Mu Fanay ni Gubin Ngiyal’
1. Fare tract ni Ga Baadag ni Ngam Nang e Tin Nriyul’? e ra ayuwegdad ni ngad rin’ed e mang?
1 Fare ngi tract ni Ga Baadag ni Ngam Nang e Tin Nriyul’? e kan ngongliy ni nge ayuwegdad ngad tababnaged e fol Bible ko girdi’. Machane kub fel’ ni ngan fanay e re tract ney nge yog ni ngan wereg e tin riyul’. (Ekl. 11:6) Baaray boch ban’en nra ayuwegdad.
2. Uw rogon ni ngad fanayed fare tract ni ngad tababnaged e machib?
2 Ngan Tababnag e Machib: Nap’an ni ngam pi’ fare tract ngak be’, ma ngam dag fa nel’ i deer ni bay u wuru’ e re tract nem, ma ga fith ngak ni nge lungum: “Bin ngan ko pi deer ney e ri ga baadag ni ngam nang e fulweg riy?” Tomren ni ke mel’eg reb fapi deer, ma ga dag e fulweg riy ni bay u lan fa ngi tract ngemu’ ma ga beeg reb fapi thin nu Bible ni bay riy. Mu kum beeg ara mu weliy e pi thin ni bay ko bin tomur e page, ma ga dag fare babyor ni Mang e Ri Be Fil e Bible? ngak. Ma faanra dabi fek, machane kam mu’ i pi’ fare tract ngak, ma dabisiy nra taw e tin riyul’ nga gum’irchaen.—Matt. 13:23.
3. Mang e ngad rin’ed nfaanra boor pa’ u puluwon be’?
3 Faanra Boor Pa’ u Puluwon Be’: Rayog ni ngam gaar: “Sana gab magawon ere kemus ni nggu pi’ e re tract ney ngom. Baaray nel’ e deer riy ni baga’ ni ma fith e girdi’ ni bay e fulweg riy u Bible. Rayog ni nge yay ni migid ni gub, ma ga weliy e tafinay rom riy.”
4. Mang e rayog ni nga dogned ko ngiyal’ ni gad be dag fare tract u nap’an ni gad be machib u kanawo’?
4 Nap’an ni Yibe Machib u Kanawo’: Rayog ni ngam gaar: “Siro’! Bay ba ngiyal’ ni kaam lemnag e pi deer ni baaray, fa? [Mmotoyil ko n’en nra yog.] Re ngi tract ney e be pi’ e fulweg ni bay u Bible nib tamilang.” Faanra der gur facha’, ma rayog ni ngam weliyew reb fapi fulweg ni bay u lan fare tract ngemu’ mag dag fare babyor ni Mang e Ri Be Fil e Bible? ngak.
5. Faanra dariy e girdi’ u tabinaw ma mang e rayog ni ngad rin’ed ko fare tract?
5 Pi Tabinaw Ndariy e Girdi’ Riy: U boch e binaw, e pi publisher e yad ma tay e babyor ko pi tabinaw ni dariy e girdi’ riy. Faanra aram rogon ni yima rin’ ko ulung rom, ma mang ni dab mu tay fare tract ni Ga Baadag ni Ngam Nang e Tin Nriyul’? Nap’an ni ga ra sul ko fare tabinaw bayay ma rayog ni ngam gaar: “Fa binem e rran e gub u roy u tabinaw rom ma dam moy, ma aram mug tay e re tract ney. Ere bin ngan ko pi deer ney e ga ba adag ni ngam nang e fulweg riy?”
6. Mang fan ni fare tract ni Ga Baadag ni Ngam Nang e Tin Nriyul’? e ba talin e maruwel ni ma yibnag angin e machib?
6 Fare tract ni Ga Baadag ni Ngam Nang e Tin Nriyul’? e ma weliy e tin riyul’ nib tamilang. Girdi’ nib thilthil e teliw nge yalen rorad e yad ra adag. Mab mom ni ngan wereg; ya mus ko piin nib fel’ yangaren nge tin beech e publisher ma rayog ni ngar wereged. Ga be fanay e re tract ney ko ngiyal’ nib puluw ngay, fa?