U M’on ni Ngam Machib, Ma Sana Ba T’uf ni Ngam Gay e Girdi’ nu Bang

1. Mang fan ni pi binaw ni boor e thin riy e kan yarmiy e machib riy ni be yan u rogon e pi thin?

¹ Nap’an e Pentekost ko duw ni 33 C.E., ma tomuren pi gachalpen Jesus e ke sugnagrad fare gelngin Got nib thothup ‘mar tababgad ko numon nlungun boch e nam’ ngak e girdi’ ni kar bad u yu yang u fayleng. (Acts 2:4) Ma angin ni yib riy e sogonap’an 3,000 e girdi’ ni kan taufenagrad. Ma gowa yooren e girdi’ nra bad u bang e ku rayog ni ngar nonad ni thin ni Hebrew nge Greek. Machane ke turguy Jehovah ni ngan machibnagrad ko thin rorad. Dariy e maruwar riy nreb i fan ni kan rin’ e re n’em e ba ga’ nra adag e girdi’ fare thin nib fel’ nfaanra kar rung’aged ko thin rorad. Ere, ngiyal’ ney, e yibe fal’eg fare maruwel ni ngan machib ni be yan u rogon e thin rok e pi walag. (Organized, p. 107, ko par. 2-3, km 5/02 p. 4) Pi walag nib thil e thin rorad e dab ni pi’ e territory ara binaw ni ngar machibgad riy, ya yad ra machibnag e piin nib taareb rogon e thin rorad u lan e pi binaw ni ma machib fare ulung ni yad be chag ngorad nge territory rok yugu boch e ulung nib chugur.

2. (a) Mang fare maruwel ni ngan fal’eg i gay, ma uw e ba t’uf ni ngan rin’ e re n’ey riy? (b) Mang e thingar da rin’ed u nap’an ni kad pirieged be’ nib thil e thin rok ma baadag e machib?

² Faanra ga be par u binaw ni taareb e thin riy, ma rayog ni ngam machib u mit e tabinaw i yan. Machane gathi aram rogon nfaanra ga be par u binaw ni boor e thin riy. Faanra gur bagayad e pi walag nib thil e thin romed ma ke mil fan ngom ni ngam un ko maruwel ni ngan fal’eg i gay, ara ngam gayed e girdi’ nib taareb rogon e thin romed ya nge yag ni ngam machibnaged yad. (Mu guy fare thin ni kenggin e “Ngad Ayuweged Gadad.”) Ere, ba t’uf ni ngam uned ko maruwel ni ngan fal’eg i gay. Uw rogon ni ngan rin’ e re maruwel ney?

3. Uw rogon ni ngan nang ko uw e ra yan e pi walag ngay ni ngar gayed e girdi’ nu bang?

³ Ngan Yarmiy Rogon ni Ngan Fal’eg i Gay: Urngin e tayim ni ngan fanay ko re maruwel ney ni ngan fal’eg i gay e be yan u rogon rarogon e binaw. Bod nib fel’ ni ngan nang e fulweg ko pi deer ni baaray: In e girdi’ ni bay ko fare binaw nib thil e thin rorad? In e tamachib ni bay? Ma in e address ko girdi’ nu bang ni bay rorad? De t’uf ni nga ranod ko urngin e naun ngar gayed e girdi’ nu bang, ya rayog ni nga ranod ko binaw ni boor e girdi’ riy ma gathi rib palog. Machane, rib ga’ fan ni bay e yaram ni fan ko re maruwel ney ma rayog ni ngan bing e kanawo’ ngak yooren e girdi’ ya nge yag ni ngar pininged fithingan Jehovah.​—Rom. 10:13, 14.

4. (a) Uw rogon ni ngan yarmiy fare maruwel ni ngan fal’eg i gay? (b) Uw rogon ni ngan gay e girdi’ nib taareb rogon e thin romew?

