Mu Folwok Ko Fare Sensey Nib Fel’

“Ere mmarod ngam pingeged e girdi’ ngar manged pi gachalpeg . . . , mi gimed fil ngorad ni nga ur rin’ed urngin e pi n’en ni kugu ta’ chilen ngomed.”​—MATTHEW 28:19, 20, NW.

1, 2. (a) Uw rogon ma gadad gubin, ni ba’ bang ni ra taw ngay, ma gadad mang sensey? (b) Faanra yib ko ngan fil ban’en ngak be’, ma mang maruwel e dariy ban’en ni taareb rogon ngay nib mil fan ni nge rin e tin riyul’ e Kristiano?

GUR REB e sensey fa? Gadad gubin ni ba’ bang ni ra taw ngay ma gadad e sensey. Urngin ngiyal’ ni ga ra pow’iy be’ ni daki nang e gin be sor ngay, fa mu dag ngak be’ ni gimew nga maruwel rogon ni nge rin’ reb e ban’en, ara mog rogon ngak ba bitir ni nge m’ag e sus rok’, ma aram e ga be sensey. Faan yira ayuweg be’ ni aram rogon ma ma yibnag, e falfalan’ fa danga’?

² Ma faanra yib ko sensey, ma tin riyul’ e Kristiano e aram e maruwel rorad ni dariy ban’en ni taareb rogon ngay. Kan ta’ chilen ngodad ni “ngan pingeg e girdi’ ngar manged pi gachalpen Jesus . . .  ni ngan skulnagrad.” (Matthew 28:19, 20) Ku arrogon u lan e ulung, bay yu ngiyal’ ni ngan sensey. Piin ni pumoon ni kar salapgad e yima dugliyrad ni ngar manged “piin ni yad ma gafaliyey ma yad ma sensey,” ni yibe guy rogon ni nge mon’og e ulung. (Efesus 4:11-13) Rogon e n’en ni yad ma rin’ ni yu rran ni yad e piin ni Kristiano, e piin ni ppin ni kar piilalgad e ngar manged “sensey ko tin nib fel’” ngak e piin ni kab rugod. (Titus 2:3-5) Gadad gubin ni yibe ta chilen ngodad ni nguud pied e athamgil ngak e piin ni gadad ni ke michan’rad, ma rayog ni ngad tayan’dad ngad weliyed ngad ayuweged e girdi’ ni ngad fanayed e Bible ngad mon’ognaged boch e girdi’. (1 Thessalonika 5:11) Uw feni ba towath ni ngan mang sensey ko thin rok Got min wereg e tirok Got ban’en nib fel’ ma ba tolang puluwon ni rayog nib angin nib n’uw nap’an!

3. Uw rogon ni gadad ra mon’ognag rogon ni nge manging’ rogon ni gadad e sensey?

³ Machane, uw rogon, ni gadad ra mon’ognag rogon ni nge manging’ rogon i gadad e sensey? Som’mon, e ngada folwokgad ko fare sensey ni Ga’, ni Jesus. ‘Machane, uw rogon ma rayog ni ngad folwokgad rok Jesus?’ boch e girdi’ e ra maruwaran’ ni gaar. ‘Ir e ba flont.’ Ba mudugil, ni dabiyog ni ngad manged sensey ni ba flont. Machane, de mutrug rogon gelngidad, ma rayog ni ngad athamgiliyed nge mus rogodad ni rogon ni rayog rodad ni ngad folwokgad u rogon ni i skulnag Jesus e girdi’. Ngad weliyed rogon ni gadad ra maruwel nga aningeg e kanawo’ ni i fanay aram e​—ba mom, deer nib manging’, ba riyul’ mab puluw, nge fanathin nib m’ag ko n’en ni yibe weliy.

Ngan Momnag

4, 5. (a) Mang fan ni thin nib mom e ir e kiy ko tin nriyul’ u Bible? (b) Faanra ngan momnag i fil ban’en, ma mang fan nib ga’ fan ni ngada tedan’dad ko yu bugithin ni gadad be fanay?

