Mu Pigpig ngak Jehovah u Polo’ i Gum’irchaem!

1-3. Mang e ba muun ngay ni ngad pigpiggad ngak Jehovah u ‘polo’ i gum’ircha’dad’? Mu tamilangnag.

BOCHAN ndawor da flontgad, ma aram fan nra ud olobochgad. Machane, gad ba felfelan’ ni bochan e faanra da kalgadngan’dad ko kireb rodad ma gad meybil ngak Jehovah u fithik’ e michan’ nge sobut’an’ ni nge n’ag fan rodad u daken fare biyul ni maligach ni pi’ Jesus, ma aram e dabi gechignagdad “nrogon nsusun e nge aw ngodad.” (Ps. 103:10, BT) Yugu aram rogon, me yog David ngak Solomon ni faanra nge m’agan’ Jehovah ko pigpig ni gad ma tay ngak ni gubin e rran, ma thingar da ‘pigpiggad ngak u polo’ i gum’ircha’dad.’ (1 Kron. 28:9) Ere, uw rogon nrayog ni ngad rin’ed e re n’ey ndawor da flontgad?

² Rayog ni ngad taareb rogonnaged e n’en ni buch rok Asa ni Pilung ko n’en ni buch rok Amaziah ni Pilung, ya nge yag nda nanged e fulweg ko re deer ney. Gal pilung nu Judah nem e yow l’agruw ni ur rin’ew e tin nib m’agan’ Jehovah ngay, machane Asa e ri i rin’ u fithik’ e yul’yul’ ara u polo’ i gum’irchaen. (2 Kron. 15:16, 17; 25:1, 2; Prov. 17:3) L’agruw e gal pilung nem ndar flontgow, maku immoy yu ngiyal’ ni ur olobochgow. Asa e de digey Got, ya i pigpig ngak u “polo’” i gum’irchaen ara u fithik’ e yul’yul’. (1 Kron. 28:9, BT) Machane, Amaziah e gathi ri i par nib yul’yul’ ngak Jehovah, ya tomuren ni gel ko pi toogor rok, ma aram me fek e pi liyos rorad nge un ngak, me tay ni nga i liyor ngay.​—2 Kron. 25:11-16.

³ Ra ngad pigpiggad ngak Got u ‘polo’ i gum’ircha’dad,’ ma be yip’ fan ni ngaud pared ni gad ba yul’yul’ ngak ni gubin ngiyal’. Fare bugithin ni ‘gum’ircha’’ ni yima fanay u Bible e ba ga’ ni be yip’ fan e bin riyul’ i rarogon be’. Ba muun ngay e pi n’en ni gad baadag, nge pi n’en ni gad ma lemnag, nge rarogodad, nge pi n’en nrayog rodad, nge pi n’en ni ma k’aringdad ni ngad rin’ed ban’en, nge pi n’en ni gad ma nameg ni ngad rin’ed. Ere, be’ ni ma pigpig ngak Jehovah u polo’ i gum’irchaen e der ma dake be pigpig ngak Got. Maku der ma pigpig ngak Jehovah ni bochan e manang ni ban’en nthingari rin’ ara bochan e ka ban’en ni ma rin’. Ma uw rogodad? Faan gad ra ulul ni ngad pigpiggad ngak Got u fithik’ e yul’yul’ ni yugu aram rogon ndawor da flontgad, ma aram e riyul’ ni gad be pigpig ngak u polo’ i gum’ircha’dad.​—2 Kron. 19:9.

4. Mang e ngad weliyed?

⁴ Faanra ngari tamilang u wan’dad e n’en ni be yip’ fan ni ngad pigpiggad ngak Got u polo’ i gum’ircha’dad, ma ngad weliyed e n’en ni buch rok Asa nge yugu boch e pilung u Judah ni ur pigpiggad ngak Got u fithik’ e yul’yul’ ni bod rogon Jehoshafat, nge Hezekiah, nge Josiah. Gubin e pi pilung ney nra olobochgad, machane ur pared ni yad ba fel’ u wan’ Jehovah. Ere, mang fan ni i sap Got ngay ni yad gubin ni ur pigpiggad ngak u polo’ i gum’ircha’rad, ma uw rogon nrayog ni ngad folwokgad rorad?

