BIN 8

Fanathin ni Yira Fil Ban’en Riy

Matthew 13:34, 35

N’EN NI NGAN RIN’: Mu fanay e fanathin nib mom nra pug e tafinay rok e piin be motoyil mar filed boch ban’en riy nib ga’ fan, ya nge yag nim mon’og u rogon ni ga ma fil ban’en.

ROGON NI NGAN RIN’:

Mmel’eg boch e fanathin nib mom. Mu fanay boch ban’en ni manang e girdi’ ni ngam tamilangnag boch ban’en nib mo’maw’ ni ngan nang fan. Dab mu puthuy boch ban’en ko fanathin rom nra mo’maw’nag ni ngan nang fan. Mu guy rogon ni nge puluw e fanathin rom ko n’en ni ga be weliy ya nge dabi maathuk laniyan’ e piin be motoyil.

Mu tiyan’um ko pi n’en ni be buch u toobem, mag fil e pi babyor rodad, mag motoyil ko pi walag u lan e ulung ni yad ba salap i fil ban’en ko girdi’. Nap’an ni ga be rin’ e re n’ey, mag yoloy nga but’ boch e fanathin ni ga be pirieg nra ayuwegem, mag chaariy nga bang.
Mu lemnag e piin be motoyil ngom. Mmel’eg boch e fanathin ni bay rogon ko pi n’en ni ma rin’ e piin be motoyil ngom nge pi n’en nib ga’ fan u wan’rad. Mu guy rogon ndabi tamra’ e girdi’ ara ra damumuwgad ni bochan e fanathin ni kam fanay.
Mu tamilangnag e n’en th’abi ga’ fan. Mu fanay e fanathin nra tamilangnag e n’en th’abi ga’ fan ko n’en ni ga be weliy, ma gathi tin ni gathi rib ga’ fan riy. Mu guy rogon ni gathi kemus ni nge par fare fanathin u laniyan’ e piin be motoyil, machane ngkur filed ban’en riy.