“Somol e Manang e Piin ni Yad Girdien”

1. Mu weliy ban’en ni rin’ boch e tapigpig rok Got kakrom ni be dag ndabiyog ni ngan bannag Got. (Mu guy e sasing ni bay u tabolngin e re article ney.)

REB e kadbul me yan i sak’iy Aron ni ir e En Th’abi Tolang ko Prist nga langan e garog ko fare tabernacle rok Jehovah ni be kol barba’ i fen e fek nifiy ni yima urfiy bogi ban’en nib fel’ bon riy. Ma bay Korah nge 250 e pumoon u bang nib chugur ni yad be pi’ e maligach ngak Jehovah nra bagayad ma ku be kol barba’ i fen e fek nifiy ni yima urfiy bogi ban’en nib fel’ bon riy. (Num. 16:16-18) Yira guy e pi pumoon nem ma gowa yad be pigpig ngak Jehovah ni yad ba yul’yul’. Machane, bin riyul’ riy e goo Aron e ba yul’yul’ ngak Got ma fapi pumoon ni yad 250 u gubin e kemus ni yad be guy rogon ni ngar feked fare liw ko prist. (Num. 16:1-11) Kar bannaged yad ya yad be lemnag nib fel’ e pigpig ni yad be tay u wan’ Jehovah. Machane bin riyul’ riy e yad be k’aring e damumuw ngak, ya manang ko mang e bay u gum’ircha’rad.​—Jer. 17:10.

2. Mang e yog Moses nra buch, ma riyul’ ni buch ni aram rogon, fa?

² Reb e ran u m’on riy, me yog Moses ni gaar: “Gabul ni kadbul e bayi dag Somol ngodad ko mini’ e en nib mil fan ngak.” (Num. 16:5, BT) Ma aram e n’en ni buch, ya pi’ Jehovah e “nifiy ni be daramram nge urfiy [Korah nge] fa 250 i pumoon ni kar pied e incense,” ma re n’ey e be micheg ko mini’ e piin nriyul’ ni yad be pigpig ngak Jehovah, ma mini’ e piin ni yad be dake yad be pigpig ngak. (Num. 16:35; 26:10, BT) Ke ayuweg Jehovah Aron ni nge magey nib fas, ya goo ir e i par nib fel’ u wan’.​—Mu beeg e 1 Korinth 8:3.

3. (a) Mang e buch u nap’an apostal Paul? (b) Mang e rin’ Jehovah ngak e piin ni ur togopuluwgad ngak u boch e chibog u m’on riy?

³ Sogonap’an 1,500 e duw nga tomuren ni buch e re n’ey, miki buch ban’en ni taareb rogon ngay u nap’an apostal Paul. Immoy boch e girdi’ ni u rogned ni yad e Kristiano ni ur filed boch e machib ni googsur ko girdi’ ma ka yad be par u lan e ulung. Yira guy e pi girdi’ nem ma yira lemnag ni ka taareb rogorad ko tin ka bay e girdi’ u lan e ulung. Machane, bin riyul’ riy e ur rin’ed boch ban’en ni i magawonnag e pi Kristiano ni yad ba yul’yul’. Pi girdi’ nem ni yad bod e saf u wuru’ i dowrad, machane bin riyul’ riy e yad bod e wolf, e ur kirebnaged “rogon nib mich Kristus u wan’ boch e girdi’.” (2 Tim. 2:16-18) Machane, i guy Jehovah e n’en ni i buch. Ma sana manang Paul e re n’ey ni bochan e n’en ni rin’ Got ngak Korah nge fapi girdi’ ni yad ba muun ngak u boch e chibog u m’on riy. Ere, ngad weliyed reb e thin nu Bible nib manigil ma gad guy e n’en nrayog ni ngad filed riy.

“I GAG E SOMOL MA RI DAB GU THIL”

4. Mang e ke mich u wan’ Paul, ma uw rogon ni weliy e re n’ey ngak Timothy?

⁴ Ba mudugil u wan’ Paul ni faanra ud dake gad be liyor ngak Jehovah ma manang, ma kub mich u wan’ ni manang Jehovah ko mini’ e piin nriyul’ ni yad ba yul’yul’ Ngak. I dag Paul nib mich e re n’ey u wan’ ko thin nni thagthagnag nga laniyan’ nge yoloy nge yan ngak Timothy. Tomuren ni weliy Paul rogon ni ke magawon laniyan’ boch e girdi’ ko tirok Got ban’en ni bochan e piin ni ur dake yad e Kristiano, me yoloy ni gaar: “Machane fare def nib gel ni ke fal’eg Got rogon ke tay e dabiyog ni ngan rurug; ma baaray e thin ni kan yoloy nga daken ni gaar: ‘I Somol e manang e piin ni yad girdien’; ma ki gaar, ‘En nra gaar e ir reb e girdi’ rok Somol e thingari pi’ keru’ ko ngongol nib kireb ni be rin’ nge dab ki rin’.’”​—2 Tim. 2:18, 19.

