Mu Ayuweg e Nangan’ Rom
1. Mang kenggin e special assembly ni fan ko duw ni 2013, ma mang fan e re muulung ney?
1 Gubin e rran ni gad ma mada’nag boch ban’en nrayog ni nge k’aringdad ni ngad rin’ed boch ban’en nra magawonnag e nangan’ rodad. Aram fan ni kenggin e special assembly ni fan ko duw ni 2013 ni yira tabab ngay ko September 1, 2012 e “Mu Ayuweg e Nangan’ Rom.” (1 Tim. 1:19) Kan ngongliy rogon e re muulung ney ni fan e nge ayuwegdad ni gad gubin ya nge yag ni bagadad me fal’eg i lemnag rogon ni be maruwel ko re tow’ath ney ni ke pi’ e En Tasunmiy ngodad.
2. Mang boch e deer nib ga’ fan ni yira pi’ e fulweg riy u nap’an e re assembly ney?
2 Mu Fal’eg i Yaliy e Pi N’en ni Baaray: Re assembly ney e ra pi’ e fulweg u medlip e deer nib ga’ fan ni murung’agen e nangan’ rodad, ni aram e:
• Mang e rayog ni nge magawonnag e nangan’ rodad?
• Uw rogon ni ngad skulnaged e nangan’ rodad?
• Uw rogon ni nge dabi aw rachaen e girdi’ nga pa’dad?
• Faanra ud lemnaged ma gad be fol ko pi kenggin e motochiyel nu Bible, ma mang e be dag u rarogodad?
• Uw rogon ni nge dab da magawonnaged e nangan’ rok boch e girdi’?
• Piin fel’ yangaren, uw rogon ni ngam pared ni gimed ba gel u nap’an ni kan towasariymed ni ngam togopuluwgad ko michan’ romed?
• Mang boch e tow’ath ni ma yag ngak e piin ni yad ma fol ko nangan’ rorad ni gelngin Got nib thothup e be pow’iy?
3. Uw rogon nrayog ni nge yib angin e re assembly ney ngodad?
3 Dabiyog ni nge kirebnag Satan e nangan’ rodad ni faanra be ayuwegdad Jehovah. Be non Jehovah ngodad u daken e Thin rok nge ulung rok ni be gaar: “Baaray e wo’. Mu leked.” (Isa. 30:21, BT) Re assembly ney e aram reb e kanawo’ ni be pow’iydad Jehovah riy. Ere, mu guy rogon nge yag nim un ngay. Mu fal’eg e motoyil u nap’an e re muulung ney, mag fal’eg i lemnag rogon ni ngam fol ko pi n’en ni yira weliy riy. Mu weliyed chon e tabinaw rom e pi n’en ni yira weliy u nap’an e re assembly ney. Faan gad ra fol ko pi fonow ni yira pi’ u nap’an e re muulung ney ma rayog ni nge pi’ gelngidad nge yag ni ‘ud pared ndariy ban’en ni be methan’dad ngay,’ miki ayuwegdad ni nge dabi chafegdad e pi n’en ni yima felfelan’ ngay ko re fayleng rok Satan ney.—1 Pet. 3:16.