Ma Pow’iy Jehovah e Girdi’ Rok

1, 2. (a) Uw rogon nib thil e piin ni yad ma yog e thin ko Pi Mich Rok Jehovah ngak e piin ni yad ma yog e thin ko girdi’ u yugu boch e teliw? (b) Mang e gad ra weliy ko re article ney nge bin migid?

“MINI’ e en ta yog e thin romed?” Ireray reb e deer nib ga’ ni yima fith ngak e Pi Mich Rok Jehovah. Ma dariy e maruwar riy ni fan ni yima fith e re deer ney ngorad e bochan ni boor raba’ e teliw ni kemus ni taareb e pumoon ara taareb e ppin e ir e ma yog e thin ko urngin e girdi’ ko fare raba’ i teliw ara ir e en nib ga’ lungun. Machane, gadad e gad ba felfelan’ ngay ni gad ma yog ko piin ni yad ma fith e re deer ney ngodad ni En Ta Yog e Thin rodad e gathi reb e girdi’ nde flont. Ya Kristus e ir e en ni ma yog e thin rodad, ma Jehovah ni Chitamangin e ir e en ni ma yog e thin rok Kristus.​—Matt. 23:10.

² Machane, bay ba ulung i pumoon ni ka nog “fare tapigpig nib yul’yul’ ma ba gonop” ngorad ni yad ma yog e thin ko girdi’ rok Got e ngiyal’ ney. (Matt. 24:45) Ere, uw rogon ni gad manang nriyul’ ni Jehovah e ir e be pow’iydad u daken Fak? Re article ney nge bin migid e gad ra weliy riy rogon ni ke pow’iy Jehovah boch e girdi’ ni nga u rogned e thin ko girdi’ rok ni kab kakrom i yib. Gad ra weliy ko gal article ney dalip ban’en ni be micheg ni Jehovah e ir e i pow’iy e pi girdi’ nem kakrom maku ir e Be Yog e Thin ko girdi’ rok e ngiyal’ ney.​—Isa. 58:11.

GELNGIN GOT NIB THOTHUP E ARAM E N’EN NI PI’ GELNGIRAD

3. Mang e ayuweg Moses nge yag ni pow’iy piyu Israel?

³ Gelngin Got nib thothup e aram e n’en ni i pi’ gelngin e piin ni i fanayrad Got ni ngar rin’ed boch e maruwel rok. Am lemnag Moses ni ir e en ni mel’eg Got ni nge pow’iy piyu Israel. Mang e ayuweg ya nge yag ni rin’ e maruwel nni pi’ ngak nrib ga’ fan? I pi’ Jehovah gelngin nib thothup “ngak.” (Mu beeg e Isaiah 63:11-14.) Bochan ni pi’ Jehovah gelngin nib thothup ngak Moses, ma aram fan ni ir e i pow’iy e girdi’ rok u daken Moses.

4. Uw rogon ni nang piyu Israel ni bay gelngin Got nib thothup rok Moses? (Mu guy e sasing ni bay u tabolngin e re article ney.)

⁴ Bochan ndabiyog ni ngan guy gelngin Got nib thothup, ma uw rogon ni nang piyu Israel ni aram e n’en ni i pi’ gelngin Moses? Ya aram e n’en ni ayuweg Moses nge yag ni ngongliy boch e maang’ang me weliy murung’agen fithingan Got ngak Farao. (Ex. 7:1-3) Ku aram e re gelngin ni ayuweg ni nga i m’ug boch e fel’ngin nrib manigil ko ngongol rok ni bod rogon e t’ufeg, nge sobut’an’, nge gum’an’. Ma aram e pi fel’ngin ni ayuweg ni nge pow’iy piyu Israel. Riyul’ nrib thil Moses ngak boch e pilung u yugu boch e nam nib gel e thin rorad ma kemus ni yigoo yad e yad ma lemnagrad! (Ex. 5:2, 6-9) Ere, ba tamilang ni Jehovah e ir e ke mel’eg Moses ni nge pow’iy e girdi’ rok.

