N’en Nra Rin’ Got ko Pi N’en nib Kireb ni Be Buch

Be tamilangnag e Bible murung’agen e n’en nra rin’ Jehovah nge Jesus Kristus ni Fak ko pi gafgow ni be k’aring Satan ni Moonyan’. Be yog e Bible ni gaar: “Ereray fan ni yib i m’ug Fak Got [Jesus], ni bochan e nge kirebnag e maruwel rok e re moonyan’ nem.” (1 John 3:8) Yira chuweg gubin ban’en ko re fayleng ney nib kireb, nib muun ngay e chogow nge fanenikan nge ku boch ban’en. Ke micheg Jesus ni “en ni be gagiyegnag e fayleng” ni aram Satan ni Moonyan’ e yira “l’uf pa’” ko gagiyeg ni be tay. (John 12:31) Bochan ni dabkiyog ni nge bannag Satan e girdi’, ma ra par e girdi’ nib mat’aw u daken e fayleng, ma ra par ni bay e gapas riy.​—2 Peter 3:13.

Ma uw rogon e piin ni dubrad ni ngar thilyeged e ngongol rorad, ma yad baadag ni ngar ululgad i rin’ e kireb? Am lemnag e re thin ney ni kan micheg ni be gaar: “Girdi’ nib mat’aw ni girdi’ ni dariy thibngin e yad ra par u lan e re nam rodad ney. Machane Got e bayi buk’liy e piin kireb ko fare nam me pug e pi tadenen nge chuweg riy ni bod e pan ni kan pug u but’.”(Proverbs 2:21, 22, BT) Ma dab kun pirieg e piin nib kireb e ngongol rorad. Ngiyal’ nem ni ke gapas e fayleng e ra munmun ma yira chuweg e piin ni yad be fol ko pi motochiyel rok Got u tan gelngin e denen.​—Roma 6:17, 18; 8:21.

Uw rogon nra chuweg Got e pi n’en nib kireb u lan e bin nib beech e fayleng? Re n’em e gathi be yip’ fan nra darifannag Got fare tow’ath ni puf rogon ni ke pi’ ko girdi’ ni aram e nge n’igin e girdi’ ni ngar boded e robot. Ya bin riyul’ riy e ra fil e pi n’en nib m’agan’ ngay ko piin ni yad ra fol rok, me ayuwegrad ni ngar thilyeged e lem nge ngongol rorad.

Mang e ra rin’ Got ko pi gafgow ni ma buch ndan lemnag? Ke micheg ndaki n’uw nap’an ma ra gagiyegnag e Am rok e fayleng. Ma Jesus Kristus ni aram e en ni ke dugliy Got ni nge mang Pilung u Gil’ilungun e bay gelngin ni nge golnag e piin nib m’ar. (Matthew 14:14) Ku bay gelngin Jesus ni nge taleg e yoko’ nge durru’ nge ku boch ban’en ni ma gafgow e girdi’ riy. (Mark 4:35-41) Ere, ra chuw e gafgow ni ma yib ngodad ni “bod e arche’ ni ra gin ma ke aw ko wup.” (Eklesiastes 9:12, BT) Nap’an nra gagiyeg Jesus ma dakuriy be’ nra gafgow.​—Proverbs 1:33.

Ma uw rogon bokum milyon e girdi’ nib gel e gafgow ni ur ted u m’on ni ngar m’ad? Dawori n’uw nap’an u m’on ni ke faseg Jesus Lazarus ko yam’ me yog ni gaar: “I gag owchen e fos ko yam’ nge yafos.” (John 11:25) Arrogon, bay gelngin Jesus ni nge faseg e piin ni kar m’ad!

Faanra ba fel’ u wan’um fare athap ko par u fayleng ndakuriy ban’en nib kireb nra buch rok e piin nib mat’aw, me ere gur, mang fan ndab mu nameg ni ngkum fil boch murung’agen e bin riyul’ e Got nge pi n’en nib m’agan’ ngay u daken e fol Bible? Pi Mich Rok Jehovah ni yad ma par ko binaw rom e yad ba felfelan’ ngay ni ngar ayuweged gur ni ngam nang e tin riyul’. Rayog ni nga mog ni nga nib ni guyem ara mu yol ko piin ni kar fal’eged e re ke babyor ney.