“Baaray Fan ni Nge T’uf Got Rodad”

1, 2. Mang fan nib t’uf Jehovah Got rom?

BA T’UF Got rom? Faanra kam ognagem ngak Jehovah Got ni ngam pigpig ngak, mab mudugil nra lungum, arrogon! Bay fan ni nge t’uf Jehovah rodad. Ba t’uf Jehovah rodad ni bochan e gad ba t’uf rok. Be gaar e Bible: “Ba t’uf Got rodad nge girdi’ ni bochan e Got e som’on ni at’ufegdad.”​—1 John 4:19.

² Jehovah e som’on ni at’ufegdad ni bochan e ke ngongliy e fayleng nrib fel’ yaan ni ngad pared riy, maku ma pi’ e tin nib t’uf rodad. (Matthew 5:43-48) Bin th’abi ga’ fan riy e ma pi’ e pi n’en nib t’uf rodad nra ayuweg e tha’ u thildad ngak. Ke pi’ e Bible ni aram e gin ni bay e Thin rok riy, ma ki micheg ngodad nra rung’ag e meybil rodad, maku ra pi’ gelngin nib thothup ni nge ayuwegdad. (Psalm 65:2; Luke 11:13) Ma n’en th’abi fel’ ni ke pi’, e aram Fak ni yib nga fayleng ni nge Biyuliydad. Ere, rriyul’ ni gad ba t’uf rok Jehovah!​—Mu beeg e John 3:16; Roma 5:8.

3. (a) Mang e ba t’uf ni ngad rin’ed ni faanra ngaud pared ni gad ba t’uf rok Got? (b) Mang deer e ba ga’ fan ni ngad lemnaged, ma uw e yira pirieg e fulweg ko re deer ney riy?

³ Baadag Jehovah ni nge yib angin e t’ufeg rok ngodad ndariy n’umngin nap’an. Machane, gadad e gad ra dugliy ko ra yib angin ngodad fa danga’. Ke tay e Thin rok Got chilen ngodad ni gaar: “Um pired ni gimed ba t’uf rok Got, ma gimed be sonnag e . . . yafos ndariy n’umngin nap’an.” (Jude 21) Fare bugithin ni “um pired” e be dag nra ngaud pared ni gad ba t’uf rok Got ma bay ban’en nib t’uf ni ngad rin’ed. Boor e kanawo’ ni thingari m’ug u dakendad e t’ufeg ni ke dag Got ngodad. Ere, reb e deer nib ga’ fan ni ngad lemnaged e, ‘Uw rogon ni nge m’ug ko ngongol rog nriyul’ nib t’uf Got rog?’ Fulweg ko re deer ney e bay ko thin ni kan thagthagnag nga laniyan’ apostal John ni gaar: “Baaray fan ni nge t’uf Got rodad: fan e ngad folgad ko tin ni ke yog ni ngad rin’ed. Ma tin ni ke yog ni ngad rin’ed e gathi rib mo’maw’.” (1 John 5:3) Ba ga’ fan ni ngad fal’eged i lemnag fan e pi thin ney, ya gad baadag ni nge nang Got gelngin nrib t’uf rodad.

“BAARAY FAN NI NGE T’UF GOT RODAD”

4, 5. Mu weliy rogon e n’en ni rin’ me t’uf Jehovah rom.

⁴ Tabolngin e re thin ney ni yoloy John e gaar, “fan ni nge t’uf Got rodad.” Ngad guyed rogon ni ke weliy apostal John e n’en ni be yip’ fan ni nge t’uf Got rodad. Machane, som’on e ngam lemnag e ngiyal’ ni baaram ni tabab ni nge t’uf Jehovah rom.

⁵ Am lemnag e ngiyal’ nim tabab i fil e tin riyul’ u murung’agen Jehovah nge tin nib m’agan’ ngay me mich u wan’um. Kam fil ni yugu aram rogon nni gargelnagem ni gab tadenen ndariy e tha’ u thilmew Jehovah, machane ke bing e kanawo’ ni nge yag e yafas ni manemus ngom u daken Kristus ni aram e n’en ni mul u pa’ Adam. (Matthew 20:28; Roma 5:12, 18) Ku aram e ngiyal’ ni kam nang feni ga’ fan e maligach ni pi’ Jehovah, ni aram e l’og Fak ni kari maagirag rok nga fayleng ni nge yim’ ni fan ngom. Ere, nap’an ni mich e pi n’em u wan’um ma aram e n’en ni k’aringem ni nge t’uf Got rom ni ir e ke rin’ gubin e pi n’ey ni fan ngom.​—Mu beeg e 1 John 4:9, 10.