5. Mu weliy rogon ni pi’ Jehovah gelngin yugu boch e pumoon u Israel ni ngar pow’iyed e girdi’ rok.

⁵ Ku immoy yugu boch e pumoon nga tomuren ni ki pi’ Jehovah gelngin nib thothup ngorad ni ngar pow’iyed e girdi’ rok. “Joshua ni fak Nun e pi’ Got e gonop ngak.” (Deut. 34:9) “Me yib i ying fare gelngin Somol ngak Gideon nge gagiyegnag.” (Judg. 6:34, BT) Miki “yib fare gelngin Somol i ying ngak David ngi i gagiyegnag.” (1 Sam. 16:13, BT) Gubin e pi pumoon ney e ur taga’gad nga gelngin Got nib thothup ni nge ayuwegrad, ma aram e re gelngin ni ayuwegrad ni ngar rin’ed boch ban’en ndabiyog ni ngar rin’ed u gelngirad. (Josh. 11:16, 17; Judg. 7:7, 22; 1 Sam. 17:37, 50) Bochan e re n’ey ma aram mu un pining e sorok ngak Jehovah ko pi n’en ni ur rin’ed.

6. Mang fan nib m’agan’ Got ngay ni nga i tay piyu Israel fan e piin ni u rogned e thin rorad?

⁶ Mang e susun ni nge rin’ piyu Israel ni faanra aram rogon ni gelngin Got nib thothup e aram e n’en ni i pi’ gelngin e pi pumoon nem? Nap’an ni gun’gun’nag piyu Israel Moses ni bochan rogon ni be pow’iyrad, ma aram me fith Jehovah ni gaar: “Uw n’umngin nap’an ni nge par e pi girdi’ ney ni yad be darifannigeg?” (Num. 14:2, 11) Arrogon, i mel’eg Jehovah Moses, nge Joshua, nge Gideon, nge David ni ngar pow’iyed e girdi’ Rok. Ere, n’umngin nap’an ni i fol piyu Israel rok e pi pumoon nem ma aram e yad be fol rok Jehovah ni ir e En ni i Yog e Thin rorad.

I AYUWEGRAD E PI ENGEL

7. Uw rogon ni i ayuweg e pi engel Moses?

⁷ I ayuweg e pi engel e pi pumoon ni i fanayrad Got ni ngar rin’ed boch e maruwel rok. (Mu beeg e Hebrews 1:7, 14.) I yog Got ngak Moses e n’en ni nge rin’, miki ayuweg, ma be pow’iy u daken e pi engel rok. I l’og ni nge “yan ni nge gagiyeg me chuweg piyu Israel u tan pa’ yu Egypt, ni fare engel ni m’ug ngak u fithik’ e daramram ko fachi ke gek’iy ni be yik’ e ir e nge ayuweg.” (Acts 7:35) I pi’ fare Motochiyel “ngak e pi engel ngar bad ra pied ngak” Moses, ma aram e re motochiyel ni fanay Moses ni nge fonownag piyu Israel. (Gal. 3:19) Ki gaar Jehovah ngak: “Mman e chiney, ngam fek piyu Israel i yan ko fa gin ni ku gog ngom. Dab mu pag talin ni engel rog e bay i pow’iyem ko gin ni ngam sor ngay.” (Ex. 32:34) Der yog e Bible ni i guy piyu Israel e engel ni i rin’ e pi n’em. Machane, ba tamilang u rogon e fonow ni i pi’ Moses ngorad nge rogon ni i pow’iyrad nriyul’ ni immoy e pi engel rok Got ni ur ayuweged.

8. Uw rogon ni ayuweg e pi engel Joshua nge Hezekiah?

⁸ Fare engel ni ir e i “gagiyegnag e salthaw rok” Jehovah e aram e en ni i pi’ gelngin Joshua ni ir e yib nga tomuren Moses ni nge pow’iy e girdi’ rok Got ni ngar chamgad ngak piyu Kanaan ngar gelgad. (Josh. 5:13-15; 6:2, 21) Boch nga tomuren u nap’an ni Hezekiah ni Pilung e ir e be pow’iy e girdi’ rok Got, ma aram me yib bogi salthaw nu Assyria ni ngar chamgad nga Jerusalem. Machane, u lan taab nep’, ma aram me yan ba engel rok Jehovah “ko gin ni be par e salthaw nu Assyria riy me thang e pogofan rok 185,000.”​—2 Ki. 19:35.

