Ngada Chaariyed Rarogodad Ni Gad E Kristiano

“ ‘Gimed e pi mich rog.’ Aram e n’en ni yog Jehovah.”​—ISAIAH 43:10.

1. Miti mang girdi’ e be pining Jehovah ni ngar bad ngak?

NAP’AN ni ga bay u Kingdom Hall mu chachangar ko mang e bay u charem? Chon mini’ e ga be guy u tafen e meybil? Sana ga ra guy e piin nib fel’ yangaren ni yad be tayan’ ko llowan’ ko Bible. (Psalm 148:12, 13) Maku sana ga ra guy e piin ni yad lolgen e tabinaw rorad ni yad be athamgil ni ngar falan’naged Got ni yugu aram rogon ni yad be par u fithik’ e fayleng ni be dariy fannag e par u tabinaw. Sana ga ra guy e piin ni pilibthir ni yad ba yul’yul’ ni yad be rin’ e tin ni kar micheged ngak Got u nap’an ni kar ognaged yad ni ngar rin’ed e tin nib m’agan’ Got ngay ni yugu aram rogon ni boor e magawon rorad ni bochan e kar pilibthirgad. (Proverbs 16:31) Yad gubin ni rib t’uf Jehovah rorad. Mab m’agan’ Got ngay ni nge pining e pi girdi’ ney ni nge fel’ thilrad Got. Ke micheg Fak Got ni gaar: “Dariy be’ nrayog ni nge yib ngog ni faanra gathi en ni Chitamangiy e pow’iy nge yib ngog, ni ir e ke l’uggeg ku gub.”​—John 6:37, 44, 65.

2, 3. Mang fan nib mo’maw’ ni nguuda ted ni gad e Kristiano?

² Gad ba falfalan’ ni gad bang e pi girdi’ ni ke falan’ Jehovah ngorad ma ke flaabnagrad, fa? Machane mmo’maw’ ni nge tamilang u wan’dad ni gad e Kristiano ni bochan e gad ma par ko ngiyal’ nib “mo’maw’ ni ngan par nrogon e tin riyul’ ni girdien Kristus.” (2 Timothy 3:1) Ma baga’ nib mo’maw’ rok e piin nib fel’ yangaren ni yibe chuguliyrad nrogon e Kristiano. Be gaar be’ nib fel’ yangaren: “De tamilang u wan’ug ko mang e gu be nameg ni yugu aram rogon ni gu ma un ko pi muulung rok e Kristiano. Ma dariy u wan’ug ni nggu pigpig ku Jehovah.”

³ Ma bay boch e piin nib fel’ yangaren ni yad ba adag ni ngar pigpiggad ku Jehovah machane kar magawongad ni bochan e towasar ko pi tafager rorad nge tin nu fayleng ban’en ni be wawliyrad maku bay e denen ni bay u fithik’rad. Nap’an ni yira towasariydad ma munmun ma rayog ni nge de tamilang u wan’dad ni gad e Kristiano. Susun, boor e girdi’ u fayleng e chiney ni yad be lemnag ni yalen nu Bible e mm’ay fan ara de m’ag ko par rodad e chiney. (1 Peter 4:4) Boch e girdi’ e ma lemnag ni gathi ri baga’ fan ni ngan liyor ku Got nrogon ni ke gagiyegnag. (John 4:24) Nap’an ni yol Paul ngak piyu Efesus i weliy morngaagen “laniyan’” e fayleng ara “nifengen e fayleng.” (Efesus 2:2) Re “laniyan’” nem e ma suruy e girdi’ ni ngar folgad nga laniyan’ e piin ni dar nanged Jehovah.

