Mu Pag e Pi Motochiyel nge Kenggin e Motochiyel rok Got ni Nge Skulnag e Nangan’ Rom

1. Mang reb e ban’en ni bay ko girdi’ ni be dag ni ka yad ba fel’ ko gamanman?

REB e ban’en ni bay ko girdi’ ni be dag ni yad ba thil ko gamanman e aram e bay e nangan’ rorad. Ka nap’an nni sunmiy e girdi’ kan tayrad nga fayleng ma ke m’ug nriyul’ e re n’ey. Tomuren ni th’ab Adam nge Efa e motochiyel rok Jehovah, ma aram ma ranow ra mithgow. Re n’ey e be dag ni ke magawon e nangan’ rorow.

2. Uw rogon nrayog ni ngan taareb rogonnag e nangan’ rodad ko compass? (Mu guy e sasing ni bay u tabolngin e re article ney.)

² Piin ndawor ra skulnaged e nangan’ rorad nib fel’ rogon e rayog ni ngan taareb rogonnagrad ngab barkow ni be fol u ba compass ni ke kireb. Faan yira milekag ni yibe fanay ba compass nde puluw, ma rayog ni nge bannagey. Nifeng nge n’ew nib gel u maday e rayog ni nge k’aring fare barkow ni nge sor nga bang nde puluw. Machane, faanra be fanay e gabitey ko barkow e compass ni be maruwel nib fel’ rogon, ma aram e rayog ni nge puluw e gin ni nge sor fare barkow ngay. Nangan’ rodad e taareb rogon ko fare compass. Nangan’ ni bay rodad e ir e ma ayuwegdad ni ngad nanged e n’en nib thil u thilin e tin nib fel’ nge tin nib kireb, me pow’iydad ko bin nib puluw e kanawo’. Machane, faanra nge yag ni pow’iydad e nangan’ rodad ko bin nib puluw e kanawo’, ma thingar da skulnaged ya nge yag ni maruwel nib fel’ rogon.

3. Mang e rayog ni nge buch rok be’ ni faanra de skulnag e nangan’ rok nib fel’ rogon?

³ Faanra de skulnag be’ e nangan’ rok nib fel’ rogon, ma aram e dabiyog ni nge taleg ndabi rin’ e kireb. (1 Tim. 4:1, 2) Nangan’ ni aray rogon e ku rayog ni nga i yog e “manigil ko kireb.” (Isa. 5:20, BT) I ginang Jesus pi gachalpen ni gaar: “Bayi taw nga ba ngiyal’ ni en ra thang e fan romed e bayi finey nra rin’ ni aram rogon ma aram e be pigpig ngak Got.” (John 16:2) Aray rogon fapi girdi’ nra lied Stephen nge yim’, maku bay yugu boch e girdi’ ni arrogorad. (Acts 6:8, 12; 7:54-60) Kab kakrom i yib ni boor e girdi’ ko pi yurba’ i teliw ni yad ma rin’ boch e kireb nib togopuluw ko motochiyel ni bod ni ngar thanged e pogofan ku be’ ma rogned nre n’em ni kar rin’ed e fan ngak Got. Machane bin riyul’ riy e, kar rin’ed ban’en nib togopuluw ko motochiyel rok Got. (Ex. 20:13) Ere ba tamilang ni nangan’ rorad e be soregrad nga bang nde puluw!

4. Uw rogon ni ngad ayuweged e nangan’ rodad ndabi kireb?

⁴ Uw rogon ni ngad ayuweged e nangan’ rodad ndabi kireb? Pi motochiyel nge kenggin e motochiyel ni bay ko Thin rok Got e “ba ga’ fan ya ma fil e tin nib riyul’ e thin ngodad, ma be yal’uweg e tin ni be oloboch e girdi’ riy, ma be fulweg e girdi’ ko ngongol nib fel’, ma be fonownag e girdi’ u rogon e ngongol ni ngar pired riy ni ir e mmat’aw u mit Got.” (2 Tim. 3:16) Ere, faan gad ra fal’eg i fil e Bible rodad, mu ud fal’eged i lemnag e n’en ni be yog, ma gad fol riy, ma aram e rayog ni ngad skulnaged e nangan’ rodad ni nge puluw ko lem rok Got me yag ni pow’iydad nib fel’ rogon. Chiney e ngad weliyed rogon nrayog ni nge ayuwegdad e pi motochiyel nge kenggin e motochiyel rok Jehovah ni ngad skulnaged e nangan’ rodad.

