Girdi’ rok Jehovah e Yad Ma ‘Pi’ Keru’rad ko Ngongol nib Kireb’

1. Mang reb e ban’en ni gad ma tay nib ga’ fan ko liyor rodad ngak Got?

KAAM guy fare ngachal ni Jehovah ni kan yoloy nga downgin e rungrung u reb e naun ara nga daken ban’en ni kan ngongliy? Ba mutrug ni ga ra felfelan’ u nap’an ni ga ra guy e re ngachal ney. Ya bin riyul’ riy e, re ngachal rok Got ney e aram ban’en ni gad ma tay nib ga’ fan ko liyor rodad! Ma aram fan ni yima yog e Pi Mich Rok Jehovah ngodad. Machane, bochan ni gad ma fek e re ngachal ney, ma aram fan ni gad manang ni bay ban’en nib milfan ngodad.

2. Ba gaman ni kemus ni nga u dogned fithingan Got, fa?

² Ra ngad fel’gad u wan’ Jehovah ma de gaman ni kemus ni nga u dogned fithingan. Ya thingari puluw e ngongol rodad ko pi motochiyel rok. Aram fan ni be yog e thin rok Got ni ngad ‘pied keru’dad ko kireb.’ (Ps. 34:14) Ku aram e n’en ni weliy apostal Paul murung’agen u nap’an ni gaar: “En nra gaar e ir reb e girdi’ rok Somol e thingari pi’ keru’ ko ngongol nib kireb.” (Mu beeg e 2 Timothy 2:19.) Yi manangdad ni gadad e Pi Mich Rok Jehovah ni bochan e gad ma yog fithingan. Machane, uw rogon ni ngad pied keru’dad ko ngongol nib kireb?

NGAD “PALOGGAD” KO NGONGOL NIB KIREB

3, 4. Mang thin nu Bible e ke n’uw nap’an ni ma lemnag boch e girdi’ ni boor ban’en ni yad manang u murung’agen e Bible, ma mang fan?

³ Ngad weliyed e n’en ni weliy Paul murung’agen ko thin rok ni bay u 2 Timothy 2:19. Re thin ney e be weliy murung’agen “fare def nib gel ni ke fal’eg Got rogon ke tay.” Ku be weliy l’agruw ban’en ni kan yoloy nga daken e re def nem. Bin som’on e be gaar, “Somol e manang e piin ni yad girdien,” ma re thin ney e kan fek ko fare thin ni bay ko Numbers 16:5. (Mu guy fa binem e article ni ke yan.) Ma bin l’agruw e be gaar, “En nra gaar e ir reb e girdi’ rok Somol e thingari pi’ keru’ ko ngongol nib kireb.” Re thin ney e ke n’uw nap’an ni ma lemnag boch e girdi’ ni boor ban’en u murung’agen e Bible ni yad manang. Mang fan?

⁴ Yira beeg fapi thin ni yog Paul ma bod ni be sul u daken e thin ni ka nog ko Pi Babyor ko Bible nni Yoloy Nsom’on ni Thin ni Hebrew. Machane, dariy bang ko pi babyor ney ni bay e pi thin ney riy. Ere mang e yip’ Paul fan u nap’an ni gaar: “En nra gaar e ir reb e girdi’ rok Somol e thingari pi’ keru’ ko ngongol nib kireb”? U m’on ni yog Paul e re thin ney me sul u daken e thin ni bay ko Numbers ko guruy ni 16 ni be weliy murung’agen e togopuluw ni tay Korah nge piin ni ur moyed u ba’ rok. Ere gur, re n’ey e be yip’ fan ni n’en ni migid ni weliy Paul e bay rogon ko re togopluw nem?

5-7. Mang e n’en ni buch u nap’an Moses ni bay rogon ko thin ni weliy Paul ni bay ko 2 Timothy 2:19? (Mu guy e sasing ni bay u tabolngin e re article ney.)

⁵ Be yog e Bible ni un Dathan nge Abiram ni fa gal pumoon ni fak Eliab ngak Korah ngar togopuluwgad ngak Moses nge Aron. (Num. 16:1-5) N’en ni kar rin’ed e be m’ug riy ni kar darifannaged mat’awun Moses ni ke pi’ Got. Machane, yugu aram rogon ma ka yad be par u fithik’ e girdi’ rok Jehovah. Re n’ey e rayog ni nge magawonnag e tha’ u thilin Jehovah nge piin ni yad ba yul’yul’ ngak. Ere nap’an ni taw ko rofen ni nge gagiyelnag Jehovah ko mini’ e rriyul’ ni be pigpig ngak nge mini’ e be dake be pigpig ngak, ma bay ban’en ni yog ni ngan rin’.