4. Uw rogon ni ke tamilangnag Jesus ni ba t’uf rodad ni nge tamilang u wan’dad ni gad e Kristiano?

⁴ Machane gad e pi tapigpig rok Jehovah ni kada ognaged gadad ngak e gad manang ni gad ra gafgow ni faanra dabki tamilang u wan’dad ni gad e Kristiano​—ni gad e piin nib fel’ yangaren nge piin nib ilal. Gad manang ni gad e Kristiano ni bochan e gad manang e pi motochiyel rok Jehovah nge pi n’en nib m’agan’ ngay ni ngada rin’ed. Ya kada sumgad ni bay boch rarogon Got rodad. (Genesis 1:26; Micah 6:8) I taarebnag e Bible rarogodad e Kristiano ko mad ni gad ra chuw ngay ni fan e nge guy urngin e girdi’. I weliy Jesus morngaagen e ngiyal’ ni gad ma par riy ni gaar: “Mmotoyil! Bay gub ni bod ba moro’ro’! Ra felfelan’ e en ni ke par ni be od ni be ayuweg e mad rok, ni bochan e nge dab i yan ndariy e mad u daken ngi i tamra’ u fithik’ e girdi’.”a (Revelation 16:15) Dubdad ni ngada n’aged pi felngin e Kristiano ara pangin e Kristiano ni bay rodad nge mang fayleng rok Satan e nge gagiyegnagdad. Faan manga ke mang fayleng e nge gagiyegnagdad ma gowa kada n’aged e “mad” rodad. Faan manga yodor ma ri baga’ e kireban’ nge tamra’ rodad.

5, 6. Mang fan ni baga’ fan ni nge mudugil e michan’ rodad?

⁵ Faanra tamilang u wan’ be’ ni ir e Kristiano ma re tamilangan’ nem e ra turguy rogon e yafas rok faanem. Uw rogon? Faanra ke maruwaran’ be’ ni ma liyor ngak Jehovah ko ir mini’ ma ra yan i aw ni ke yoor e tafinay rok ma de nang e gini be sor ngay ara n’en ni be nameg. Boor yay ni be yog e Bible ni nge dabi maruwaran’dad. I yog James ni ngada ayuwgad ni gaar: “Cha’ nra maruwaran’ rok e bod ba ley i n’ew u maday nnifeng e be mithmitheg ma be yannag. Be’ ni ara’ rogon e thingari dabi lemnag nra pi’ Somol ban’en ngak, ya dawori mudugil lanyan’ ko tin ni be’ rin’.”​—James 1:6-8; Efesus 4:14; Hebrews 13:9.

⁶ Uw rogon nrayog ni ngada ayuweged rarogodad e Kristiano? Mang e ra ayuwegdad ni ngari tamilang u wan’dad ni ri gad ba taw’ath ni bochan e gad ma liyor ngak e Ani Th’abi Tolang? Mu tay fanam iyan riy ko boch e kanawo’ nra ayuwegdad ni nge tamilang u wan’dad.

Nge Mudugil Rarogom Ni Gur Reb e Kristiano

7. Mang fan nib fel’ ni ngada wenignaged Jehovah ni nge yaliy rarogodad?

⁷ Gubin ngiyal’ ma ga micheg u wan’um ni bay thilmew Jehovah. N’en ni th’abi t’uf ni bay rok be’ ni Kristiano e aram fare thin nib fel’ u thilrow Got. (Psalm 25:14; Proverbs 3:32) Faan gad ra tabab i maruwaran’dad u rarogodad e Kristiano ma aram e ngiyal’ ni ngada fl’eged i lemnag rogon fene fel’ thildad Jehovah nge gelngin e michan’ rodad. I wenig e ani yoloy e Psalm ni gaar: “O Jehovah, mu fl’eg i yaliy fithik’ag, mu skengnageg; ma ga fl’eg rogon e bu’oy rog nge gumerchaeg.” (Psalm 26:2) Mang fan ni baga’ fan ni nge skengnagdad Got? Ya dabiyog rodad ni ngada skengnaged fithik’ i lanin’dad nge fithik’ gumercha’dad. Ke mus ni goo Jehovah nrayog rok ni nge nang fithik’dad​—ni aram lanin’dad nge lem rodad.​—Jeremiah 17:9, 10.

8. (a) Uw rogon nra fel’ rogodad ni faanra skengnagdad Jehovah? (b) Me gur, uw rogon ni kan ayuwegem ni ngam mon’og ni gur reb e Kristiano?

⁸ Nap’an ni gad ra pining Jehovah ni nge yaliy fithik’dad ma gad be ning ni nge skengnagdad. Ma rayog ni nge pag boch ban’en ni nge buch rodad ya ngari m’ug ko mang e bay u fithik’ i lanin’dad ara gumercha’dad. (Hebrews 4:12, 13; James 1:22-25) Ere susun e ngada falfalan’dad ngay ni ke yib e pi skeng nem ngodad ya rayog ni ngada daged fene gel e yul’yul’ rodad ngak Jehovah. Pi skeng nem e ra dag ni gad ba “yal’uw ni aram e ke yan i mus nga rogodad ndakuriy ban’en ndada gamangad riy.” (James 1:2-4) Ma nap’an e pi skeng nem e rayog ni ngada ilalgad nrogon girdien Got.​—Efesus 4:22-24.