6. Uw rogon ni ma m’ug e bin riyul’ e t’ufeg? Mang e kam rin’ ni bochan e ba t’uf Got rom?

⁶ Machane, re t’ufeg nem e aram tabolngin e bin riyul’ e t’ufeg ngak Jehovah. Ya t’ufeg e gathi kemus ni ban’en ni ngaun lemnag fa nga u nog. Ku dabi gaman ni nge lungum, “Ba t’uf Jehovah rog,” ya bin riyul’ e t’ufeg e bod e michan’ nib chag e ngongol ngay. (James 2:26) Ku ma m’ug e t’ufeg rodad u daken e ngongol nib fel’ ni gad ma rin’ ngak e en nib t’uf rodad. Ere, nap’an ni ke t’uf Jehovah u polo’ i gum’irchaem ma aram e n’en ni ke k’aringem ni ngam adag ni ngam ngongol u rogon nib m’agan’ ngay. Kam un ko taufe fa dawor? Faanra kam un, mab mudugil nib t’uf Jehovah rom ma ga baadag ni ngam fol rok. Kam ognagem ngak Jehovah ni ngam rin’ e tin nib m’agan’ ngay, ma kam micheg e re n’em u daken e taufe ni kam un ngay. (Mu beeg e Roma 14:7, 8.) Ra ngam lebguy e n’en ni kam micheg ngak Jehovah mab muun ngay e n’en ni migid ni yog apostal John.

“NGAD FOLGAD KO TIN NI KE YOG NI NGAD RIN’ED”

7. Mang boch ban’en ni ke tay Got chilen ndab da rin’ed? Ra ngan fol ko pi n’ey, ma mang e kub muun ngay?

⁷ Ke weliy John fan ni nge t’uf Got rodad ni gaar: “Ngad folgad ko tin ni ke yog ni ngad rin’ed.” Mang e pi n’en ni ke tay Got chilen ni ngad folgad riy? Boor e pi n’em ni ke yog u lan e Thin rok, ni aram e Bible. Bod ni dabun e chingaw, nge ngongol ndarngal, nge meybil ko liyos, nge moro’ro’, nge malulfith l’igin. (1 Korinth 5:11; 6:18; 10:14; Efesus 4:28; Kolose 3:9) Ra ngad folgad ko tin ni ke yog Got ni ngad rin’ed, ma kub muun ngay ni nge puluw e ngongol rodad ko pi motochiyel rok u Bible.

8, 9. Uw rogon ma gad nang e n’en nib m’agan’ Jehovah ngay ni ngad rin’ed ni mus ko ngiyal’ ni kad mada’naged boch ban’en nder tamilangnag e motochiyel nu Bible ndab ni rin’? Mu weliy reb e ban’en.

⁸ Gathi kemus ni ngad rin’ed e tin ni baadag Jehovah fa ngad folgad ko tin ni ke tay chilen ni ngad folgad riy, ya ku bay boch ban’en nib t’uf ni ngad rin’ed. Gathi gubin ban’en ni gad ma rin’ ni bay e motochiyel riy ni ke tay Jehovah. Ere rayog ni ngaud mada’naged boch ban’en nder tamilangnag e Bible ko rayog ni ngan rin’ fa dabiyog. Machane, faanra buch ni aram rogon, ma uw rogon ma gad nang e n’en nib m’agan’ Jehovah ngay ni ngad rin’ed? Bible e aram e gin ni gad ra nang rogon laniyan’ Got riy. Ma faan gad ra ulul i fil, ma aram e gad ra nang e pi n’en nib t’uf rok nge pi n’en ni ma fanenikay. (Proverbs 6:16-19; mu beeg e Amos 5:15.) Ra yoor ban’en nda filed u rarogon Jehovah, ma aram e rayog ni nge puluw e ngongol rodad nge pi n’en ni gad ma dugliy ko lem rok. Ma nap’an ni gad ra mada’nag boch ban’en ni gathi rib tamilang u Bible ko rayog ni ngad rin’ed fa dabiyog, ma gad manang ko mang e ngad rin’ed nib “m’agan’” Jehovah ngay.​—Efesus 5:17.

⁹ Bod ni, dariy e motochiyel u Bible ni be yog ndab da yaliyed e kachido ni bay yaan e cham ara puwlag riy. Machane, de t’uf ni ngan fal’eg e motochiyel ndab da yaliyed yaan e pi n’em, ya gad manang rogon laniyan’ Jehovah riy. Be gaar e Bible: “Ri ma fanenikay [Jehovah] e en ni baadag e cham.” (Psalm 11:5, NW) Ki gaar: “Ra gechignag Got e pi arorad ni be ngongliy e ngongol ko darngal.” (Hebrews 13:4) Gad ra fal’eg i lemnag e pi thin nem, ma aram e rayog ni ngad nanged e n’en nib m’agan’ Jehovah ngay. Maku ra ayuwegdad ndab da uned i yaliy yaan e pi ngongol ni ma fanenikay, ya gad manang nra felfelan’ ni faan gad ra siyeg e pi ngongol nib kireb ko re fayleng ney ni yima dag ko pi n’en ni yima chuweg e chalban ngay ni gowa ban’en ndariy e kireb riy.a

10, 11. Mang fan ni gad ma fol rok Jehovah? Susun ni uw rogon ni ngad folgad rok?