⁶ Be gaar e Bible: “Me gaar Somol ngak Moses, ‘Mog ngak fapi girdi’ ngar paloggad u tooben fapi tent rok Korah, nge Dathan, nge Abiram.”’ Ma aram me un fapi tayugang’ nu Israel ngak Moses, nga ranod ngak Dathan nge Abiram. Me gaar Moses ngak fapi girdi’ ni gubin, ‘Mu paloggad ko pi tent rok e pi pumoon ney ni yad ba kireb, ma dab kum mathgad nga ban’en ni ferad. Ya ra dangay, ma yira da chuguymed ngorad ngan thang e pogofan romed ni fan ko denen rorad.’ Ma aram ma ra paloggad ko fapi tent rok Korah nge Dathan, nge Abiram.” (Num. 16:23-27, BT) Tomuren e re n’ey me thang Jehovah e piin ni ur togopuluwgad ngak, me magey e piin nra pared ni yad ba yul’yul’ ngak ni aram e piin nra paloggad rok Korah nge piin ni yad ba muun ngak, mi yad pi’ keru’rad ko ngongol nib kireb.

⁷ Manang Jehovah e n’en ni bay u gum’ircha’dad! Ma manang e piin ni yad ba yul’yul’ ngak. Yugu aram rogon ma ka bay ban’en nib t’uf ni nge rin’ e piin ni yad ma pigpig ngak ni yad ba yul’yul’. Ba t’uf ni ngar palognaged yad ko piin nib kireb e ngongol rorad. Ere dabisiy ni be weliy Paul murung’agen e n’en ni buch kakrom ni bay ko Numbers 16:5, 23-27 u nap’an ni gaar: “En nra gaar e ir reb e girdi’ rok Somol e thingari pi’ keru’ ko ngongol nib kireb.” Pi thin ney e kub puluw ko fapi thin ni yog Paul ni faani gaar: “Somol e manang e piin ni yad girdien.”​—2 Tim. 2:19.

“MU TIYEM U UREL KO MALUAG THIN NDARIY FAN”

8. Mang fan nde gaman ni kemus ni ngam pining fithingan Jehovah ara ngam un ko ulung rok?

⁸ Nap’an ni weliy Paul murung’agen e n’en ni buch u nap’an Moses, ma be puguran ngak Timothy ni bay ban’en nthingari rin’ ya nge ayuweg e tha’ u thilrow Jehovah. De gaman ni kemus ni nge un ko ulung rok Got, ni bod nde gaman ni kemus ni ngan pining fithingan Jehovah u nap’an Moses. Piin ni yad ma pigpig ngak Jehovah u fithik’ e yul’yul’ e kub t’uf ni ngar pied keru’rad ko ngongol nib kireb. Mang rogon e re thin ney ngak Timothy? Ma mang boch ban’en nrayog ni nge fil e pi tapigpig rok Jehovah ko re fonow rok Paul ney e ngiyal’ ney?

9. Mang e buch ko ulung ni Kristiano kakrom ni bochan e ur ‘maluag thingad ndariy fan’?

⁹ Be tamilangnag e Thin rok Got e miti ngongol nib kireb nthingari palog e piin Kristiano riy. Bod ni, yog Paul ngak Timothy ko 2 Timothy 2:19 ndab i un i ‘luag murung’agen yu bugithin’ maku dab i ‘un i yog e thin ni ma yog e piin ndariy fan Got u wan’rad nge thin ko balyang.’ (Mu beeg e 2 Timothy 2:14, 16, 23.) Immoy boch e girdi’ u lan e ulung rok Got ni ur machibnaged boch ban’en nde riyul’. Maku reb e, ur filed boch ban’en ni i mo’maw’nag ko girdi’ ni ngar pared nib taareban’rad. Yugu aram rogon nde togopuluw e n’en ni ur rin’ed ko thin nu Bible, machane ke magawonnag e taareban’ u lan e ulung. Ma n’en ni buch e tabab boch e girdi’ ko maluagthin, ma re n’ey e warnag e michan’ rorad. Aram fan ni yog Paul ngorad nib t’uf ni ngar ‘tiyed yad u urel ko maluag thin ndariy fan.’

10. Mang e susun ni ngad rin’ed u nap’an ni kad mada’naged e piin ni kar digeyed e tin riyul’ ma kar chelgad yad be togopuluw ngay?

