Tapigpig rok Jehovah e Kan “Maad’ad Ngak ni Bochan e Denen Rodad”
“Ni maad’ad ngak ni bochan e denen rodad, min toy ni bochan e kireb ni kad ngongliyed. Gechig ni gafgow riy e ke golnagdad, dumow ni aw ngak e fasegdad ko maad’ad nda tayed.”—ISA. 53:5.
1. Susun mang e ngauda lemnaged u nap’an ni gad be un ko Puguran, ma mang yiiy e ra ayuwegdad?
GAD ma madnomnag e Puguran ko yam’ ni tay Jesus ni nge puguran ngodad urngin e pi n’en ni ke rin’ e yam’ nge fas ko yam’ ni tay. Re Puguran ney e be tamilangnag ngodad ni Jehovah e ir e th’abi tolang, min thothupnag fithingan. Nge ku rogon ni ke lebug e n’en nib m’agan’ ngay ni kub muun ngay rogon ni ke thap e girdi’ ngak Got. Yiiy ni bay ko Isaiah 53:3-12 e rib tamilang rogon ni be weliy murung’agen e maligach ni pi’ Kristus nge angin ni ke yib. I yiiynag Isaiah e gafgow nra tay fare Tapigpig me weliy nib tamilang rogon e yam’ nra tay nge angin nra yib ngak pi walagen ni kan dugliyrad nge fapi “yugu boch e saf.”—John 10:16.
2. Mang e be micheg e yiiy rok Isaiah ma mang e ra rin’ ngodad?
2 Sogonap’an medlip miriay e duw u m’on ni gargeleg Jesus, me thagthagnag Jehovah ngak Isaiah ni nge yiiynag ni Tapigpig rok ni ke turguy e ra par nib yul’yul’ ngki mada’ ko ngiyal’ ni keb e skeng ngak nib gel. Bochan ni Jehovah e thagthagnag e re yiiy ney ma aram e mich riy nrib pagan’ ko yul’yul’ nra tay Fak. Gad ra fal’eg i lemnag e re yiiy ney ma ri gad ra felfelan’ ma ra gelnag e michan’ rodad.
Kan ‘Dariyfannag’ ma Kan ‘Dabuy’
3. Mang fan ni susun e nge felfelan’ piyu Jew ni keb Jesus, machane mang e ra rin’ed?
3 Mu beeg e Isaiah 53:3. Mu lemnag e n’en ke buch rok fak Got ni kari maagirag rok ni digey e felfelan’ rok ni ma pigpig ku Chitamangin ngeb nga fayleng. Keb ni nge pi’ e yafas rok ni maligach nge chuweg e girdi’ ko denen nge yam’! (Fil. 2:5-8) Maligach rok Jesus e riyul’ nra n’ag fan e denen ko girdi’, ya fare maligach ni gamanman ni un pi’ u nap’an Moses e kemus ni be dag yaan e re n’ey. (Heb. 10:1-4) Susun e ngan felfelan’ ni keb min tay fan, ni ba ga’ ni piyu Jew ya yad e ur sonnaged Kristus ni kan micheg nra yib. (John 6:14) Ma n’en ni rin’ e “dabuy” piyu Jew mar “dariyfannaged” ni bod ni ke yiiynag Isaiah. I yoloy apostal John ni gaar; “I yib ko nam rok, machane pi girdien e ra dabuyed ni ke yib ngorad.” (John 1:11) I gaar apostal Peter ngak piyu Jew: “Fare Got , . . . ni ir e Got rok e pi chitamangidad e ke ta’ fan e tapigpig rok i Jesus. Gimed e mpied nga pa’ e piin ni yad be yog e thin, mi gimed yog u p’eowchen Pilate ni dabumed Jesus, ni mus ko fa ngiyal’ nem ni dugliy Pilate ni nge pag Jesus. I ir e be’ nib thothup ma ba fel’, machane mogned ndabumed.”—Acts 3:13, 14.