9. Yugu aram rogon ni i oloboch e piin ni i tayrad Got ni ngaur pow’iyed piyu Israel kakrom, machane mang e ba m’agan’ ngay ni nge rin’ piyu Israel? Mu weliy rogon.

⁹ Riyul’ nib flont e pi engel nem, machane pi pumoon ni baaram ni ur ayuweged yad e dar flontgad. Bod ni, Moses e immoy bayay nde pining e sorok ngak Jehovah ko n’en ni rin’. (Num. 20:12) Me Joshua e de ning e ayuw rok Got u m’on ni nge fal’eg ba m’ag u thilrad piyu Gibeon. (Josh. 9:14, 15) Mus ngak Hezekiah ni immoy ba ngiyal’ ni i par ni ke “uf.” (2 Kron. 32:25, 26, BT) Yugu aram rogon ni i oloboch e pi pumoon nem, machane ba m’agan’ Jehovah ngay ni nge fol piyu Israel u rogon ni yad be pow’iyed yad. I pi’ e pi engel rok ni nge ayuweg e pi pumoon nem. Ere, ba tamilang ni ir e be pow’iy e girdi’ rok.

I POW’IYRAD E THIN ROK GOT

10. Uw rogon ni i pow’iy e Motochiyel rok Got Moses?

¹⁰ Thin rok Got e aram e n’en ni i pow’iy e piin ni i fanayrad Got ni ngar rin’ed boch e maruwel rok. Ma yog e Bible e “Motochiyel rok Moses” ko fare Motochiyel ni pi’ Got ngak piyu Israel. (1 Ki. 2:3) Machane, be yog e Bible ni Jehovah e ir e En ni Pi’ e re Motochiyel nem, maku thingari fol Moses riy. (2 Kron. 34:14) Tomuren ni yog Jehovah ngak Moses rogon ni nge ngongliy fare tabernacle, ma aram me ‘rin’ urngin e tin ni yog ngak ni nge rin’.’​—Ex. 40:1-16, BT.

11, 12. (a) Mang e ba m’agan’ Got ngay ni nge rin’ Joshua nge pi pilung ni ur gagiyegnaged e girdi’ rok? (b) Uw rogon ni i pow’iy e Thin rok Got e pi pumoon ni u rogned e thin ko girdi’ rok?

¹¹ Ka nap’an ni tabab Joshua i pow’iy e girdi’ rok Got, ma immoy e Thin rok Got rok ni kan yoloy nga but’. I gaar Got ngak: “Thingar um fil ni rran nge nep’, ma ngam guy rogon nguum rin’ urngin ban’en ni ba’ riy ni kan yoloy.” (Josh. 1:8) Boch nga tomuren, maku aram e n’en ni i rin’ e pi pilung ni ur gagiyegnaged e girdi’ rok Got. I tay Got chilen ngorad nthingar ur beeged fare Motochiyel ni gubin e rran, mar yoloyed nga but’, mu ur folgad u “gubin e tin ka nog riy ni ngan rin’.”​—Mu beeg e Deuteronomy 17:18-20, BT.

¹² Uw rogon ni i pow’iy e Thin rok Got e pi pumoon ni u rogned e thin ko girdi’ rok? Am lemnag e n’en ni rin’ Josiah ni Pilung. Tomuren nni pirieg fare babyor ko Motochiyel rok Moses, ma aram me fek e en tayol rok Josiah nge beeg ngak.a Ere, mang e rin’ e re pilung nem? “Faani rung’ag me guchthuy e mad rok.” Machane, gathi kemus e n’en ni rin’, ya pag e Thin rok Got ni nge pow’iy ma aram me kirebnag urngin e liyos ni bay u lan e re nam nem miki yog ni ngan madnomnag fare madnom ko Paluk’af. (2 Ki. 22:11; 23:1-23) Bochan ni fol Josiah nge yugu boch e pumoon ni yad ba yul’yul’ ko Thin rok Got, ma aram fan ni m’agan’rad ngay ni ngar yal’uweged mar tamilangnaged e pi fonow ni ur pied ko girdi’ rok Got. Bochan e n’en ni ur rin’ed ma aram e n’en ni ayuweg e girdi’ rok Got kakrom ni ngar rin’ed e tin nib m’agan’ ngay.

