Ngan Maruwel u Taabang ni Ngan Machib u Boch e Binaw nib Thilthil e Thin Riy

Girdi’ e ba ga’ ni yad ra adag ni ngar motoyilgad ko fare thin nib fel’ u murung’agen Gil’ilungun Got, ma yad guy rogon ni ngar folgad riy ni faanra yad ra rung’ag ko thin rorad. Sana ireray fan ni yarmiy Jehovah ni nge rofen ni Pentekost ko duw ni 33 C.E., me yib e pi Jew ni “kar bad u urngin e nam nu fayleng” ni yad ba yul’yul’ ni ngar rung’aged fare thin nib fel’ ko ‘thin ko nam rorad’ ni yugu aram rogon ni yad manang e thin nu Hebrew ara Greek. (Ac 2:5, 8) Ngiyal’ ney e bay boch e binaw ni ma par e girdi’ riy nib thilthil e thin rorad. Ma bay boch e ulung ni yad ma muulung nib thilthil e thin rorad ni yad ma machib u taa bangi binaw. Bochan ni boor e ulung ni girdi’ riy e ba thilthil e thin rorad ni yad ma machib u taareb e binaw, ma rayog ni ngaur sulod nga taab binaw ni boor yay. Ara reb e, nap’an nra chuw boch e walag u reb e ulung ko re binaw nem ma ke taw boch. Re n’ey e rayog ni nge k’aring e chalban nge damumuw ko girdi’ ni yad be par u rom. Ere uw rogon ni nge siyeg e pi walag ndabi buch e re n’ey?

• Ngan puruy’nag ban’en (Pr 15:22, NW): Pi service overseer ko pi ulung ney e ngar puruy’naged reb e yaram nib m’ag ko pi ulung ni yad be machib ko pi binaw ney, ya nge yaram rogon ni ngan machibnag fare thin nib fel’. Faanra bay boch e ulung nde ga’ yang e gin ni yad be machib riy, ni yad ma machib u yugu boch e thin e yad ra adag ni nge dabin yan ko pi tabinaw u lan reb e binaw ni yad e yad ma yan ngay ko machib. Machane faanra bay reb e ulung nib mo’maw’ ngorad ni ngar machibnaged e girdi’ ko pi tabinaw ni yad e yad ma yan ngay ni bochan e ba ga’ yang e gin ni ngar machibgad riy, ma sana yad ra adag ni nge ndab da paged reb e naun. Machane nap’an ni gad ra mada’nag be’ ni ma non ko thin rorad ni baadag e machib, ma nga dogned ngorad. (od-E 93 ¶37) Ku rayog ni nge ning e pi walag u reb e ulung e ayuw ni ngan gay e piin ni yad ma yog e thin ko ulung rorad. Ma rayog ni ngan tay e address ko pi cha’nem ko territory rorad. (km 7/12 5, kahol) Dab mu pagtalin ni bay boch e tabinaw ni girdi’ riy e ba thilthil e thin rorad. Rogon ni ngad machibgad u reb e binaw ngu reb e thingar da folgad ko motochiyel ni ke fal’eg e am u rogon ni ngan fanay boch ban’en u murung’agen e girdi’ ni faanra bay rogon ko maruwel ni machib.

• Ngan maruwel u taabang (Efe 4:16): Mu fol u rogon ni be pow’iyey e en service overseer ko ulung rom. Gur, ga be fil e Bible ngak be’ nib thil e thin rok ko thin ko ulung rom? Rayog ni nge mon’og faen ni ga be fil e Bible ngak ni faanra nga mog ngak be’ u lan reb e ulung nib chugur ngak ni nge yib i guy ara reb e ulung ni yad ma muulung ko thin rok.

• Ngam fal’eg rogom (Pr 15:28): Faanra kam mada’nag be’ u nap’an e machib nib thil e thin rok, mag gay rogon ni ngam weliy fare thin nib fel’ ngak nrogon nrayog rom. Rayog ni ngam fal’eg rogom ni aram e ngam gay rogon ni ngam nang ko mang thin e ma yog e girdi’ ko gin ni ga ma machib riy. Maku rayog ni ngam downloadnag boch e Bible ara video ni kan pilyeg nga yugu boch e thin nga lan e cellphone ara tablet rom u m’on riy. Ku rayog ni ngam fanay fare app ni JW Language ni ngam fil rogon ni ngam mog boch e thin ni bod e fel’ e kadbul ara kammagar ara kafel ko thin rorad.