I PAR ASA NRIB “YUL’YUL’” NGAK JEHOVAH

5. Mang e rin’ Asa u nap’an ni mang pilung?

⁵ Asa e ir e en dalip ngay ni mang pilung u Judah u tomuren ni ki’ e nam nu Israel nge par fare ragag i ganong nu Israel nga bang, me par e ganong nu Judah nga bang. I chuweg urngin e liyos ni yima meybil ngay nge piin ni yad ma fol chuway’ ngorad ko yungi n’en tagil’ e meybil. Ki chuweg Maakah ni titaw rok ko fare liw ni “chitiningin e pilung, ni bochan e ke ngongliy ba liyos nib sonogor.” (1 Ki. 15:11-13, BT) Maku reb e, ki pi’ Asa e athamgil nga laniyan’ e girdi’ ni ngar “gayed Jehovah . . . mar folgad ko fare Motochiyel nge pi n’en ni ke tay chilen ni ngan rin’.” I rin’ Asa urngin e tin nrayog rok ni nge ayuweg e girdi’ ni ngar liyorgad ngak Jehovah.​—2 Kron. 14:4, NW.

6. Mang e rin’ Asa u nap’an ni yib piyu Ethiopia ni ngar chamgad nga Judah?

⁶ Ragag ni m’on e duw ko gagiyeg rok Asa e i tow’athnag Jehovah fare nam nu Judah nga i par nib gapas. Ma aram me yib Zerah nu Ethiopia ni nge cham nga Judah ni ke un 1,000,000 e pumoon ngak nge 300 e karrow ni ma girngiy e os. (2 Kron. 14:1, 6, 9, 10) Ere, mang e rin’ Asa u nap’an ni buch e re n’ey? I dag nrib pagan’ ngak Jehovah. (Mu beeg e 2 Kronicles 14:11.) Ere, fulweg Got taban e meybil rok ni tay u polo’ i gum’irchaen ni aram e ayuweg ni nge gel ko fare raba’ i salthaw nu Ethiopia. (2 Kron. 14:12, 13) Mus ko ngiyal’ nda i par boch e pilung ni yad ba yul’yul’ ngak Jehovah, ma ka i ayuwegrad ni ngar gelgad ko pi toogor rorad ni bochan e nge gagiyel ni ir e bin nriyul’ e Got. (1 Ki. 20:13, 26-30) Machane, Asa e i par ni be taga’ ngak Jehovah, ma aram mi i fulweg taban e meybil rok. Yugu aram rogon, ma immoy yu yay nga tomuren ni i oloboch. Bod ni, immoy bayay ni ning e ayuw ko pilung nu Syria ma de sap ngak Jehovah ni nge ayuweg. (1 Ki. 15:16-22) Machane, yugu aram rogon ma i sap Jehovah ngay ni Asa e ir be’ ni ‘i par nib yul’yul’ ngak u n’umngin nap’an e yafos rok.’ Ere, uw rogon nrayog ni ngad folwokgad ko n’en nib fel’ ni rin’ Asa?​—1 Ki. 15:14.

7, 8. Uw rogon nrayog ni ngam folwok rok Asa?

⁷ Rayog ni nge bagadad me fal’eg i yaliy ir ko rriyul’ ni be pigpig ngak Got u polo’ i gum’irchaen fa danga’. Rayog ni nge bagadad me fith ir ni nge gaar, ‘Kar gu dugliy u wan’ug ni nggu rin’ e tin nib m’agan’ Jehovah ngay, mug ayuweg e bin riyul’ e liyor, mu kug ayuweg e girdi’ rok u boch ban’en nrayog ni nge magawonnag e michan’ rorad, fa?’ Am lemnag gelngin e athamgil ni tay Asa ya nge dabi rus ni nge chuweg Maakah ni titaw rok ko liw rok ni ir “chitiningin e pilung!” Sana dariy be’ ni ga manang ni bod rogon e re ppin nem, machane sana rayog ni ngam mada’nag boch ban’en nra t’uf riy ni ngam folwok ko n’en ni rin’ Asa. Bod ni, uw rogon ni faanra ke denen reb i girdien e tabinaw rom ara reb e fager rom nrib chugur ngom, ma de kalngan’, mab t’uf ni ngan tharbog ko ulung? Ga ra dugliy u wan’um ndab kum chag ngak, fa? Mang e ra yog lanin’um ngom ni ngam rin’?