MU PAG E PI MOTOCHIYEL ROK GOT NI NGE SKULNAGEM

5, 6. Faan gad ra fol ko pi motochiyel rok Got, ma uw rogon nra yib angin ngodad?

⁵ Faanra nge yib angin e pi motochiyel rok Got ngodad, ma aram e gathi kemus ni ngaud beeged ya ba t’uf ni ngkud nanged ko mang e pi motochiyel nem. Thingari t’uf e pi motochiyel nem rodad ma gad tayfan. Be gaar e Thin rok Got: “Mu fanenikayed e tin nib kireb, me t’uf romed e tin nib fel’.” (Amos 5:15) Machane, uw rogon ni ngad rin’ed e re n’ey? Reb e ban’en nrayog ni nge ayuwegdad e aram e ngad filed rogon ni ngaud lemnaged boch ban’en ni bod rogon ni ma lemnag Jehovah. Am susunnag nder yag ni ngam mol nib fel’ rogon. Ere ke yog e togta ngom nib t’uf ni ngam kay e ggan nib fel’ nga fithik’ i dowam, mu um rin’ boch ban’en nib chamag ngom, mag thilyeg boch ban’en u rogon e par rom. Nap’an nim fol ko fare fonow, ma aram mag guy ni ke yib angin! Ere dabisiy ni ga ra pining e magar ko togta rom ni ke ayuwegem ni ngam mon’ognag boch ban’en u rogon e par rom.

⁶ Ku arrogon e En ni Ke Sunmiydad ni ke pi’ boch e motochiyel nrayog ni nge ayuwegdad u wenegan e denen me yag nda mon’ognaged rogon e par rodad. Am lemnag rogon angin ni ma yib ngodad ni faan gad ra fol ko pi motochiyel u Bible ni be yog ndabin ban, ara ni sasalap, ara ni moro’ro’, ara ni un ko ngongol ndarngal, ara cham, ara ngongolen e pig. (Mu beeg e Proverbs 6:16-19; Rev. 21:8) Nap’an ni gad ra guy angin ni ke yib ngodad ni bochan e gad be rin’ boch ban’en u rogon nib m’agan’ Jehovah ngay, ma aram e ra gel e t’ufeg rodad ngak nge pi motochiyel rok miki ga’ fan u wan’dad.

7. Faanra ud beeged ma gad be fal’eg i lemnag murung’agen boch e girdi’ u Bible, ma mang e rayog ni nge ayuwegdad ni ngad rin’ed?

⁷ Machane gad ba felfelan’ ni bochan e de t’uf ni ngad th’abed e pi motochiyel rok Got me yib wenegan ngodad mfini yag nda filed ban’en riy. Ya rayog ni ngad filed ban’en ko oloboch ni i rin’ boch e girdi’ ni kan yoloy murung’agen e kireb ni ur rin’ed nga lan e Thin rok Got. Be gaar e Proverbs 1:5 (NW): “Be’ nib gonop e ma motoyil ya nge yag ni ngki fil boch e fonow nib beech.” Arrogon, tin th’abi fel’ e fonow ni ma yag ngodad e Got e ma yib rok, ma rogon ni ma yag e pi fonow ney ngodad e bod nu nap’an ni gad be beeg ma gad be fal’eg i lemnag murung’agen boch ban’en ni i buch rok boch e girdi’ ni bay murung’agrad u Bible. Bod ni, am lemnag gelngin e amith ni tay laniyan’ David ni Pilung u tomuren ni th’ab e motochiyel rok Got mar parew Bath-sheba ni leengin yugu be’. (2 Sam. 12:7-14) Nap’an ni gad be beeg e re chep ney ma gad be fal’eg i lemnag, ma aram e rayog ni ngad fithed gadad ni nge lungudad: ‘Mang e faan gomanga rin’ David ni Pilung ma aram e rayog ni nge siyeg e amith ni ke tay laniyan’ ni bochan e kar parew Bath-sheba ni gathi leengin? Faan gomanga ke yib reb e lumel ni aray rogon ngog, ma gur rayog rog ni nggu siyeg? Gu ra mil riy ni bod Josef, fa gu ra pageg ngay ni bod rogon David?’ (Gen. 39:11-15) Faan gad ra fal’eg i lemnag wenegan e denen nra yib ngodad, ma aram e rayog ni ngar da “fanenikayed e tin nib kireb.”

8, 9. (a) Mang e ma ayuwegdad e nangan’ rodad ni ngad rin’ed? (b) Uw rogon ni ma maruwel e nangan’ rodad nge pi kenggin e motochiyel rok Jehovah u taabang?

