pin nrib fel’,” ni kari taw’athnag Jehovah me mang llabthir rok Jesus Kristus.​—Ruth 2:12; 3:11; 4:18-22; Matthew 1:1, 5, 6.

Kan Dag ko Tin ni Rin’

13. Uw rogon ma Bethuel, nge Joseph, nge Ruth e kara daged e t’ufeg nib yul’yul’ rorad?

¹³ Kam guy rogon ni dag Bethuel, nge Joseph, nge Ruth e t’ufeg rorad nib yul’yul’? Kara rin’ed e binem ni gathi kemus ni ka rogned ko thin nib gol ya kara rin’ed boch ban’en. Gathi kemus ni ke yog Bethuel ni, “Baaray Rebekah” machane riyul’ ni ke “fingichiy Rebekah.” (Genesis 24:51, 59) Gathi kemus ni ke yog Joseph ni gaar, “Nggu rin’ e tin ni kam mog” machane ir nge pi walagen e kara rin’ed ni fan ku Jakob e n’en ni “kari tay chilen ngorad.” (Genesis 47:30; 50:12, 13) Gathi kemus ni ke yog Ruth ni, “Gin ni ga ra yan ngay ma nggu un ngom” machane ke digey e girdi’ rok me un ngak Naomi, ma aram “kara ululgow ko yan rorow nge mada’ nga Bethlehem.” (Ruth 1:16, 19) U Judah, ku ke rin’ Ruth “urngin ni ke micheg ngak e chitiningin e pumoon rok ni nge rin’.” (Ruth 3:6) Arrogon, t’ufeg nib yul’yul’ rok Ruth, nbodrogon e n’en ni ke rin’ yugu boch e girdi’, e kara micheged u daken e tin ni kara rin’ed.

14. (a) Uw rogon fapi tapigpig rok Got ko ngiyal’ ney ni kara daged e t’ufeg nib yul’yul’ rorad ko ngongol rorad? (b) Uw rogon ni kan dag e t’ufeg nib yul’yul’ u fithik’ e piin Kristiano ko binaw ni ga manang?

¹⁴ Gad ra guy ni pi tapigpig rok Got ko ngiyal’ ney e yad be ulul i yan ni yad be dag e t’ufeg nib yul’yul’ u daken e ngongol rorad ni ma k’aring e falfalan’ ngodad. Ni bod rogon e piin ni ma pi’ e ayuw ni gubin ngiyal’ ko pi walag nib m’ar, nge pi walag ni kar gafgowgad ko mochuch, ara kari kireban’rad. (Proverbs 12:25) Am fal’eg i lemnag boor e Pi Mich Rok Jehovah ni ba yul’yul’ ni ma fek e piin pillibthir nga Kingdom Hall ni fan ni ngara uned ko muulung. Anna, ni 82 e duw rok e bay e m’ar rok ni arthritis, e ke weliy e n’en ni be thamiy yugu boch e girdi’ u nap’an ni gaar: “Reb e taw’ath ni yib rok Jehovah ni bay be’ ni ma yon’eg ni nggu un ko urngin e muulung. Ka ri gu pining e magar ngak ni ke pi’ boch e walag ni pumoon nge ppin ngog nib ta runguyey.” Ga ma rin’ ni aram rogon u lan e ulung rom fa? (1 John 3:17, 18) Faanra aram rogon, mu pagan’um ya t’ufeg nib yul’yul’ rom e ri yibe tayfan.

Kan Dag nib M’agan’uy ngay

15. Mang boch e kanawo’ ni kan dag e t’ufeg nib yul’yul’ ni ku kan dag ko dalip e chep nu Bible ni kada weliyed?

¹⁵ Fapi chep nu Bible ni kada weliyed e ku be dag ni t’ufeg nib yul’yul’ e kan dag nib gel mab m’agan’uy ngay, ma gathi u fithik’ e towasar. Bethuel e ke m’agan’ ngay ni nge ayuweg e tapigpig rok Abraham, maku aram rogon Rebekah. (Genesis 24:51, 58) I dag Joseph e t’ufeg rok nib yul’yul’ ndariy be’ ni be k’aring. (Genesis 50:4, 5) Ke un Ruth “ngak [Naomi] u fithik’ e towasar.” (Ruth 1:18) Nap’an ni ke yog Naomi ngak Ruth ni nge chuchugur ngak Boaz, ma t’ufeg nib yul’yul’ e ke k’aring fare pin nu Moab ni nge yog ni gaar: “Urngin ban’en ni ga ra yog ngog ma nggu rin’.”​—Ruth 3:1-5.