4. Uw rogon me nang Jesus e gafgow ko m’ar ni ma yib ko girdi’?
4 Ki yiiynag Isaiah ni Jesus e ku ra nang e “gafgow” ko m’ar ni ma yib ngak e girdi’. Nap’an e machib ni i tay mab mudugil ni i magar yu ngiyal’ machane dariy murung’agen ni gafgow ko m’ar. (John 4:6) Ma i guy e m’ar ni ma yib ngak e girdi’ ni i machibnag, miri kireban’ ngorad me golnagrad. (Mark 1:32-34) Ere ke lebguy Jesus fare yiiy ni gaar: “Me athamgiliy fare gafgow ni susun e gadad e nge aw ngodad, nge amith ni susun e gadad e ngad pired nga fithik’.”—Isa. 53:4a; Matt. 8:16, 17.
Bod “Ba Gechig ni Got e Ke Pi’ Ngak”
5. Mang fan e yam’ ni tay Jesus u wan’ boch piyu Jew, ma mang fan ni gelnag e re n’ey e kireban’ rok Jesus?
5 Mu beeg e Isaiah 53:4b. Boor e girdi’ ko ngiyal’ ni immoy Jesus riy ni dar nanged ko mang fan e gafgow nge yam’ ni tay. I mich u wan’rad ni Got e ke gechignag ni bod ni ke pi’ ba m’ar ngak nib gel e kireb riy. (Matt. 27:38-44) Me yog piyu Jew ni Jesus e be n’ag fan Got. (Mark 14:61-64; John 10:33) Me Jesus e gathi be’ nib tadenen ara be’ ni ma n’ag fan Got. Ra lemnag ni be yog e girdi’ ni ngan li’ ngem’ ni bochan ni be n’ag fan Got, ma ri be kireban’ nib gel ni bochan e rib t’uf e Chitamangin rok. Yugu aram rogon, ma ri baadag ni nge rin’ e tin nib m’agan’ Jehovah ngay.—Matt. 26:39.
6, 7. Uw rogon ni ke turguy Jehovah ni nge “gafgow” e Tapigpig rok nib yul’yul’, ma mang fan ni rin’ ni aram rogon?
6 Rayog ni ngad nanged fan e yiiy rok Isaiah ni gaar, boch e girdi’ e yad ra lemnag ni “ba gechig ni Got e ke pi’ ngak,” mab mo’maw’ ni ngad nanged fan fare yiiy ni gaar, “i gag e gu turguy ni nge gafgow.” (Isa. 53:10) Ya bochan ni ki yog Jehovah ni gaar: “Baaray e tapigpig rog . . . ni kug turguy ni ir e ba fel’ u wun’ug,” ere uw rogon ni nge yog Jehovah ni ir e ke “turguy ni nge gafgow”? (Isa. 42:1) Ma mang fan ni rayog ni nga nog ni ke felfelan’ Jehovah ko re n’ey?
7 Ra ngad nanged fan e re yiiy ney, ma ngad lemnaged e togopuluw ni tay Satan ko gagiyeg rok Jehovah. Ke ta’ Satan nga laniyan’ urngin e tapigpig rok Got nib mo’maw’ ni ngar pared ni yad ba yul’yul’ ngak Got. (Job 1:9-11; 2:3-5) Yul’yul’ ni tay Jesus nge mada’ ko yam’ e kari tamilangnag ni de riyul’ e n’en ni ke yog Satan. Nap’an ni pag Jehovah e pi toogor rok Kristus ngar lied ngem’, ma dariy e maruwar riy ni rib gel e kireban’ ni tay Jehovah u nap’an ni guy Fak ni kan li’ kem’. Machane, rogon ni guy feni yul’yul’ Fak e ri yibnag e felfelan’ ngak nib gel. (Prov. 27:11) Maku reb, e ki felfelan’ Jehovah ya manang fel’ngin e yam’ ni tay Fak nra yib ngak e piin nib yul’yul’.—Luke 15:7.
“Ni Maad’ad Ngak ni Bochan e Denen Rodad”
8, 9. (a) Uw rogon ma kan “maad’ad” ngak Jesus ni fan ko denen rodad? (b) Uw rogon ni ke micheg Peter e re n’ey?
8 Mu beeg e Isaiah 53:6. Girdi’ ni yad ma ngongliy e kireb e yad bod e saf ni ke yan nga bayang. Yad be gay e gin ni ngan chuwegrad riy ko m’ar nge yam’ ni ke af rok Adam ngorad. (1 Pet. 2:25) Bochan ni dan flont, ma dariy reb i fak Adam ni rayog ni nge fulweg e n’en ni ke mul u pa’ Adam. (Ps. 49:7) Machane, t’ufeg rok nib gel, “me gagiyegnag Somol e gechig nge aw ngak, ni fare gechig ni gadad gubin ni ba’ tapgin ni ngan pi’ ngodad,” me aw ngak Fak nrib t’uf rok ni fare Tapigpig ni turguy. Bochan ni pag ngan “maadad ngak” ni fan ko denen rodad min “toy ni bochan e kireb ni kad ngongliyed,” ma aram me yim’ Kristus ni fan ko denen rodad ni yim’ ni kan tining nga baley i gek’iy.