⁸ Sana rayog ni kad palognaged gadad ko pi ngongol nib fanenikan Got. Machane, bay boch ban’en ni ma buch u lan e yafos rodad ndariy ba motochiyel u Bible ni be yog e n’en ni ngad rin’ed ngay. Faanra kad mada’naged boch ban’en ni aray rogon, ma uw rogon ni ngad nanged e n’en nib m’agan’ Got ngay? Aram e ngiyal’ ni ngad maruwelgad ko nangan’ rodad ni kan skulnag ko thin nu Bible.

⁹ Bochan ni gad ba t’uf rok Jehovah, ma aram fan ni ke pi’ e pi kenggin e motochiyel nrayog ni nge pow’iy e nangan’ rodad. Ke yog ni gaar: “I Gag Somol ni Got romed, faen baadag ni nge fil ngomed e tin nib fel’ me pow’iymed ko fare kanawo’ ni ngam marod riy.” (Isa. 48:17, 18, BT) Faan gad ra fal’eg i lemnag e pi kenggin e motochiyel u Bible ma gad guy rogon ni nge taw nga gum’ircha’dad, ma aram e rayog ni ngad yal’uweged e nangan’ rodad ma gad guy rogon ni nge maruwel nib fel’ rogon. Ireray e n’en nra ayuwegdad ni ngad dugliyed boch ban’en nib fel’ rogon.

MU PAG E PI KENGGIN E MOTOCHIYEL ROK GOT NI NGE POW’IYEM

10. Mang e kenggin e motochiyel, ma uw rogon ni fanay Jesus u nap’an ni be fil boch ban’en ngak pi gachalpen?

¹⁰ Kenggin e motochiyel e aram ban’en nib riyul’ nrayog ni nge pow’iy e lem rodad, me ayuwegdad ni ngad dugliyed boch ban’en nib fel’ rogon. Ra ngad nanged fan reb i kenggin e motochiyel mab muun ngay ni ngad nanged fan rogon e lem rok Jehovah nge fan ni ke pi’ boch e motochiyel ni ngad folgad riy. Nap’an ni i machib Jesus, ma aram me fil boch i kenggin e motochiyel ngak pi gachalpen ya nge yag ni ayuwegrad ni ngar nanged wenegan nra yib ngorad ni faanra ur lemgad ara ur rin’ed boch e ngongol nde puluw. Bod ni, fil ngorad ni damumuw e ra fekey i yan ko cham, ma ar’ar nib kireb e ra fekey i yan ko ngongol ndarngal. (Matt. 5:21, 22, 27, 28) Faanra nge yag e nangan’ ngodad ni kan skulnag nib fel’ rogon, ma aram e susun ni ngad paged e pi kenggin e motochiyel rok Got ni nge pow’iydad me yad nda pininged e sorok ngak.​—1 Kor. 10:31.

11. Uw rogon nrayog ni nge thil e nangan’ rok l’agruw ni’?

¹¹ Mus ni faanra ke skulnag l’agruw e Kristiano e nangan’ rorow ko thin nu Bible, ma ka rayog ni nge thil rogon ni ngar dugliyew boch ban’en. Am lemnag murung’agen e muun alkul. Der yog e Bible nib kireb ni ngan unum buchuuw e alkul. Machane, be yog nib kireb e unum nib pag rogon nge chingaw. (Prov. 20:1; 1 Tim. 3:8) Ere gur, re n’ey e be yip’ fan ni faanra der unum reb e Kristiano nib pag rogon ma aram e dakuriy ban’en nib t’uf ni nge lemnag? Danga’, ya yugu aram rogon ndariy ban’en ni be magawonnag e nangan’ rok, machane thingar ki lemnag e nangan’ rok yugu boch e girdi’.