⁴ Kenggin e tin riyul’ ko thin rok Got e de mo’maw’. U lan e meybil, me gaar Jesus: “Chitamag, gu be yog e sorok ngom u fithik’ e girdi’, . . . ya kam mithag e pi n’eney ko piin ni yad ba llowan’ nge piin ni yad ba skul ma kam dag ngak e piin bitir.” (Matthew 11:25, NW.) Jehovah e ke dugliy e tin nib m’agan’ ngay ni nge dag ngak e piin nib yul’yul’ ma ba munguy gum’ircharad. (1 Korinth 1:26-28) Arfan, ni tin nib mom e ir e kiy nib ga’ fan ko tin riyul’ nu Bible.

⁵ Nap’an ni ga be ta’ reb e fol Bible u tabinaw ara ku mu sul ni nga kum guy be’ ni ke m’agan’ ko tin kamog, uw rogon ni ngam momnag i fil ban’en ngak? Mang e kada filed rok fare Sensey nib Fel’? Faanra nge nang e piin ni yad be motoyil ngak fan e n’en ni be yog ni nge tamilang u wan’rad, ya boor i yad e “de skul nge yug girdi’,” ma aram e i fanay Jesus e tin nib mom e thin ni rayog ni ngar nanged fan. (Acts 4:13) Ra ngan fil ban’en ni ngan momnag rogon, ma bin som’mon nib t’uf e ngad yaliyed rogon e yu bugithin ni gadad be fanay. De t’uf ni nga dogned yu bugithin ni gagang’ ara yu bugithin ni ba mo’maw’ ni bochan ni ngan fal’eg rogon e tin riyul’ ni thin rok Got ni nge gel e pagan’ rok boch e girdi’ ngay. “Thin ni kaygi pag rogon” e rayog ni k’aring e marus ni rib ga’ ngak e piin ni dariy e skul rok ara ba meewar. (1 Korinth 2:1, 2) N’en ni rin’ Jesus e dag ni thin nib mom ni kan mel’eg nib fel’ rogon e rayog ni ngan nang e tin riyul’ riy mab gel gelngin.

6. Uw rogon ma dabi pag oren e n’en ni gadad be fel’ ko ani gad be fil e Bible ngak?

⁶ Ra ngan momnag i fil ban’en, maku thingarda guyed rogon ni dabi pag rogon ngay yigi yoor e n’en ni nga nog ngak en be fol Bible. Jesus e i lemnag e gini mus e llowan’ rok pi gachalpen riy. (John 16:12) Ku arrogodad, ni thingar kuud lemnagniged e gini mus e llowan’ ko ani gad be fil e Bible ngak riy. Ni bod rogon, ni nap’an ni gadad be study be’ ko fare babyor ni Knowledge That Leads to Everlasting Life, ma de t’uf ni ngar ni weliy urngin nochi ban’en riy.a Ara baga’ fan ni ngan gurgurnag ngan ni yan u fithik’ fapi thin, ni faan gowa nge yoor e n’en ni ngar ni mu’nag e ir e tha’bi ga’ fan. N’en ni ngan rin’, e ba manigil ni ngan pag ni tin ba t’uf nge tin nrayog u gelngin faani yibe skulnag e nge dugliy oren nge rogon e tin ni ngan fil. N’en ni gadad be nameg e ngad ayuweged fa ani gadad be skulnag ni nge mang reb i gachalpen Kristus me mang be’ ni ma liyor ku Jehovah. Ba t’uf ni ngad pied e tayim ni rogon nib t’uf ni nge ayuweg e ani baadag ni gadad be skulnag ni nge tamilangan’ nib fel’ rogon nge nang e pi n’en ni be fil. Arfan, ni nap’an ni ra taw e tin riyul’ nga gum’erchaen me mithmith ni nge rin’ ban’en.​—Roma 12:2.

7. Mang e pi n’en ni ka nog ni rayog ni nge ayuwegdad ni ngad momniged i fil ban’en u nap’an ni gad be pi’ e welthin u lan e ulung?