9. Thingar da micheged ngodad e machib nriyul’ ni bay ko Bible, fa? Mu weliy.

⁹ Mu micheg nga lanin’um e pi machib nriyul’ nu Bible. Rayog ni nge war e tamilang u wan’dad ni gad e pi tapigpig rok Jehovah ni faanra gathi ri tamilang e pi machib nu Bible u wan’dad. (Filippi 1:9, 10) Gubin e Kristiano​—ni piin nib fel’ yangaren nge piin ni yad ba ilal—​e thingari ra bagayad e nge micheg nga laniyan’ nib puluw e tin nib mich u wan’ ko machib ni bay ko Bible. I yog Paul ngak e piin nib mich u wan’rad ni gaar: “Um sikengnaged urngin ban’en, mi gimed fanay e tin nib fel’ riy.” (1 Thessalonika 5:21) Thingari nang e pi Kristiano nib fel’ yangaren ni dabiyog ni nge fel’ thilrad Got ni bochan e michan’ rok e galabthir rorad. David ni chitamangin Solomon e ke yog ngak ni “ngari mu nang e Got rok e chitamam ma ga pigpig ngak u polo’ i gumerchaem.” (1 Chronicles 28:9) Dabi gaman ni ke mus ni nge yaliy rogon ni ke gelnag e chitamangin e michan’ rok ngak Jehovah. Ya thingari fil morngaagen Jehovah, ma aram e n’en ni rin’. I meybil ngak Got ni be wenig ni gaar: “Mu pi’ e gonop nge tamilangan’ ngog ya nge yog rog ni nggu wan u fithik’ e pi girdi’ ney ma nggu sul.”​—2 Chronicles 1:10.

10. Mang fan ni dariy e kireb riy ni ngada fithed e deer u fithik’ e yul’yul’ nib puluw lanin’dad?

¹⁰ Tamilangan’ e ma yognag e michan’. Be gaar Paul: “Thin rok Got ni yibe machibnag yibe rung’ag e be yognag e michan’ ngak e girdi’.” (Roma 10:17) Mang fan e thin rok Paul? Be yog Paul ni faan gad ra fil e Thin Rok Got ma ra gel e michan’ rodad nge pagan’ rodad ngak Jehovah nge ulung rok nge tin ni ke micheg. Ma faan gad ra fith ban’en u morngaagen e Bible u fithik’ e yul’yul’ ma ra yib e fulweg riy nra gelnag e michan’ rodad. Maku bay e fonow rok Paul u Roma 12:2 ni gaar: “Ngam micheged ngomed e tin nib m’agan’ Got ngay​—ni tin nib fel’ nib fel’ u wan’ Got mab yal’uw.” Uw rogon ni gad ra rin’? Rayog ni ngada rin’ed ni faanra yog ngodad e tamilangan’ ko machib nriyul’. (Titus 1:1) Rayog rok gelngin Jehovah ni nge ayuwegdad ni ngada nanged fan e tin nib mo’maw’ i nang fan. (1 Korinth 2:11, 12) Thingar da yibilayed e ayuw rok Got u nap’an ni bay e magawon rodad ni ngada nanged fan ban’en. (Psalm 119:10, 11, 27) Ba adag Jehovah ni ngada nanged fan e Thin Rok, ma nge mich u wan’dad, ma ngada folgad ngay. Ba adag ni ngada deeriyed ban’en u fithik’ e yul’yul’.

Nge Mudugil U Wan’um Ni Ngam Falan’nag Got

11. (a) Mang e n’en ni gad ba adag nrayog ni nge mang wup ngodad? (b) Uw rogon nrayog ni nge gel lanin’dad ya ngada togopuluw ko towasar ni yib ko girdi’?