9 Yoloy apostal Peter ni gaar: “Ereray e re n’en ni ir e ke piningmed Got ngay; yi Kristus e ir e gafgow ni bochmed me dag ngomed rogon ni ngam folwokgad rok, ni aram e nguum leked luwan ay.” Ki weliy Peter ni ke yim’ Jesus ni fan ko denen rodad. Miki fanay e yiiy rok Isaiah nge ulul ngay ni gaar: “Maad’ad ni ke tay e ir e ke golnagmed.” (1 Pet. 2:21; Isa. 53:5) Re n’ey e ke bing e kanawo’ ngak e piin tadenen nge fel’ thilrad Got, ya ki yog Peter ni gaar: “Kristus e ir e yim’ ni fan ngomed; nri taab yay ni ke yim’ ni fan ko denen me mus, ni ir be’ nib fel’ me yim’ ni fan ngak e girdi’ nib kireb, ni fan e nge yog ni fekmed i yan ngak Got.”—1 Pet. 3:18.
“Bod Ba Pi Fak e Saf ni Yibe N’en ni Ngan Li’ Ngem’”
10. (a) Uw rogon ni weliy John ni Tataufe murung’agen Jesus? (b) Uw rogon mab puluw e thin ni ke yog?
10 Mu beeg e Isaiah 53:7, 8. Nap’an ni guy John ni Tataufe Jesus ni be yib, me gaar: “Baaram fare Fak e Saf rok Got ni ir e nge chuweg e denen rok e girdi’ nu fayleng!” (John 1:29) Nap’an ni be yog John ni Jesus e bod ba fak e Saf ma sana be lemnag fare thin rok Isaiah ni gaar: “Bod ba pi fak e saf ni yibe n’en ni ngan li’ ngem’.” (Isa. 53:7) Ki yiiynag Isaiah ni gaar, “Pi’ ir ngan li’ ngem’.” (Isa. 53:12) Ba puluw e re n’ey, ya fare nep’ ni tababnag Jesus fare madnom ni puguran ko yam’ ni tay me fek e wain me pi’ ngak fa 11 i apostal rok nib yul’yul’ ni gaar: “Ereray rachaeg ni ir e bayi micheg e m’ag u thilin Got nge girdi’, ni rachaeg ni bay map’ nga but’ ni fan ngak boor e girdi’ ni fan e nge n’ag Got fan e denen.”—Matt. 26:28.
11, 12. (a) Rogon ni m’agan’ Isak ngay ni nge pi’ ir ni maligach e mang e be dag u rogon e maligach rok Kristus? (b) Mang e ri dabda paged talin u murung’agen Jehovah u nap’an ni gad be un ko madnom ni Puguran ko yam’ ni tay Jesus?
11 I m’agan’ Jesus ngay ni ngan pi’ ni maligach ni be fol ko n’en nib m’agan’ Jehovah ngay. Taareb rogon ko n’en ni rin’ Isak kakrom. (Gen. 22:1, 2, 9-13; Heb. 10:5-10) Ya ri m’agan’ Isak ngay ni ngan pi’ ni maligach. Machane Abraham e ir e guy rogon ni nge pi’ fak ni maligach. (Heb. 11:17) Maku aram rogon nib m’agan’ Jesus ngay ni nge yim’, machane Jehovah e ir e dugliy u rogon ni ngan pi’ e re maligach nem. Re maligach rok Jesus nem e be dag nrib gel e t’ufeg rok Got ngak e girdi’.
12 I gaar Jesus: “Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) I yoloy apostal Paul ni gaar: “Got e ke dag ngodad gelngin feni ri gadad ba t’uf rok, ya ka gadad be par ni gadad bogi tadenen me yan i yim’ Kristus ni fan ngodad!” (Rom. 5:8) Arfan ni ngiyal’ ni gad be madnomnag e yam’ ni tay Kristus, ma ri dabda paged talin ni en ni turguy rogon e re maligach nem e Jehovah. Gad be un ko re madnom nem ni ir e ngad pininged e sorok ngak.