13. Uw rogon nib thil e piin ni ur pow’iyed e girdi’ rok Got ko piin ni ur pow’iyed girdien yugu boch e nam?

¹³ Riyul’ nrib thil e pi pilung nem ni yad ba yul’yul’ nga yugu boch e girdi’ ni u rogned e thin u yugu boch e nam kakrom, ya pi girdi’ nem e ur paged e gonop ko girdi’ ni nge pow’iyrad ma ur nameged ni ngar rin’ed boch ban’en nde par angin nib n’uw nap’an! Bod ni, piin ni ur pow’iyed piyu Kanaan nge girdi’ ko nam rorad e ur rin’ed boch e ngongol nib golong nib muun ngay e girdi’ u lan e tabinaw ni yad be par, nge pumoon ni be darngalnag e pumoon, nge ppin ni be darngalnag e ppin, nge girdi’ ni yad be par e gamanman, nge bitir ni yibe pi’ ni maligach, nge meybil ko liyos. (Lev. 18:6, 21-25) Ma piin ni ur pow’iyed piyu Babylon nge Egypt e da ur folgad ko pi motochiyel ni i fol piyu Israel riy ni be weliy murung’agen rogon ni ngan par ni yib beech. (Num. 19:13) Machane, girdi’ rok Got e ur guyed rogon ni i ayuwegrad e piin ni ur pow’iyed yad ni ngar pared nib machalbog e liyor rorad, mab beech e ngongol rorad, nge dowef rorad. Ere, ba tamilang ni Jehovah e ir e be pow’iyrad.

14. Mang fan ni yal’uweg Jehovah boch e pumoon ni ur pow’iyed e girdi’ rok?

¹⁴ Gathi urngin e pilung ni ur gagiyegnaged e girdi’ rok Got kakrom e ur folgad ko n’en ni i yog ngorad. Piin ndar folgad rok e ra siyeged ni ngar paged gelngin nib thothup, nge pi engel rok, nge Thin rok ni nge pow’iyrad. Ere, immoy boch e pi pumoon nem ni yal’uwegrad Jehovah ma boch i yad e chuwegrad ko liw rorad. (1 Sam. 13:13, 14) Faani boch nga tomuren ma aram me mel’eg Jehovah be’ ni nge yan nga lon urngin e pi pumoon nem me par ni ir e nge pow’iy e girdi’ rok nib fel’ rogon.

KE DUGLIY JEHOVAH BE’ NRAYOG NI NGE POW’IY E GIRDI’ ROK NRIB FEL’ ROGON

15. (a) Uw rogon ni yog e pi profet murung’agen be’ nra yib nra pow’iy e girdi’ rok Got nrib fel’ rogon? (b) Mini’ e cha’nem nni yiiynag murung’agen?

¹⁵ Bokum miriay e duw ni i yiiynag Jehovah nra dugliy be’ ni nge pow’iy e girdi’ rok nrib fel’ rogon. I yog Moses ngak piyu Israel ni gaar: “Somol ni Got romed e bayi pi’ ba profet ngomed ni bod gag ni bayi gagiyeg nge sum u fithik’ e tiromed e girdi’, ma nguum folgad rok.” (Deut. 18:15) I yiiynag Isaiah ni Cha’nem e ra mang e en ni ir e ‘nge yog e thin ma be tay murung’agen e pi nam.’ (Isa. 55:4) Kun thagthagnag nga laniyan’ Daniel ni nge yoloy murung’agen e ngiyal’ nra yib e “en ni Got e ke turguy ni nge gagiyeg.” (Dan. 9:25) Ma nap’an ni yib Jesus Kristus ma aram me yog ni ir e en “Tayog e thin” ko girdi’ rok Got. (Mu beeg e Matthew 23:10.) Ba m’agan’ pi gachalpen Jesus ngay ni ngar folgad rok, ma kub mich u wan’rad ni ir e en ni ke mel’eg Jehovah. (John 6:68, 69) Ere, mang e micheg ngorad ni Jesus Kristus e aram e en ni i fanay Jehovah ni nge pow’iy e girdi’ rok?