¹¹ Mu guy rogon ni ngam falan’nag Got ma gathi girdi’. Reb e kanawo’ ni gad ra nang rarogodad e gad ra nang rarogon e piin ni gad ra un ngorad. Ba t’uf e fager rok urngin e girdi’ ma ra fel’ lanin’dad ni faanra yi ba adag dakendad. Ma nap’an ni kab fel’ yangaren be’​—ma ku arrogon u nap’an ni ke ilal—​ma ba gel e towasar rok e piin ni gad ra chag ngorad ni yad be suruydad ma ku bochan e ri gad ba adag ni ngada folwok ngorad ara gad ba adag ni ngada fel’gad u wan’rad. Machane gathi gubin ngiyal’ ni ba adag e pi tafager rodad ni nge fel’ rogodad. Yu ngiyal’ ma yad ba adag ni nge un be’ ngorad ko kireb. (Proverbs 1:11-19) Ma nap’an nra war reb e Kristiano me un ko kireb ni pi tafager rok e ke towasariy, ma ra guy rogon fare Kristiano ni nge mithag ko ir mini’. (Psalm 26:4) Be gaar apostal Paul: “Dab mu folgad ko ngongol ni yibe rin’ u roy u fayleng.” (Roma 12:2, The Jerusalem Bible) Ra pi’ Jehovah e gel nga lanin’dad ni ngada togopuluwgad ko towasar ni yib ko fayleng.​—Hebrews 13:6.

12. Mang machib nriyul’ nra ayuwegdad ni ngada gelgad ma nge ayuwegdad ni ngada pagedan’dad ngak Got? Ma morngaagen mini’ e ra gelnagdad?

¹² Nap’an nra gel e towasar ni yib ko fayleng ni ngada paged talin ni gad e Kristiano mab fel’ ni nge dab da paged talin ni kab fel’ boch ni ngada yul’yul’gad ngak Got ko bin ni ngada fel’gad u wan’ e girdi’ ara ngada folgad ko tin ni be rin’ e girdi’ ni yoor. Fare thin u Exodus 23:2 e ra ayuwegdad ma be gaar: “Thingar dab mu folgad ko kireb ni be rin’ e girdi’ ni yoor.” De fol Caleb ko girdi’ nu Israel ni yad boor u nap’an ni ke maruwaran’rad ni dar lemnaged ni rayog rok Jehovah ni nge lebguy e tin ni ke micheg. Kari mich u wan’ Caleb ni ra riyul’ e tin ni ke micheg Got ma kari taw’ath ni bochan e michan’ rok. (Numbers 13:30; Joshua 14:6-11) Me gur, kub m’agan’um ngay ni ngam togopuluw ko towasar rok e girdi’ ni yoor ni fan e ngii fel’ thilmew Got, fa?

13. Mang fan nib fel’ ni ngada tamilangnag ni gad e Kristiano?

¹³ Mu tamilangnag ni gur reb e Kristiano. Ba puluw fare thin ni yima yog nib bin nib fel’ e kanawo’ ni ngam matanagiyem e aram e ngam togopuluw. Mab puluw e re thin nem u nap’an ni gad ra tamilangnag ni gad e Kristiano. Nap’an ni yib e togopuluw ngak piyu Israel u nap’an Ezra ni yad be guy rogon ni ngar rin’ed e tin nib m’agan’ Got ngay, i lungurad, “Gamad e pi tapigpig rok fare Got nu tharmiy ngu fayleng.” (Ezra 5:11) Faan manga gad ra tamdag ni bochan e thin nib kireb rok e piin ni yad be togopuluw ma rayog ni ngada talgad ko maruwel rodad ni bochan e re tamdag nem. Faan gad ra guy rogon ni ngada falan’naged urngin e girdi’ ma ra yan i aw ni dariy angin e maruwel rodad. Ere dab mu tamdag. Ffel’ ni ngam tamilangnag ngak yugu boch e girdi’ ni gur reb e Mich Rok Jehovah. Rayog ni ngam weliy ngorad u fithik’ e sumunguy rogon e machib rom, nge tin nib mich u wan’um nge rarogom ni gur reb e Kristiano. Mu tamilangnag ngak yugu boch e girdi’ nib mudugil u wan’um ni ngam fol ko pi motochiyel rok Jehovah u morngaagen e tin nib yalen ban’en. Mu tamilangnag ni dabiyog ni ngan puruy’nag e machib ni Kristiano ya dabiyog ni nge thil. Mu tamilangnag ni dariy e tamra’ ni bochan e ga be fol ko yalen e Kristiano. (Psalm 64:10) Ga ra par ni gab mudugil ni gur reb e Kristiano e ra gelnagem, ma ra matanagiyem ma sana ra n’igin ni nge fith boch e girdi’ u morngaagen Jehovah nge pi girdi’ rok.