¹⁰ Girdi’ rok Jehovah e ngiyal’ ney e gathi gubin ngiyal’ ni yad ma mada’nag e piin ni kar chelgad yad be togopuluw ko bin riyul’ e liyor u lan e ulung. Yugu aram rogon ma nap’an ni gad ra mada’nag e piin ni yad ma machibnag boch ban’en nde puluw ko Bible, ma thingar da palognaged gadad rorad ni demtrug e gin ni ke sum e machib rorad riy. De fel’ ni ngad luaged e pi girdi’ ney e thin u nap’an ni kad mada’naged yad, ara nap’an ni gad bay ko internet, ara ku boch e kanawo’. Yugu aram rogon ni gad be guy rogon ni ngad ayuweged facha’ ni nge tamilang e thin rok Got u wan, ma de fel’ ni ngad rin’ed e re n’ey, ya faan gad ra rin’ ma aram e gad be togopuluw ko n’en ni gad be weliy u roy. Ere, n’en nib fel’ ni ngad rin’ed e aram e ngad ted gadad u orel ko pi girdi’ ney ni kar digeyed e bin riyul’ e liyor ma kar chelgad kar togopuluwgad ngay ni bochan e gadad e girdi’ rok Jehovah.

11. Mang e rayog ni nge k’aring e “maluag thin ndariy fan,” ma uw rogon nrayog ni nge dag e piin piilal e kanawo’ nib fel’ ni ngan folwok riy ko re n’ey?

¹¹ Gathi kemus ni yigoo piin ni kar chelgad yad be machibnag boch ban’en nde puluw e rayog ni ngar magawonnaged e gapas u lan e ulung, ya ku bay boch ban’en nrayog ni nge magawonnag e gapas u lan e ulung. Bod nrayog ni nge un boch e girdi’ ko “maluag thin ndariy fan” ni bochan e ba thilthil rogon ni yad ma lemnag murung’agen e pi n’en nib fel’ ni ngan chuweg e chalban ngay. Riyul’ nnap’an nra togopuluw reb e Kristiano ko pi kenggin e motochiyel rok Jehovah u murung’agen e pi n’en ni yima chuweg e chalban ngay, ma susun ndabi pag e piin piilal facha’ ni nge rin’ e n’en ni baadag. (Prov. 6:16-19; Efe. 5:3-5) Ma nap’an nra fonownag e piin piilal be’ ma thingar ra guyed rogon ndab ra rin’ed u rogon ni yad be lemnag. Ya susun ni ngar folgad ko fare fonow ni bay u Bible ni fan ko pi Kristiano ni yad ma yog e thin u lan e ulung ni be gaar: “Nguum gafaliyed fare ran’ i saf ni Got e ke pi’ ngomed. . . . Dab mu guyed rogon ni ngam suweyed e piin ni kan pi’rad ngomed ni ngam gafaliyed yad, machane ngam pired nib fel’ pangimed ya nguur folwokgad romed.”​—1 Pet. 5:2, 3; mu beeg e 2 Korinth 1:24.

12, 13. (a) Uw rogon ni ma mel’eg e Pi Mich Rok Jehovah e miti n’en ni ngar chuweged e chalban rorad ngay, ma mang boch i kenggin e motochiyel u Bible ni bay rogon ko re n’ey? (b) Mang rogon fapi kenggin e motochiyel ni bay ko paragraph 12 nga boch ban’en ni gad ma dugliy?

¹² Der ma par e ulung rodad nga i fal’eg i yaliy e miti kachido nrayog ni ngad yaliyed, nge video games, nge babyor nrayog ni ngad beeged, nge miti tang nrayog ni ngad motoyilgad ngay, ngemu’ mi yad yog ngodad e tin ni ngad siyeged. Mang fan? Ya be yog e Bible nra be’ ma nge ‘fil rogon ni nge nang e tin nib fel’ ko tin nib kireb.’ (Heb. 5:14) Bay kenggin e motochiyel u Bible nrayog ni nge ayuwegdad u rogon ni ngad mel’eged e miti n’en ni ngad chuweged e chalban rodad ngay. Demtrug e n’en ni gad be rin’ ma susun e ngad guyed rogon ni nge yan i par ni “mm’agan’ Somol ngay.” (Efe. 5:10) Be yog e Bible ni en lolugen e tabinaw e bay mat’awun u lan e tabinaw. Ere, rayog ni nge yog e miti n’en nrayog ni nge chuweg chon e tabinaw rok e chalban rorad ngay nge tin ndabiyog.​—1 Kor. 11:3; Efe. 6:1-4.