⁴ Faanra bay e yaram ni ke tay e piin piilal nib ga’ ni en service overseer u rogon ni ngan fal’eg i gay, ma rayog ni ngan siyeg ni nge dabi yan boor e walag nga reb e tabinaw. (1 Kor. 9:26) U fithik’ e pi walag nib thil e thin rorad, ma piin piilal ko ulung ni yad be chag ngorad e ra mel’eg reb e piilal ara ministerial servant ni nge ayuwegrad ko re maruwel ney. Boor e ulung ni bay e yaram rorad nib fel’ ni ngar gayed e girdi’ nu bang ko yay ni som’on ni yad be fanay e directory ara Internet ni ngar gayed fithingan e girdi’ nu bang. Ngemu’ min kolnagrad ko telefon rorad ara ngan yan ngan guyrad nga taferad. Faanra kan guy nib puluw, ma piin piilal ko ulung ni yad be chag ngorad e ra yarmiy ni urngin e girdi’ u lan e ulung e ngar uned ngorad ko re maruwel ney u yu ngiyal’.​—Mu guy fare thin ni kenggin e “Rogon ni Ngam Pirieg e Piin nib Taareb Rogon e Thin Romed.”

5. (a) Mang boch ban’en nrayog ni nge rin’ e pi tamachib u nap’an ni yad be un ko maruwel ni ngan fal’eg i gay? (b) Mang e rayog ni nga dogned u nap’an ni gad be gay e girdi’ nu bang?

⁵ Gubin ngiyal’ ni ngad uned ko re maruwel ney mab t’uf ni nge tamilang u wan’dad e n’en ni gad be nameg. Bochan ni re maruwel ney e bang ko machib, mab t’uf ni ngad chuwgad ko mad rodad ni fan ko machib. Boor e pi walag ni kar pirieged, ni bochan ni kar fal’eged rogon e thin ni nga rogned u m’on ni nga ranod ngar gayed e girdi’ nu bang, ma ke ayuwegrad ni ngaur pasiggad ko re maruwel ney ma kar salapgad ko thin. Rayog ni ngad uneged ko report rodad e tayim ni kad fanayed u nap’an ni gad be gay e girdi’ nu bang, machane dab da uneged ngay e tayim ni kad fanayed u nap’an ni gad be ngongliy e territory map. Nap’an ni kad pirieged be’ ni manang fare thin, ma thingar da machibnaged fare thin nib fel’ ngak, ngemu’ ma nga dogned ngak e en service overseer ara be’ ni ke tay ni nga i ayuweg, ya nge yag ni ngan yoloy fithingan e cha’ nem nga but’. Ma ireray e n’en ni ngan rin’ ndemtrug ko baadag be e machib, fa danga’. Yugu aram rogon nib ga’ fan ni ngan gay e girdi’ nu bang, machane thingar da rin’ed urngin e maruwel rodad ni bay rogon ko machib.​—Mu guy fare thin ni kenggin e “Mang e Nga Nog u Nap’an ni Yibe Fal’eg i Gay.”

6. Mang boch e magawon nib thil ko fare maruwel ni ngan gay e girdi’ nib biling?

⁶ Ngan Gay e Girdi’ nib Biling: Ngan gay e girdi’ nib biling e ba mo’maw’ mab t’uf ni ngan athamgiliy. Be’ nib biling e dabiyog ni ngan nang u fithingan, ngu rarogon downgin, nge munmad rok. Maku chon e tabinaw rok be’ nib biling e yad baadag ni ngar ayuweged, ere sana dubrad ni nga rogned ban’en u murung’agen ngak e pi tamachib. Maku pi n’en nrayog ni ngan fanay u nap’an ni ngan gay e girdi’ nib biling ni gad ra weliy, e ku rayog ni ngan fanay u nap’an ni ngan gay e piin ni ma non.

7. (a) Mang e rayog ni nga dogned ngak e girdi’ u nap’an ni gad be gay e girdi’ nib biling? (b) Mang e ngad rin’ed ni nge pagan’ e girdi’ ngodad?

⁷ Pi ulung ni ma fanay e fanathin u paay e ke yib angin ngorad u nap’an ni kar gayed boch e girdi’ nib biling u mit e tabinaw i yan. Sana ra yog be’ ngom ni ke guy be’ ni buguli yoror rok, nge piin ni yad nga maruwel, ara piin ni yad nga skul ni ma fanay e fanathin u pa’. Sana ke guy e yol u tooben e kanawo’ ni be yog ni ngan kol ayuw ya bay e pi bitir nib biling. Sana bay e girdi’ rok nib biling. Ma dab mu pag talin ni boch e girdi’ e dubrad ni nge pagan’rad ngom. Machane rayog ni ngam rin’ ban’en ni nge dabki lemnag facha’ ni aram rogon ni aram e ngam gol ngorad, ma ngam weliy ngak fan ni kam mub u fithik’ e yul’yul’ nge tayfan. Boch e pi walag e ke yib angin ngorad u nap’an ni kar daged ngak e girdi’ e thin nu Bible u daken e DVD ara boch e DVD ni be dag yaan e fanathin u paay, ngemu’ kar fithed yad ko kar nanged be’ nib biling, fa. Ma ka rogned ni yad baadag ni ngar filed ngorad murung’agen e athap ni be weliy e Bible murung’agen. Faanra dabun be’ ni nge yog ban’en, ma sana baadag ni ngam pi’ ngak e address rom ara fare babyor ni be pining e girdi’ ko muulung ni nge pi’ ngak e girdi’ rok ara fager rok nib biling.