5, 6. Mang e yip’ Paul fan u nap’an ni yoloy murung’agen “fare def nib gel ni ke fal’eg Got rogon ke tay,” ma uw rogon ni ke ayuweg Timothy?

⁵ Mang e ba thil u rogon e thin ni fanay Paul u nap’an ni yoloy e re thin ney? Ke mus e re thin nu Bible ni be weliy murung’agen “fare def nib gel ni ke fal’eg Got rogon ke tay.” Ma fanay e Bible fare bugithin ni “def” ni nge yip’ fan boor ban’en. Bod ni be taareb rogonnag e Bible e def ko pi motochiyel rok Got ni ma gagiyegnag rogon ni ma mithmith e fayleng nge rogon ni ma par nib mudugil. (Ps. 104:5) Kun taareb rogonnag e def nga rogon nra lebguy Jesus e tin nib m’agan’ Jehovah ngay. (1 Kor. 3:11; 1 Pet. 2:6) Ere, mang e yip’ Paul fan u nap’an ni yoloy murung’agen “fare def nib gel ni ke fal’eg Got rogon ke tay”?

⁶ Nap’an ni be weliy Paul murung’agen e thin ni yog Moses ni bay ko Numbers 16:5 ni murung’agen Korah nge piin ni yad ba muun nga ba’ rok, miki weliy murung’agen “fare def nib gel ni ke fal’eg Got rogon ke tay.” Ere, ba tamilang ni fan ni weliy Paul murung’agen e pi n’en ni buch u nap’an Moses e bochan ni nge pi’ e athamgil nga laniyan’ Timothy me puguran ngak nrayog rok Jehovah ni nge guy urngin ban’en. De pag Jehovah boch e girdi’ u lan e ulung e ngiyal’ nem ni kar chelgad yad be fil boch ban’en nde riyul’, ni ngar magawonnaged e tin nib m’agan’ ngay ni ku bod rogon nde pag Korah ni nge magawonnag e yaram rok. Ri de tamilangnag Paul fan “fare def nib gel ni ke fal’eg Got rogon ke tay.” Yugu aram rogon, ma thin ni yog e ayuweg Timothy ni nge pagan’ ngak Jehovah.

7. Mang fan nrayog ni nge pagan’dad ni Jehovah e ir be’ nib yul’yul’ ma gubin ngiyal’ ni ma rin’ e tin nib mat’aw?

⁷ Dariy ba ngiyal’ nra thil e pi kenggin e motochiyel rok Jehovah. Be gaar e Psalm 33:11: “Tin ni ke lemnag ke ta’ e bayi par ndariy n’umngin nap’an, ma tin ni ke finey e bayi par ndariy n’umngin nap’an.” Yugu boch e thin nu Bible e be yog ni gagiyeg rok Jehovah, nge t’ufeg rok, nge rarogon nib mat’aw, nge feni yul’yul’ e ra par ndariy n’umngin nap’an. (Ex. 15:18; Ps. 106:1; 112:9; 117:2) Ma Malaki 3:6 e be gaar: “I gag e Somol ma ri dab gu thil.” Ku be yog e James 1:17 ni “ir e der ma thil.”

BOCH E “THIN NI KAN YOLOY” NRA GELNAG E MICHAN’ RODAD NGAK JEHOVAH

8, 9. Mang e rayog ni ngad filed ko fapi “thin ni kan yoloy” ni faani weliy Paul u lan e fanathin rok?

⁸ Fapi thin ni yoloy Paul ni bay ko 2 Timothy 2:19 e be weliy murung’agen ba def ni bay e thin ni kan yoloy nga daken. Kakrom e ba ga’ ni yima tay e thin nga bang ko def ko naun ya ngan nang ko mini’ e toy fare naun fa mini’ e tafen. Paul e ir e som’on ni fanay e re fanathin ney u nap’an ni be yoloy boch e thin nu Bible.a Fapi thin ni bay ko “fare def nib gel ni ke fal’eg Got rogon ke tay” e be weliy murung’agen l’agruw ban’en. Bin som’on e, “Somol e manang e piin ni yad girdien,” ma bin migid e, “En nra gaar e ir reb e girdi’ rok Somol e thingari pi’ keru’ ko ngongol nib kireb ni be rin’ nge dab ki rin’.” Re thin ney e be puguran ngan’dad e n’en ni bay ko Numbers 16:5.​—Mu beeg.