⁸ Faan ga ra taga’ ngak Got u nap’an ni kam mada’nag e togopuluw nib gel, ma aram e rayog ni nge m’ug riy ni ga be pigpig ngak u polo’ i gum’irchaem ara u fithik’ e yul’yul’ ni bod rogon Asa. Sana rayog ni be moningnagem boch e bitir u skul ni bochan e gur reb e Pi Mich Rok Jehovah. Fa reb e be moningnagem e piin ni gimed nga maruwel ni bochan e kam fek e matal rom ni ngam un nga reb e assembly ara ba ga’ nda mur maruwel nge pag e awa ni ngam maruwel riy. Nap’an ni ga ra mada’nag boch e magawon ni aray rogon, ma ngam meybil ngak Got ni bod e n’en ni rin’ Asa. Dab mu rus, mag taga’ ngak Jehovah, mu um rin’ e tin nib mat’aw. Dab mu pagtalin ni pi’ Got gelngin Asa me ayuweg, maku arrogon gur nra pi’ gelngim.

9. Uw rogon nrayog ni nge m’ug ni gad be pigpig ngak Got u polo’ i gum’ircha’dad u nap’an ni gad be machib?

⁹ Pi tapigpig rok Got e gathi kemus ni yad ma lemnaged yad, ya Asa e rin’ e tin nrayog rok ni nge ayuweg e girdi’ ni ngar liyorgad ngak Got. Ku arrogodad ni gad ma ayuweg e girdi’ ni ngar “gayed Jehovah.” Ere, dariy e maruwar riy nrib gel e felfelan’ ni ma tay Jehovah u nap’an nra guydad ni gad be weliy murung’agen ngak e pi buguli yoror rodad nge yugu boch e girdi’, maku gad be rin’ ni bochan e ba t’uf rodad ma gad be lemnag e girdi’ nge n’en nra buch rorad boch nga m’on!

I GAY JEHOSHAFAT JEHOVAH

10, 11. Uw rogon nrayog ni ngam folwok rok Jehoshafat?

¹⁰ Jehoshafat ni fak Asa e ku “bod Asa ni chitamangin nib m’on rok.” (2 Kron. 20:31, 32, BT) Ni uw rogon? I pi’ Jehoshafat e athamgil nga laniyan’ e girdi’ ni ngar gayed Jehovah ni bod rogon ni i rin’ e chitamangin. Rogon ni rin’ e re n’ey e aram e l’og boch e pumoon ni nga ranod u lan e pi mach nu Judah i yan ni yad be fil ko girdi’ e thin ni bay u “babyoren e motochiyel rok Somol.” (2 Kron. 17:7-10, BT) Ki milekag nga thatharen e burey nu Efraim nreb e binaw ni bay u tan pa’ fare ganong nu Israel ni bay ko lel’uch ni nge ‘yog ngak e girdi’ u rom ni ngar sulod ngak’ Jehovah. (2 Kron. 19:4) Jehoshafat e ir reb e pilung ni “i rin’ urngin e tin nrayog rok” ni nge gay Jehovah me pigpig ngak u polo’ i gum’irchaen.​—2 Kron. 22:9, BT.

¹¹ Rayog ni ngad uned i rin’ e bin th’abi ga’ e maruwel ni ke pi’ Jehovah ni ngan rin’ e ngiyal’ ney, ni aram e ngan fil murung’agen ko girdi’. Ere gur, gubin e pul ni ga ma nameg ni ngam fil e Thin rok Got ngak yugu boch e girdi’, mag gay rogon ni ngam ayuwegrad ni ngar adaged ni ngar pigpiggad ngak Got? Faan ga ra athamgil u rogon nrayog rom miki ayuwegem Got, ma aram e rayog ni ngam tabab i fil e Bible ngak be’. Ireray reb e ban’en ni ga ma uneg u lan e meybil rom, fa? Ba m’agan’um ngay ni ngam fil e Bible ngak be’ ni yugu aram rogon nsana ra t’uf ni ngam fanay boch e tayim ndariy ban’en ni ga ma rin’ riy ya nge yag nim rin’ e re n’ey, fa? Rayog ni ngad gayed rogon ni ngad ayuweged e piin ni kar meewargad ko tirok Got ban’en ma dakurur uned ko muulung nge machib, ni bod rogon ni yan Jehoshafat nga Efraim ni nge ayuweg e girdi’ ni ngar sulod ngak Jehovah bayay. Maku reb e, ma yarmiy e piin piilal ko ulung e tayim rorad ni nga ranod ra guyed e piin ni kan tharbograd ni yad be par u lan e pi binaw ni ma machib fare ulung riy ni kar talgad ndakurur rin’ed e kireb ni ur rin’ed kafram.