⁷ Nap’an ni gadad ra pi’ e welthin u lan e ulung, ni rib ga’ ni faanra bay e girdi’ ni biech ni ke un ko muulung, ma uw rogon ni gadad ra pi’ nib “mom i nang fan”? (1 Korinth 14:9) Mu lemnag dalip i ban’en ni ka nog ni rayog ni ayuwegey. Bin som’mon, mu weliy fan e yu bugithin ni gathi ri yima yog ni ga ra uneg ko welthin rom. Rogon ni kada nanged fan e thin rok Got e kada nanged fan yu bugithin ni yugub thil. Faan gad ra fanay e thin ni bod “fare tapigpig nib yul’yul’ ma ba gonop,” nge “yugu boch e saf,” nge “Babylon nib Gilbuguwan,” ma ra t’uf ni ngan momnag i weliy nge tamilang fan. Bin l’agruw, mu guy rogon ni dabi yoor i yoor bugithin ni nga mog. Yugu ra yoor bugithin, fa kaygi pag rogon i weliy ma rayog ni nge chuwan’ e piin ni yad bay ko muulung. Rayog ni nge tamilang fan ban’en ni faani yira chuweg e yu bugithin ni de ga’fan riy nge tin de ga’fan ko fare welthin. Bin dalip, dabmu guy rogon ni nge yoor bogi ban’en ni ngam weliy. Nap’an ni gad be gay murung’agen e n’en ni ngad weliyed ma rayog ni da pirieged boch ban’en ni ba fel’ ni ngan nang. Machane ba fel’ ni ngan yarmiy nge yan i aw ni in bug nib ga’fan riy e ngan fek, ma kemus ni pi n’en ni rayog ni nge ayuweg fa ini n’em nib ga’fan e ngam weliy ma rayog ni ngan tamilangnag ngan pi’ u nap’an e tayim ni kan dugliy ni ngan pi’ riy.

Rogon ni Fanay e Deer nib Manging’

8, 9. Uw rogon ni rayog ni ngada mel’eged reb e deer nib m’ag ko n’en nib m’agan’ fa ani tafen e tabinaw ngay? Mu weliy kanawoen.

⁸ Ka gamnang Jesus ni rib salap i fanay e deer ni nge k’aring e pi gachalpen nga rogned e n’en ni bay u lanin’rad mang e pug lanin’rad me skulnag rogon ni nga ur lemgad. Bochan e pi deer rok Jesus nem, me yog ni taw e tin riyul’ nga gum’ircharad. (Matthew 16:13, 15; John 11:26) Uw rogon, ma rayog ni ngad boded Jesus, nge yog ni ud fanayed e deer nib manging’?

⁹ Nap’an ni gadad be machib u mit e tabinaw i yan, ma rayog ni ngad fanayed e deer ni ra pug laniyan’ e girdi’, nge motoyil me bing e kanawo’ ngodad ni nge yog ni ngad weliyed murung’agen Gil’ilungun Got. Uw rogon ni rayog ni ngad mel’eged reb e deer ni ra m’ag ko n’en ni ke adag facha’ ko fare tabinaw? Ngarim fal’eg i gu’ ngam nang. Nap’an ni ga ra yan nga reb e tabinaw, ma ga yaliy tooben i yan. Mu gu’ ko bay talin e gosgos u lan e yoror ni be yip’ fan ni ba’ e bitir ko fare tabinaw fa? Faanra aram rogon, ma sana rayog ni ngad deeriyed nge lungudad, ‘Kaa yugu mu lemnag ko ra uw rarogon e fayleng u nap’an ni ra ilal fakam?’ (Psalm 37:10, 11) Ara bay boch e lok ko mab, ara bay e security system ni ban’en ni bay e gamig riy ni ma ayuwegey ko moro’ro’? Ma aram e rayog ni ngad fithed ni nge lungudad: ‘Ga be lemnag ma bay ba ngiyal’ ni bayib ni girdi’ ni bod gur nge gag e ku rayog ni nge pagan’ u lan e tabinaw rodad ngo kanawo’ i yan?’ (Mikah 4:3, 4) Ara bay bang ni kanawoen e wheelchair? Ma rayog ni ngad fithed ni nge lungudad: ‘Gur ramoy ba ngiyal’ ni bayib ni urngin e girdi’ ni yad ba fas e bay ra falfalan’gad ni ke fel’ fithik’ i dowrad?’ (Isaiah 33:24) Boor ban’en ni ka nog ni yira fanay ni yira pirieg ko fare babyor ni Reasoning From the Scriptures.b

10. Uw rogon ni gadad ra fanay e deer ni ngebi m’ug e pi n’en bay ko lem rok be’ nge rogon gum’irchaen ni be fol Bible, ma mang e n’en ni thingar ud ted u lanin’dad?