16. Mang e be micheg ni gelngin Got nib thothup e aram e n’en ni pi’ gelngin Jesus?

¹⁶ Gelngin Got nib thothup e aram e n’en ni pi’ gelngin Jesus. Nap’an nni taufenag Jesus, ma aram me guy John ni Tataufe e “tharmiy ni be mab, me guy fare Kan ni Thothup [“gelngin Got nib thothup,” NW] ni be yib u lang i yib nga daken ni bod ba bulogol.” Tomuren e re n’ey, ma aram me pow’iy gelngin Got nib thothup ‘Jesus ni nge yan nga daken e ted.’ (Mark 1:10-12) Ma nap’an ni i machib Jesus u fayleng, ma aram me pi’ gelngin Got nib thothup gelngin ni nge ngongliy boch e maang’ang ma be fil e thin rok Got ko girdi’. (Acts 10:38) Maku reb e, ki ayuweg gelngin Got nib thothup Jesus ni nge m’ug boch e fel’ngin ko ngongol rok ni bod rogon e t’ufeg, nge felfelan’, nge michan’ nib gel. (John 15:9; Heb. 12:2) Dariy be’ ni ke pow’iy e girdi’ rok Got ni ke m’ug gelngin Got nib thothup rok ni bod rogon Jesus. Ere, riyul’ ni aram e en ni ke mel’eg Jehovah.

17. Uw rogon ni i ayuweg e pi engel Jesus?

¹⁷ I ayuweg e pi engel Jesus. De n’uw nap’an nga tomuren nni taufenag Jesus, ma aram “me yib e pi engel ngar bad ra pigpiggad ngak.” (Matt. 4:11) In e awa u m’on ni nge yim’, ma aram “me yib ba engel nu tharmiy i m’ug ngak nge pi’ gelngin.” (Luke 22:43) Ba pagan’ Jesus nra pi’ Jehovah e engel rok ni nge ayuweg ko ngiyal’ ni ke t’uf e ayuw rok ya nge yag ni rin’ e n’en nib m’agan’ Jehovah ngay.​—Matt. 26:53.

18, 19. Uw rogon ni i pow’iy e Thin rok Got Jesus nge pi n’en ni machibnag?

¹⁸ Thin rok Got e aram e n’en ni i pow’iy Jesus. Ka nap’an ni tabab Jesus ko machib, ma i pag e thin ni bay u lan fare Babyor nib Thothup ni nge pow’iy. (Matt. 4:4) Bin riyul’ riy e, i par nib yul’yul’ ko Thin rok Got ngki mada’ ko ngiyal’ ni yim’ u daken fare ley i gek’iy. Tin tomur e thin ni yog u m’on ni nge yim’ e ba muun ngay boch e yiiy u murung’agen fare Messiah. (Matt. 27:46; Luke 23:46) Pi tayugang’ ko teliw ni ur moyed u nap’an Jesus e yad ba thil ni bochan e nap’an ni yad ra guy ni be togopuluw e pi machib rorad ko Thin rok Got ma aram e dab ra folgad ko Thin rok Got. I sul Jesus u daken e thin ni yog Jehovah u daken Isaiah ni profet ni murung’agrad ni gaar: “Pi girdi’ ney e yad be ta’ fag ko thin ni yad be yog, machane rib mal’af lanin’rad rog. Mm’ay fan e siro’ nge pigpig ni yad be tay ngog, ya pi motochiyel ni girdi’ e sunumiy e yad be machibnag ngak e girdi’ ni gowa pi motochiyel rok Got!” (Matt. 15:7-9) Ere gur, rayog ni nge mel’eg Jehovah bagayad e pi girdi’ nem ni nge pow’iy e girdi’ rok?

