Deer

◼ Faanra nge mon’og e piin bitir ko tirok Got ban’en, ma mang e thingar ra filed?

Thingari athamgil e pi gallabthir ni Kristiano ni ngar ‘fonownaged pi fakrad nrogon girdien Kristus.’ (Efe. 6:4) Bod ni, boor e gallabthir ni kar pirieged nib fel’ ni ngaur beeged pi fakrad e daily text u gubin e kadbul. Ma nap’an e fol Bible ni tabinaw ara yugu ba ngiyal’, ma rayog ni nge yaliy chon e tabinaw reb e video u taabang, ara ra weliyed boch ban’en ni bay ko fapi article ni Young People Ask, ara ranod u yaan boch e chep ni bay u Bible, ara ranod u daken boch ban’en ni fan ko machib u taabang. Machane, faanra nge mon’og e piin bitir “ko tin ni ka ba’” ban’en, maku thingar ni fil e tin nib toar e machib nu Bible ngorad.​—Heb. 6:1.

Am lemnag e n’en ni gad ma fil ko piin ni gad ma mada’nag u nap’an e machib. Nap’an ni gad ra sul ngorad, ma gad ma guy rogon ni ngad tababgad i fil fare ke babyor ni Mang e Ri Be Fil e Bible? ngorad. Tomuren ni kad mu’naged e re ke babyor nem, ma gad ma fil fare ke babyor ni “Um Pired ni Gimed Ba T’uf rok Got.” Mang fan? Ya fare ke babyor ni Mang e Ri Be Fil e Bible? e ra ayuweg facha’ ni yibe fil e Bible ngak ni nge nang e tin nib mom e machib u Bible. Ma fare ke babyor ni “Um Pired ni Gimed Ba T’uf rok Got” e ra ayuweg facha’ u rogon ni nge fanay e pi kenggin e motochiyel u Bible ko par rok u reb e rran ngu reb. Ra fil be’ e gal ke babyor ney ma ra ayuweg ni nge ‘tay lik’ngin nib toar’ nga fithik’ Kristus me par nib mudugil e ‘michan’ rok ngak.’ (Kol. 2:6, 7) Ere, gathi ku ra yib angin e re n’ey ko bitir rodad? Ya ku er rogorad ni kub t’uf ni ngar nanged murung’agen fare biyul, nge Gil’ilungun Got, nge rarogon e piin ni kar m’ad. Kub t’uf ko piin bitir ni ngar nanged fan ni be pag Got e gafgow nge rogon ni ngad nanged ni gad be par ko tin tomuren e rran ko re m’ag ney. Thingari mich u wan’rad ni Pi Mich Rok Jehovah e yad ma fil e tin riyul’. Kub t’uf ni nge tamilang u wan’ e piin fel’ yangaren e pi kenggin e motochiyel u Bible nge rogon ni ngar “nanged e tin nib fel’ ko tin nib kireb.” (Heb. 5:14) Riyul’ ni thingari lemnag e piin gallabthir rogon yangaren fapi bitir nge urngin ban’en nrayog ni nge mit ngorad. Machane, boor e bitir nrayog rok ni nge fil e tin nib toar e machib ni yugu aram rogon ni kab achig.​—Luke 2:42, 46, 47.