¹⁰ Mang fan ni gad ma fol ko pi n’en ni ke yog Got ni ngad rin’ed ara motochiyel rok? Ma mang fan ni gad baadag ni nge puluw e ngongol rodad ko lem Rok? Gathi gad ma fol ni bochan e nge dab ni gechignagdad fa ngad siyeged wenegan nra yib nfaanra dab ni fol ko n’en ni baadag Got ni ngan rin’. (Galatia 6:7) Ya fan ni gad ma fol e bochan ni gad manang ni aram rogon nra m’ug nriyul’ nib t’uf Jehovah rodad. Gad baadag ni ngad fel’gad u wan’ Jehovah ni bod e bitir ni baadag ni nge fel’ u wan’ e chitamangin. (Psalm 5:12) Ir e Chitamangidad nrib t’uf rodad ni faanra ud pared ma gad manang ni gad ba “fel’ u wan’,” ma ra ud felfelan’gad.​—Proverbs 12:2, BT.

¹¹ Ere, gathi gad ma fol ko pi motochiyel rok Got ni bochan e kan towasariydad. Maku darud mel’eged e tin ni gad baadag ni ngad folgad riy.b Ku darud folgad ko tin ni gad be lemnag nra fel’ rogodad riy fa de mo’maw’ ngodad, ya fol ni gad ma tay e ban’en ni ke yib u “gum’ircha’dad.” (Roma 6:17, NW) Ba taareban’dad e en ni yoloy fare thin ko Psalm ni gaar: “Ku gu pirieg e felfelan’ u fithik’ e fol ni gu be tay ko tin ka mog ni ngan rin’, ni bochan e rib t’uf rog e tin ka mog.” (Psalm 119:47, BT) Ri gad baadag ni ngaud folgad rok Jehovah, ya gad manang ni ir e bay rogon ni ngad folgad rok u gubin ban’en, maku aram rogon ni baadag. (Deuteronomy 12:32) Gad baadag ni ngad boded Noah ni be’ nib yul’yul’ ma i par nib t’uf Jehovah rok u n’umngin nap’an e yafas rok. Aram fan ni gaar e Bible: “Me rin’ Noah urngin e tin ni yog Got ngak ni nge rin’.”​—Genesis 6:22.

12. Mang fan ni ma felfelan’ Jehovah ni faanra ud folgad rok?

¹² Ra uw rogon u wan’ Jehovah ni faanra ud folgad rok ni bochan e gad baadag? Be yog e Bible ni gad ra ‘felfelan’nag.’ (Proverbs 27:11, BT) Riyul’ e re n’em, fa? Arrogon, ma bay fan nib riyul’! I sunmiydad Jehovah me pi’ e puf rogon ngodad ni ngad mel’eged ko gad ra fol rok fa danga’. (Deuteronomy 30:15, 16, 19, 20) Ma faanra ud folgad rok ni bochan e ba t’uf rodad, ma rra felfelan’ ngodad. (Proverbs 11:20) Maku reb, e faan gad ra fol ma aram e gad be lek e bin th’abi fel’ kanawoen e yafas.

“TIN NI KE YOG NI NGAD RIN’ED E GATHI RIB MO’MAW’”

13, 14. Mang fan nrayog ni nga nog ni tin ni ke yog Got ni ngad rin’ed e “gathi rib mo’maw’”? Uw rogon ni yira susunnag?

¹³ Bay ban’en nra pagan’dad ngay ni yog apostal John u murung’agen e pi motochiyel rok Jehovah ni gaar: “Tin ni ke yog ni ngad rin’ed e gathi rib mo’maw’.” Fare bugithin ni Greek ni kan piliyeg ko 1 John 5:3 ni “mo’maw’” e be yip’ fan ban’en nib “tomal.”c Ere, gathi ke pi’ Jehovah e motochiyel ngodad ni bochan e baadag ni ngaud gafgowgad riy. Ma motochiyel rok e gathi rib mo’maw’ ni dabiyog ni nge fol e girdi’ nde flont riy.