16, 17. Uw rogon fare t’ufeg nib yul’ ni dag Bethuel, nge Joseph, nge Ruth ni ri bay fan, ma mang e ke k’aringrad ni ngara daged e re felngin ney?

¹⁶ T’ufeg nib yul’yul’ ni dag Bethuel, nge Joseph, nge Ruth e ri bay fan ya bochan Abraham, nge Jakob, nge Naomi e dar towasariyed yad. Ra ngan lemnag, ma de mil fan ngak Bethuel ni nge l’og fak ni ppin nge yan nga bang. Rayog ni nge yog ngak fa cha’ ni tapigpig rok Abraham e: ‘Danga’, dabug ni nggu pi’ fakag ni ta maruwel nge yan nga bang.’ (Genesis 24:18-20) Maku aram rogon Joseph, ba puf rogon ni nge turguy ko ra fol ko tin ni ke wenignag e chitamangin ngak fa danga’, ya bochan ke yim’ Jakob ma dariy rogon ni nge towasariy ni nge fol ko thin rok. Me Naomi e ir ke yog ni ba puf rogon Ruth ni nge par u Moab. (Ruth 1:8) Maku ba puf rogon Ruth ni nge leay bagayad e “pi pumoon ni ka yad ba pagal” ma gathi Boaz ni ke pillibthir.

¹⁷ Bethuel, nge Joseph, nge Ruth e kara daged e t’ufeg nib yul’yul’ nib m’agan’rad ngay; gum’ircharad e ke k’aringrad ni ngara rin’ed ban’en ni aram rogon. Kara thamiyed u fithik’rad nib mil fan ngorad ni ngara daged e re felngin ney ngak e piin ni bay e tha’ u thilrad, ni mus ku David ni Pilung ma ke thamiy nib mil fan ngak ni nge dag e re felngin ney ngak Mephibosheth.

18. (a) Piin piilal ni Kristiano e ngara “gafaliyed e ulung” ni bay e mang u wan’rad”? (b) Uw rogon ni ke weliy reb e piilal e n’en ni be lemnag u murung’agen e maruwel ni nga ayuweg e pi walag?

¹⁸ T’ufeg nib yul’yul’ e ka be par ni ir e pow ko Girdi’ rok Got, nib muun ngay e piin pumoon ni ma ayuweg e ulung rok Got. (Psalm 110:3; 1 Thessalonika 5:12) Pi cha’ nem ni piin piilal, ara piin ma gafaliy e ulung, e kara thamiyed nib mil fan ngorad ni ngara ayuweged e tin ni kan pagfan ngorad ya bochan kan dugliyrad ko re maruwel ney. (Acts 20:28) Yugu aram rogon, ma maruwel rorad ni ngara gafaliyed yad nge yugu boch e maruwel ni be dag e t’ufeg nib yul’yul’ ngak girdien e ulung e ur rin’ed ni, “gathi bochan kan towasariyrad, ya ke m’agan’rad ngay.” (1 Peter 5:2) Piin piilal e yad ma gafaliy e ulung ya bochan aram e maruwel rorad ma yad baadag ni ngara lebguyed e re n’en nem. Yad ma dag e t’ufeg nib yul’yul’ ngak e pi saf rok Kristus ya ke mil fan ngorad maku yad baadag ni ngara rin’ed e re n’en ney. (John 21:15-17) “Gub falfalan’ ni nggu wan nga tafen e pi walag ara nggu dengwanagrad ni gathi bochan yugu boch ban’en ya ke mus ni gu baadag ni nggu dag ngorad ni gu ma lemnagrad,” ireray e n’en ni yog reb e piilal ni Kristiano. “Ngan ayuweg e pi walag e aram e n’en ni ma pi’ e falfalan’ ngog!” Piin piilal ni ta tarunguyey ndemtrug e binaw ni ma par riy u gubin yang e ra puluw lanin’rad u polo’ i gum’ircharad.

Mu Dag e T’ufeg nib Yul’yul’ Ngak e Piin nib Gafgow

19. Mang e tin riyul’ u murung’agen e t’ufeg nib yul’yul’ ni kan dag ko fapi chep nu Bible ni kan weliy ko re article ney?