12, 13. (a) Mang e rin’ Jehoshafat u nap’an ni rus? (b) Mang fan nsusun e ngad folwokgad rok Jehoshafat?

¹² I folwok Jehoshafat rok Asa ni chitamangin me par nib yul’yul’ ngak Got ngki mada’ ko ngiyal’ ni yib ba ulung i salthaw nib ga’ ni ngar chamgad nga Judah. (Mu beeg e 2 Kronicles 20:2-4, BT.) Yugu aram rogon ni rus Jehoshafat, machane i ning e ayuw “ngak Somol ni nge pow’iy.” Nap’an ni be meybil ngak Jehovah, ma aram me yog ngak ndariy gelngirad e girdi’ rok u ‘puluwon e re raba’ i salthaw nem nib ga’’ ma da kur nanged e n’en ni ngar rin’ed. I dag ni be taga’ ngak Jehovah, me yog ni gaar: “Gamad be sap ngom ni ngam ayuwegmad.”​—2 Kron. 20:12, BT.

¹³ Ku arrogodad ni bay yu ngiyal’ nrayog ni ngad rusgad ni bod rogon Jehoshafat ma dab kud nanged e n’en ni ngad rin’ed. (2 Kor. 4:8, 9) Machane, dab mu pagtalin ni meybil Jehoshafat u p’eowchen e girdi’ ni kar muulunggad ni yad boor me yog ngak Jehovah gelngin farad meewar u puluwon e pi toogor rorad. (2 Kron. 20:5) Ere, gimed e piin lolugen e tabinaw e rayog ni ngam folwokgad rok Jehoshafat ni aram e ngaum meybilgad ngak Jehovah ni nge pow’iymed me pi’ gelngimed ni ngam gelgad ko pi magawon ni gimed be mada’nag. Ma dab mu tamra’gad ni ngam weliyed e pi n’ey u lan e meybil romed nge rung’ag chon e tabinaw romed. Ya faan gimed ra rin’, ma rayog ni ngar nanged ni be pagan’med ngak Jehovah. I ayuweg Got Jehoshafat, ere ba mudugil ni ku ra ayuwegmed.

I PAR HEZEKIAH NI BE RIN’ E TIN NIB MAT’AW

14, 15. Uw rogon ni dag Hezekiah nri be taga’ ngak Got?

¹⁴ Hezekiah e ku ir reb e pilung nib “yul’yul’ ngak” Jehovah. I par nib yul’yul’ ngak Jehovah ni yugu aram rogon nib kireb e ngongol rok e chitamangin, ma i meybil nga boch e got ni googsur. I “gothey fa yungi tagil’ e meybil rok e piin ndar nanged Somol, me t’ar fapi yu raba’ i malang nga but’ me th’ab nga but’ fapi liyos ni yaan fare got nib pin i Asherah. Miki t’et’ar nge yochiyang fare yaan e porchoyog ni bronze ni ngongliy Moses,” ni yibe fanay e ngiyal’ nem ni ngaun meybil ngay. I par nrib yul’yul’ ngak Jehovah me ulul nga “i ayuweg urngin e tin ke tay Somol chilen ngak Moses.”​—2 Ki. 18:1-6, BT.

¹⁵ Nap’an ni Hezekiah e ir e pilung, ma aram me yib e salthaw rok yu Assyria ra chamgad nga Judah mar guyed rogon ni ngar gotheyed yu Jerusalem. Ngiyal’ nem e yu Assyria e aram e re nam nib gel lungun u roy u fayleng. Machane, yugu aram rogon mi ri taga’ Heziekiah ngak Jehovah. I moningnag Sennacherib ni Pilung nu Assyria Jehovah me guy rogon ni nge k’aring e marus ngak Hezekiah ndab ki cham ngorad. Machane, i meybil Hezekiah ngak Jehovah me yog ngak nib pagan’ nra ayuwegrad u pa’ e pi toogor rorad. (Mu beeg e Isaiah 37:15-20.) Ere, fulweg Got taban e meybil rok Hezekiah ni aram e l’og reb e engel rok nge li’ 185,000 e salthaw nu Assyria.​—Isa. 37:36, 37.

16, 17. Uw rogon nrayog ni ngam folwok rok Hezekiah u rogon e pigpig ni ga be tay ngak Got?