⁹ Mang e rayog ni ngad filed ko fapi “thin ni kan yoloy” ni faani weliy Paul murung’agen? Gad be fil riy ni pi n’en nib ga’ fan u wan’ Jehovah nge pi kenggin e motochiyel rok e be tor nga daken l’agruw ban’en: (1) Ma t’ufeg Jehovah e piin ni yad ba yul’yul’ ngak, ma (2) ma fanenikay Jehovah e ngongol nde mat’aw. Ere, mang rogon e re n’ey ko pi n’en ni ma machibnag boch e girdi’ u lan e ulung ni kar chelgad kar togopuluwgad ko tin riyul’?

10. Uw rogon ni magawon laniyan’ boch e walag ni yad ba yul’yul’ u nap’an Paul ni bochan e ngongol rok boch e girdi’ nra chelgad ngar togopuluwgad ko tin riyul’?

¹⁰ Dabisiy ni ke magawon laniyan’ Timothy nge ku boch e walag ni yad ba yul’yul’ ni bochan e pi n’en ni i rin’ e pi girdi’ nem u fithik’rad ni kar chelgad kar togopuluwgad ko tin riyul’. Ku dabisiy ni i lemnag boch e Kristiano ko mang fan ni un pag e pi girdi’ nem ni ngar pared u lan e ulung. Rayog nsana i lemnag e pi Kristiano nem ko rayog rok Jehovah ni nge guy e n’en nib thil u thilin e pigpig ni ur ted nge pigpig ni i tay e pi girdi’ nem fa dabiyog.​—Acts 20:29, 30.

11, 12. Uw rogon ni ke gel e michan’ rok Timothy ni bochan e babyor ni pi’ Paul ngak?

¹¹ Dariy e maruwar riy nre gi babyor nem ni yoloy Paul ngak Timothy e gelnag e michan’ rok, ya puguran Paul ngak Timothy rogon ni ke m’ug nib m’agan’ Got ko liyor ni i tay Aron ngak, nge rogon ni ke gagiyelnag Got e ngongol rok Korah nde yul’yul’ ma de m’agan’ ngay, nge rogon ni thang Korah. Ere, n’en ni be yog Paul u roy e, yugu aram rogon ni immoy boch e Kristiano u lan e ulung e ngiyal’ nem ni ur dake yad be liyor ngak Jehovah, machane ra tomur riy ma ra gagiyelnag Jehovah e piin ni yad girdien ni bod rogon ni rin’ u nap’an Moses.

¹² Dabi thil Jehovah; ma rayog ni nge pagan’uy ngak. Ma fanenikay e tin nde mat’aw ban’en, ma ra taw nga nap’an ni ke dugliy u wan’ ma ra gechignag e piin ndab ra talgad i ngongliy e kireb. Bochan ni i yog Timothy ni “ir reb e girdi’ rok” Jehovah, ma aram fan ni kan puguran ngak ni nge siyeg e ngongol ko pi girdi’ nem ni ur dake yad boch e Kristiano.b

YIRA TOW’ATHNAG E PIIN NI YAD MA PIGPIG U FITHIK’ E YUL’YUL’

13. Mang e rayog ni nge pagan’dad ngay?

¹³ Fapi thin ni yog Paul e ku rayog ni nge pi’ e athamgil nga lanin’dad. Bin som’on, e gad ba felfelan’ ni ngad nanged ni manang Jehovah ni gad ba yul’yul’. Machane, gathi kemus ni manang, ya ri ma lemnag e piin ni yad girdien. Be gaar e Bible: “I Somol e ma fal’eg i yaliy e re fayleng ney ni ga’ngin, ni nge pi’ gelngin e piin yad ba yul’yul’ ngak u gum’ircha’rad.” (2 Kron. 16:9, BT) Ere, rayog ni nge pagan’dad ni pi n’en ni gad ma rin’ ni fan ngak Jehovah ni ke ‘yib u gum’ircha’dad nib machalbog,’ e dabi aw nib m’ay fan.​—1 Tim. 1:5; 1 Kor. 15:58.