¹³ Fapi kenggin e motochiyel nu Bible ni kad weliyed aray u lang e gathi kemus ni fan ko pi n’en ni gad ma mel’eg ni ngad chuweged e chalban rodad ngay. Ku rayog ni nge thilthil rogon e lem rodad u murung’agen e munmad ni gad ma tay, nge rogon ni gad ma fal’eg yaadad, nge rogon ni ngaud ayuweged fithik’ i dowdad, nge miti ggan ni ngaud ked, nge ku boch ban’en. Machane, faanra dariy reb i kenggin e motochiyel u Bible nib togopuluw nga reb e pi n’ey, ma der ma maluagthin e pi tapigpig rok Jehovah u murung’agen e tin nrayog ni nge rin’ be’ fa tin nsusun e dabi rin’, ya “tapigpig rok Somol e thingari dabi un ko tugthin. Thingari munguy ngak urngin e girdi’.”​—2 Tim. 2:24.

DAB UM CHAG KO GIRDI’ NIB KIREB E NGONGOL ROK!

14. Mang fanathin e weliy Paul murung’agen ni nge tamilangnag fan nsusun e dab ud chaggad ko girdi’ ni ma rin’ e tin nde mat’aw?

¹⁴ Ku mang reb e kanawo’ ni piin ni yad ma yog ni yad e ‘girdi’ rok Somol e thingar ra pied keru’rad ko ngongol nib kireb’? Susun e nge dab ur chaggad ko girdi’ ni ma rin’ e tin nde mat’aw. Mu tay fanam i yan riy nu tomuren ni weliy Paul fare fanathin rok ni murung’agen “fare def nib gel ni ke fal’eg Got rogon ke tay,” miki weliy reb e fanathin. I weliy murung’agen “ba naun ni ba ga’” ni “bay e plet riy ni pire’ mit, ni boch e ni ngongliy ko silber, ma boch e ni ngongliy ko gol, ma yugu boch e ni ngongliy ko ren, ma boch e ni ngongliy ko but; ni boch e ngan maruwel ngay ko yu ngiyal’ ni yima ngongliy e madnom riy, ma boch e ngan maruwel ngay ni urngin e rran.” (2 Tim. 2:20, 21) I yog ko piin Kristiano ni ngar ‘gilafgad nga orel,’ ara ra palognaged yad ko piin ni kan taareb rogonnagrad ko fapi plet ni yima “maruwel ngay ni urngin e rran.”

15, 16. Mang e gad ra fil ko fare fanathin u murung’agen “ba naun ni ba ga’”?

¹⁵ Mang fan e re fanathin ney ni weliy Paul? I taareb rogonnag Paul e ulung ni Kristiano nga “ba naun ni ba ga’,” me taareb rogonnag e girdi’ u lan e ulung ko “plet” ni bay u lan fare naun. Bay boch e plet ni yima fanay u reb e naun nnap’an nra alit ma dabkiyog ni ngan abich riy ya yira m’ar ngay. Ere, faen ni tafen e naun e ra tay e pi plet nem nga bang ndabi maathuk nga fithik’ e tin nib beech e plet ni bod e tin baaray e plet ni yima fal’eg e ggan u langgin.

¹⁶ Ere, ku er rogon e pi tapigpig rok Jehovah e ngiyal’ ney ni yad be athamgil ni ngaur pared ni yad bbeech u mit Got nsusun e dab ur chaggad ko tin baaray e girdi’ u lan e ulung ndarur folgad ko pi kenggin e motochiyel rok Jehovah. (Mu beeg e 1 Korinth 15:33.) Ere, faanra aray rogon e n’en ni ka nog ngodad u murung’agen e girdi’ u lan e ulung, me ere ku er rogon e girdi’ u wuru’ e ulung nsusun e ngaud ‘tiyed gadad u urel rorad,’ ya boor i yad e yad ba ‘chogow, ma darur folgad rok e gallibthir rorad, ma darur liyorgad ngak Got, ma yad ma t’ar e thin nga daken e girdi’, ma yad ba damumuw, ma dubrad e tin nib fel’, ma dabiyog ni nge pagan’uy ngorad, mab t’uf e fafel rorad mab tomur Got u wan’rad’!​—2 Tim. 3:1-5.