¹⁶ Boch nga tomuren, mi ri m’ar Hezekiah nib gel nge chugur i yim’. Ere, wenig ngak Jehovah ni nge lemnag rogon e yul’yul’ ni i tay ngak miki ayuweg. (Mu beeg e 2 Kings 20:1-3, BT.) Be tamilangnag e Bible ni ngiyal’ ney ni gad bay riy e dabkiyog ni nge ngongliy Got e maang’ang nge golnagdad ko m’ar ara n’uwnag nap’an e yafos rodad. Machane, rayog ni ngad folwokgad rok Hezekiah ni aram e nge bagadad me meybil ngak Jehovah ni gaar: “Nge par u wan’um, ni rogon ni ug pigpig ngom e rib fel’ rogon ma ri gub yul’yul’ ngay.” Ere gur, ba mich u wan’um nrayog rok Jehovah ma kub m’agan’ ngay ni nge ayuwegem ngki mada’ ko ngiyal’ ni kam m’ar, fa?​—Ps. 41:3.

¹⁷ Faan gad ra fal’eg i lemnag e n’en ni rin’ Hezekiah, ma sana rayog ni ngad guyed ni bay ban’en ni be magawonnag e tha’ u thildad Got ara bay ban’en ni gad be adbey e tayim rodad ngay ndakir yag ni ngad pigpiggad nib fel’ rogon. Bod ni, boor e girdi’ e ngiyal’ ney e yad ma n’uf yugu boch e girdi’ nga lang nib pag rogon ni gowa yad boch e got ni ngaun meybil ngorad. Ri yad ma tayfan e piin nib gilbuguwrad u fayleng nge ku boch e girdi’ ndar nanged owcherad. Boor i yad e ma tay boor e tayim ni nge beeg murung’agen e pi girdi’ nem ara i yaliy e sasing rorad ko Internet. Kub ga’ ni yad ma fanay boch ban’en ni bay ko Internet ni ngaur nonad riy ngak yugu boch e girdi’. Riyul’ nsana gad baadag ni ngaud fanayed e pi n’ey ni ngaud nonad riy ngak girdien e tabinaw rodad ara pi fager rodad nrib chugur thildad. Machane, rayog ni ngaud adbeyed e tayim rodad nga boch ban’en ni bay ko Internet ni yima fanay ni ngaun non riy ngak yugu boch e girdi’, ara da paged boch e girdi’ ndad nanged yad ni ngar manged fager rodad ko yungi n’em ni yima yan ngay ko Internet, ara ud ted boor e tayim ni ngaud yaliyed e sasing ni ke tay e pi girdi’ nem e ngaram, ara ngad beeged boch ban’en u murung’agrad. Maku reb e, rayog ni ngad ufgad ni faanra yog boor e girdi’ ni yad baadag e sasing ara thin ni kad ted ko yungi n’em ko Internet. Fa reb e, faanra da nanged ni bay boch e girdi’ ndakurur yaliyed e sasing rodad, ma rayog ni ngad damumuwgad. Machane, ba fel’ ni ngad folwokgad rok apostal Paul, nge Aquila nge Priscilla. Ga be lemnag ni gubin e rran ni ur fanayed e tayim rorad ni ngaur gayed murung’agen gubin e nochi n’en ni be rin’ e girdi’, nib ga’ ni piin ndarur pigpiggad ngak Jehovah, fa? Be yog e Bible ni i ‘par Paul ni yigoo thin rok Got e be machibnag ko girdi’.’ Ma Aquila nge Priscilla e ur fanayew e tayim rorow ni ngar weliyew ko girdi’ “murung’agen Kanawoen Got nib puluw.” (Acts 18:4, 5, 26) Ere, rayog ni ngad fithed gadad ni nge lungudad, ‘Gu ma guy rogon ndab ug n’uf yugu boch e girdi’ nga lang nib pag rogon, fa? Gu ma guy rogon ndab ug n’ag boor e tayim rog ni ngaug rin’ boch ban’en riy nde ga’ fan, fa?’​—Mu beeg e Efesus 5:15, 16a.

I FOL JOSIAH KO PI MOTOCHIYEL ROK JEHOVAH

18, 19. Uw rogon nrayog ni ngad boded Josiah?