14. Ba miti mang pigpig e ba fanenikan Jehovah?

¹⁴ Ku ma fanenikay Jehovah e piin ni yad ma dake yad be liyor ngak. Bochan ni “ma fal’eg i yaliy e re fayleng ney ni ga’ngin,” ma rayog rok ni nge guy e piin ndarur ‘yul’yul’gad ngak u gum’ircha’rad.’ Be yog e Proverbs 3:32, BT ni Jehovah e ma “fanenikan e girdi’ ni ma rin’ e kireb,” ara piin ni yad ma mith ngaur rin’ed e kireb ma nap’an e bay ra bad nga fithik’ e girdi’ mu ur dake yad be rin’ e tin nib fel’. Yugu aram rogon nrayog ni nge bannag e pi girdi’ ney be’ u taa bochi ngiyal’, machane gad manang ni kab gel gelngin Jehovah ma ir e Got ko tin nib mat’aw. Ere ‘dabi fel’ rogon e yafos rorad ni faanra yad be guy rogon ni ngar mithaged e pi denen rorad.’​—Prov. 28:13; mu beeg e 1 Timothy 5:24; Hebrews 4:13.

15. Mang e susun ni ngad siyeged, ma mang fan?

¹⁵ Yooren e pi tapigpig rok Jehovah e yad ba yul’yul’ ngak. Ma dabiyog ni nga yigi pos reb e walag u lan e ulung me chel nga i rin’ boch ban’en nib togopuluw ngak Jehovah. Machane, faanra ke buch e re n’ey u nap’an Moses, ngu lan e ulung ni Kristiano ko bin som’on e chibog, me ere ku rayog ni nge buch e ngiyal’ ney. (2 Tim. 3:1, 5) Ere, gur, re n’ey e be yip’ fan ni nge dab ki pagan’dad nga rogon e pigpig ni be tay pi walagdad ngak Jehovah? Ri danga’! Ya dabi fel’ ni ngaud lemnaged boch ban’en u murung’agen pi walagdad ndariy e mich riy. (Mu beeg e Roma 14:10-12; 1 Korinth 13:7.) Maku reb e faanra dabi pagan’dad nga rogon e pigpig ni be tay pi walagdad u lan e ulung ma rayog ni nge magawonnag e tha’ u thildad Jehovah.

16. (a) Mang e rayog ni ngad rin’ed ya nge yag nda guyed rogon ndabi sum e lem ndariy e yul’yul’ riy u gum’ircha’dad? (b) Mang boch ban’en nrayog ni ngad filed ko fare thin ni kenggin e, “Mu Changargad Ngomed”?

¹⁶ Ra reb e Kristiano “ma nge mang ir e changar ngak.” (Gal. 6:4) Bochan ndawor da flontgad ma rayog ni ngad lemnaged nib m’agan’ Jehovah ko pigpig ni gad be tay ngak, machane bin riyul’ riy e danga’. (Heb. 3:12, 13) Ere, ba fel’ ni nge taw nga ba ngiyal’ ma gad fal’eg i lemnag fan ni gad be pigpig ngak Jehovah. Rayog ni ngad fithed gadad ni nge lungudad: ‘Gu ma pigpig ngak Jehovah ni bochan e ba t’uf rog ma gu baadag ni nge mang ir e i gagiyegnigeg? Fa kemus ni gu be pigpig ngak ni bochan e pi flaab ni gu be athapeg ni nge yag ngog u Paradis?’ (Rev. 4:11) Dariy e maruwar riy ni faanra ud fal’eged i lemnag fan ni gad be pigpig ngak Got ma gad guy rogon ndabi sum e lem ndariy e yul’yul’ riy u gum’ircha’dad, ma ra yib angin ngodad.

GAD RA PAR NI GAD BA YUL’YUL’ MA GAD RA FELFELAN’

17, 18. Mang fan nsusun e ngad pigpiggad ngak Jehovah ni gad ba yul’yul’?

¹⁷ Boor angin nra yib ngodad ni faan gad ra athamgil ni ngad pigpiggad ngak Got ni gad ba yul’yul’. Be gaar fare psalmist: “Ba felan’ e en ndakir yog Somol ngak ni be rin’ faanem e kireb; ma kar wergow urngin mit e sabanban.” (Ps. 32:2) Arrogon, piin ni yad ma pigpig u fithik’ e yul’yul’ e yad ba felfelan’, ma rayog ni ngar pared ni yad ba felfelan’ ndariy n’umngin nap’an boch nga m’on.

¹⁸ Dabki n’uw ma ra gagiyelnag Jehovah e piin ni yad ma rin’ e tin nib kireb ara piin ni yad ma dake yad be pigpig ngak, me gagiyelnag e ‘n’en nib thil u thilin e piin ni yad mmat’aw nge piin ni yad be ngongliy e kireb, ngu thilin e en ni be pigpig ngak nge en nder pigpig ngak.’ (Mal. 3:18) Machane, chiney ni gad be sonnag e re ngiyal’ i n’em e rayog ni nge pagan’dad ni “ke yiluy e changar rok ngak e piin ni yad mmat’aw ma gubin ngiyal’ ni ma rung’ag e meybil rodad.”​—1 Pet. 3:12.