8. Uw rogon ni ngan rin’ e re maruwel ney ko gin ni ma muulung e girdi’ nib biling riy ni ngau ra felfelan’gad ara gin ni yima ayuwegrad riy?

⁸ Maku rayog ni ngan gay e girdi’ nib biling ko gin ni yad ma muulung ngay ni ngau ra fafelgad ara gin ni yima ayuwegrad riy. Pi tamachib e thingar ra chuwgad ko mad rorad nib puluw ko n’en ni yibe rin’ ko gin’em. Mab fel’ ni ngan non u fithik’ e tayfan ngak taareb ara l’agruw e girdi’ u rom ko bin ni ngan non ngorad ni ba ulung. Faanra ke yib angin e sabethin, ma fare tamachib nge facha’ e ra bagayow ma nge pi’ e address fa namba ko telefon rok ngak bagayow.

9. Uw rogon ni ngan gay e girdi’ nib biling u lan tagil’ e siyobay?

⁹ Maku reb, e ngan fal’eg e map ni be dag yaan e gin ni yima fol chuway’ riy min yarmiy e tayim ni ngan yan ngaram. Reb e map e ngan yoloy ngay boch e tagil’ e gin ni yima pi’ e pensin riy. Ma reb e ngan ta’ ngay e gin ni bay e dry cleaner riy, nge gin ni yima maluknag e mad riy, nge tafen e abich, nge hotel, nge ku boch e tagil’ e fol chuway’. Faanra taab mit e fol chuway’ e bay ko urngin e map, ma rayog ni nge fanay e pi tamachib reb e kanawo’ u rogon ni ngar tababnaged e sabethin. Ba ga’ ni pi hotel e bay e girdi’ nib biling ni ma par riy, ere rayog ni ngad weliyed ngak girdien e maruwel rorad murung’agen e maruwel rodad nib ngoch nap’an. Ngemu’, ma nga dogned ngorad ni bay e DVD rodad nrayog ni ngad pied ngorad ni ngar pied ngak e girdi’ nib biling ni yad be par u hotel rorad. Ma boch e tagil’ e siyobay e kemus ni ngad fithed ngorad ngad nanged ko bay e girdi’ ni ma yib ngorad ni yad ma fanay e fanathin u pa’rad, fa. Faanra bay e skul ni fan ko girdi’ nib biling u lan e binaw ni gad ma par riy, ma rayog ni ngad pied boch e DVD rodad ni fan ko library rorad.

10. Mang nib ga’ fan fare maruwel ni ngan gay e girdi’ nu bang ara biling?

¹⁰ Reb e Maruwel nib Ga’ Fan: Ngan gay e girdi’ nib taareb rogon e thin romew e ba maruwel nib gel. Maku, bochan ni girdi’ e yad ma thilyeg e gin ni yad ma par riy, ere ba t’uf ni ngan thilyeg e babyor ni kan yoloy boch ban’en riy u murung’agen e girdi’ ni yad ma par u lan e pi binaw ni yima machib riy. Machane, be yoor i yan e pi binaw nrib ga’ fan ni ngan gay e girdi’ nu bang nge girdi’ nib biling riy. Jehovah, ni ir e ke tay chilen ngodad ni ngad machibgad e de laniyan’. (Acts 10:34) Ba m’agan’ ngay ni “urngin e girdi’ ni ngar thapgad ngak ma ngar nanged e tin nib riyul’.” (1 Tim. 2:3, 4) Ere, yibe athapeg ni ngaud rin’ed e tin nib m’agan’ Jehovah ngay ma ngad ayuweged gadad ni ngad gayed urngin e girdi’ nib thil e thin rorad ni yad baadag ni “nguur folgad” ko thin rok Got.​—Luke 8:15.