¹⁰ Uw rogon ni ngada fanayed e deer nib fel’ rogon u nap’an ni gadad be fil e Bible ku be’? De taareb rogon ngak Jesus, ya dabiyog ni ngad nanged gum’irchaen e girdi’. Machane, deer nib puluw ma ba mat’aw ma ba tamilang e rayog ni ayuwegdad ‘nge yog ni m’ug’ e pi n’en ni be lemnag nge rogon gum’irchaen facha’ ni gadad be fil e Bible ngak. (Proverbs 20:5) Ni bod rogon, ni susuna gad be fil fare guruy ni “Mang fan ni ga ra Par ni ga be rin’ e Tirok Got ma ra Yibnag e Falfalan’,” ko fare babyor ni Knowledge. Be weliy murung’agen rogon e lem rok Got ko danir yul’yul’, nge ngongol ni darngal, nge ku boch ban’en. Rayog ni nge fulweg facha’ ni be fil e Bible fare deer ni kan yoloy nib puluw, machane gur ke mich u wan’ e n’en be fil? Rayog ni ngad deeriyed ni lungudad: ‘Ga be lemnag ma rogon e lem rok Jehovah ko pi n’eney e ba puluw u wan’um?’ ‘Uw rogon ni ga ra fanay e tiney e kenggin e motochiyel nu Bible ko yafas rom?’ Ngam tayan’um, ni yugu aram rogon, ma ba t’uf ni ngaun ta’ fan fa ani be fol Bible nge ngongolen. Dubdad ni ngad fithed e deer ni ra tamra’nag ara ra dariyfannag fa ani be fil e Bible.​—Proverbs 12:18.

11. Mang boch e kanawo’ ni rayog rok be’ ni ma pi’ e welthin ni fan ko yoor ni nge fanay e deer nib manging’?

¹¹ Piin ni ku yad ma pi’ e welthin ni fan ko yoor e ku rayog ni ngar fanayed e deer nib manging’. Deer ni yima fith ni gathi ngan fulweg​—e rayog ni nge ayuweg e girdi’ ni kar muulunggad—​ni ngar lemnaged fan. Yu ngiyal’ e i fanay Jesus e deer ni aram rogon. (Matthew 11:7-9) Maku reb ni kiy ma rin’, e tomuren ni kan mu’ i weliy ko mang e pi n’en ni ngan weliy ko fare welthin, ma an be non e rayog ni nge fanay boch e deer ni nge dag e pi n’en nib ga’ fan ni yira weliy. Rayog ni gaar: “N’en ni ngad weliyed e daba’, e ngada’ lemnaged e fulweg ko pi deer ni baaray . . .” Ma aram, e tomur ko welthin, ma rayog ni nge sul ko fapi deer ni nge sul u daken e tin nib ga’ fan ko fare welthin.

12. Mu pi’ reb e kanawo’ ni rayog rok e piin piilal ni Kristiano ni nge fanay boch e deer ni nge ayuweg be’ ni ke michan’ ni nge yog ngak e pagan’ ko Thin rok Got.

¹² Maruwel rorad ni yad ma gafaliy e saf, e pi piilal ko Kristiano, e rayog ni ngar fanayed e deer ni nge ayuweg e ani ‘ke mulan’ ni nge yog ni fel’ laniyan’ nibochan e thin rok Jehovah. (1 Thessalonika 5:14) Ni bod rogon, ni ra ngan ayuweg be’ ni ke kireban’, ma fare piilal e ra yog ni nge guy rogon nge guy e Psalm 34:18, NW. I gaar: “Jehovah e ba chuchugur ngak e piin ni ke kireban’rad; ma piin ni ke m’ingngan’rad e ra ayuwegrad.” Ra nge nang ko riyul’ ni ke nang facha’ ni ke kireban’ ko uw rogon e re n’ey ngak, ma fare piilal e rayog ni nge fith ni gaar: ‘Jehovah e ba chuchugur ngak mini’? Bay yu ngiyal’ ni “ma kireban’um” ma “ma m’ingan’um”? Faanra, bod rogon ni yog e Bible, ni Jehovah e ba chuchugur ko pi girdi’ nem, me ere gathi kub chuchugur ngom?’ Pi ney e ra uni sumunguynag i micheg ngak be’ ni ke mulan’ ma rayog ni ngaki gel biyay.​—Isaiah 57:15.