12. Uw rogon nrayog ni nge k’aringdad fapi thin ni bay ko Roma 14:21 ni ngad ted fan e nangan’ rok yugu boch e girdi’?

¹² I yog Paul nib t’uf ni ngad ted fan e nangan’ rok yugu boch e girdi’ u nap’an ni yoloy ni gaar: “N’en nib mat’aw ni ngan rin’ e nge dab ni kay e ufin, ma dab ni unum e wain, fa nrin’ yugu ban’en nra waliy be’ ni walagem ni girdien Got nge mul nga fithik’ e denen.” (Rom. 14:21) Gur, ra m’agan’um ngay ni ngam pag fan boch ban’en ni ga manang ni bay mat’awum ni ngam rin’ ya nge dab mu magawonnag laniyan’ reb e walag nib thil e nangan’ romew? Dariy e maruwar riy ni ga ra rin’. Bay boch e walag nu m’on ni ngar filed e tin riyul’, ma ur unumed e alkul nib pag rogon, machane chiney e kar dugliyed ni ngar talgad ko unum. Ba mudugil ndariy bagadad ni baadag ni nge rin’ ban’en nra k’aring walagdad ni nge sul nga ngongolen ni kafram. (1 Kor. 6:9, 10) Ere, ra m’ug ndariy e t’ufeg rok be’ ni ke pining boch e girdi’ nga tafen ni faanra towasariy reb e walag ni nge unum e alkul u tomuren ni ke siyeg.

13. Uw rogon ni tay Timothy fan e nangan’ rok yugu boch e girdi’ ya nge yag ni ayuwegrad ni ngar adaged fare thin nib fel’?

¹³ Nap’an ni ka fini gaman 20 e duw rok Timothy fa ka fini pag, ma aram me m’agan’ ngay ni ngan maad’adnag ni yugu aram rogon nra gafgow riy ni bochan e nge dabi magawonnag laniyan’ e pi Jew ni be machibnagrad. Taareb rogon e lem rok Timothy nge apostal Paul. (Acts 16:3; 1 Kor. 9:19-23) Me gur, ba m’agan’um ngay ni ngam pag fam u boch ban’en ni fan e ngam ayuweg yugu boch e girdi’, fa?

NGAD “MON’OGGAD I YAN KO TIROK GOT BAN’EN”

14, 15. (a) Mang e ba muun ngay ni ngad ilalgad ko tirok Got ban’en? (b) Uw rogon nib peth e t’ufeg ni gad ma dag ko girdi’ nga rogon ni kad ilalgad ko tirok Got ban’en?

¹⁴ Gubin e Kristiano nsusun e ngar adaged ni nge “ga’ e tamilangan’ rorad ko tin som’on e machib ni kar filed u murung’agen Kristus” mar “mon’oggad i yan ko tirok Got ban’en.” (Heb. 6:1, NW) Re n’ey e dabiyog ni nga yigi buch ni ir rok, ya ba t’uf ni ngad “mon’oggad i yan” ara da ululgad i maruweliy e re n’ey. Ra ngad ilalgad ko tirok Got ban’en mab muun ngay ni nge ga’ e tamilangan’ nge nang fan rodad. Aram fan ni boor yay ni yima puguran ngodad ni ngaud beeged bang ko Bible ni gubin e rran. (Ps. 1:1-3) Kam nameg ni ngam rin’ e re n’ey, fa? Faanra um beeg e Bible rom ni gubin e rran, ma aram e rayog ni ngari tamilangan’um ko pi motochiyel nge kenggin e motochiyel rok Jehovah me toar rogon e nang fan rom ko Thin rok.

¹⁵ Bin th’abi ga’ fan e motochiyel ni ma fol e piin Kristiano riy e aram fare motochiyel ko t’ufeg. I gaar Jesus ngak pi gachalpen: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:35) Yima yog ni t’ufeg e aram “fare motochiyel rok fare gagiyeg nu tharmiy [“bin th’abi ga’ e motochiyel,” NW] nge “fare Motochiyel ni polo’.” (Jas. 2:8; Rom. 13:10) Darud gingad ngay ni t’ufeg e ban’en nrib ga’ fan ni bochan e be yog e Bible ni “Got e t’ufeg.” (1 John 4:16) T’ufeg rok Got e gathi kemus ni ban’en ni ma thamiy, ya ku ma m’ug ko ngongol rok. I yoloy John ni gaar: “Baaray rogon ni dag Got ni gadad ba t’uf rok: i l’og Fak ni kari maagirag rok ngaray nga fayleng ni fan e nge yog e yafos ngodad u daken.” (1 John 4:9) Ere faan gad ra dag e t’ufeg ngak Jehovah nge Fak, nge pi walagdad ni Kristiano, nge tin ka bay e girdi’, ma aram e gad be micheg ni kad ilalgad ko tirok Got ban’en.​—Matt. 22:37-39.