¹⁴ Rayog ni ngan susunnag ngak reb e fager rom ni ke ning e ayuw ngom ni ngam fekew e chugum rok ya nge chuw nge yan i par nga bang. Boor kahol e chugum rok ni ngan fek ni boch e bbaud nrayog ni nge chibiy taabe’, ma boch e ba tomal nthingari chibiy l’agruw ni’. Ga be lemnag, ma ra pi’ reb e kahol ngom ni manang ndabi taw rom? Danga’. Ya manang ni kaygi tomal ngom ma rim gafgow riy. Ere, ku er rogon Got nrib gol ma gad ba t’uf rok, ma dabi yog ngodad ni ngad folgad u boch e motochiyel ni manang ni kaygi mo’maw’ ngodad. (Deuteronomy 30:11-14) Dabi yog Jehovah ni ngad rin’ed ban’en ni aram feni mo’maw’, ya manang e tin ndabiyog rodad ni bochan e “manang e n’en nni ngongliydad ngay; ma manang ni gadad e fiyath.”​—Psalm 103:14.

15. Mang fan nrayog ni nge pagan’dad ni gubin e motochiyel ni ke ngongliy Jehovah e ra fel’ rogodad riy?

¹⁵ Rriyul’ ni pi motochiyel rok Jehovah e de mo’maw’, ya ra yib angin ngodad. (Mu beeg e Isaiah 48:17.) Aram fan ni yog Moses ngak piyu Israel ni gaar: “Yog Jehovah ngodad ni ngaud folgad u urngin e pi motochiyel ney, ma ngad pared ni ba’ madgun u wan’dad. Ya faanra ud rin’ed ma gubin ngiyal’ nra i yib angin ngodad mi i taydad ni gad ba fas.” (Deuteronomy 6:24, NW) Ku rayog ni nge pagan’dad ya ke pi’ Jehovah e motochiyel ngodad ni bochan e be lemnag rarogodad nge tin nra fel’ rogodad riy. Jehovah e dabi yog ngodad ni ngad rin’ed ban’en ni manang ni gad ra gafgow riy, ya ir ba Got nrib toar e gonop rok. (Roma 11:33) Manang e tin nra fel’ rogodad riy maku ir e Got ko t’ufeg. (1 John 4:16) Gubin ban’en ni ma yog nge gubin ban’en ni ma rin’, e ma rin’ u fithik’ e t’ufeg. Ma gubin e motochiyel ni ke tay ni nga i fol e pi tapigpig rok riy e ke ngongliy u fithik’ e t’ufeg.

16. Uw rogon nrayog ni ngad folgad rok Got ni yugu aram rogon nib mom ni nge af e ngongol nu fayleng ngodad, maku bay boch ban’en ni gad ba meewar riy?

¹⁶ Re n’ey e gathi be yip’ fan nib mom ni ngan fol rok Got, ya thingar kud chamgad nga ngongolen e re fayleng nib kireb ney ni ke suwey “Faanem nib Kireb.” (1 John 5:19) Ku thingar da athamgilgad ni ngad gelgad ko pi n’en ni gad ba meewar riy ni ir e ma waliydad ni ngad th’abed e pi motochiyel rok Got. (Roma 7:21-25) Machane, rayog ni ngad gelgad ko pi n’ey ni faanra riyul’ nib t’uf Jehovah rodad. Ma Jehovah e ku ra tow’athnag e piin ni yad ma fol rok ni bochan e ba t’uf rorad. Ku ra pi’ gelngin nib thothup ngak e “piin ni yad be fol rok.” (Acts 5:32) Ma re gelngin nem e ra m’ug fel’ngin rodad ni ir e rayog ni nge ayuwegdad ni ngaud pared ni gad be fol rok Got.​—Galatia 5:22, 23.

17, 18. (a) Mang e gad ra fil ko re ke babyor ney, ma mang e susun ndab da paged talin? (b) Mang e gad ra fil ko bin migid e guruy?

¹⁷ Re ke babyor ney e gad ra fil riy e pi kenggin e motochiyel rok Jehovah, nge rogon e ngongol ni baadag ni ngad rin’ed, nge ku boch ban’en. Nap’an ni gad be fil e pi’ n’em maku bay boch ban’en nib t’uf ni ngad lemnaged. Dab da paged talin nder towasariydad Jehovah ni ngad folgad ko pi motochiyel rok, ya baadag ni ngaud folgad riy ni bochan e ba m’agan’dad ngay. Maku dab da paged talin ni tin ni be yog Jehovah ni ngad rin’ed e ra fel’ rogodad riy, ma ra pow’iydad i yan ko yafas ndariy n’umngin nap’an. Faanra ud folgad ma aram e gad be dag ngak Jehovah gelngin nrib t’uf rodad.

¹⁸ Ke pi’ Jehovah e nangan’ ngodad ya nge yag nda nanged e n’en nib thil u thilin e fel’ nge kireb. Bin migid e guruy e gad ra fil riy nib t’uf ni ngad skulnaged e nangan’ rodad ni faanra nge pow’iydad nib fel’ rogon.