Ngan Weliy Fan Nib Puluw

13, 14. (a) Susun uw rogon ni ngad nonad ngak be’ ni ra gaar e dabi mich u wan’ reb e Got ni dabiyog ni nge guy? (b) Mang fan ni dabda lemniged ni urngin e girdi’ ma rayog ni nge michan’rad?

¹³ Nap’an ni gadra machib, ma gadad be guy rogon ni nge taw e machib nga gum’irchaen e girdi’, nib puluw fan. (Acts 19:8; 28:23, 24) Ere re n’em e be yip’ fan ni thingarda filed rogon ni ngad fanayed e tin nib puluw ma ba mo’maw’ ni ngan nang fan ni bochan ni nge yog ni da micheged u wan’ e girdi’ murung’agen e tin riyul’ ni Thin rok Got? Ri danga’. Yira weliy ban’en ni ngari puluw fan ma de t’uf ni ngan mo’maw’nag i weliy. Maluag thin nib puluw ni yibe weliy u reb e kanawo’ nib mom e baga’ ni ir e rib ga’ angin. Mu lemnag reb e kanawo’.

¹⁴ Gonapan mang e gadad ra rin’ ni faanra gaar be’ nder mich u wan’ reb e Got ni dabiyog ni nge guy? Rayog ni da weliyed rogon e motochiyel ni kama moy u murung’agen tapgin nge angin. Nap’an ni gad ra guy angin ban’en, ma gad nang ni bay tapgin me yodorom. Rayog ni nge lungudad: ‘Faanra ga bay u bang ni dariy be’ nib chugur ngay ma gab mu pirieg ba naun ni kan toy ni rib fel’ rogon ma kan suguy ko ggan (angin), ma ri ga ra nang ni bay be’ (tapgin) ni toy e re naun nem me suguy tafen e ggan. Ere, ku arrogon, ni nap’an ni gadad ra guy rogon ni kan ngongliy boch ban’en nib gagiyel u fayleng nge ggan ni boor u “tafen e ggan” ko fayleng (angin), me ere gathi ba puluw ni ngad nanged ni bay Be’ (tapgin) ni ir e ngongliy?’ Fare Bible e weliy ni rib mom ma ba th’abi fel’ e re n’ey ni gaar: “Urngin e naun ma ba mmudugil ni ba’ be’ ni ir e toy, mi Got e ir ke sunmeg urngin ban’en.” (Hebrews 3:4) Machane, demtrug rogon feni puluw e n’en gadad be weliy, ma gathi gubin e girdi’ ni ra mich u wan’rad. Be puguran e Bible ngodad ni kemus ni piin ni “riyul’ ni yad baadag” e ra mich u wan’rad.​—Acts 13:48; 2 Thessalonika 3:2.

15. Uw rogon e numon ni gadad ra fanay me tamilangnag pi felngin Jehovah nge kanawoen e pi n’en ma rin’, ma mang l’agruw e kanawo’ ni kan dag ni ku rayog ni ngad fanayed e numon ni aram rogon?

¹⁵ Nap’an ni gadad be fil ban’en ko girdi’, ni demtrug ko u mit e tabinaw i yan ara lan e ulung, ma rayog ni ngad nonod ngad fanayed e tin nib puluw nib riyul’ ni nge tamilangnag felngin Jehovah nge kanawoen e pi n’en ma rin’. N’en ni baga’ nib manging’ u rogon ni weliy ban’en e fare thin ni ‘uw feni’ ni faan ma fanay Jesus yu ngiyal’. (Luke 11:13; 12:24) Ra ngan weliy e n’en nib thil riy, ma numon ni aray rogon e rayog ni ngari rich gum’irchaey. Ra ngan dag feni de riyul’ e machib ni murung’agen e infierno, ma rayog ni nge lungudad: ‘Dariy reb e matam ni bay e t’ufeg rok ni starafnag fak nge kol pa’ nge ta’ ko nifiy. Ere uw feni fanenikan e chitamangidad nu tharmiy nib ta runguyey fare lem ko infierno!’ (Jeremiah 7:31) Ra ngad filed ni Jehovah e ma lemnag e pi tapigpig rok ni yad e girdi’ ma rayog ni nge lungudad: ‘Faanra manang Jehovah fithingan fa bokum i bilyon e t’uf ni reb nge reb, me ere uw feni ri ma ayuweg e girdi’ ni yad ma t’ufeg ma kan chuwiyrad nga rachaen fak ni rib tolang puluwon!’ (Isaiah 40:26; Acts 20:28) Pi thin ney ni ba’ gelngin e rayog ni ayuwegdad ni nge yog ni taw e thin ni gadad be yog nga gum’irchaen boch e girdi’.