¹⁹ Fapi chep nu Bible ni kada weliyed e ku be dag ni t’ufeg nib yul’yul’ e ba puluw ni ngan dag ngak e piin nib gafgow ni dabiyog rogorad ni ngara ayuweged yad. Rogon ni nge dabi m’ay girdien e tabinaw rok Abraham, mab t’uf ni nge pi’ Bethuel e ayuw ngak. Ba t’uf ni nge ayuweg Joseph ma aram rayog ni ngan fek nga Canaan fare dowef rok Jakob ni ke yim’. Ma rogon ni nge yib e en ni owchen Naomi, ba t’uf ni nge pi’ Ruth e ayuw ngak. Abraham, nge Jakob, nge Naomi e dabiyog rorad ni ngara ayuweged e re magawon rorad nem nfaanra dabni ayuwegrad. Taab rogon ko ngiyal’ ney, nib puluw ni ngan dag e t’ufeg nib yul’yul’ ngak e piin nib t’uf e ayuw rorad. (Proverbs 19:17) Thingarda folwokgad rok Job ni patriarch, ni ma ayuweg e “piin ni ke gafgow ma be ning e ayuw, nge fare pagal ndariy e chitamangin nge en ndariy be’ ni be ayuweg” ma ku arrogon e “en ni ke chuchugur ni nge yim’.” Maku i falfalan’nag Job ‘gum’irchaen e ppin ni kem’ figirngin’ me mang ‘lan owchen be’ nib malmit nge ay be’ nib mugutgut.’​—Job 29:12-15.

20, 21. Mini’ e susun ni ngada daged e t’ufeg nib yul’yul’ rorad ngak, ma ra bagadad ma susun ni nge mudugil laniyan’ ni nge rin’ e mang?

²⁰ Riyul’, bay e ‘piin nib gafgow ma be ning e ayuw ko urngin e ulung ko piin Kristiano. Rayog ni aram wenegan boch e magawon ni bod ni ke tawreng be’, ara ke mulan’, ara be lemnag ni ir be’ ndariy fan, ara boch e girdi’ e ke gafgow laniyan’, ara keb e m’ar ngak nib gel, ara bochan ke yim’ e en nib t’uf rok. Demtrug ko mang e ke k’aring e magawon, ma yad urngin ni yad e pi walag nib t’uf rodad ma bay e pi n’en nib t’uf rorad nrayog rodad ma susun ni ngada ayuweged yad ma aram ngada daged nib m’agan’dad ko t’ufeg rodad nib yul’yul’ ni ngan dag ngorad ni gubin ngiyal’.​—1 Thessalonika 5:14.

²¹ Ere, ngada ululgad ngay ni ngada folwokgad rok Jehovah Got, ni “ri ma dag e t’ufeg nib yul’yul’.” (Exodus 34:6; Efesus 5:1) Rayog ni ngada rin’ed e n’en ni aram rogon ma aram gad ra rin’ ban’en nib m’agan’dad ngay, ni baga’ ni fan ko piin nib gafgow. Ma mutrug ni rayog ni ngada pininged e sorok ngak Jehovah ma ra yib e falfalan’ ngodad ni faanra “bagadad ma nge dag e t’ufeg nib yul’yul’ ngak bagadad.”​—Zekariah 7:9.

[Footnote]

Uw Rogon ni Ngam Pi’ e Fulweg?

• Uw rogon ma t’ufeg nib yul’yul’ e ba thil ko gol ni yigoo ma dag e girdi’?

• Mang boch e kanawo’ ni ke dag Bethuel, nge Joseph, nge Ruth e t’ufeg nib yul’yul’ rorad riy?

• Gad ra dag e t’ufeg nib yul’yul’ ni mang e bay u laniyan’dad?

• Mini’ e susun ni ngada daged e t’ufeg nib yul’yul’ ngak?

[Picture on page 26]

Uw rogon ni dag Bethuel e t’ufeg nib yul’yul’?

[Picture on page 29]

T’ufeg rok Ruth nib yul’yul e ba taw’ath ni fan ku Naomi

[Pictures on page 30]

T’ufeg rok e girdi’ nib yul’yul’ e ngara daged nib m’agan’rad ngay, ma ur daged nib chag e maruwel ngay, ma ngar daged ngak e piin nib t’uf e ayuw rorad