16. Mang fan nra gel feni ga’ fan e pi kenggin e motochiyel u wan’dad u nap’an ni gad ra ilal i yan ko tirok Got ban’en?

¹⁶ Nap’an ni ga ra mon’og i yan ko tirok Got ban’en, ma aram e ra gel feni ga’ fan e pi kenggin e motochiyel u wan’um. Re n’ey e bochan ni motochiyel e ba mudugil e n’en nrayog ni ngan fanay ngay, ma pi kenggin e motochiyel e rayog ni ngan fanay nga boor ban’en. Bod nreb e bitir ni kab achig e dawor ri tamilang u wan’ feni kireb ni ngaun chag ko girdi’ nib kireb. Ere ba t’uf ni nge tay e gallabthir rok boch e motochiyel ni nge fol riy nra ayuweg. (1 Kor. 15:33) Machane, nap’an nra ilal fare tir ma aram e ku ra ilal e lem rok me yag ni nang rogon ni nge fal’eg i lemnag fan e pi kenggin e motochiyel u Bible, nge angin nra yib ngak ni faanra fol riy. Pi kenggin e motochiyel nem e aram e n’en nra ayuweg ni nge mel’eg boch e fager nib manigil. (Mu beeg e 1 Korinth 13:11; 14:20.) Faanra ud fal’eged i lemnag fan e pi kenggin e motochiyel ni ke pi’ Got ngodad nge angin nra yib ni faan gad ra fol riy, ma aram e rayog ni nge pow’iydad e nangan’ rodad nib fel’ rogon, miki yag ni nge puluw ko lem rok Got.

17. Mang fan nrayog ni nga dogned ni bay e tin nib t’uf rodad nra ayuwegdad u rogon ni ngad dugliyed boch ban’en u fithik’ e gonop?

¹⁷ Gur, bay rodad urngin ban’en nib t’uf nra ayuwegdad ni ngad dugliyed boch ban’en u fithik’ e gonop u rogon nra m’agan’ Jehovah ngay, fa? Arrogon. Faan gad ra nang rogon ni ngad fanayed e pi motochiyel nge kenggin e motochiyel ni bay ko Thin rok Got, ma aram e rayog ni ngad ‘pared ni ke bung rogodad nrayog ni ngad rin’ed urngin mit e ngongol nib fel’.’ (2 Tim. 3:16, 17) Ere, mu fal’eg i gay e pi kenggin e motochiyel u Bible ya nge yag nim ‘nang e n’en nib m’agan’ Somol ngay ni ngam rin’.’ (Efe. 5:17) Mu fanay boch ban’en ni ke fal’eg e ulung rodad nrayog ni nge ayuwegem, ni bod rogon fare Watch Tower Publications Index, nge fare Research Guide for Jehovah’s Witnesses, nge fare Watchtower Library, nge fare JW Library app ni thin ni Meriken, nge fare LIBRARY U ONLINE ni fan ko Wulyang ko Damit. Pi n’ey e kan ngongliy rogon ni nge ayuwegdad ni nge yib angin ngodad e fol Bible ni gad ma tay ni yigoo gadad ara fol Bible ni tabinaw.

NANGAN’ NI KAN SKULNAG KO THIN NU BIBLE E RA YOGNAG BOCH E TOW’ATH NGODAD

18. Mang boch e tow’ath nra yag ngodad ni faanra puluw e ngongol rodad ko pi motochiyel nge kenggin e motochiyel rok Jehovah?

¹⁸ Boor e tow’ath nra yag ngodad ni faan gad ra fol ko pi motochiyel nge kenggin e motochiyel rok Jehovah, ya be gaar e Psalm 119:97-100: “Rib t’uf rog e motochiyel rom! Gu ma par ni gu ma lemnag ni polo’ e rran. Tin ni ka mog ni ngan rin’ e be par u wun’ug ni gubin ngiyal’, be gagiyegnigeg gu be par ni ba ga’ e gonop rog ngak e pi toogor rog. Ba gel e tamilangan’ rog ngak urngin e piin ni ur machibniged gag, ya gu ma lemnag e fonow ni ga be tay ngog. Ka ba ga’ e gonop rog ngak e piin ni kar pumoongad, ya gu be fol ko tin ni ka mog ni ngan rin’.” Ere, faanra ud ‘pared ni gad be lemnag’ e pi motochiyel nge kenggin e motochiyel rok Got, ma aram e rayog ni nge ga’ e gonop, nge tamilangan’, nge rogon e nang fan rodad. Ma faan gad ra athamgil ni ngad paged e pi motochiyel nge kenggin e motochiyel rok Got ni nge skulnag e nangan’ rodad, ma aram e rayog ni ngad ‘ilalgad i yan nge mus rogodad ngad boded mam’ungun Kristus.’​—Efe. 4:13.