¹⁹ I pag Jesus e Thin rok Got ni nge pow’iy e ngongol rok nge machib rok. Nap’an ni togopuluw e pi tayugang’ ko teliw ngak, ma de fanay e gonop rok ara pi n’en ni manang ni nge fulweg lungurad. Ya gubin ngiyal’ ni i fanay e thin ni bay u lan fare Babyor nib Thothup. (Matt. 22:33-40) Maku reb e, da i par nga i weliy ko girdi’ murung’agen e yafos rok u tharmiy ara rogon nni sunmiy e palpalth’ib, ya ‘tamilangnag an’rad ngar nanged fan e pi n’en ni bay u lan e babyor nib thothup.’ (Luke 24:32, 45) Rib ga’ fan e Thin rok Got u wan’ Jesus, ma ri baadag ni ma weliy ko girdi’.

20. (a) Uw rogon ni i pining Jesus e sorok ngak Got? (b) Uw rogon nib thil Jesus ngak Herod Agrippa I, ma mang e be fil e re n’ey ngodad u rogon e piin ni ma mel’egrad Jehovah ni ngar pow’iyed e girdi’ rok?

²⁰ Yugu aram rogon ni i ngat e girdi’ ko ‘thin nib fel’’ ni i weliy Jesus ngorad, machane gubin ngiyal’ ni i pining e sorok ngak Jehovah ni ir e En ni Ke Fil e pi n’em ngak. (Luke 4:22) Nap’an ni yog be’ nib moon ni boor ban’en rok e ‘Tamachib nib fel’’ ngak Jesus ya nge m’ug riy ni be tayfan, ma aram me gaar Jesus ngak: “Mang ni ka mog ni gub fel’? Ya dariy taabe’ nib fel’, ya ke mus ni yigoo Got e ba fel’.” (Mark 10:17, 18) Riyul’ nrib thil Jesus ngak Herod Agrippa I ni ir e mang pilung u Judea sogonap’an meruk e duw nga tomuren! Nap’an reb e muulung nni tay, ma aram me yan Herod i yon’ “madan e pilung” nga daken. Ma nap’an ni guy e girdi’, ma aram mar tababgad ni ngar tolulgad ni be lungurad: “Cha’ ney ni be welthin e gathi ba girdi’, ya ba got!” Ri uf Herod ko re n’em. Ere, mang e buch? “Ka chingiyal’ nem me gad e engel rok Somol pa’ ngak Herod, ni bochan e yog e girdi’ ni ir ba got ma de talegrad nge mang Got e nog e sorok ngak. Me longuy e fak l’ud Herod nge yim’.” (Acts 12:21-23) Ere, ba tamilang ni gathi Jehovah e ir e ke mel’eg Herod ni nge mang pilung. Machane, Jesus e ba thil ni bochan e micheg ni Got e ir e ke mel’eg, ma gubin ngiyal’ ni i pining e sorok ngak Jehovah ni ir e En Th’abi Tolang ni Be Pow’iy e girdi’ rok.

21. Mang e gad ra weliy ko bin migid e article?

²¹ De tay Jehovah Jesus ni nge pow’iy e girdi’ rok u lan in e duw. Ya tomuren nni faseg ko yam’ me yog ni gaar: “Kan pag fan urngin ban’en ngog u tharmiy ngu but’. Dab mpaged talin ni gubin ngiyal’ ma gu ba’ romed, nge yan i mada’ nga tomren e fayleng [“ngiyal’ ni ke chugur nga tomuren e re m’ag ney,” NW].” (Matt. 28:18-20) Ere, chiney ni bay Jesus u tharmiy ni ir reb e kan ndab ni guy e uw rogon ni be pow’iy e girdi’ rok Got u fayleng? Mini’ e ra fanay Jehovah ni nge maruwel u tan pa’ Kristus ni nge pow’iy e girdi’ rok Jehovah? Ma uw rogon nrayog ni nge nang e piin Kristiano ko mini’ e pi girdi’ nem? Bin migid e article e ra tamilangnag e fulweg ko pi deer ney.