[Kahol ko page 5]

Ngad Ayuweged Gadad

Faanra ba t’uf e ayuw rok e pi walag ni ngar gayed e girdi’ nib taareb rogon e thin rorad ya ngar machibnaged yad, ma en service overseer e rayog ni nge non ngak e piin piilal ko pi ulung nib chugur. Sana ba fel’ ni ngan non ngak e pi ulung ni gathi rib palog ma bay boor e girdi’ nu bang u lan e pi binaw ni yad ma machib riy. Ngemu’, ma nga nog ngak e girdi’ u lan e ulung ni faanra kar pirieged be’ nu bang, ma ngar yoloyed e address rok nga but’ ngar pied ngak e en ni service overseer ya ir e ra pi’ ngak e pi walag ni yad be ning e ayuw. Ma piin service overseer ko pi ulung nem e ngar maruwelgad u taabang ya nge yag ni ngan pirieg e girdi’ nu bang u lan e pi binaw ni yad ma machib riy mi yad yog ngak e piin baadag e machib ko bin ngan e ulung e rayog ni ngar chaggad ngorad.

Faanra ke pirieg e pi tamachib be’ nib thil e thin rok ma baadag e machib (ara be’ nib biling), ma chingiyal’ nem e thingar ra yoloyed fare babyor ni Please Follow Up (S-43) ma ngar pied ngak e en secretary ko ulung. Re n’ey e ra ayuweg ni nge yag boch e ayuw ko tirok Got ngak facha’ nib papey.

[Kahol ko page 6]

Rogon ni Ngam Pirieg e Piin nib Taareb Rogon e Thin Romed

• Ngam fith ngak e piin ni ga be fil e Bible ngorad, nge girdien e tabinaw rorad, nge girdi’ ni yad nga maruwel, nge ku boch e girdi’.

• Ngam fanay e directory ko telefon ya nge yag ni ngam pirieg fithingan e girdi’ nu bang. Ma reb e directory ni kan yarmiy fithingan e girdi’ ni be yan u rogon e address rorad e sana rayog ni ngan pirieg u Internet ara u lan e ofis ko telefon.

• Ngam fith ngak e piin ni yad ma pi’ e ayuw ko girdi’ ni yoor, ni bod e tafen e babyor, nge pi ofis ko am, nge pi skul nib tolang.

• Ngam man nga tafen e abich ni ma yan e girdi’ nu bang ngay ngar abichgad.

• Ngam non ngak e piin nib mil fan ngorad e gin ni yima fol chuway’ riy ma boor e girdi’ nu bang ni yad ma yan ngay, ni nge yag ni ngam tay e tebel ni fan ko babyor e ngaram.

• Faanra ba puluw ko motochiyel ko am, ma ngam chuw’iy reb e commercial directory ara reb e program ko computer ni ma fanay e Internet ni ngan gay fithingan e girdi’.

[Kahol ko page 7]

Mang e Nga Nog u Nap’an ni Yibe Fal’eg i Gay

Faanra ngam gol ngak e girdi’ ma ngam non ngak u fithik’ e yul’yul’ mab tamilang, ma ba ga’ nra pagan’ ngom. Ma ba ga’ nib fel’ ni som’on e ngam dag ngak reb e babyor ni thin rom.

Tomuren ni ka mog e siro’ ngak be’ ma rayog ni nga mog ni nge lungum: “Gamad be gay e girdi’ ni ma non e thin nu ․․․․․ ya nge yag ni nggu weliyew ngak e athap ni be weliy e Bible murung’agen. Bay be’ ni ga manang nrayog ni nggu nonad, fa?”

Nap’an ni ga be gay e girdi’ nib biling ma rayog ni nga mog ni nge lungum: “Siro’. Rayog ni nggu dag ban’en ngom? [Ngan fanay reb e portable video player, min dag yaan e fanathin u paay ni be weliy murung’agen reb e verse u Bible ni New World Translation​—Ba’ ko DVD.] Ireray bang ko fare Bible ni American Sign Language. Maku, bay boch e kachido ndariy puluwon ni fan e nge ayuweg e girdi’ nib biling ngar nanged e thin nu Bible. Bay be’ nib biling ni ga manang ni ma fanathin u pa’?” Faanra dariy be’ ni ke yib ngan’, mab fel’ ni ngam fith ngak ko ke guy be’ nib biling u tabon e maruwel, ara skul, ara piin buguli yoror rok.