Fanathin Nib Puluw

16. Mang fan ni fanathin e baga’ fan ko skul ni yima tay ko girdi’?

¹⁶ Fanathin nib puluw e ban’en ni ra fal’eg rogon e pi n’en gadad be fil ngak boch e girdi’ ngar adaged ni ngar motoyilgad. Mang fan ni fanathin e baga’ fan ko ngiyal’ ni yibe fil ban’en ko girdi’? Be’ ni ma skulnag e girdi’ e yoloy ni gaar: “Gelngin ni yima lem ni buchuw ara dariy ban’en ni bebi dag yaan fare n’en nga lanin’uy e reb e ban’en ni rib mo’maw’ ni nge yog ko girdi’.” Fanathin e ma pi’ yaan ban’en nga lanin’dad nib fel’ rogon, boch ban’en nib biech. Jesus e rib salap i fanay e fanathin. (Mark 4:33, 34) Ngad guyed ko uw rogon ni rayog ni ngad fanayed boch e biney e kanawoen i skulnag e girdi’.

17. Mang aningeg i ban’en ni ra manging’nag reb e fanathin?

¹⁷ Mang e ra manging’nag e fanathin? Bin som’mon, thingari m’ag ko piin ni yad be motoyil, ngad fanayed e pi n’en ni rayog ni nge nang e piin ni yad be motoyil ngodad fan. Gadad manang ni Jesus e boor e fanathin rok ni i fanay e pi n’en ma buch ni yu rran ko par ko piin ni yad be motoyil ngak. Bin l’agruw, ra reb e fanathin ma thingari m’ag fan ko n’en ni ka nog. Faanra dabi taareb rogon fan, ma fare fanathin e ra malognag laniyan’ fa piin ni yad be motoyil ngodad. Bin dalip, reb e fanathin e thingari dabni uneg ngay bogi n’en ni boor ni de ga’ fan. Gamnang faram ni Jesus e i pi’ e tin ni ba mudugil ni ba t’uf me digey e tin ni de ga’ fan. Bin aningeg, faan gadad ra fanay reb e fanathin, ma thingari mich u wan’dad ni rogon ni gad be pi’ e ba tamilang. Ya ra danga’, ma bay boch e girdi’ ni rayog ni nge dab ra nanged e n’en ni yibe yog u rogon ni ngan rin’ fare n’en.

18. Uw rogon me yog ni da lemniged e fanathin nib puluw?

¹⁸ Ra diin me yog ni da lemnaged reb e fanathin nib puluw? De t’uf ni ngad lemnaged ban’en nib n’uw ara ngar ni maruweliy nib gel. Fanathin nib ngoch e rayog ni ngari manging’. Kemus ni ngam guy rogon ni lemnag boch i kanawoen e n’en ni kan weliy. Ni gonapan, susuna gadad be weliy murung’agen Got ni nge n’ag fan e denen, ma gad be lemnag ni nga dogned reb e fanathin ko n’en ni ba’ ko Acts 3:19, ni faani gaar, Jehovah ‘e ra chuweg e denen,’ ara thang, e denen rodad. Re thin nem e ir rok ma rib tamilang, machane mang reb e kanawo’ ni nge tamilangnag boch e re n’en ni yibe yog nem ni bod bangi n’en ni yima​—thang e yol ngay? ara bangi mad ni yibe falay nga ban’en? Rayog ni nge lungudad: ‘Nap’an ni ra n’ag Jehovah fan e denen rodad, ma aram ke falay ke chuw ni bod ni ke falay nga bangi mad (ara n’en ni yima thang e yol ngay).’ Ba mo’maw’ ni nge dab ni nang fan e n’en ni yibe yog ko fanathin ni aram feni mom.

19, 20. (a) Uw e rayog ni da pirieged e fanathin riy nib fel’? (b) Mang boch e fanathin nib manging’ ni kan yoloy ko pi babyor rodad?