14. Nge mulan’dad ni faan yira moningnagdad ara togopuluw ngodad, fa? Mu weliy.

¹⁴ Arrogon, sana ra moning ara togopuluw boch e girdi’. (Jude 18) Machane dabi mulan’um ni faanra dabi motoyil e girdi’ ni ga be weliy e machib ngorad. (Ezekiel 3:7, 8) Yugu de mutrug fene mudugil u wan’um machane dabiyog ni ngam ayuweg e girdi’ ni nge mich u wan’rad ni faanra dubrad ni nge mich u wan’rad. Dab mu pag talin Pharaoh. Dariy reb e riya’ ara maang’ang​—mus ko bin nganni’ i fak ni yim’—​e rayog ni nge n’igin laniyan’ Pharaoh ni nge mich u wan’ ni be weliy Moses e thin rok Jehovah. Ere dab mu tal ko maruwel rom ni bochan e tamdag ngak e girdi’. Ngada pagedan’dad ngak Got ma nge mich Got u wan’dad ya re pagan’ nem e ra ayuwegdad ni nge dab da tamdaggad.​—Proverbs 3:5, 6; 29:25.

Mu Sap Nga Tomur, Mu Maruwel Ni Fan Ko Tin Ni Bay Nga M’on

15, 16. (a) Mang boch e taw’ath ni ke af ngodad rok Got? (b) Uw rogon nrayog ni nge fel’ rogodad ni faan gad ra lemnag e pi taw’ath ni ke af rok Got ngodad nrogon ni yog e Thin Rok Got?

¹⁵ Mu chaariy e tirok Got ban’en ni ke af ngom. Rayog ni nge fel’ rogon e pi Kristiano ni faan yad ra fl’eg i lemnag e tirok Got ban’en ni ke af ngodad, ma Thin Rok Got e ra tamilangnag e pi taw’ath ni ke af ngodad. Boch ban’en ni ke af ngodad e aram e machib nriyul’ ni bay ko Thin Rok Jehovah, nge yafas ni manemus ni gad be athapeg, nge taw’ath ni bay rodad ni gad e piin ni owchen Got ni gad be wereg fare thin nib fel’. Me gur, ga manang ni gab taw’ath ni bochan e gur reb e Mich Rok Got, ni gur girdien fare ulung i girdi’ ni kan duguliyrad ni ngar ayuweged yugu boch e girdi’ ko fare machib u morngaagen Gil’ilungun Got, fa? Mu tay fanam iyan riy ni Jehovah e ir faanem ni ke micheg: “Gimed e pi mich rog.”​—Isaiah 43:10.

¹⁶ Rayog ni ngam fithem: “Uw fene t’uf rog e pi taw’ath ney ni ke af rok Got ngog? Rib t’uf e pi taw’ath nem rog ere kug tay ni ri baga’ fan ni nggu rin’ e tin nib m’agan’ Got ngay, fa? Gu ma tay fan e pi taw’ath ni ke af Got ngog, me ere ke gelnageg ni nggu togopuluw ko pi n’en ni ra waliyeg ya nge dab gu n’ag e pi taw’ath ni ke yog ngog, fa?” Pi n’en ni ke af Got ngog e rayog ni nge ayuwegdad ni ngari gapas lanin’dad ma ke mus nu lan e ulung rok Jehovah e rayog e re gapas laniyan’ nem. (Psalm 91:1, 2) Ga ra fil e pi n’en ni ke buch ko ulung rok Jehovah ko ngiyal’ ney ma ra ayuwegdad ni ngada nanged ni dariy be’ ara dariy ban’en nrayog ni nge thirif e pi girdi’ rok Jehovah u fayleng.​—Isaiah 54:17; Jeremiah 1:19.

17. Maku mang e ba t’uf ni gathi ke mus ni pi taw’ath ni af rok Got ngodad?

¹⁷ Riyul’ ni dabiyog ni ngada ted ni kada thapgad ni bochan e pi taw’ath ni ke af rok Got ngodad. Ya nge bagadad e thingari guy rogon ni ngari fel’ thildad Got. Tomren e maruwel rok Paul nib gel ni ke gelnag e michan’ rok e pi Kristiano nu Filippi, me yol ngorad ni gaar: “Ere pi tafager rog, um moyed ni gubin ngiyal’ ni gimed be fol rog ko ngiyal’ ni ug moy romed, me ere chiney nda kug moy romed e ri ba ga’ fan ni ngam folgad rog. Um ngongolgad ni ba’ madgun Got u wun’med mu um t’ongad ko marus nge mada’ ko ngiyal’ ni kam marod ngak Got.” (Filippi 2:12) Dabiyog ni ngada ted ni nge yog e yafas ni manemus ngodad ni bochan e maruwel rok yugu be’.