GAD RA PAR NI GAD BA YUL’YUL’ MA RA TOW’ATHNAGDAD JEHOVAH

17. Uw rogon ni ke par piyu Israel ni yad ba mudugil mar togopuluwgad ko tin nde mat’aw?

¹⁷ Be weliy e Bible feni gur ni rin’ piyu Israel ban’en u nap’an nnog ngorad ni “ngar paloggad u tooben fapi tent rok Korah, nge Dathan, nge Abiram.” Be yog e Bible ni “ka chi ngiyal’ nem mi yad palog u tooben fapi tent.” (Num. 16:24, 27, NW) Dar pared nge n’uw nap’an maku dar pared ngaur lemnaged ko ngar chuwgad fa danga’. Ku be weliy e Bible rogon nra chuwgad. Be yog ni “kar chuwgad . . . ni yad gubin.” Ba m’agan’rad ngay ni ngar folgad. Ma kar rin’ed e re n’ey u polo’ i gum’ircha’rad. Kar pared ni yad ba mudugil u ba’ rok Jehovah mar togopuluwgad ko tin nde mat’aw. Ere, mang e rayog ni ngad filed ko re n’ey?

18. Mang e yip’ Paul fan u nap’an ni yog ngak Timothy ni nge ‘tay ir u urel ko tin ni ma ar’arnag e piin ni pagel’?

¹⁸ Susun e ngad guyed rogon ndab da sagaalgad ni ngad ayuweged e tha’ u thildad Jehovah. Ireray e n’en ni yip’ Paul fan u nap’an ni yog ngak Timothy ni nge ‘tay ir u urel ko tin ni ma ar’arnag e piin ni pagel.’ (2 Tim. 2:22) Nap’an nnog e pi thin ney ngak Timothy, ma sana ke pag 30 e duw rok. Ere, gathi goo piin pagel e yad ma “ar’arnag” boch ban’en nib kireb. Ka nog ngak Timothy nnap’an nra mada’nag e pi n’ey ma thingari ‘tay ir u urel’ riy. Re n’ey e be yip’ fan ni thingari pi’ Timothy “keru’ ko ngongol nib kireb.” Ku taareb rogon e n’en ni yog Jesus u nap’an ni gaar: “Faanra waliyem baraba’ i lan owchem ngam pi’ keruum ngak Got, ma ga luf ngam n’ag!” (Matt. 18:9) Pi Kristiano ni yad baadag ni ngar folgad ko re fonow ney mar ayuweged e tha’ u thilrad Got e nap’an ni yad ra mada’nag e mit ney e skeng ma yad ma gur ngar rin’ed ban’en, maku darur pared ngaur lemnaged ko ngar rin’ed e re n’ey fa danga’.

19. Mang e ke rin’ boch e walag e ngiyal’ ney ya nge dab ra rin’ed boch ban’en nra magawonnag e tha’ u thilrad Jehovah?

¹⁹ Bay boch e walag ni immoy e magawon rorad ko chingaw kafram nnap’an ni kar manged boch e Pi Mich Rok Jehovah ma kar dugliyed ndab kur unumed ban’en ni bay e alkul riy. Ku bay boch e walag ni kar siyeged boch ban’en ni yima chuweg e chalban ngay ni bochan e rayog ni nge waliyrad ni ngkur sulod ko ngongol ni ur rin’ed nib kireb. (Ps. 101:3) Bod ni, immoy reb e walag nu m’on ni nge mang reb e Pi Mich Rok Jehovah ma ri baadag ni ma un nga boch e mur ni yima churu’ riy ma yima rin’ boch e ngongol nib puwlag riy. Machane, nap’an ni fil e tin riyul’ ma aram me tal ko churu’. Ki mada’ ko pi abich ni ma tay e pi walag u lan e ulung nnap’an nra un ngay ma der ma un ko churu’ ya dabun ni nge k’aring e re n’ey ni ngki sul nga ngongolen kakrom. Machane, gathi yibe yog nthingari tal e piin Kristiano ndab kur unumed ban’en ni bay e alkul riy, ara dab ku ur uned ko churu’, ara ku boch ban’en. Ya thingar da kol ayuwgad ma gad ayuweg e tha’ u thildad Jehovah.

20. Yugu aram rogon nde mom ni ngad ‘pied keru’dad ko ngongol nib kireb,’ ma mang e gad ba felfelan’ ngay?

²⁰ Gad ba tow’ath ni gad be fek fithingan Got, machane ku bay ban’en nib milfan ngodad ni ngad rin’ed. Thingar da ‘pied keru’dad ko ngongol nib kireb’ ara da ‘pied keru’dad ko kireb ngad rin’ed e tin nib fel’.’ (Ps. 34:14) Riyul’ nde mom e re n’ey. Machane, ri gad ra felfelan’ ni ngad nanged ni Jehovah e gubin ngiyal’ ni ma t’ufeg e “piin ni yad girdien,” ma yad ma fol rok.​—2 Tim. 2:19; mu beeg e 2 Kronicles 16:9a.