¹⁸ Josiah ni Pilung ni fak tungin Hezekiah e ku ir be’ ni i fol ko pi motochiyel rok Jehovah “u polo’ i gum’irchaen.” (2 Kron. 34:31, BT) Nap’an ni ke fel’ yangaren, ma aram me “tabab i liyor ngak Got rok e ga’ rok ni aram David,” ma nap’an ni gaman 20 e duw rok ma aram me tabab i gothey e yungi n’en ni tagil’ e tayfan rok e piin ni yad ma meybil nga yugu boch e got ni googsur nge urngin e liyos ni bay u lan yu Judah. (Mu beeg e 2 Kronicles 34:1-3, BT.) Rib pasig Josiah ni i rin’ e tin nib m’agan’ Got ngay, ma dariy reb e pilung u Judah ni bod ir. Machane, nap’an nni pirieg fare ke babyoren e Motochiyel ni yoloy Moses min beeg ngak, ma aram me guy ni bay boch ban’en nib t’uf ni ngki rin’ ya nge yag ni nge fel’ rogon e pigpig ni be tay ngak Got. Ere, pi’ e athamgil nga laniyan’ e tin ni ka bay e girdi’ ni ngar pigpiggad ngak Jehovah. Angin ni yib riy e, i par e girdi’ ni yad be ‘pigpig’ ngak Jehovah u n’umngin nap’an ni i par nib fos.​—2 Kron. 34:27, 33.

¹⁹ Piin fel’ yangaren e susun ni ngar tababgad i guy rogon ni ngar nanged Jehovah u nap’an ni kab fel’ yangarrad ni bod rogon e n’en ni rin’ Josiah. Nap’an ni kalngan’ Manasseh ni Pilung ni tutuw rok Josiah ko kireb rok, ma rayog ni fil ngak Josiah murung’agen rogon ni ma runguyey Got. Ere, gimed e piin fel’ yangaren e ngam guyed rogon ni nge chugur e tha’ u thilmed boch e walag u lan e ulung ngu lan e tabinaw romed ni yad ba ilal ngomed, mi gimed fil rorad murung’agen e pi n’en nib fel’ ni ke rin’ Jehovah ni fan ngorad. Maku reb e, dab mu paged talin ni pi n’en ni beeg Josiah u lan fare Babyor nib Thothup e aram e pi n’en ni taw nga gum’irchaen me k’aring ni nge yal’uweg boch ban’en nde puluw ni be buch. Ere, faanra um beeged e Thin rok Got ma rayog ni nge k’aringmed ni ngam rin’ed e n’en nib t’uf ni ngam rin’ed ya nge yag ni gel e felfelan’ romed, me chugur e tha’ u thilmed Got, miki k’aringmed ni ngam ayuweged yugu boch e girdi’ ni ngkur nanged Got. (Mu beeg e 2 Kronicles 34:18, 19.) Fol Bible e ku rayog ni nge ayuwegmed ni ngam nanged boch ban’en nib t’uf ni ngam mon’oggad riy u rogon e pigpig ni gimed be tay ngak Got. Ma faanra kam guyed ni bay boch ban’en u rarogomed nib t’uf ni ngam thilyeged, mi gimed athamgil ngam rin’ed ni bod rogon Josiah.

MU PIGPIG NGAK JEHOVAH U POLO’ I GUM’IRCHAEM!

20, 21. (a) Mang e taareb rogon ko fa aningeg i pilung ni kad weliyed murung’agrad? (b) Mang e gad ra weliy ko bin migid e article?

²⁰ Mang e rayog ni ngad filed ko fa aningeg i pilung nu Judah ni ur pigpiggad ngak Jehovah u polo’ i gum’ircha’rad? Ra dugliyed u wan’rad ni ngar rin’ed e tin nib m’agan’ Got ngay mar pigpiggad ngak u n’umngin nap’an e yafos rorad. Ur pared ni yad be rin’ e tin nib m’agan’ Got ngay ngki mada’ ko ngiyal’ ni yib e pi toogor rorad ni ngar chamgad ngorad. Bin th’abi ga’ fan riy e, ur pigpiggad ngak Jehovah ni bochan e ba t’uf rorad.

²¹ Gad ra weliy ko bin migid e article nre aningeg i pilung nem e immoy yu ngiyal’ ni ur olobochgad. Machane, yugu aram rogon ma i tayrad Jehovah ni ir e En ni Ma Yaliy gum’irchaen e girdi’ ni yad gubin ni ur pigpiggad ngak u polo’ i gum’ircha’rad. Ku arrogodad ndawor da flontgad. Ere, nap’an nra yaliydad Jehovah ma gur, ra guy ni gad be pigpig ngak u polo’ i gum’ircha’dad, fa? Ngad weliyed e fulweg ko re deer ney ko bin migid e article.