Fare Tapigpig e Ra Ayuwegrad ‘Ngar Manged Girdi’ nib Mat’aw’
13, 14. Uw rogon ni Tapigpig rok Jehovah e ke ayuwegdad ni ‘ngad manged girdi’ nib mat’aw’?
13 Mu beeg e Isaiah 53:11. Yog Jehovah murung’agen fare Tapigpig rok ni Ke turguy ni gaar: “I ir e tapigpig rog nib mat’aw; . . . me ngongliyrad ngar manged girdieg ni yad ba mat’aw.” Urngin pi fak Adam e kan gargelegrad ni yad bogi tadenen ma arfan ni ke yog ngorad “puluwoy ni yam’.” (Rom. 5:12; 6:23) Ba t’uf ni ngki fel’ e tha’ u thilin Jehovah nge girdi’ ni tadenen. Guruy ni 53 ko yiiy rok Isaiah e rib fel’ rogon ni ke weliy murung’agen Jesus ni yib nga thilin Got nge girdi’ ni tadenen ni gaar: “Ni maad’ad ngak ni bochan e denen rodad, min toy ni bochan e kireb ni kad ngongliyed. Gechig ni gafgow riy e ke golnagdad, dumow ni aw ngak e fasegdad ko maad’ad nda tayed.”—Isa. 53:5.
14 Bochan ni ke yim’ Kristus ni fan ko denen rodad ma ke ayuwegdad ‘ngad manged girdi’ nib mat’aw.’ Ki yoloy Paul ni gaar: “Got e turguy ni en ni Fak e nge par ni bod rogon Got. I Got e turguy ni nge sulweg urngin ban’en ngak u daken Fak. Mi Got e ngongliy e gapas u thilin e girdi’ nge ir u daken rachaen Fak ni map’ . . . ma aram me yog ni nge sulweg urngin ban’en ngak, ntin ni bay u fayleng nge tin ni bay u tharmiy.”—Kol. 1:19, 20.
15. (a) Mang ma aram e ‘tin ni bay u tharmiy’ ni yog Paul? (b) Mini’ e rayog ni nge kay fare flowa me unum fare wain ko Puguran, ma mang fan?
15 “Tin ni bay u tharmiy” ni ke fel’ thilrad Jehovah ni bochan rachaen Kristus ni map’ e yad e piin Kristiano ni kan dugliyrad. Kan piningrad ni ngar uned ngak Kristus ko gagiyeg u tharmiy. Ma ke ‘mat’awnagrad’ Got. (Rom. 5:1, 18) Jehovah e ke mang Chitamangirad. Fare Gelngin Got nib thothup e ke micheg ngorad ni yad “ra un ko flaab rok” Kristus, min piningrad ngar manged pilung nge prist ko gagiyeg rok u tharmiy. (Rom. 8:15-17; Rev. 5:9, 10) Mar manged bang ko Israel “rok Got” min fekrad ko fare “m’ag nib beech.” (Jer. 31:31-34; Gal. 6:16) Bochan ni yad girdien fare m’ag nib beech ma aram e rayog ni ngar ked fare flowa nib muun ngay e wain ni yima pi’ ko Puguran ko yam’ ni tay Jesus, yi yog Jesus ni gaar: “Re kap ney e bin nib beech e m’ag u thilin Got nge girdi’ ni rachaeg ni bay map’ nga but’ ni fan ngomed e ir e bayi micheg.”—Luke 22:20.
16. Mang ma aram e “tin ni bay u fayleng,” ma uw rogon ni kar mat’awgad u p’eowchen Jehovah?
16 “Tin ni bay u fayleng” e aram fapi yugu boch e saf rok Kristus ni athap rorad e ngar pared u fayleng ni manemus. Ku arrogon e pi cha’ ney ni ke ayuwegrad fare Tapigpig nge fel’ thilrad Jehovah. Bochan ni michan’rad ko biyul ni tay Kristus ma aram e “kar lukniged e mad rorad kar wechwechniged nga rachaen fare Fak e Saf,” ma ke mat’awnagrad Jehovah ni gathi kar manged pi fak ya kar manged e pi tafager rok. Ke pi’ ngorad e athap ni yad ra magey u nap’an “fare gafgow ni ba ga’.” (Rev. 7:9, 10, 14; Jas. 2:23) Fapi yugu boch e saf e dariy e athap rorad ni nga ranod nga tharmiy, ma aram e dab ra kayed fare flowa nge fare wain ko Puguran ko yam’ ni tay Jesus. Machane, yad ma un ngay ni yad be tay fan.