¹⁹ Uw e ga ra pirieg e fanathin riy nib puluw, ni ba muun ngay e tin ni ri ma buch u nap’an e yafas? Mu gay u lan e yafas rom ara pi n’en nib thilthil ni ma buch ko par ara n’en ni ke un boch e piin ni taareb e michan’ romed u fithik’. Fanathin e boor ban’en ni rayog i mel’eg riy, nib muun ngay e tin nib fas ban’en nge tin danga’, chugum u tabinaw, ara ban’en ni kafini buch ni goo yi manang u lan e binaw. Reb e kiy u rogon ni ngan pirieg e fanathin nib fel’ e nga um par ni ga be fal’eg i tiyan’um ko pi n’en be buch, ma ga be “fal’eg i guy e pi n’en be buch” u gubin e rran u toobedad i yan. (Acts 17:22, 23) Reb i rogon i maruweliy e numon u fithik’ e yoor e be weliy ni gaar: “Cha’ ni ma pi’ e welthin ni ma fal’eg i yaliy e yafas ko girdi’, nge pi n’en ni yima rin’ riy ma ma non ngak urngin mit e girdi’, ma ma fal’eg i yaliy urngin ban’en ma fith ban’en nge taw ko ngiyal’ ni ke nang fan, era kunkuniy boch ban’en ni yira fanay ko fanathin ni ra ayuweg ko ngiyal’ ni ke t’uf.”

²⁰ Ku ba’ bayang ni bay e fanathin riy ni kub manging’ e​—Fare Wulyang Ntagil’ e Damit, nge Awake!, nge ku boch e babyor ni fal’eg e Pi Mich Rok Jehovah. Boor ban’en ni rayog nim fil ni nga umu fal’eg i guy rogon ni be fanay e pi babyor nem e fanathin.c Amu lem, bod rogon, fare fanathin nni fanay ko bin 11 e paragraph ko guruy ni 17 ko fare ke babyor ni Knowledge. Ni be taarebnag rogon fene thilthil rogon e girdi’ u lan e ulung ko karro ni boor mit ni be milekag toobem u kanawo’. Mang e n’en ni ke manging’nag? Rayog nim gu’ ni kan fanay ban’en ni ma buch ni gubin e rran, ri ba chuchugur nga rogon fare n’en ni kan weliy, ma n’en kan fanay e ba tamilang. Rayog ni ngad fanayed e fanathin ni kan yoloy ko machib ni gadad be tay, sana rayog ni mu m’ag ko n’en nib t’uf ko ani be fol Bible fa mu fal’eg rogon nge puluw nge yog nim fanay ko welthin rom.

21. Mang puluwon ni ra yib ni bochan nib manging’ rogon ni yibe fil e Thin rok Got ngak e girdi’?

²¹ Puluwon e sensey nib manging’ e boor. Nap’an ni gadad be fil ban’en ngak boch e girdi’, ma aram e gadad be pi’ boch ban’en ngak boch e girdi’; ma gadad be pi’ boch ban’en rodad ni ngad ayuweged yad. Re pi’ ban’en nem e ra yibnag e falfalan’, ya gaar fare Bible: “Ba gel e falfalan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Ya sensey ko Thin rok Got, e re falfalan’ nem e ba falfalan’ ni bochan ni yi manang ni gadad be pi’ ban’en ni rib riyul’ ni ra par felngin ni manemus​—ni aram e tin riyul’ ni murung’agen Jehovah. Maku e ri tay ni ra pagan’dad ni bochan ni gadad manang ni gadad be fol wok rok fare Sensey ni Fel’, ni Jesus Kristus.

[Footnotes]

Ka Ga Manang?

• Uw rogon ni gadad ra skulnag be’ nib mom u nap’an ni gadad be fol Bible u tabinaw rok? nge ngiyal’ ni gadad be pi’ e welthin u lan e ulung?

• Uw rogon ma rayog ni ngad fanayed e deer nib manging’ u nap’an ni gadad be machib u mit e tabinaw i yan?

• Uw rogon ma rayog ni ngad faned e tin nib puluw ni ngad weliyed e tin nib ga’ fan ni felngin Jehovah nge kanawoen ni ma rin’ ban’en?

• Uw e rayog ni da pirieged e fanathin riy nib puluw?

[Pictures on page 28]

Tin riyul’ e Kristiano e yad e sensey ko Thin rok Got

[Picture on page 30]

Piin ni piilal e rayog ni ngar fanayed e deer ni nge ayuweg e piin ke michan’rad ni nge yog e pagan’ ngorad ni yib ko Thin rok Got