18. Uw rogon nra tamilang ni gad e Kristiano ni faan gad ra un ko pi maruwel rok e Kristiano?

¹⁸ Ngari mu un ko pi maruwel rok e Kristiano. Yima yog ni “maruwel e aram e n’en ni ma n’igin rarogon e girdi’.” Kan duguliy e pi Kristiano ko ngiyal’ ney ni ngar uned ko fare maruwel ni baga’ fan ni ngan wereg fare thin nib fel’ u morngaagen Gil’ilungun Got. Be gaar Paul: “N’umngin nap’an ni gu be par ni gag ba apostal ngak e piin ni gathi yad piyu Israel e bay ug par ni gub felan’ ko maruwel ni gu be tay.” (Roma 11:13) Gad ba lingagil u fithik’ e girdi’ nu fayleng ni bochan e maruwel rodad ni gad be machib, ma faan gad ra un ko re maruwel ney ma ra tamilangnag ni gad e Kristiano. Maku rayog ni nge tamilang ni gad e Kristiano ni faan gad ra un ko muulung, ma gad ra un i toy pi tafen e muulung, ara gad be ayuweg e piin nib gafgow ara yugu boch e maruwel rok e Kristiano ni bod e tiney.​—Galatia 6:9, 10; Hebrews 10:23, 24.

Ba Tamilang Ko Gad Mini’, Ma Ba Tamilang E Pi Taw’ath Riy

19, 20. (a) Gur, mang boch e taw’ath ni ke yog ngom ni bochan e gur reb e Kristiano? (b) Gad manang e bin riyul’ i rarogodad ni bochan e mang?

¹⁹ Amu lemnag rogon fene fel’ rogodad ni bochan e gad e tin riyul’ e Kristiano. Gad ba taw’ath ni bochan e manangdad Jehovah. Be gaar Malachi ni profet: “Ma girdi’ ni ba’ madgun Somol u wun’rad e ur welthingad rorad, mi i motoyil Somol ngorad me rung’ag e thin ni yad be yog. Bay ba ke babyor rok ni kan yoloy ngay murung’agen e piin ni bay madgun Somol u wun’rad ma yad be ta’ fan.” (Malachi 3:16) Maku ra tay Got ni gadad e pi tafager rok. (James 2:23) Maku bay fan e yafas rodad ni gad manang e gini be sor e yafas rodad ngay ma bay fan e tin ni gad be nameg. Maku bay e athap rodad ni yafas ni manemus.​—Psalm 37:9.

²⁰ Dab mu pag talin ni bin riyul’ i rarogom e bay ni bochan e Got e ke tay ni baga’ fam, ma gathi bochan rarogom u wan’ yugu boch e girdi’. Yugu boch e girdi’ e ra lemnagem nrogon ni ma lem e girdi’. Machane baga’ fadad ni bochan e gad ba t’uf rok Got ma ke tay ni bay fadad​—baga’ fadad ni bochan e gadad girdien. (Matthew 10:29-31) Ma bochan e ba t’uf Got rodad e gadad manang ko gadad mini’ ma gad manang e gini be sor e yafas rodad ngay. “Machane en nib t’uf Got rok e manang Got faanem.”​—1 Korinth 8:3.

[Footnote]

Ka Ga Manang?

• Mang fan ni baga’ fan ni ngari tamilang u wan’ e pi Kristiano rarogorad ni yad e Kristiano?

• Uw rogon nrayog ni ngada duguliyed ni gad e Kristiano?

• Mang boch ban’en nra ayuwegdad ni ngada turguyed e n’en ni gad ra rin’ u nap’an ni ra maruwaran’dad ko mini’ e ngada falan’naged?

• Uw rogon ni ra fel’ e tin ni bay nga m’on rodad ni faanra tamilang u wan’dad ni gad e Kristiano?

[Pictures on page 19]

Ra tamilang ni gad e Kristiano ni faan gad ra un ko pi maruwel rok e Kristiano