Ngan Pining e Magar Ngak Jehovah nge fare Tapigpig Rok nib Fel’ u Wan’!
17. Yiiy rok Isaiah ni kad filed u murung’agen fare Tapigpig e uw rogon ni ke tamilangnag lanin’dad ko fare Puguran ko yam’ ni tay Jesus?
17 Fapi yiiy rok Isaiah ni kad guyed ni murung’agen fare Tapigpig, e ban’en nib manigil ya ma tamilangnag lanin’dad ko fare Puguran ko yam’ ni tay Kristus. Ra ayuwegdad nge yog ni ngad pared “ni kad l’eged owchedad ngak Jesus, yi ir e be tor e michan’ rodad ngak.” (Heb. 12:2) Kad filed ni Fak Got e der ma togopuluw. Ba thil ngak Satan, ya ir e baadag ni nge fil Jehovah ban’en ngak, ya manang ni Jehovah e ir e Somol ni Th’abi Tolang. Kad guyed ni nap’an ni i machib Jesus u fayleng, ma ma kireban’ ko piin ni i machibnagrad, ma boor i yad e golnagrad ko m’ar me ayuwegrad nge fel’ thilrad Got. Ere ke dag rogon e pi n’en nra rin’ u nap’an nra mang Pilung ko bin nib beech e m’ag “ma tin nib yal’uw e bayi tay nga fayleng.” (Isa. 42:4) Jesus ni ir fare “tamilang ngak e pi nam” e machibnag murung’agen Gil’ilungun u fithik’ e pasig. Re n’ey e be puguran ngak pi gachalpen ni ngar machibniged fare thin nib fel’ u ga’ngin e fayleng u fithik’ e pasig.—Isa. 42:6.
18. Mang fan ni yiiy rok Isaiah e ke k’aringdad ni ngad pininged e magar ku Jehovah nge fare Tapigpig rok nib yul’yul’?
18 Yiiy rok Isaiah e ki gelnag e tamilangan’ rodad u gelngin e kireban’ ni tay Jehovah u nap’an ni pi’ Fak nib t’uf rok nga fayleng nge gafgow me yim’ ni fan ngodad. I felfelan’ Jehovah ni gathi bochan e gafgow ni tay Fak, ya bochan ni guy e yul’yul’ ni tay nge mada’ ko ngiyal’ ni yim’. Ere susun e ngad felfelan’gad ni bod Jehovah ni kad nanged ni urngin ban’en ni ke rin’ Jesus e ke micheg nib sasalap l’ugun Satan miki thothupnag Jesus fithingan Jehovah. Ere ke tamilangnag feni mat’aw e gagiyeg Rok ni th’abi tolang. Maku reb, e ke yim’ Jesus ni fan ko denen rodad. Aram rogon ni ke bing e kanawo’ ngak fachi ulung ni pi walagen ni kan dugliyrad nge fapi yugu boch e saf ni kar mat’awgad u p’eowchen Jehovah. Nap’an ni gad ra muulung ni fan ko fare Puguran, ma susun e ngaud pininged e magar ngak Jehovah nge fare Tapigpig rok nib yul’yul’.
Ngan Sul Nga Daken
• Uw rogon ni ke ‘turguy’ Jehovah ni nge ‘gafgow’ Fak?
• Mang e be yip’ fan fare thin ni “kan maad’ad ngak Jesus ni fan ko denen rodad”?
• Uw rogon ni ke ayuwegrad fare Tapigpig ‘ngar manged girdi’ nib mat’aw’?
• Yiiy ni kad filed u murung’agen fare Tapigpig e uw rogon ni ke tamilangnag lanin’dad ko fare Puguran?
[Picture on page 26]
“Kan dariyfannag ma kan dabuy”
[Picture on page 28]
“Me pi’ ir ngan li’ ngem’”
[Picture on page 29]
Fapi “yugu boch e saf” e yad ma un ko fare Puguran ni yad be tayfan