BIN 6

Ngan Tamilangnag Fan ni Kan Fanay Reb e Thin nu Bible

John 10:33-36

N’EN NI NGAN RIN’: Yug dab mu beeg reb e thin nu Bible mag yan ko bin migid. Mu guy rogon ni piin be motoyil ngom e yad ra guy rogon nib peth e n’en ni ga be beeg ko n’en ni ga be weliy.

ROGON NI NGAN RIN’:

Mu tamilangnag e thin riy nib ga’ fan. Tomuren ni kam beeg reb e thin nu Bible, mag tamilangnag yu bugithin riy ni bay rogon ko n’en ni ga be weliy. Rayog ni ngam rin’ e re n’ey ni aram e ngam sul u daken e yu bugithin nem ara mu fith reb e deer nra ayuweg e piin be motoyil ngom ni ngar guyed e tin nib ga’ fan e thin riy.

Faanra kam fanay yu bugithin nib thil ni ngam sul u daken e n’en ni be yog fare thin nu Bible, ma ngam guy rogon ni piin be motoyil ngom e rayog ni ngar guyed rogon nib peth fapi thin ko n’en ni ga be tamilangnag.
Mu tamilangnag e n’en nib t’uf ni nge par u laniyan’ e piin be motoyil. Nap’an ni ga ra beeg reb e thin nu Bible mag weliy rogon nib l’ag ko n’en ni ga be weliy.

Mu pithig e Bible rom ngam tay u nap’an ni ga be weliy fare thin nu Bible. Re n’ey e ra ayuweg e piin be motoyil ni ngar nanged rogon nib peth yu bugithin ni ga be yog ko fare verse.
Mu tamilangnag rogon ni ngan fol ko fare thin nu Bible. Dab mu weliy boch ban’en ndariy rogon ko n’en ni ga be guy rogon ni ngam tamilangnag. Mu dugliy urngin ban’en nib t’uf ni ngam weliy nra tamilangnag fan fapi n’em u wan’ e piin be motoyil ni be yan u rogon e tin ni yad manang ko n’en ni ga be weliy.